Read Tshiluba Sefanya 3 Bible Online

Sefanya 3 - Tshiluba bible

Sefanya 3

¹Yerushalayime udi muena diakabi. Udi tshimenga tshia bantomboji, tshia bena tshikisu, ne bena tshinyangu.

²Kavua uteleja diyi dia Maweja-Nangila. Kavua witaba mibelu yende. Kavua utekemena Maweja-Nangila. Kavua ukeba diambuluisha kudi Mvidi Mukulu.

³Bamfumu ba tshimenga etshi badi bu nyama ya ntambue idi ikungula. Balumbuluishi babu badi bu bimungu, bidi bikeba biakudia dilolu.[16] Kadi kabiena bishiya tshintu tshia kudia mu dinda.

⁴Bambi babu badi baditemba, banyanga mudimu wabu. Batuangaji babu kabena banemeka bintu bia tshijila; badi banaya ne mikenji ya Mvidi Mukulu.

⁵Kadi Maweja-Nangila udi amu mu tshimenga etshi, bua kukosa nsambu pa yoyi, kumushamu malu mabi. Dinda dionsu udi ulumbuluisha bantu. Kadi nansha nanku, bantu babi badi amu benza malu mabi, kabayi ne bundu!

⁶Maweja-Nangila udi wamba ne: “Ndi mubutule bisamba bia bantu bia bungi. Ndi mushimbule tuleya tua bimenga biabu bivuabu bakoleshe ne bimana. Misesu ya mu bimenga biabu mmishale munda mutupu. Bimenga biabu mbishale makolu, muntu nansha umue kena upitshilamu, kena usombamu.

⁷Pashishe meme kuela meji ne: Yerushalayime neannemeke, neavuluke mibelu yanyi, neayitabe! Nanku, tshiakumubutula to, tshiakukumbaja bimvua mumukanyine nabi. Kadi bantu badi basombamu; badi lukasa lukasa amu bua kuenza malu mabi.”

⁸Maweja-Nangila udi wamba ne: “Nuindile dituku dindi mfika bua kunupisha, kununyoka. Ndi mujadike ne: nensangishe bisamba ne makalenga, bua kubiosha ne kapia ka tshiji tshianyi. Buloba bujima nebupie, ku kapia ka tshiji tshianyi.”

⁹“Pashishe nenkudimune bantu; nengumushe mikiya idi ku mishiku yabu.[17] Nebantendelele meme Maweja-Nangila, nebankukuile ne muoyi umue.

¹⁰Bantu banyi bamvua mutangalaje,[18] nebafume muaba mule, nansha dishiya dia misulu ya bena Kushe. Nebantuadile milambu yabu.”

¹¹“Dituku adi, nuenu bantu banyi, kanuena ne bua kufua kabidi bundu, bua buenzayi buenu, nansha bua malu mabi anudi bangenzele. Bualu nengumushe munkatshi muenu bantu badi baditambisha. Kanuena mua kuditumbisha kabidi pa mukuna wanyi wa tshijila.[19]

¹²Nenshiye amu bantu bapuekele ne bapele munkatshi muenu, badi bandomba bua meme kubakuba.

¹³Bena Izrayele badi bashale ne muoyi, kabatshiena benza malu mabi, kabena bashima kabidi, kabena badinga kabidi bantu ne mishiku yabu. Nebadie, balale, muntu kayi ubakuatshisha bowa.”

¹⁴Tshimenga tshia Siyone, sankaku! Bena Izrayele, elayi tunkunduluila. Yerushalayime, sanguluka ne muoyi webe mujima.

¹⁵Maweja-Nangila mmukujimijile bubi buebe. Maweja-Nangila, mukalenga wa Izrayele, udi munkatshi muenu, mmunuipatshile baluishi benu. Nanku kanuena ne bua kutshina tshintu nansha tshimue.

¹⁶Dituku nedifike, diambilabu Yerushalayime ne: “Tshimenga tshia Siyone, kutshinyi, kutekeshi muoyi nansha!

¹⁷Maweja-Nangila Mvidi Mukulu webe udi nebe, udi tshilobu, mukuluidi wa mvita. Udi usanka bualu buebe. Udi ukunanga; nanku neakuenze muntu mupiamupia.[20] Udi uja maja bu dituku dia tshibilu, wimba misambu ne disanka bualu buebe.”

¹⁸Maweja-Nangila udi wamba ne: “Nenjikije dikenga dienu, nennumushe bundu.[21]

¹⁹Diba adi, nennyoke bonsu bavua banukengeshe. Nengondape badibu batape mputa. Bantu bavua baye mu bupika, nembapingaje mu ditunga diabu. Nenkudimune kapeja kavuabu banupeja miaba yonsu, nkenza butumbi ne lumu bienu.

²⁰Diba adi, nennupingaje mu ditunga dienu, nennusangishe muaba umue. Nenudimuene mundi nkudimuna dikenga dienu. Nennupeshe butumbi ne lumu, munkatshi mua bantu bonsu ba pa buloba. Meme Maweja-Nangila ndi ngamba nanku.”