Read Tshiluba Dibadika 27 Bible Online

Dibadika 27 - Tshiluba bible

Dibadika 27

¹Selofade uvua ne bana ba bakaji batanu: Mala, Nowa, Ogla, Milka ne Tirsa. Bana abu bavua ba mu diku dia Menashe, muana wa Yozefe. Menashe kulela Makire. Makire kulela Ngilaade. Ngilaade kulela Efere. Efere kulela Selofade.

²Bakaji abu batanu kuya mu mushiku wa ntenta wa kusambakena. Kulomba Moshe, mutuangaji Elazare, bakulu ne bena Izrayele bonsu ne:

³— Tatuetu ufuile mu tshipela bua bubi buende. Kadi kavua ku tshisumbu tshia Kora ne bantu bende, bavua batombokela Maweja-Nangila to. Kavua mulele muana wa balume to.

⁴Dina diende didi ne bua kujimina mu diku dietu, bua padiye kayi mulele muana wa balume anyi? Nanku utupeshe petu tshietu tshitupa tshia buloba, mushindu umue ne bana babu ne tatu ba balume!

⁵Moshe kuya kuambila Maweja-Nangila bionsu abi.

⁶Awu kumuandamuna ne:

⁷— Bana ba Selofade badi bamba bualu bulelela. Nanku ubape buloba bua bupianyi mushindu umue ne bana babu ne tatuabu ba balume. Ubapeshe buloba buvua tatuabu ne bua kupeta.[130]

⁸Pashishe wambile bena Izrayele bonsu ne: Padi muntu ufua kayi mushiye muana wa balume, bapiane bintu biende kudi muanende wa bakaji.

⁹Pikalaye kayi ne muana wa bakaji, bapiane bintu biende kudi bana babu ba balume.

¹⁰Pikalaye kayi ne bana babu ba balume, bapiane bintu biende kudi ba tatuende mukuabu.

¹¹Pikalaye kayi ne batatuende mukuabu, bapiane bintu biende kudi muntu yonsu wa mu diku diabu. Bena Izrayele bakumbaje bionsu bindi mukuambile ebi.

¹²Maweja-Nangila kuambila Moshe ne: — Banda ku lusongu lua mukuna wa Abarime,[131] ubandile ditunga dindi mpesha bena Izrayele.

¹³Pawabandila ditunga adi, neufue, mufuile mukuluebe Arone, ulonda bankambua bebe.

¹⁴Bualu nuenu nuvua babenge diyi dianyi mu tshipela tshia Tsine, pavua bena Izrayele bantombokela. Mvua mukutume bua kupatula mayi mu lubuebue, pavuabu baalomba, bua bonsu bamone mundi wa tshijila. Kadi nuenu kubenga. Mayi aa ke mayi a Meriba, mmumue ne mayi a matandu, a mu Kadeshe, mu tshipela tshia Tsine.[132]

¹⁵Moshe kuambila Maweja-Nangila ne:

¹⁶— Maweja-Nangila Mvidi Mukulu, wewe ke udi mufuke bintu bionsu ebi, ubipesha muoyi. Nanku usunguile bena Izrayele mfumu mukuabu,

¹⁷udi mua kubalombola miaba yonsu, bua bantu bebe kabikadi bu mikoku idi kayiyi ne muyilami.[133]

¹⁸Maweja-Nangila kuandamuna Moshe ne: — Yoshuwa,[134] muana wa Nune, mmukumbane, bualu udi ne Mueyelu wanyi munda muende. Umubikidishe, umutenteke bianza.

¹⁹Umuleje kudi mutuangaji Elazare, ne kudi bena Izrayele bonsu, bua bajadike ne: yeye ke udi upingana pa muaba webe.

²⁰Nanku, umunyukuile bukole buebe, bua bena Izrayele bonsu bamuitabe.

²¹Kadi Yoshuwa aye kuebeja mutuangaji Elazare bidiye ne bua kuenza. Mutuangaji akuate mudimu ne Urime,[135] bua amanye tshindi musue, amanyishe Yoshuwa. Nanku Yoshuwa ne bena Izrayele bonsu nebakumbaje bionsu bidi mutuangaji Elazare ubambila.

²²Moshe kubikila Yoshuwa, bu muvua Maweja-Nangila mumuambile, kumuimanyika kumpala kua mutuangaji Elazare ne bena Izrayele bonsu.

²³Kutentekaye Yoshuwa bianza, bua ikale mupinganyi wende, bu muvua Maweja-Nangila mumuambile.[136]