Read Tshiluba Dibadika 30 Bible Online

Dibadika 30 - Tshiluba bible

Dibadika 30

¹Moshe[143] kumanyisha bena Izrayele bionsu bivua Maweja-Nangila mumuambile.

²Pashishe Moshe kumanyisha bamfumu ba meku a bena Izrayele mikenji mikuabu ya kudi Maweja-Nangila ya ne:

³“Pikala muntu mulaye bua kulambula Maweja-Nangila mulambu, nansha mutshipe bua kujila tshintu, udi ne bua kukumbaja bimpe bionsu bidiye mulaye abi.[144]

⁴“Kadi pikala nsongakaji utshidi ku nzubu kua tatuende, mulaye Maweja-Nangila bualu, nansha muditshipe,

⁵tatuende mumvue bualu ebu, kayi wamba bualu, nsongakaji ewu udi ne bua kukumbaja bivuaye muambe.

⁶Kadi pikala tatuende mubenge bualu ebu dituku didibu bamumanyishabu, nsongakaji kena ne bua kukumbaja bivuaye muambe. Maweja-Nangila neafuile nsongakaji awu luse, bualu tatuende kavua musue bua abikumbaje to.

⁷“Pikala nsongakaji mumane kulaya, nansha muditshipe, kayi muele meji bimpe, kadi pashishe kumuselabu,

⁸bayende mupuwe diba didibu bamumanyisha bualu ebu, nsongakaji udi ne bua kukumbaja bionsu bivuaye mulaye abi.

⁹Kadi pikala bayende mubenge bionsu abi dituku mene didiye umanya bualu, udi ushipa bivua mukajende mulaye. Maweja-Nangila neafuile mukaji luse, padiye kayi ubikumbaja.

¹⁰“Pikala mukaji mukamba, nansha uvuabu babenga ku dibaka, musue kulaya bualu, udi ne bua kukumbaja bionsu bidiye mulaye abi.

¹¹“Kadi pikala mukaji musela mulaye, nansha muditshipe,

¹²bayende kayi mubenge dituku didiye ubumanya, mukaji udi ne bua kukumbaja bionsu bidiye mulaye.

¹³Kadi pikala bayende mubibenge dituku adi, dilaya dia mukaji awu kadiena ne bualu kabidi to. Maweja-Nangila neamufuile luse, bualu bayende mmushipe dilaya diende adi.

¹⁴Nanku dilaya dionsu didi mukaji musela ulaya, nansha padiye uditshipa bua kujila tshintu, bayende udi mua kujadika, nansha kushipa dilaya diende, nansha mutshipu wende.

¹⁵Kadi dituku didi mulume mumanye bualu, mushale anu mupuwe, kayi wambila mukajende bualu, udi wanyisha bivuaye mulaye.

¹⁶Kadi pikala mulume mubibenge matuku mamane kupita, mukaji kayi ukumbaja bivuaye mulaye, tshilumbu netshikuate amu bayende.

¹⁷“Mikenji eyi ke ivua Maweja-Nangila muambile Moshe, bua mukaji musela, nansha bua nsongakaji utshidi kumbelu kua tatuende, padiye musue kulaya bualu.”