Read Tshiluba Dibadika 33 Bible Online

Dibadika 33 - Tshiluba bible

Dibadika 33

¹Bena Izrayele bamane kupatuka mu Ejipitu, kulondabu Moshe ne Arone, benda bikisha miaba mishilangane.

²Maweja-Nangila uvua muambile Moshe bua kufundaye miaba yonsu ivuabu ne bua kuikisha mu luendu luabu. Miaba ayi idi nunku[153]:

³Mu matuku dikumi ne atanu a ngondu wa kumpala, bena Izrayele bamane kuenza tshibilu tshia Dipita dia Maweja-Nangila musangu wa kumpala, kumukabu mu Ramsese, muvuabu basue,[154] bena Ejipitu babatangile.

⁴Ke bena Ejipitu kushisha kujika bitalu bia bamuanabute babu, bavua Maweja-Nangila mushipe bonsu. Ke muvua Maweja-Nangila muleje bukole buende kudi mvidie ya bena Ejipitu nanku.

⁵Bena Izrayele bumuka mu Ramsese, kuyabu ku Sukote.

⁶Bumuka mu Sukote, kufikabu ku Etame, ku muelelu wa tshipela.

⁷Bumuka mu Etame, kupinganabu ku Pi-Ahirote, mutangilangane ne Baale-Sefone. Kuasabu mitanda yabu kuinshi kua Migdole.

⁸Bumuka mu Pi-Ahirote,[155] kusabukabu mayi manene, kufikabu mu tshipela. Kuendabu matuku asatu mu tshipela atshi tshia Etame, kufikabu ku Mara.

⁹Bumuka mu Mara, kuyabu kuasa ku Elima. Muaba awu uvua mpokolu ya mayi dikumi ne ibidi, ne mabue a ngaji makumi muanda mutekete.

¹⁰Bumuka mu Elima, kuyabu kuasa pabuipi ne Mayi manene makunze.

¹¹Bumuka ku Mayi manene makunze, kuyabu mu tshipela tshia Sine.

¹²Bumuka mu tshipela tshia Sine, kuyabu ku Dofka.

¹³Bumuka ku Dofka, kuyabu ku Alushe.

¹⁴Bumuka mu Alushe, kuyabu ku Refidime, muaba uvuabu kabayi mua kupeta mayi a kunua to.

¹⁵Bumuka mu Refidime, kuyabu mu tshipela tshia Sinayi.

¹⁶Bumuka mu tshipela, kuyabu ku Kibrote-Taawa.

¹⁷Bumuka mu Kibrote-Taawa, kuyabu ku Asherote.

¹⁸Bumuka mu Asherote, kuyabu ku Ritma.

¹⁹Bumuka mu Ritma, kuyabu ku Rimone-Perese.

²⁰Bumuka mu Rimone-Perese, kuyabu ku Libna.

²¹Bumuka mu Libna, kuyabu ku Risha.

²²Bumuka mu Risha, kuyabu ku Kehelata.

²³Bumuka mu Kehelata, kuyabu ku mukuna wa Shefere.

²⁴Bumuka ku mukuna wa Shefere, kuyabu ku Arada.

²⁵Bumuka ku Arada, kuyabu ku Makelote.

²⁶Bumuka ku Makelote, kuyabu ku Tahate.

²⁷Bumuka mu Tahate, kuyabu ku Tera.

²⁸Bumuka mu Tera, kuyabu ku Mitka.

²⁹Bumuka mu Mitka, kuyabu ku Ashemona.

³⁰Bumuka ku Ashemona, kuyabu ku Mosherote.

³¹Bumuka ku Mosherote, kuyabu ku Bene-Yakane.

³²Bumuka ku Bene-Yakane, kuyabu ku Ore-Ngidngade.

³³Bumuka mu Ore-Ngidngade, kuyabu ku Yotbata.

³⁴Bumuka mu Yotbata, kuyabu ku Abrona.

³⁵Bumuka mu Abrona, kuyabu ku Eshiyone-Ngebere.

³⁶Bumuka mu Eshiyone-Ngebere, kuyabu ku Kadeshe mu tshipela tshia Tsine.

³⁷Bumuka mu Kadeshe, kuyabu ku mukuna wa Ore, pabuipi ne mikalu ya bena Edome.

³⁸Mutuangaji Arone kubanda ku mukuna wa Ore, bu muvua Maweja-Nangila muambe. Kufuilayemu dituku dia kumpala dia ngondu muitanu, bena Izrayele bamane kukumbaja bidimu makumi anayi katshia bumuka mu Ejipitu.

³⁹Arone uvua ne bidimu lukamu makumi abidi ne bisatu, pafuilaye ku mukuna wa Ore.[156]

⁴⁰Tshikondu atshi, Arade, mukalenga wa bena Kenaane, uvua musombe mu tshitupa tshia kuinshi tshia ditunga, kumvuaye lumu lua difika dia bena Izrayele.[157]

⁴¹Bena Izrayele bumuka ku mukuna wa Ore, kuyabu ku Salmona.

⁴²Bumuka mu Salmona, kuyabu ku Punone.

⁴³Bumuka mu Punone, kuyabu ku Obote.

⁴⁴Bumuka mu Obote, kuyabu ku Ye-Abarime, ku mikalu ya bena Mowabe.

⁴⁵Bumuka mu Ye-Abarime, kuyabu ku Dibone-Ngade.

⁴⁶Bumuka mu Dibone-Ngade, kuyabu ku Almone-Diblatayime.

⁴⁷Bumuka mu Almone-Diblatayime, kuyabu ku mikuna ya Abarime, ivua mitangilangane ne mukuna wa Nebo.

⁴⁸Bumuka mu mikuna ya Abarime, kuyabu mu mpata ya Mowabe, pabuipi ne musulu wa Yardene, mitangilangane ne Yeriko.

⁴⁹Kuasabu mitanda yabu mu mpata ya Mowabe, pabuipi ne musulu wa Yardene, pankatshi pa Bete-Yeshimote ne Abele-Shitime.

⁵⁰Mu mpata ya Mowabe, pabuipi ne musulu wa Yardene, mitangilangane ne Yeriko, Maweja-Nangila kuambila Moshe

⁵¹bua kumanyisha bena Izrayele ne: — Panuikala bamane kusabuka musulu wa Yardene, bafike mu ditunga dia Kenaane,

⁵²nuipate bena ditunga adi bonsu. Nunyange mpingu yonsu, idi ileja mvidie yabu, nansha bayisonge mu mabue, nansha bayifule ne tshiamu. Nunyangakaje kabidi miaba yabu yonsu idibu batendelela.

⁵³Nukuate ditunga diabu, nusombemu. Ditunga nedishale dienu, bualu ndi mumane kunupeshadi.

⁵⁴Bua nuenu kuabanyangana ditunga edi, nutshinke muaba udibu mua kuasa kudi bisamba bienu ne meku enu. Diku dionsu, nedipete muaba, bilondeshile bungi ba bantu badimu. Bantu banyishe muaba udibu babapesha, bilondeshile munuikala batshinke.[158]

⁵⁵Panudi kanuyi bipate bena ditunga bonsu, badi bashale nebanukengeshe bikole, bu mudi misona itua mu disu, nansha bu mudi dieba ditua mu nyima. Pashishe nebanukengeshe mu ditunga dinudi nuya kusomba.

⁵⁶Diba adi, meme Maweja-Nangila nennukengeshe nuenu bena Izrayele, bu mumvua musue kukengesha bena Kenaane.