Read Tshiluba Agayi 1 Bible Online

Agayi 1 - Tshiluba bible

Agayi 1

¹Dituku dimue dia ngondu muisambombu wa tshidimu tshibidi tshia bukalenga bua Daryaveshe, Maweja-Nangila kuyukila ne muambi Agayi. Kumutumaye kudi mulombodi wa buloba bua bena Yuda, diende Zerubabele, muana wa Sheyaltiyele,[1] ne kudi mutuangaji munene Yeshuwa, muana wa Yoshadake,

²bua kubamanyisha mu dina dia Maweja-Nangila ne: — Maweja-Nangila wa bukole buonsu udi wamba ne: “Bantu ba mu tshisamba etshi badi bamba ne: tshikondu tshia kuibakulula nzubu wanyi, ki ntshianji kukumbana![2]

⁴Panudi nuenu basombe mu nzubu yenu milengeja bimpe, wanyi meme munyanguke, nudi nuenza bimpe anyi?

⁵Meme Maweja-Nangila wa bukole buonsu, ndi nnuambila ne: Dikonkayi pa malu adi anuenzekela.

⁶Nuenu kukuna bintu bia bungi, kunowa bikese. Nudi nudia, kadi kanuena mua kuukuta. Nudi nunua maluvu, kadi nyota yenu kayena ijika. Nudi nuvuala bilamba, kadi numvua anu mashika. Muena mudimu udi upeta difutu, kadi didi dijika lukasa, bu mudi bintu bimata mu tshibombi tshitubuke!

⁷Meme Maweja-Nangila wa bukole buonsu, ndi nnuambila tshiakabidi ne: Dikonkayi pa malu adi manuenzekele.

⁸Pashishe, nuye ku mikuna, nutape mitshi, nuibakulule nzubu wanyi. Nanku, nengikale ne disanka, bualu bantu nebantumbishemu. Meme Maweja-Nangila, ndi ngamba nanku.

⁹Nuvua batekemene biakudia bia bungi, nuenu kunowa bikese. Binuvua baye nabi mu nzubu yenu, meme kubiela mupuya, kutangalakabu Meme Maweja-Nangila wa bukole buonsu, ndi nnukonka ne: Ndi muenze nanku bua tshinyi? Ndi nnuamba ne: Ndi muenze nanku, bualu nudi balekele nzubu wanyi ashale munyanguke, nukuate mudimu bikole amu bua kulengeja yenu nuenu.

¹⁰Ke padi mvula kayi uloka, bintu kabiyi bitoloka.

¹¹Meme kunutumina minanga mu ditunga: pa mikuna, mu madimi a ntete ya kuenza bukula, a mionji ya nwinyo, a mitshi ya olive, ne mu madimi a bikunyibua bikuabu bionsu. Bantu ne nyama kukenga ku minanga ayi. Nanku, nuvua bakuate mudimu amu tshianana.”

¹²Zerubabele, muana wa Sheyaltiyele, ne mutuangaji munene Yeshuwa, muana wa Yoshadake, ne bantu bonsu bavua bumuke mu bupika,[3] kuitababu bionsu bivua muambi Agayi mubambile mu dina dia Maweja-Nangila Mvidi Mukulu wabu. Ke muvua muambi Agayi mukumbaje mudimu uvua Maweja-Nangila mumupeshe. Nanku bantu bonsu kunemeka Maweja-Nangila.

¹³Pashishe Maweja-Nangila kutuma muambi Agayi bua kuambila bantu ne: — Meme Maweja-Nangila ndi nnulaya ne: Nengikale nenu.

¹⁴Zerubabele, mulombodi wa buloba bua bena Yuda, ne Yeshuwa, mutuangaji munene, ne bantu bonsu bavua bumuke mu bupika, Maweja-Nangila kubapa muoyi wa kuenza mudimu ne disuminyina. Nanku, kutuadijabu kuibakulula nzubu wa Maweja-Nangila wa bukole buonsu, Mvidi Mukulu wabu,

¹⁵dituku dia makumi abidi ne dinayi dia ngondu muisambombu, wa tshidimu atshi.[4]