Read Tshiluba Abakuke 3 Bible Online

Abakuke 3 - Tshiluba bible

Abakuke 3

¹Ke ditendelela dia Abakuke, didibu bimba bu musambu wa miadi:

²Eyi, Maweja-Nangila wanyi, ndi mumvue biuvua mungambile,[16] kadi bidi binkuatshisha bowa. Patutshidi ne muoyi apa, utuenzele kabidi malu a dikema auvua muenzenze kale. Nansha wewe mutufikile munda pa bualu, utufuile kabidi amu luse.

³Mvidi Mukulu udi utumina ku Temane, Mvidi Mukulu wa tshijila udi upueka ku mikuna ya Parane.[17] Diulu ndiwule tente ne buneme buende, buloba tente ne lumu luende.

⁴Udi upatuka, ukenka, ubalakana bu diba, tshianza tshiende tshidi tshiela nsese, ke muaba udi bukole buende.

⁵Udi utuma bipupu kumpala kuende, lufu lulonda panyima.

⁶Padiye utuluka panshi, buloba budi bunyungakana. Padiye ukenzakana, bisamba bia bantu bidi bizakala. Mikuna minene ne mikese, ya kale ne kale, idi yupuka, isenguluka. Kuonsu kuvuaye upitshila kuvua anu nanku.

⁷Ndi mmona mudi bena Kushane ne bowa, mudi bena Madiyane[18] bazakala, batshina.

⁸Maweja-Nangila, uudi mufikile munda nnganyi? Ke misulu iudi mutekele tshiji anyi? Ke mayi manene audi mufikile munda anyi? Udi ubanda pa mavuba, bu pa ditempu, didi nyama ya tubalu ikoka, bua uye kutshimuna baluishi.

⁹Udi mumane kupatula buta buebe, mupayikaku mukete.[19] Ke buloba kupandika, mayi a muinshi mua buloba kupatuka, kuenza misulu.

¹⁰Padi mikuna ikumona, idi izakala. Mvula udi uloka bikole, wenza nkoka pa buloba. Mayi manene adi ela tshiona bikole, mavuala abanda mulu bu mikuna.

¹¹Padi mikete yebe ipitakana lubilu, difuma diebe dikenka, dibalakana, diba ne ngondu bidi bimana, bibuela mu nzubu.

¹²Udi wendakana pa buloba, musunsuke ne tshiji, udiatakaja bisamba bia bantu ne kanyinganyinga.

¹³Kadi udi ufika bua kusungila bantu bebe, ne mukalenga uudi musungule, mujidile. Udi ushipa mukalenga wa tshisamba tshia bena buenzayi, ubutula kashidi bonsu badi bamulonda.[20]

¹⁴Udi utubula mitu ya bamfumu ba baluishi betu, ubapingajila mikete ivuabu bakebe kutuasa. Bavua bafika ne lubilu bu mvunde, benda bela mbila ya disanka, bajinga kututangalaja, nansha kutuzaza miaba ituvua basokomene.[21]

¹⁵Udi upitshila pa mayi manene ne tubalu tuebe, ntutu ya mayi ibanda mulu mule!

¹⁶Pandi ngumvua tshiona atshi, bowa kunkuata bikole bipite, mishiku kungomba, mifuba kunwingutuka, mikolu kunzakala. Kadi ndi anu mutukije muoyi, muindile dituku diudi mua kunyoka bonsu bayua batukengesha, baunyanga.[22]

¹⁷Mitshi ya mfiku kayena ikuama bimuma, mu mionji ya nwinyo kamuena tumuma, ku mitshi ya olive kudi kutupu, biakudia kabiena bitoloka mu madimi, mu mpangu kamuena mikoku, ngombe kayena ilala mu bikumbi.

¹⁸Kadi nansha nanku, ndi nsanka, bualu Maweja-Nangila udi ungambuluisha, ndi nsanguluka, bualu udi unsungidila.

¹⁹Maweja-Nangila Mvidi Mukulu udi bukole buanyi: udi upepeja makasa anyi bu mikonu ya ngulungu, ungendesha pa mikuna mile. Wa mu mukanda wa mulombodi wa bena misambu. Wa kuimba ne nzenze.[23]