Read Tshiluba Dibadika 5 Bible Online

Dibadika 5 - Tshiluba bible

Dibadika 5

¹Maweja-Nangila kuambila Moshe bua kumanyisha bena Izrayele ne:

²— Bantu bonsu badi ne masama a nsudi, masama a tufina tupatuka mu mubidi, nansha bavua balenga bitalu, nubumushe mu mitanda yenu, bualu badi ne mikiya.

³Nuipate[10] bantu aba bonsu, balume ne bakaji, bua kabatampakaji mikiya mu mitanda yenu. Bualu meme Maweja-Nangila ndi munkatshi muabu.

⁴Nanku bena Izrayele kumusha bantu bonsu abu mu mitanda yabu. Kukumbajabu bivua Maweja-Nangila muambile Moshe.

⁵Maweja-Nangila kuambila Moshe

⁶bua amanyishe bena Izrayele ne: — Muntu yonsu, mulume nansha mukaji, udi wenzela mukuende bibi, neikale ne tshilumbu tshinene kudi Maweja-Nangila.

⁷Udi ne bua kutonda bubi buende, kupingaja tshintu atshi kudi muenatshi, kusakidila kabidi tshia bitanu tshimue tshia mushinga wa tshintu atshi.

⁸Pikala mukuende, uvuaye ne bua kupingajila tshintu tshiende, mumane kufua, kakuyi muena diku mukuabu udibu mua ku-pesha bintu abi, nebabipingajile Maweja-Nangila. Mmumue ne: nebabipeshe mutuangaji. Muena tshibawu awu neasakidile kabidi pa bintu abi, mukoku wa tshimpanga, bua mutuangaji amukobolole, amulombele luse kudi Maweja-Nangila.[11]

⁹Bintu bionsu bidibu bumusha ku mulambu wa tshijila udi bena Izrayele balambula, bidi bintu bia mutuangaji.

¹⁰Tshintu tshionsu tshidi muntu ulambula Maweja-Nangila, nebatshipeshe mutuangaji. Nanku tshidi muntu upesha mutuangaji, mutuangaji udi mua kutshilama.[12]

¹¹Maweja-Nangila kuambila Moshe

¹²bua amanyishe bena Izrayele ne: — Tuambe ne: Mukaji wa bende mmuende tshiendenda.

¹³Mmudinyange, musombe ne mulume mukuabu mu musokoku. Kadi bayende kena mumujikidile ne mulume. Kena nansha ne muntu udi mua kumujadikila bualu, nansha udi mubumone.

¹⁴Padi mulume ubanda mukajende, nansha yeye mudinyange bushuwa, nansha kayi muende,

¹⁵neafikishe mukajende kudi mutuangaji. Neafile kabidi mulambu wa kilo isatu ya bukula bua orje. Kadi kena mua kuelamu mafuta nansha kutekamu musenga wa kamonya to, bualu mmulambu wa bualu budibu babanda nabu mukaji, kabayi bajadike.

¹⁶Mutuangaji awu neabuele ne mukaji awu muaba wa tshijila bua kumuteka kumpala kua Maweja-Nangila.

¹⁷Mutuangaji neangate mayi a tshijila mu dibungu.[13] Neasambakaje ne buloba buboya panshi muaba wa tshijila.

¹⁸Mutuangaji neumushe tshitambala tshia ku mutu wa mukaji awu, neamupeshe mu bianza mulambu wa bualu buvuabu ba-mubande nabu, kabayi bajadike. Mutuangaji neambule mayi a bululu awu,[14] a kutshipa nawu muntu.

¹⁹Mutuangaji neatshipishe mukaji, umuambila ne: ‘Pikala mulume mukuabu kayi mukubuelele mu nzubu, wewe kuyi mudinyange, kuyi mudinge bayebe, mayi audi unua aa kakukuenzela bualu to.

²⁰Kadi pikala mulume mukuabu mukubuelele mu nzubu, wewe mudinyange, mudinge bayebe,

²¹Maweja-Nangila akunyoke, ushale nkumba, upeta difu dia munana, bua ushale tshilejilu kudi bantu bonsu, bua batshipangane, batela dina diebe.

²²Diba adi mayi aa a kutshipa nawu muntu, akutue munda, akuwuje difu, ushale nkumba.’ Mukaji awu neandamune ne: ‘Amene! Bienzeke nanku!’

²³“Pashishe mutuangaji neafunde meyi a mitshipu aa mu mukanda, atue mukanda awu mu mayi a bululu aa, bua miaku ayi ishale mu mayi aa.

²⁴Bangabanga ne kunuisha mukaji mayi a bululu awu, bua amutue munda,

²⁵mutuangaji neangate mulambu wa bualu budibu babanda nabu mukaji, udi mukaji awu nawu mu bianza biende, neawele mulu, aunyukule kumpala kua Maweja-Nangila. Pashishe neaye nawu ku tshilambuilu.

²⁶Nanku mutuangaji ambule dianza dia bukula bua tshivulukilu,[15] aboshe pa tshilambuilu. Pashishe neanuishe mukaji awu mayi a bululu awu.

²⁷Mukaji munue mayi, bidi ne bua kuenzeka mbiobi ebi: yeye mudinyange bushuwa, mudinge bayende, nanku mayi a bululu neamutue munda, amuwuje difu, ashale nkumba. Nanku neikale tshilejilu tshidi bantu batshipangane natshi, batela dina diende.

²⁸Kadi pikalaye kayi mumanye bualu, kayi mudinyange, mayi a bululu aa kaena amuenzela bualu to. Nealele bana.

²⁹“Mukenji ewu udi bua mukaji yonsu udibu babanda bua tshiendenda, nansha yeye muenze bualu bubi, mudinyange, mudinge bayende,

³⁰nansha yeye kayi muenze bualu, bamubanda patupu. Bayende neamuimanyike kumpala kua Maweja-Nangila bua mutuangaji amuenzele malu aa onsu.

³¹Nanku, bayende kena ne bualu to. Amu mukaji neapete dinyoka, pikalaye muenze bibi.”