Read Tshiluba 1 Bamakabe 1 Bible Online

1 Bamakabe 1 - Tshiluba bible

1 Bamakabe 1

¹Aleksandre munene muana wa mukalenga Filipe, kumukaye mu ditunga diende dia Masedoniya, bua kuluangana mvita. Kudiaye bumfumu bangabanga mu ditunga dijima dia bena Ngreke.[1] Mumane kutshimuna Daryaveshe, mfumu wa bena Persa ne bena Madayi, Aleksandre kupingana pa mutu pende mu bukalenga.

²Kubangaye mvita mivule, kukuata bimenga bivua bikolesha ne bimana, kushipa bamfumu ba matunga avuaye mukuate.

³Kutungunukaye ne mvita too ne ku ndekelu kua matunga. Kupawulaye bintu bivule mu matunga a benyi. Buloba kutalala mu matuku a bukalenga buende. Muoyi kumulunduka, ditambisha kupita, kushalaye muena dikamakama.

⁴Kukungijaye tshiluilu tshikole, kutekesha bantu ba mu bitupa bionsu bia ditunga diende, ba mu matunga makuabu ne bamfumu bawu mene. Kubambilaye bua bamulambule milambu.

⁵Pashishe disama kumutekesha. Ku-diumvuaye ne lufu.

⁶Kubikidishaye baneme bavuaye nabu patshivuaye muana. Kubabanyinaye bukalenga buende bangabanga ne lufu luende.

⁷Aleksandre wakalala mvula dikumi ne ibidi mu bukalenga, kufuaye.

⁸Aleksandre ufua, baneme abu kuangata bukalenga, muntu muabu muntu muabu.[2]

⁹Bonsu kuasa tshifulu tshia bumfumu, kushala bapinganangana bobu ne ndelu yabu bidimu bivule. Kuvudi-jabu makenga mapite pa buloba.

¹⁰Munkatshi muabu kupatukamu muntu mukuabu, diende Antiyokuse Epifane, muana wa mfumu Antiyokuse. Bamane kumupatula ku bupika ku bena Rome, kudiaye bumfumu mu bukalenga bua bena Arame, mu tshidimu tshia 138.[3]

¹¹Mu matuku awu bamue bena Yuda bashipianganyi, bavua balobesha bantu, babambila ne: “Tumvuangane ne matunga makuabu. Bualu dipangakana dietu nabu edi ke didi dituvudijila makenga.”

¹²Bena Izrayele kuanyisha muabambidibu amu.

¹³Bamue bantu kuyabu kudi mukalenga, kupetabu dianyisha dia kulonda bibidilu bia mu matunga a bende.

¹⁴Kuasabu tshipalu[4] tshia manaya mu Yerushalayime bu muvuabu benza mu bimenga bivua bilonda bibidilu bia matunga makuabu.

¹⁵Bavua badienzeja bua bikale bu badi kabayi bateka panshi,[5] balekela ndondu wa tshijila pa kudisanga ne benyi. Kabidi bavua benza manga malu mabi mapite.

¹⁶Pakamona mukalenga Antiyokuse ne: bukalenga buanyi budi bukole, ujingile mua kutshimuna bena mu Ejipitu, bua ikale mukalenga mu matunga onsu abidi.

¹⁷Kubuelaye mu ditunga dia Ejipitu ne tshiluilu tshikole, matempu, nyama ya tupumbu, kabidi ne matu mavule manene.

¹⁸Kubundaye Ptolemeye, mukalenga wa ditunga dia Ejipitu. Awu kukuatshika bowa, kunyema. Bantu bende bavule kufua mu mvita ayi.

¹⁹Antiyokuse kukuata bimenga bia Ejipitu bivua bikolesha ne bimana. Antiyokuse kukalama nabi, kunyenga bionsu bivua mu bimenga.

²⁰Kutshimunaye Ejipitu. Mu tshidimu tshia 143,[6] kubandilaye bena Izrayele ne bena mu Yerushalayime tshianza panshi, kabidi ne tshiluilu tshikole.

