Read Tshiluba Mika 5 Bible Online

Mika 5 - Tshiluba bible

Mika 5

¹Maweja-Nangila udi wamba ne: “Wewe Betleyeme wa mu Efrata, ku misoku yonsu ya bena meku a Yuda, udi musoku udi ne bantu bakese. Kadi nempatule muntu wa munda muebe, bua alombole mu dina dianyi, tshisamba tshia bena Izrayele.[17] Muntu awu uvuaku ku kale ne kalele.”

²Maweja-Nangila nealekele bantu bende mu bianza bia baluishi babu, too ne ku tshikondu tshidi mukaji udi kulu ulela muana wa balume. Diba adi bantu badi bashala ne muoyi mu bupika, nebapingane mu ditunga diabu, bua kudisangisha ne bena Izrayele bakuabu.

³Yeye ke mfumu uvuabu babalaye. Nealombole bantu bende ne muoyi mukole. Nealeje bukole buende, ne butumbi bua Maweja-Nangila, Mvidi Mukulu wende. Bantu ba tshisamba tshiende nebasombe mu ditalala, bualu nebitabe bumfumu buende too ne ku nshikidilu kua buloba.

⁴Yeye neafile ditalala. — Pikala bena Ashure bafika bua kukuata ditunga dietu, babuela mu nzubu ya bakalenga betu, netubatumine bamfumu tshisumbu tshinene bua kubaluisha.

⁵Nebadie bumfumu mu buloba bua bena Ashure. Nebakuate ditunga dia Nemrode,[18] ne bia mvita ku bianza. Mukalenga wetu neatusungidile kudi bena Ashure, padibu basambuka mikalu, babuela mu ditunga dietu.

⁶— Bena Izrayele badi bashala ne muoyi munkatshi mua bisamba bia bungi, nebikale bu lumuma ludi Maweja-Nangila ulokesha, bu mvula ulokela pa bisosa. Kabena balomba bantu tshintu, badi batekemena amu Maweja-Nangila.

⁷— Bena Izrayele badi bashala ne muoyi munkatshi mua bisamba bia bungi, nebikale ne bukole bu bua nyama wa ntambue munkatshi mua nyama ya muitu, nansha munkatshi mua tshisumbu tshia mikoku. Muaba onsu udiye upita, udi uyikuata, uyisunsula, kakuyi muntu umunyengayi.

⁸“Eyowa, luisha baluishi bebe, ubashipe, ubasunsule![19]

⁹Maweja-Nangila udi wamba ne: “Dituku didi kumpala, nembutule tubalu tuenu,[20] nenjimije matempu enu a mvita.

¹⁰Nennyange bimenga bia mu ditunga dienu, nengupule nzubu yenu yonsu idibu bakolesha ne bimana.

¹¹Nengumbushe malu anudi nuenza a majimbu, kanuakuikala kabidi ne muntu udi ukeba kunujinguluila malu adi kumpala, pa ngendu ya mitotu ne bia mulu muamua.

¹²Nengupule mvidie yenu panshi, ne bibumba bia mabue binudi bibake. Kanuakutendelela kabidi bintu binudi badienzela nkayenu.

¹³Nentule makunji enu a kutendelela nawu mvidie.[21] Nembutule bimenga bienu.

¹⁴Nemfike munda, nensombuele bisamba bia bantu, bivua kabiyi bintumikila.”