Read Tshiluba Dibadika 35 Bible Online

Dibadika 35 - Tshiluba bible

Dibadika 35

¹Maweja-Nangila kuyukila ne Moshe mu mpata ya Mowabe, mitangilangane ne Yeriko, ivua pabuipi ne Yardene. Kumuambilaye ne:

²— Wambile bena Izrayele, basungule mu buloba buabu bimenga, ne miaba ya kudishila bimuna biabu, babipeshe bena Levi.[163]

³Bimenga abi bishale bia bena Levi, bua basemu. Bapete kabidi pabuipi nabi mpata ya kudishila bimuna biabu, ne nyama mikuabu idibu mua kupeta.

⁴Mpata ya kudishila bimuna ayi, ikale bunene bua metre nkama itanu kumukila ku bimana bia bimenga biabu, ku nseke yonsu inayi, luseke ludi diba dipatukila, luseke lua kuinshi kua ditunga, luseke ludi diba dibuelela, ne luseke lua ku mutu kua ditunga. Nanku muaba wabu newikale wa metre tshinunu ku nseke yonsu, tshimenga tshikale pankatshi.

⁶Upeshe bena Levi bimenga bisambombu bia kunyemenabu. Muaba awu, ke udibu mua kunyemena kudi muntu yonsu udi ushipangana mu mpukapuka, kayi mumanye.[164] Usakidile kabidi bimenga bikuabu makumi anayi ne bibidi.

⁷Bimenga abi bionsu bisanga nebikale makumi anayi ne muanda mukulu, kabidi ne mpata idi pabuipi nabi ya kudishila bimuna.

⁸Tshisamba tshionsu, netshipeshe bena Levi bungi bua bimenga, bilondeshile bunene bua buloba buatshi. Pikala bantu ba bungi, nebafile bimenga bia bungi. Pikalabu bakese, nebafile bimenga bikese.

⁹Maweja-Nangila kuambila Moshe

¹⁰bua kumanyisha bena Izrayele ne: — Panuikala bamane kusabuka musulu wa Yardene, bafike mu ditunga dia Kenaane,

¹¹nusungule bimenga bikuabu bidi muntu mua kunyemena, pikalaye mushipangane mu mpukapuka.[165]

¹²Mushipianganyi neanyemene mu tshimenga atshi, bua kabamusombuedi,[166] too ne pamulumbuluishabu kudi bena Izrayele.

¹³Nanku bimenga bia kunyemena nebikale bisambombu:

¹⁴bisatu luseke ludi diba dipatukila lua Yardene, bisatu bikuabu mu ditunga dia Kenaane.

¹⁵Muntu yonsu, muena Izrayele nansha muenyi, udi musombe mu bena Izrayele, udi mushipe muntu mu mpukapuka, udi mua kunyemena mu tshimenga tshimue tshia ku bimenga ebi bisambombu.

¹⁶“Pikalabu bashipe muntu ne tshiamu, nansha ne dibue nansha ne mutshi bidi mua kushipa muntu, mushipianganyi awu mmuena tshibawu. Nebamushipe pende.

¹⁹Nanku muntu udibu bateka bua kumusombuela, papetaye mushipianganyi awu, amushipe pende.

²⁰Pikala mushipianganyi musakile muntu ne muoyi wa lukinu, mumuase tshintu ne muoyi mubi,

²¹nansha mumushipe ku mituutu, mushipianganyi awu mmuena tshibawu. Pamupetabu kudi musombuedianganyi, neamushipe pende.

²²“Kadi pikala muntu musakile mukuabu, mumuase tshintu mu mpukapuka, kayi ne muoyi mubi, mumushipe,

²³nansha pikalaye mumushipe ne dibue mu mpukapuka, kayi musue kumuenzela bibi, kayi ne lukinu,

²⁴bena Izrayele nebakose tshilumbu etshi bimpe, bilondeshile mikenji idi itangila muntu udi ushipangana mu mpukapuka, ne musombuedianganyi wende.

²⁵Bena Izrayele nebasungidile muntu udi mushipangane mu mpukapuka awu. Nebamusokoke mu tshimenga tshia kunyemena, bua musombuedianganyi kamushipi to. “Mushipianganyi awu, neashale mu tshimenga atshi, too ne pafua mutuangaji munene uvuabu bajidile ne manyi a tshijila.

²⁶Kadi pikala mushipianganyi awu mupatuke mu thimenga tshia kunyemena,

²⁷musombuedianganyi mumupete, udi mua kumushipa. Kakuena tshilumbu to.

²⁸Nanku muntu yonsu udi ushipangana mu mpukapuka, asombe anu mu tshimenga tshia kunyemena, too ne pafua mutuangaji munene. Pashishe mutuangaji mumane kufua, neapingane kuabu.

²⁹“Nulame mikenji eyi kashidi, miaba yonsu inudi nusomba.

³⁰“Bua kufundila mushipianganyi tshibawu tshia lufu, anu pikalabu bajadike tshilumbu atshi kudi bantu ba bungi, kadi ki nkudi muntu umue to.[167]

³¹Kanuangatshi makuta bua kubingisha mushipianganyi, muena tshibawu tshia lufu. Udi anu ne bua kufua.

³²Kanuangatshi makuta bua kunyemesha mushipianganyi mu tshimenga tshia kunyemena, kumupingaja pashishe kuabu, mutuangaji munene kayi muanji kufua to!

³³“Kanunyangakaji ditunga dinudi basombe to. Numanye ne: mushipianganyi udi unyanga ditunga. Nanku padibu bashipa muntu mu ditunga, bua kumusha mikiya idi mikuate ditunga, amu bobu bashipe mushipianganyi awu.

³⁴Nudimuke. Kanuena mua kupisha ditunga dinudi nusomba mikiya to, bualu meme muine nensombe munkatshi muenu. Eyowa, meme Maweja-Nangila, ndi nsomba munkatshi muenu.”