²¹Mukalenga kubuela mu muaba wa tshijila ne ditambisha, kupawula tshilambuilu tshia mpawungi, tshitekelu tshia miendu ne bionsu bivuaku,

²²mesa a kulambuila mampa, mabungu a bintu bia muendundu bia milambu, makopu ne mbabula ya tshiamu tshia mpawungi, bilamba ne bifulu bia mushinga mukole.[7] Bilengejilu bia mpawungi bivua ku tshimana tshia kumpala kua nzubu wa Mvidi Mukulu, wakabilamuna bionsu.

²³Kuangataye kabidi ne nkanu mitoke ya mushinga mukole, mpawungi ne bintu bikuabu bia mushinga mukole ne bionsu biakasanganaye bivua bantu basokoke momu amu.

²⁴Mumane kuangata bintu bionsu nanku, ke kupinganaye kuende, mumane kushipa bantu bavule, kabidi muakule miaku ya diditambisha mipite bubi.

²⁵Bantu kudilangana mu ditunga dijima, bua Izrayele.

²⁶Bamfumu ne bakulu kudila bujindajinda. Nsongalume ne nsongakaji kuteketa mubidi. Bakaji kualuluka mibidi, kuvuandulukayi.

²⁷Utshidi uselelaku kuasa madilu. Kabidi mukajende munda mua nzubu wende, kuasa muadi.

²⁸Buloba kuzakala pa kumona dikenga dia bena Izrayele. Bantu bonsu kukuatshika bundu.

²⁹Bidimu bibidi bimane kupita, mukalenga kutuma mulombodi wa bena mvita mu bimenga bia bena Yuda. Mulombodi awu kufika mu Yerushalayime ne tshiluilu tshikole.

³⁰Kuambilaye bantu malu a ditalala, kadi uvua wakula ne budimu. Bantu bonsu kumuitaba. Pashishe kubundaye mvita mu tshimenga, bantu kabayi bamanye. Kunyangaye tshimenga bikole. Kubutuishaye bantu bavule ba bena Izrayele.

³¹Kupawulaye bintu bia mu tshimenga, kuosha tshimenga, kushimbula nzubu ne bimana bia tshimenga.

³²Bena mvita kukuata bakaji ne bana ku bupika. Kuangatabu kabidi ne bimuna.

³³Pashishe kuasululabu tshimenga tshia Davide tshikale ne bimana bitumbuke kabidi bikole. Kuasabu ne tuleya tukole.

³⁴Kutekamu musumba wa bena Yuda bashipianganyi bavua bitaba malu abu ne meyi abu.

³⁵Kukungijilamu bia lufu ne biakudia kaba kamue, kutekapu bintu bionsu bivuabu bibe mu Yerushalayime. Tshimenga tshikole etshi kushalatshi njiwu ya mulunguluku bua bena Izrayele.

³⁶Nzubu wa Mvidi Mukulu kushala mu njiwu. Misangu yonsu bavua benza malu a kuluisha bena Izrayele,

³⁷bashipa bantu badi kabayi bualu ku tshilambuilu, banyanga muaba wa tshijila.

³⁸Bavua babambidika bena Izrayele bua kunyema. Tshimenga kushala tshia benyi, kushala tshia benyi kudi bana batshi balela, bavuabu benzeja ku bukole bua kumukamu.

³⁹Muaba wa tshijila kushala mutupu bu tshipela. Bibilu kuandamuka madilu, bavua bapepeja matuku a Dikisha, badiombola nzubu wa lumu.

⁴⁰Kadiwu kavua kapita ne lumu luvua mu tshimenga, kumpala bavua batumbisha tshimenga, mpindiewu bakadi batshipepeja.

⁴¹Mukalenga Antiyokuse kutuma diyi bua bantu bonsu ba mu bukalenga buende benze tshintu tshimue. Muntu yonsu alekele bibidilu biabu.

