Read Tshiluba Abakuke 2 Bible Online

Abakuke 2 - Tshiluba bible

Abakuke 2

¹Meme ndi mutentekedi wa mu tshimenga, ndi mubande kulu pa tshimana tshia tshimenga, ngindila. Ndi musue kumvua tshidi Mvidi Mukulu mua kungambila, mudiye mua kuandamuna ku dimudiwula dianyi.[8]

²Maweja-Nangila kungandamuna nanku: Funda bindi nkumanyisha, ubifunde bimpe pa mabaya, bua bonsu babibale, kakuyi lutatu.

³Bindi nkuleja, kabiena bienzeka mpindiewu. Kadi nebikumbane pa tshikondu tshiabi.[9] Nansha kabiyi bienzeka lukasa, indila ne lutulu, mutekemene. Bindi nkumanyisha nebienzeke, kamuyi mpata, kabiyi nansha binenga.

⁴Funda nanku: bena buenzayi nebafue. Kadi bantu badi benzela bakuabu bimpe, nebapete muoyi, bualu badi bitaba Maweja-Nangila.[10]

⁵Bushuwa, bubanji budi bufikisha bantu ku diakabi.[11] Badi baditambisha kabena ne dikisha. Badi mukana buashi, bu dijimba dia bafue kadiyi diwula. Badi bu mudi lufu, ludi lubutula amu kubutula bantu. Ke mudi bena Babilone bakuata amu kukuata matunga, bua bantu bashale bapika babu kashidi.

⁶Kadi bantu badibu batshimune, nebabele nsenda, babatshipa, bamba[12] ne: Nudi bena diakabi! Nudi nudiangatshila bintu bia bende, nutangila bantu bu badi ne bua kunufuta mabanza. Kadi nenuenze nanku too ne ku diba kaayi?

⁷Bena mabanza nebanujikidile, kanuyi bamanye. Banuvua banyenge bintu, nebanunyenge bienu. Nenupampakane, nuzakala ne bowa.

⁸Nuvua bibe bintu mu matunga mavule. Nanku bisamba bikuabu bionsu bia pa buloba nebibe bienu. Nebanunyoke, bualu nuvua bele mashi a bantu panshi, nuvua banyangakaje bimenga ne matunga.

⁹Nudi bena diakabi! Nudi banemeshe bena meku enu ne bintu bipeta ku buivi. Nansha nuenu base nzubu yenu kulu ku katongobela, dikenga nedinukuate.

¹⁰Tshinyangu tshienu katshiena ne tshipeta; netshifuishe bena meku enu amu bundu. Panudi babutule bisamba bivule bia bantu, nudi badibutule anu nuenu nkayenu.

¹¹Nansha mabue ne mabaya bidibu bibake nabi nzubu yenu, nebiele mbila, binutuisha.

¹²Nudi bena diakabi! Bua kuasa bimenga, nuvua bele mashi a bantu panshi. Tshitaku tshiabi, ke makenga anuvua bakengeshe nawu bantu.

¹³Bantu banuvua bakuate mu bupika, bavua baditatshisha patupu.[13] Bipeta bionsu nebibutuke mu kapia. Maweja-Nangila wa bukole buonsu, ke udi ukumbaja bionsu abi.

¹⁴Tshikondu netshifike tshidi bantu mu buloba bujima, bamanye amu kumanya munda muabu muonsu, butumbi bua Maweja-Nangila,[14] amu mudi mayi muwule mu mayi manene tente.

¹⁵Nudi bena diakabi! Nudi belele bena mutumba, maluvu mela lulengu, bua bakuatshike, bavule bilamba. Ke nuenu kutangila mubidi wabu, kubafuisha bundu.

¹⁶Kadi kanuakupeta lumu ku malu a mushindu ewu. Nenuikale penu ne bundu: Nenunue, nukuatshika, nuleja butaka. Maweja-Nangila neanunuishe maluvu, mu dikopu dia tshiji tshiende[15]: lumu luenu neluandamuke bundu bupite.

¹⁷Nebanutape, munuvua penu batape mitshi ya mu metu a mu Lebanone. Nuvua bashipe nyama ya mu metu awu. Nanku nyama neyinukuatshishe bowa. Bionsu abi nebinuenzekele, bua mashi a bantu anuvua bele panshi, bua tshinyangu tshinuvua banyange bimenga ne matunga abu natshi.

¹⁸Mpingu inudi badienzele bua kutendelela nwidie, neyinuambuluishe ku tshinyi? Idi amu bintu binudi nusonga, nansha nufula, kabiyi biakula, bidinga bantu. Mudibi mua kunuambuluisha mbishi?

¹⁹Nudi bena diakabi! Nudi nuambila mutshi ne: “Juka” nansha dibue ne: “Tabala!” Kadi, nansha biobi bilamika biamu bia mushinga mukole pambidi, kabiena biakula, kabiena ne muoyi!

²⁰Kadi Maweja-Nangila udi mu nzubu wende wa tshijila. Pa buloba bujima, bantu bapuwe kumpala kuende.