Read Tshiluba Dibadika 4 Bible Online

Dibadika 4 - Tshiluba bible

Dibadika 4

¹Maweja-Nangila kuambila Moshe ne Arone ne:

²— Nubadike bena Levi ba bena Kekate ku meku ne ku bisamba biabu.

³Nufunde mena a bantu balume bonsu, badi ne bidimu bituadije ku makumi asatu too ne ku makumi atanu. Badi ne bua kuenza mudimu mu ntenta wa kusambakena.

⁴Badi ne mudimu wa kulama bimpe bintu bia tshijila menemene.

⁵Padi bena Izrayele bamuangala, Arone ne bana bende ba balume nebumushe tshilamba tshidi tshilembeleja kumpala kua muaba wa tshijila, batshibuikila pa mushete wa ndondu.

⁶Nebabuikile kabidi mushete ne tshiseba tshia nyama wa nkonga. Nebateke kabidi pa mutu pa bionsu ebi tshilamba tshifikuluke tshienza ne miosa ya nyama. Pashishe nebabueje milonda ku mushete bua kuwambuilaku.

⁷Nebadije tshilamba tshikuabu tshifikuluke tshienza ne miosa ya nyama pa mesa a mampa a tshijila. Nebatekepu malongu masalama, makopu, malongu mondoke ne tukopu tua kulambuila maluvu. Nebatekepu kabidi mampa a tshijila anudi ne bua kundambuilapu kashidi.[8]

⁸Nebabuikile bionsu ebi ne tshilamba tshikunze tshienza ne miosa ya nyama. Nebateke kabidi pa mutu pa bionsu tshiseba tshia nyama wa nkonga. Pashishe nebabueje milonda ku mesa aku bua kuwambuilaku.

⁹Nebabuikile tshilamba tshifikuluke ku tshitekelu tshia miendu, ku miendu yatshi, ku lukuatu, ku mbabula ne ku tulangi tua mafuta.

¹⁰Pashishe nebabuikile tshiseba tshikole tshia nyama wa nkonga pa bintu bionsu ebi, babiteka pa mabaya a kubiambula nawu.

¹¹Ku tshilambuilu tshia tshiamu tshia mpawungi, nebabuikileku tshilamba tshifikuluke. Nebateke tshiseba tshikole tshia nyama wa nkonga pa mutu pa bionsu. Pashishe nebabueje milonda ku tshilambuilu aku bua kutshiambuilaku.

¹²Nebabuikile tshilamba tshifikuluke pa bintu bionsu bidibu benza nabi mudimu muaba wa tshijila. Nebateke kabidi tshiseba tshikole tshia nyama wa nkonga pa mutu pa bionsu ebi. Nebateke bionsu pa mabaya a kubiambula nawu.

¹³Nebumushe butu bonsu budi mu tshilambuilu bua kuadijamu tshilamba tshikunze.

¹⁴Nebatekemu bintu bionsu bivuabu benza nabi mudimu bua kulambula milambu: mbabula, nsomu wa kuambula nende munyinyi, bikasu ne mabungu a kuela mayi a kumiamina. Nebabuikile tshiseba tshikole tshia nyama wa nkonga ku bionsu ebi. Nebabueje milonda ku tshilambuilu bua kutshiambuilaku.

¹⁵Diba dia luendu, anu Arone ne bana bende ba balume bamane kubuikila bintu bia tshijila, ke bena Kekate kushisha kuambula bintu bia tshijila abi bua kuya nabi. Nanku, bena Kekate kabena ne bua kulenga bintu bia tshijila abi ne bianza to, bualu badi mua kufua. Nanku mudimu wa bena Kekate mu ntenta wa kusambakena ngwa kuambula bintu bia tshijila.

¹⁶Kadi, Elazare, muana wa balume wa mutuangaji Arone, neikale ne mudimu wa kulama nzubu wa tshijila ne bintu bionsu bia tshijila bidimu. Yeye kabidi ke udi utangila mafuta a kuela mu miendu, musenga wa kamonya wa kuosha, bintu bia mu madimi bidibu bandambula matuku onsu, kabidi ne mafuta a tshijila.

