Read Tshiluba Zekarya 12 Bible Online

Zekarya 12 - Tshiluba bible

Zekarya 12

¹Maweja-Nangila mmutume mukenji udi utangila bena Izrayele. Maweja-Nangila uvua mubalule diulu, muteke buloba pa bitaku biabu, mupeshe muntu mueyelu ne muoyi, udi wamba ne:

²— Nengenze Yerushalayime bu dikopu dia nwinyo, diwule ne tshiji tshianyi. Bantu bonsu badi bamunyunguluke, nebanue, balembakane. Kanyungunyungu nekakuate bena Yuda bonsu, panyungulukilabu Yerushalayime kudi bena myita.[50]

³Dituku adi, nengenze Yerushalayime dibue dinene dia bujitu, didi bantu bakeba kuambula. Kadi bonsu badi badiambula nebatapike. Nenku bisamba bionsu bia pa buloba nebidisangishe bua kuluisha Yerushalayime.

⁴Dituku adi, nenkuatshishe tubalu tuabu bowa bukole, nempadishe babandi ba pa tubalu ne bowa. Nentabalele bena Yuda, kadi nemfofamije tubalu tua bantu ba bisamba bikuabu. Meme ndi ngamba nanku.

⁵Bamfumu ba bena Yuda nebambilangane ne: “Bena mu Yerushalayime mbapetele bukole kudi Mvidi Mukulu Maweja-Nangila wa bukole buonsu.”

⁶Dituku adi, nengenze bamfumu ba bena Yuda, bu tshikutu tshia kapia mu ditu, nansha bu tshikunyi tshia kapia muinshi mua bisumbu bia miepu ya ntete ya kuenza bukula. Nebabutule nseke yonsu bisamba bidi bibanyunguluke. Kadi bena mu Yerushalayime nebasombe amu mu tshimenga tshiabu.

⁷Maweja-Nangila neadianze kuambuluisha meku a Yuda, bua ndelanganyi ya Davide, ne bena Yerushalayime, kabadimonyi ne: tudi ku mutu kua bena Yuda bakuabu.

⁸Pashishe Maweja-Nangila neambuluishe bena Yerushalayime: badi kabayi ne bukole munkatshi muabu, nebapete bukole bu bua Davide. Ndelanganyi ya Davide neikale bu Mvidi Mukulu wabu, bu mudi mutumibue wa Maweja-Nangila udi wenda kumpala kuabu.

⁹Maweja-Nangila udi wamba ne: Dituku adi, nembuele mu myita, bua kubutula bisamba bionsu bidi biluisha bena mu Yerushalayime.

¹⁰Nempeshe ndelanganyi ya Davide, ne bena mu Yerushalayime, muoyi wa luse. Nebantendelele. Nebatangile kundi, bavuluka muntu uvuabu basompole.[51] Nebamudile, bu mudibu badila muana wa balume umue mumane kufua. Nebase miadi mikole, bu mudibu basa miadi padi muanabute mufue.

¹¹Dituku adi, madilu manene neikale mu Yerushalayime, amu bu muvuabu benzela madilu a Adade-Rimone mu tshibandabanda tshia Megido.[52]

¹²Tshiota tshionsu tshia mu ditunga netshiteke atshi madilu: tshiota tshia ndelanganyi ya Davide, balume pa nkayabu, bakaji pa nkayabu; tshiota tshia Natane, balume pa nkayabu, bakaji pa nkayabu;

¹³tshiota tshia Levi, balume pa nkayabu, bakaji pa nkayabu; tshiota tshia Shimeyi, balume pa nkayabu, bakaji pa nkayabu.

¹⁴Nansha biota bikuabu bionsu kabidi nebiteke abi madilu, bantu balume pa nkayabu, bakaji pa nkayabu.