Read Tshiluba Mika 6 Bible Online

Mika 6 - Tshiluba bible

Mika 6

¹Telejayi bidi Maweja-Nangila wamba ne: Uye kuela lubila lukole, mikuna minene ne mikese miumvue, bua kuleja mundi mbinga, bantu banyi bapila.

²Nuenu mikuna minene, telejayi, nuenu bitaku bidi kabiyi binyunga, bidi buloba bueyemena. Maweja-Nangila udi ufunda bantu bende ku tshilumbu. Udi musue bua baleje patoke bivuabu benza.

³Udi wamba ne: “Nuenu bantu banyi, mbubi kaayi bundi munuenzele? Ndi munutonde ku thinyi? Nungambile!

⁴Nudi nuntompuela, bualu mvua munupatule mu Ejipitu, munupikule mu bupika, munutumine Moshe, Arone ne Miriyame[22] bua kunulombola anyi?

⁵Bantu banyi, nuvuluke mianda ya kale! Balake, mukalenga wa bena Mowabe, uvua muele meji a kunuenzela bibi. Nuvuluke bivuabu bamuandamune kudi Balaame, muana wa Beyore. Pashishe mvua muende nenu, biangatshile ku Shitime too ne ku Ngilgale.[23] Nanku nuvua bamone malu mimpe, andi meme Maweja-Nangila munuenzele.”

⁶“Tufike ne mulambu kaayi, patudi tuya kutendelela Maweja-Nangila, Mvidi Mukulu Muena Kulu? Tufike ne milambu ya kuosha, ya bana ba ngombe ba tshidimu tshimue anyi?

⁷Maweja-Nangila udi ujinga bimpanga bungi kabuyi kubala, nansha mafuta adi apueka, bungi bu misulu idi kayiyi ikama anyi? Tumulambule bana bute betu, bua atujimijile mibi yetu, ne malu mabi atuvua bamuenzele anyi?”

⁸Mbanulongeshe binudi ne bua kuenza, bidi Maweja-Nangila ujinga kudi bantu: udi unulomba bua nunemeke bantu ne bintu biabu, nuenzele bakuabu bimpe, nubanange, nuende bimpe mu njila[24] udi Mvidi Mukulu wenu unuleja.

⁹Telejayi bidi Maweja-Nangila wambila badi basomba mu tshimenga: Badi bangata mibelu yende ne mushinga, neabasungidile. “Nuenu bena tshisamba tshia Yuda, nuenu bonsu badi badisangisha mu tshimenga,[25] telejayi!

¹⁰Ndi mua kutangila ne mesu patupu bantu babi, badi buwuja nzubu yabu, ne bintu bivuabu bapete ku dishima, ne ku bipimu bia buivi, bisendame, — ke bindi mbenga — anyi?

¹¹Ndi mua kuhingisha, bantu badi ne bipimu bisendame, ne badi bela bujitu bua dishima, mu bibombu biabu anyi?

¹²Babanji badi mu tshimenga etshi, badi bakengesha bantu bakuabu. Bonsu badi basomba mu tshimenga etshi, badi bashima, badingangana.

¹³Nenku, ndi mubange kununyoka,[26] nennubutule, bua malu mabi enu.

¹⁴Nenudie, kanuyi nuukuta. Tshiyole netshikale munkatshi muenu! Tshintu tshinuateka mu diyeba, netshinyanguke. Tshintu tshionsu tshinudi nukeba kubumba, nentshibutule mu mvita.

¹⁵Nenukune maminu, kanuyi nunowa. Nenukame bimuma bia olive, kanuyi mua kudilaba mafuta pambidi. Nenukame bimuma bia mvinyo, kadi kanuakunua maluvu.

¹⁶Nenuidikije malu mabi onsu, avua mukalenga Omri wenza ne bena diku dia Akabe,[27] muanende wa balume. Nudi nulonda bilele biabu! Ke pandi mbutula tshimenga tshienu. Nuenu badi basombamu, bantu nebanuseke. Bundu budi bukuata bantu banyi bonsu, nebunukuate kabidi.”