Read Tshiluba Zekarya 13 Bible Online

Zekarya 13 - Tshiluba bible

Zekarya 13

¹Dituku adi, mpokolu wa mayi neabudike bua kusukula bubi ne malu mabi a ndelanganyi ya Davide ne a bena Yerushalayime.

²Maweja-Nangila wa bukole buonsu udi wamba ne: Dituku adi, nengumushe mu ditunga mpingu ya kutendelela nayi nwidie. Muntu nansha umue kakuvuluka kabidi nansha mena ayi. Nengumushe kabidi mu ditunga bantu bonsu badi badiamba ne: tudi bambi. Nentuyishe dijinga dienu dia kutendelela nwidie.

³Pikala muntu umanyisha bantu malu mu dina dia Mvidi Mukulu, tatuende ne mamuende menemene neba-muambile ne: “Ufue, bualu udi wamba malu a dishima, utela dina dia Mvidi Mukulu.” Baledi bende menemene nebamutape ne muele, patshidiye umanyisha bantu malu.

⁴Dituku adi, bambi nebumvue bundu, batshina kuamba malu mu dina dia Mvidi Mukulu, nansha kulonda malu adi Mvidi Mukulu ubaleja. Kabakudinga kabidi bantu, bavuala tshinkutu tshia bambi tshienza ne buoya.

⁵Muntu yonsu wa kudibu neambe ne: “Meme tshiena muambi to, ndi tshidime; ke mudimu undi nkuata biangatshile ku buana buanyi too ne mpindiewu.[53]”

⁶Kadi muntu yeye mumukonke ne: “Mputa idi pa tshiadi tshiebe eyi nya ku tshinyi,” neandamune ne: “Bavua bayintape mu nzubu mua balunda banyi![54]”

⁷Maweja-Nangila wa bukole buonsu udi wamba ne: “Muele wa myita, utape mulami wa mikoku, utuvua tukuata nende mudimu; ushipe mulami wa mikoku, mikoku neitangalake,[55] meme mene nenduishe bana bayi.”

⁸Maweja-Nangila udi wamba kabidi ne: “Bia bisatu bibidi bia bena ditunga edi nebifue, amu tshia bisatu tshiabu tshimue ke tshiashala ne muoyi.

⁹Nengumushe mikiya ya badi bashala ne muoyi. Nembatete, mudibu bateta tshiamu tshia mpawungi, ne tshiamu tshitoke tshia mushinga mukole, mu kapia. Nanku nebantendelele; nenkumbaje bidibu balomba. Nembabikile ne: ‘Bantu banyi,’ bobu nebangambe ne: ‘Maweja-Nangila ke Mvidi Mukulu wetu.[56]’ ”