Read Tshiluba Dibadika 6 Bible Online

Dibadika 6 - Tshiluba bible

Dibadika 6

¹Maweja-Nangila kutuma Moshe,

²bua amanyishe bena Izrayele ne: — Pikala mulume nansha mukaji ulaya bua kudijidila bu muena nazire,[16] bua kungenzela meme Maweja-Nangila mudimu,

³muntu awu kena mua kunua mvinyo nansha maluvu makole[17] to. Kena mua kunua maluvu a buanji, kena mua kunua mayi a tumuma tua mvinyo, kena mua kudia tumuma tua mvinyo tubishi, nansha tume.

⁴Matuku atshidiye mudijidile awu, kena mua kudia tshintu tshipika ne tumuma tua mvinyo, nansha ntete yatu nansha bikamfu biatu.[18]

⁵Kabidi kena mua kubeya nsuki ne miedi, too ne pakumbana matuku onsu avuaye mulaye bua kudijidila. Neikale wa tshijila, nsuki ne miedi bilepa[19] naka!

⁶Matuku onsu adiye mudijidile, kena mua kusemena pabuipi ne tshitalu,

⁷nansha tshia tatuende, tshia mamuende, tshia muanabu wa balume nansha wa bakaji, bualu udi mua kupeta mikiya. Nsuki yende idi ijadika mudiye mudifile bua kuenzela Maweja-Nangila mudimu.

⁸“Matuku onsu awu, muntu awu ikale anu mudijidile mu dina dia Maweja-Nangila.

⁹Pikala muntu mufue lufu lua tshikosu pabuipi nende, matuku ende a tshijila mmanyanguke, bualu udi ne mikiya bua tshitalu atshi. Papita matuku muanda mutekete kena kabidi ne mikiya to. Diba adi neakungule nsuki.

¹⁰Dituku dia muanda mukulu neaye ne tumandankutshi tubidi nansha ne nkudimba ibidi kudi mutuangaji, mu mushiku wa ntenta wa kusambakena.

¹¹Mutuangaji nealambule nyunyi umue bua mulambu wa kudikobolola nawu, nyunyi mukuabu bua mulambu wa kuosha. Neakobolole muntu awu bua kumusha mikiya, bualu uvua musemene pabuipi ne tshitalu. Dituku adi, mutuangaji neamuambile ne: udi mua kudijidila tshiakabidi.

¹²Muntu awu, neatuadije kabidi kudijidila. Nealambule muana wa mukoku wa tshidimu tshimue bua mulambu wa kudikobolola nawu. Matuku onsu avuaye mumane kudijidila awu, kabena baabale kabidi to, bualu mmamane kunyanguka.

¹³“Ke mikenji idi itangila muena nazire. Muntu yonsu udi mumane kukumbaja matuku avuaye mudijidile, nebaye nende mu mushiku wa ntenta wa kusambakena.

¹⁴Afile bimuna bisatu, kabiyi ne tshilema pambidi, bua kubilambula Maweja-Nangila: muana wa mukoku wa tshidimu tshimue bua mulambu wa kuosha, lukungulu lua mukoku lua tshidimu tshimue bua mulambu wa kudikobolola nawu, ne mukoku wa tshimpanga wa mulambu wa bobumue.

¹⁵Afile kabidi mikata, kayiyi miela buanga bua mampa, kadi milamba mu mafuta, tshisaka tente. Ikale kabidi ne tuampa tukese katuyi tuela buanga, tulaba mafuta, kabidi ne bukula ne mvinyo, bia kulambula musangu umue ne milanbu mikuabu.

¹⁶Nanku, mutuangaji neafile milambu yonsu eyi kudi Maweja-Nangila. Pashishe, udi ulambula mulambu wa kuosha ne wa kumukobolola nawu.

¹⁷Nealambule kabidi ne mukoku wa tshimpanga bua mulambu wa bobumue, pamue ne tshisaka tshia mikata kayiyi miela buanga bua mampa. Pashishe nealambule bukula ne mvinyo.

¹⁸Diba mene adi, muena nazire neakunguile nsuki mu mushiku wa ntenta wa kusambakena. Nsuki yende ayi, neayele mu kapia, muaba udibu bosha mulambu wa bobumue.

¹⁹Muntu awu mumane kukungula nsuki, mutuangaji neamupeshe diboku dia mukoku wa tshimpanga dimane kulamba, kabidi ne mukata mulamba kabayi bela buanga wa mu tshisaka, kabidi ne kampa. Pashishe neabiteke bionsu mu bianza bia muntu awu.

²⁰Pashishe mutuangaji neele bintu abi mulu, neabinyukule bua kubilambula Maweja-Nangila. Nanku bintu abi nebishale bia mutuangaji. Neangate kabidi tshiadi ne tshibelu bia nyama bu mudi tshibidilu. Pashishe muntu awu udi mua kutuadija kunua maluvu.

²¹“Ke mikenji idi itangila muena nazire. Ke bintu bidiye ne bua kulambula Maweja-Nangila. Pikalaye mua kusakidila milambu mikuabu udi mua kuenza. Kadi alambule nangananga bivuaye mumane kulaya bua kudijidila bu muena nazire.[20]”

²²Maweja-Nangila kuambila Moshe ne:

²³— Umanyishe Arone ne bana bende meyi adibu mua kuamba bua kuela bena Izrayele lupemba. Nebambe ne:

²⁴“Maweja-Nangila anuele lupemba, anulame.

²⁵Maweja-Nangila anuleje mpala wa mimuemue, anufuile luse.

²⁶Maweja-Nangila anuakidile bimpe, anupe bupole!”

²⁷Padi batuangaji batela dina dianyi nanku, bua kuela bena Izrayele lupemba, meme nkayanyi nembele lupemba.