Read Tshiluba Malaki 3 Bible Online

Malaki 3 - Tshiluba bible

Malaki 3

¹Telejayi mudi Mvidi Mukulu wa bukole buonsu unuandamuna ne: “Ndi ntuma muntu wanyi ne mukenji bua kundongoluelaye njila.[12] Maweja-Nangila unudi nujinga neafike lukasa mu nzubu wende. Muntu udi ne mukenji unudi bindile awu, neanumanyishe ndondu undi mutue nenu. Nyeye awu ukadi ulua!”

²Kudi muntu washala ne muoyi pafikaye anyi? Kudi muntu washala muimane kulu pamuenekaye anyi? Yeye neikale bu kapia kadi kengulula tshiamu, bu nsabanga wa kusukula nende bilamba.

³Neasombe panshi, bu mudi muntu udi wengulula, ulengeja tshiamu. Neumbushe mikiya yonsu ya batuangaji ba mu ndelanganyi ya Levi, pashishe bobu nebalambule milambu yabu kudi Maweja-Nangila. Neabatokeshe bu mudibu batokesha tshiamu tshia mpawungi, ne tshiamu tshitoke tshia mushinga mukole. Diba adi, batuangaji nebafile milambu yabu kudi Maweja-Nangila, mushindu udi mikenji yamba.

⁴Pashishe Maweja-Nangila neanyishe milambu ya bantu ba mu Yuda ne ba mu Yerushalayime, bu muvuaye muyanyishe kale, mu bidimu bishale panyima.

⁵Mvidi Mukulu wa bukole buonsu udi ujadika ne: “Nemfike munkatshi muenu bua kunulumbuluisha. Nempishe lukasa bantu badi benza malu a majimbu, badi benda tshiendenda, badi baditshipa mitshipu ya dishima, badi babenga kufuta muena mudimu, badi bakengesha bakaji bakamba, bana ba nshiya ne benyi, nansha bonsu badi kabayi bantshina meme.”

⁶“Meme Maweja-Nangila tshiena nkudimuka. Kadi nuenu kabidi nudi basue kushala kashidi ndelanganyi menemene ya Yakobe.[13]

⁷Nudi babenge malongesha anyi bu muvua bankambua benu benze, kanuena baakumbaje. Pinganayi kundi, nanku meme nempingane kunudi. Meme Maweja-Nangila wa bukole buonsu, ndi njadika nanku. Kadi nudi nuamba ne: ‘Nempingane kuudi munyi?’

⁸Ndi nnuandamuna ne: ‘Panudi nudinga Mvidi Mukulu, nudi nuenza bimpe anyi? Kadi nuenu nudi amu nundinga!’ Nudi nunkonka ne: ‘Tudi tukudinga munyi?’ ‘Nudi nundinga mu tshia dikumi[14] tshia binudi nupeta, ne mu milambu.

⁹Nuenu tshisamba tshijima, nudi bena diakabi, bualu nudi nunshima.

¹⁰Nanku nundambule mu nzubu wanyi tshia dikumi menemene tshia ku midimu inudi nukuata, bua biakudia bikale kashidi mu nzubu muanyi.[15] Pa bualu ebu, nudi mua kunteta meme Mvidi Mukulu wa bukole buonsu, nenumone mundi nnunzuluila mayeba a mu diulu, nnuela lupemba, ndokesha mvula.

¹¹Nenkandike bishi bua kabinyangi bia pa madimi, kabipangishi mionji yenu ya nwinyo bua kukuamayi. Meme Maweja-Nangila wa bukole buonsu ndi nnulaya nanku.

¹²Bisamba bikuabu bionsu nebinuambe ne: nudi bena diakalenga, bualu nudi nusomba mu ditunga dimpe ditambe. Maweja-Nangila wa bukole buonsu, ndi njadika nanku.’ ”

¹³Maweja-Nangila udi wamba ne: “Nudi nunjana, pashishe nudi nukonka ne: ‘Tudi tukujana, tukuamba bishi?’

¹⁴Nuvua nuamba ne: ‘Kukuatshila Mvidi Mukulu mudimu kakuena ne difutu to. Tuvua bitabe mikenji yende, banyingalale,[16] bua Maweja-Nangila kutufuilaye luse, kadi katuvua bapete bualu bua nsongu nansha bumue.

¹⁵Mpindiewu tudi tujadika ne: bena dikamakama ke bena diakalenga; bena buenzavi ke badi balubuluka. Nansha bobu bakeba Mvidi Mukulu lonji, badi amu bapanduka!’ ”

¹⁶Pashishe bantu bonsu bavua banemeka Maweja-Nangila, kuelanganabu pabu meji. Maweja-Nangila uvua mubateleje, mumvue bivuabu bamba. Kufundabu mena a bonsu bavua bamutshina, bamunemeka mu mukanda, yeye mutangile.

¹⁷Pashishe Maweja-Nangila wa bukole buonsu kuamba ne: — Dituku dindi ndeja bukole buanyi, bantu aba nebikale bantu banyi. Nembafuile luse, bu mudi tatu ufuila muanende udi umuenzela mudimu luse.

¹⁸Pashishe nenumone dishilangana didi pankatshi pa bantu bimpe ne bantu babi, pankatshi pa badi benzela Mvidi Mukulu mudimu ne badi kabayi bamuenzela mudimu.

¹⁹Meme Maweja-Nangila wa bukole buonsu ndi njadika ne: dituku dindi mfika munda, didi difika, didi bu tshikutu tshia kapia. Dituku adi neboshe bena dikamakama ne benji ba malu mabi, bu mudibu bosha bisosa. Nebabutule bonsu butubutuu.[17]

²⁰Kadi nuenu badi bannemeka, ndi nnulaya ne: lupandu luanyi nelumueneke, bu mudi diba dibanda nkenke yadi ijikija masama. Nenudienzele malu munudi basue, nenutupike ne disanka bu bana ba ngombe batupika padibu bapatuka mu tshikumbi.

²¹Dituku dindi ndeja bukole buanyi, nenuboze bantu babi, nebikale bu lupuishi muinshi mua makasa enu. Meme Maweja-Nangila wa bukole buonsu, ndi njadika nanku.

²²— Nuvuluke bivua Moshe, muntu wanyi, mulongeshe. Nukumbaje mikenji imvua mumupeshile pa mukuna wa Orebe bua ayimanyishe bena Izrayele bonsu.

²³Dituku dia Maweja-Nangila, dituku dinene, dikuatshisha bowa, kadiyi dianji kufika, nennutumine muambi Eliya.[18]

²⁴Yeye neatuangaje batatu ne bana,[19] bana ne batatuabu. Nenku tshiakubutula buloba buenu diba dindi mfika nansha.