⁴²Bantu bonsu ba mu matunga makuabu kuitaba diyi dia mukalenga adi.

⁴³Kadi bena Izrayele ba bungi kuanyisha ditendelela divua mukalenga muambe, kulambula nwidie milambu, kupetula dituku dia Dikisha.

⁴⁴Mukalenga kutuma bantu ne mikanda mu Yerushalayime ne mu bimenga bionsu bia Yuda, welela bantu diyi bua balonde bibidilu bidi kabiyi bia ditunga,

⁴⁵balekele kulambula milambu mikuabu ya mu muaba wa tshijila ne milambu ya kuosha, ya bukula ne ya muendundu mene, bapetule matuku a Dikisha ne a bibilu,

⁴⁶banyange muaba wa tshijila kabidi ne bintu bijidila,

⁴⁷bashile nwidie bilambuilu, miaba ya tshijila, mu nzubu balambule ngulube ne nyama ya mikiya,[8]

⁴⁸balekele kuteka bana panshi, benze malu mabi mishindu mishilangane bu bantu badi ne mikiya,

⁴⁹bua bamone mua kupua meyi a Mvidi Mukulu muoyi, bandamune bibidilu biabu.

⁵⁰Muntu yonsu wabenga kuenza mudi mukalenga muambe awu, tshiende amu lufu.

⁵¹Ke miaku ivua mukalenga mufundile bantu bonsu ba mu bukalenga buende. Kutekaye banene ba mu bukalenga buende badi mua kuenda batangila bantu, bakeba mua kumanya ne: mu bimenga bionsu bena Yuda badi balambula nwidie milambu.

⁵²Bena Yuda bavule bavua balekela kulonda meyi a Moshe, bitaba ku diyi dia banene ba mu mbulamatadi abu. Kuenzabu malu mabi mapite mu ditunga.

⁵³Ngikadilu wabu uvua musake bena Izrayele bitabi ba diyi mua kuyabu kusokoma miaba yonsu ivuabu mua kuya.

⁵⁴Mu tshidimu tshia 145, mu dituku dia dikumi ne ditanu dia ngondu wa dikumi ne muibidi, mukalenga kuasa tshintu tshibi tshia “Kabutu”[9] pa tshilambuilu tshia milambu ya kuosha. Kuimanyikabu kabidi ne bilambuilu bia kutendelela nwidie mu bimenga bikuabu bia bena Yuda.

⁵⁵Kuoshabu musenga wa kamonya ku mishiku ya mbelu ne mu misesu.

⁵⁶Kupandabu mikanda ya Meyi ivuabu basangana, kuyela mu kapia.

⁵⁷Pavua bamfumu ba mbulamatadi basangana mukanda wa ndondu kua muntu, nansha basangana muntu ulonda meyi awu, bamfumu batangidi aba bavua bamushipa bu muvua diyi dia Mukalenga diambe.

⁵⁸Ku ngondu yonsu, bantu ba mukalenga bavua bakengesha muena Izrayele yonsu uvuabu bapeta ne tshilema pa diyi dia mukalenga.

⁵⁹Mu matuku makumi abidi ne atanu a ngondu awu,[10] bavua balambula nwidie milambu pa tshilambuilu tshia milambu ya kuosha.

⁶⁰Bakaji bavua batekesha bana babu panshi, bavua babashipa bilondeshile muvua diyi dia mukalenga.

⁶¹Bavua balembeleja bana babu ba ku dibela abu mu nshingu yabu. Bavua bashipa kabidi bena diku diabu ne bantu bonsu bavua bateka bana abu panshi.

⁶²Kadi bena Yuda ba bungi, bavua bakolesha muoyi, babenga mua kudia biakudia bia mikiya.

⁶³Bavule bavua banyisha lufu pa mutu pa kudia nyama ya mikiya, kupepeja tshiovu tshia tshijila.

⁶⁴Matuku awu, bu muvua Mvidi Mukulu ne tshiji tshikole, wakakengeshisha bena Izrayele bikole.