Read Tshiluba Mika 7 Bible Online

Mika 7 - Tshiluba bible

Mika 7

¹Eyi! Ndi muena diakabi! Ndi bu muntu udi uya kupola bimuma, ku mitshi idibu bamane kupola, bajikija, bu muntu udi uya kukeba tumuma tua mvinyo, bena mudimu bamane kutupola tuonsu. Tshiena musangane nansha kamuma, ku mionji ya mvinyo, nansha ku mutshi wa mfiku. Eku nzala ya kudia tumuma, mvua nayi mipite!

²Mu ditunga kamutshiena muntu, udi witaba Mvidi Mukulu, kamutshiena muntu wa nsongu. Bonsu badi bakeba amu kushipangana, baalaminangana mu njila.

³Badi bamanye bimpe, mudibu mua kuenza malu mabi. Bamfumu ne bakoshi ba nsambu, badi balomba mabuejila. Bantu banene badi bamba majinga abu patoke, bashima bantu bua kuakumbaja.[28]

⁴Bu mu mionji ya mpesa tshisumbu, kamuena bualu buimpe nansha bumue munkatshi muabu. Nansha muntu wa kudibu udi ubenga malu mabi, udi mubi mupite lupangu lua mingonga. Kadi dituku dia kununyoka, divua bambi benu banubela nadi, dikadi disemena pabuipi. Bowa mbumane kunukuata.

⁵Kanuitabi bena mutumba benu, kanutekemenyi balunda benu. Nudimuke panudi nuakula, nansha ku mesu kua mukajenu, udi ununanga.

⁶Bualu muana wa balume udi upenda tatuende. Nsongakaji udi uluisha mamuende. Mukaji wa muana udi utombokela mamuenende. Bena diku dia muntu ke baluishi bende.[29]

⁷Kadi meme ndi ntangila kudi Maweja-Nangila. Bu mundi ntekemena Mvidi Mukulu, neansungidile. Mvidi Mukulu wanyi neumvue dilomba dianyi.

⁸Nuenu baluishi betu,[30] kanutuseki mu dikenga dietu. Nansha tuetu badishinde panshi, netujuke kulu! Nansha tuetu mu midima, Maweja-Nangila udi butoke buetu.

⁹Maweja-Nangila mmutunyoke ne tshiiji, bualu tuvua bamuenzele bibi. Kadi diba nedifike didiye utulumbuluisha, utubingisha. Yeye neatupingaje mu butoke, neatuenzele malu mimpe mavule.

¹⁰Pamona baluishi betu malu aa, bundu nebubakuate. Bualu bavua batukonka ne: “Maweja-Nangila Mvidi Mukulu wenu, tshidiye wenza ntshinyi?” Nebabadiate mu makasa, bu bitotshi bia mu njila, tuetu netubandile malu aa!

¹¹Dituku didibu bibakulula bimana bia tshimenga tshienu tshikulu nedifike. Dituku adi nebasemeje kule mikalu ya buloba buenu.

¹²Pashishe, bana benu, nebapingane mu ditunga dienu, bafumina ku bena Ashure ne ku Ejipitu, ku mielelu ya Nile ne Perate, ku mielelu ya mayi manene, ne ku matunga a mikuna.

¹³Kadi buloba bukuabu nebushale tshipela, bua malu mabi a badi basombapu.

¹⁴Maweja-Nangila, lombola bantu bebe ne dikombu diebe dia bulami. Badi basomba pa nkayabu, mu buloba budibu kabayi mua kudima, munkatshi mua madimi mimpe adi ku mpenga. Bu muuvua muenze kale, utufikishe mu mpata mimpe ya Bashane, ne mu ditunga dia Ngilaade.[31]

¹⁵Utuenzele malu a kukema,[32] bu tshikondu tshiuvua mutupatule mu Ejipitu.

¹⁶Bisamba bia bantu nebimone bishima ebi. Bundu nebubakuate, nansha bobu bikale ne bukole. Nebakeme, nebapuwe, kabayi bumvue.

¹⁷Nebadie lupuishi, bu mudi nyoka ne bilandadi bionsu. Nebipatuke mu mena abi, nebiye ne luzakalu kumpala kua Maweja-Nangila, Mvidi Mukulu wetu. Nebatshine bukole buende.

¹⁸Kakuena mvidie nansha umue, udi mukufuane wewe Maweja-Nangila. Udi ufuila bantu bebe badi bashala ne muoyi luse, kuyi musue kuvuluka kashidi bilema biabu. Kuena ulama tshiji matuku onsu. Disanka diebe didi amu dia kutunanga, kutuenzela bimpe.

¹⁹Neutufuile kabidi luse, kuyi uvuluka malu etu mabi. Bubi buetu neubuimanshe muinshi mua mayi manene.

²⁰Neuleje ndelanganyi ya Abrahame ne ya Yakobe, dinanga diebe didi kadiyi dijika, bu muuvua mulaye bankambua betu ku kale.