Read Tshiluba Zekarya 14 Bible Online

Zekarya 14 - Tshiluba bible

Zekarya 14

¹Dituku didi Maweja-Nangila[57] ufika munda, dikadi pabuipi. Bena mu Yerushalayime, bantu nebabanyangane, bintu bienu, nuenu batangile.

²Bualu Maweja-Nangila neasangishe bisamba bionsu bua kuluisha Yerushalayime: nebakuate tshimenga, nebapawule bia mu nzubu yonsu, nebakuate bakaji, bababuelele mu nzubu ku bukole. Tshia bibidi tshia bantu netshiye mu bupika, kadi bakuabu nebashale mu tshimenga.

³Pashishe Maweja-Nangila nealuishe bisamba ebi, bu mudiye muluishe baluishi ba bantu bende mu bikondu bionsu.

⁴Dituku adi, neimane pa mukuna wa mitshi ya olive, udi pabuipi ne Yerushalayime, luseke ludi diba dipatukila lua tshimenga. Mukuna wa mitshi ya olive neupandike pankatshinkatshi, tshibandabanda tshinene netshimueneke, tshibanga luseke ludi diba dipatukila, tshifika too ne ku ludidi dibuelela. Tshia bibidi tshimue tshia mukuna netshisemenene luseke lua ku mutu kua ditunga, tshitupa tshikuabu netshisemenene luseke lua kuinshi kua ditunga.

⁵Nenunyemene mu tshibandabanda etshi, tshidi tshienzeka pankatshi pa mikuna, bualu netshialabale too ne ku Ashale.[58] Nenunyeme muvua bankambua benu banyeme, pavua tshikumina tshienzeka, tshikondu tshivua Uziya mukalenga wa ditunga dia Yuda. Nanku Maweja-Nangila Mvidi Mukulu wanyi neafike, ne batumibue bende badi bamukuatshila mudimu.

⁶Dituku adi, kabakukengela kabidi butoke. Mashika, nansha mabue a mvula[59] kabiakuikalaku.

⁷Dituku dia pabuadi adi, didi Maweja-Nangila nkayende mumanye, amu munya newikaleku. Bantu kabakusunguluja kabidi munya ne butuku. Nansha dilolu, munya neuteme.

⁸Dituku adi, mpokolu neabudike mu Yerushalayime, tshia bibidi tshimue tshia mayi awu, netshipuekele ku Mayi manene a luepu, tshia bibidi tshikuabu netshipuekele ku Mayi manene a pankatshi. Nebienzeke nanku tshidimu tshijima, mu mushipu, nansha mu mvula.

⁹Dituku adi, Maweja-Nangila neikale mukalenga wa buloba bujima. Bantu kabakukukuila kabidi mukuabu to, kadi amu Yeye nkayende Mvidi Mukulu. Bonsu nebatumbishe amu dina diende.

¹⁰Ditunga dijima didi dinyunguluka Yerushalayime, nedishale mpata, biangatshile ku Ngeba ku mutu wa ditunga, too ne ku Rimone, kuinshi mu ditunga. Yerushalayime neikale ku mutu kua misoku idi mimunyunguluke. Tshimenga etshi netshituadije ku tshiibi tshia Binyamine, too ne ku tshiibi tshia ku Ditumba, ku muaba uvua tshiibi tshia kale, ne ku kaleya ka Ananeyele, too ne ku bikaminu bia nwinyo bia Mukalenga.[60]

¹¹Bantu nebasombe mu tshimenga, kabakukeba kabidi mua kutshibutula. Bantu nebasombemu talalaa.

¹²Kadi bantu bonsu bavua baye kuluisha Yerushalayime, bipupu biabatumina Maweja-Nangila bidi nenku: minyinyi yabu yapambidi neyibole, bobu batshikale ne muoyi; mesu abu neabolele mu bindokundoku biawu, ludimi luabu nelubolele mukana muabu.

¹³Dituku adi, Maweja-Nangila neabakuatshishe bowa bikole. Nebatandangane ya bungi, muntu yonsu nealuishe muena mutumba nende.

¹⁴Bena mu ditunga dia Yuda nebaluangane, bua kusungidila Yerushalayime. Nebanyenge bubanji buonsu bua bisamba, bidi pamue nabu; nebunguje mpawungi, biamu bitoke bia mushinga mukole, ne bilamba bia bungi.

¹⁵Nyama yonsu idi mu mitanda ya baluishi, tubalu, mpunde, tumelu ne mpunde mikaji, neyipete bipupu bia momumue nebivuabu bakengesha nabi bantu.[61]

¹⁶Dituku adi, bantu bawa bashale ne muoyi, munkatshi mua bisamba bivua biluisha Yerushalayime, nebaye mu tshimenga etshi ku tshidimu ku tshidimu, bua kutendelela Maweja-Nangila, Mukalenga wa bukole buonsu, ne bua kuenza tshibilu tshia tuzubu tua Bisasa.[62]

¹⁷Pikala bena tshisamba tshia pa buloba, babenga kuya ku Yerushalayime, bua kutendelela Maweja-Nangila, Mukalenga wa bukole buonsu, mvula kakuloka mu ditunga diabu to.

¹⁸Pikala bena Ejipitu babenga kuya ku Yerushalayime, bua kuenzaku tshibilu tshia tuzubu tua Bisasa, tshipupu netshibakuate, muvuatshi tshikuate bisamba bikuabu, bivua bibenga kuya kuenza tshibilu etshi.

¹⁹Ke dinyoka dikale nadi bena Ejipitu ne bisamba bionsu, bidi bibenga kuenza tshibilu etshi.

²⁰Dituku adi, nebafunde too ne pa ndibu ya tubalu ne: “Tshintu tshia tshijila tshia Maweja-Nangila”. Ngesu ya mu nzubu wa Mvidi Mukulu, neikale kabidi ya tshijila, anu mudi makopu a kumiamina nawu, adibu bateka kumpala kua tshilambuilu.

²¹Ngesu yonsu idi mu Yerushalayime, ne mu ditunga dia Yuda, neyikale bintu bia tshijila bia Maweja-Nangila wa bukole buonsu. Bantu bonsu badi bavua kufila milambu yabu, nebangate ngesu ayi, bua kuipikilamu minyinyi ya milambu. Pafika dituku adi, kakuakuikala ngenda mushinga kabidi mu nzubu wa Maweja-Nangila wa bukole buonsu.