¹⁷Maweja-Nangila kuambila kabidi Moshe ne Arone ne:

¹⁸— Nulame bena Kekate bimpe bua bashale ne muoyi munkatshi mua bena Levi bakuabu.

¹⁹Nanku, wewe Arone ne bana bebe ba balume, nufile muntu yonsu wa bena Kekate muaba udiye ne bua kuenza mudimu. Numuleje tshidiye ne bua kuenza, kabidi ne tshintu tshidiye mua kuambula. Bualu bobu balenga tshintu tshia tshijila menemene, nebafue.

²⁰Nanku bena Kekate kabamonyi tshintu tshia tshijila nansha katupa ka diba to. Bobu batshimone nanku, nebafue.

²¹Maweja-Nangila kuambila Moshe ne:

²²“Ubadike kabidi bena Levi ba bena Ngershone ku meku ne ku bisamba.

²³Ufunde mena a bantu balume bonsu badi ne bidimu bituadije ku makumi asatu too ne ku makumi atanu. Nebenze mudimu mu ntenta wa kusambakena.

²⁴Nanku bena Ngershone nebenze midimu eyi:

²⁵kuambula tshilamba tshia kubuikila nzubu wa tshijila, biseba bia mikoku ya bimpanga ne bia nyama wa nkonga bia kubuikila pa mutu pa bionsu, tshilamba tshia mu mushiku wa ntenta.

²⁶Badi bambula kabidi ne bilamba bia ku lupangu, ne tshilamba tshia mu mushiku wa lupangu. Ke bilamba bidi bileja mikalu ya lupangu ludi lunyungulula muaba wa tshijila ne tshilambuilu. Nebambule kabidi mionji ya ku lupangu ne biamu bikuabu bionsu bia kuenzabu nabi mudimu ku lupangu.[9]

²⁷Nanku Arone ne bana bende balombole bena Ngershone ku midimu eyi. Nebabaleje midimu idibu mua kuenza ne bintu bidibu mua kuambula.

²⁸Ke midimu idi bena Ngershone ne bua kuenza mu ntenta wa kusambakena. Itamare, muana wa mutuangaji Arone, neikale ubalombola.”

²⁹Maweja-Nangila kuambila Moshe ne: “Ubadike kabidi bena Levi ba bena Merari ku meku ne ku bisamba biabu.

³⁰Ufunde mena a bantu balume bonsu badi ne bidimu bituadije ku makumi asatu too ne ku makumi atanu. Badi ne bua kuenza mudimu mu ntenta wa kusambakena.

³¹Bena Merari nebenze midimu eyi: kuambula mabaya onsu a nzubu wa tshijila, makunji ne bitaku biawu;

³²kuambula makunji a ku lupangu ne bitaku biawu, milonda ne mionji ne bintu bionsu bidibu nabi mudimu. Batuangaji nebaleje muntu yonsu tshintu tshidiye mua kuambula.

³³Ke midimu idi bena Merari ne bua kuenza mu ntenta wa kusambakena. Itamare, muana wa mutuangaji Arone, neikale ubalombola.”

³⁴Nanku, Moshe ne Arone ne balombodi ba bena Izrayele, kubadika bantu ba bisamba bisatu bia bena Levi: tshisamba tshia Ngershone, tshia Kekate ne tshia Merari, bilondeshile meku abu ne bisamba biabu. Kufundabu mena a bantu balume bonsu bavua ne bidimu bituadije ku makumi asatu too ne ku makumi atanu, bavua ne bua kuenza midimu mishilangane ya mu ntenta wa kusambakena. Bantu bonsu bavuabu babadike, bu muvua Maweja-Nangila muambile Moshe, bavua bungi nunku: bena Kekate bavua 2.750; bena Ngershone bavua 2.630; bena Merari bavua 3.200; bena Levi bonsu bavua 8.580.

⁴⁹Dibadika dia bantu edi, divua dienzeka bu muvua Maweja-Nangila muambile Moshe. Nanku, kulejabu muena Levi yonsu mudimu uvuaye ne bua kuenza ne tshintu tshivuaye mua kuambula, amu bu muvua Maweja-Nangila muambe.