Read Tshiluba 1 Bamakabe 10 Bible Online

1 Bamakabe 10 - Tshiluba bible

1 Bamakabe 10

¹Mu tshidimu tshia 160, Aleksandre Epifane, muana wa Antiyokuse IV, kutulukaye ku majuwa pabuipi ne Ptolemayise,[147] kukuataye tshimenga. Bantu kumumanya ne ke mukalenga.

²Kadi mukalenga Demetriyuse[148] umanya bualu, kusangishaye tshiluilu tshinene bua kuya kuluisha Aleksandre.

³Demetriyuse kufundila Yonatane mukanda ne miaku milenga, umulaya malu mavule.

⁴Uvua udiambila ne: “Tuye lukasa bua kumvuangana ne Yonatane, kayi wanji kumyuangana ne Aleksandre, kadi bavua kutukudimukila.

⁵Bualu Yonatane udi mua kuvuluka makenga atuvua babapeteshe yeye ne bana babu ne ditunga diabu dijima.”

⁶Demetriyuse kuanyisha bua Yonatane asangishe tshiluilu, enze bia lufu. Uvua mulombe bua kutua nende ndondu. Kutumaye diyi bua bamupingajile bena Izrayele bavua bakuata mu lukanu mu tshimenga tshia Yerushalayime.[149]

⁷Yonatane kuya mu Yerushalayime, kubadila bantu bavuamu mukanda, kabidi ne bonsu bavua mu nzubu wa bena mvita.

⁸Bantu bumvua ne mukalenga mmuanyishe bua Yonatane asangishe tshiluilu, kukuatshikabu bowa bunene.

⁹Bantu kufila bena lukanu bavuabu bakuate kudi Yonatane. Awu pende kubapingaja baledi babu.

¹⁰Yonatane kuya kusomba mu Yerushalayime, kuasulula kabidi ne tshimenga, kutshilongolola.

¹¹Uvua utumina bena mudimu diyi bua kuibakisha bimana bia tshimenga, kabidi bavua ne bua kunyungulula mukuna wa Siyone ne bimana bia mabue masonga. Kuenzabu nanku.

¹²Bena mvita benyi bavua basombe mu bimenga bikolesha ne bimana kudi Bakidese,[150] kumvuanganabu bua kumuka.

¹³Muntu yonsu uvua ushiya mudimu wende, upingana kuabu.

¹⁴Kadi mu Bete-Sure,[151] bena Izrayele bavua babenga mikenji bavua amu benza mudimu, bualu tshivua tshimenga tshia kunyemena.

¹⁵Mukalenga Aleksandre kupeta lumu lua malu avua Demetriyuse mulaye Yonatane mu mukanda. Kumulondelabu kabidi muvua Yonatane muluangane mvita, ne bionsu bivua bana babu ne Yonatane benze bia bulobu, kabidi ne makenga avuabu bapeta.

¹⁶Mukalenga kuambaye ne: “Tudi mua kupeta petu muntu wa nenku anyi? Mbimpe bua tudienze petu balunda, kabidi tutue nende ndondu bituadijile ku mpindiewu.”

¹⁷Ke Aleksandre kufundila Yonatane mukanda wamba ne:

¹⁸— Yonatane wetu, meme mukalenga Aleksandre, ndi nkuela muoyi.

¹⁹Tudi bumvue batuambila ne: udi muntu wa bukitu, udi ukumbana bua wikale mulunda wetu.

²⁰Bituadije lelu ewu, ndi nkuteka mutuangaji munene wa tshisamba tshienu. Ndi nkupa kabidi muanzu munene wa “mulunda wa Mukalenga,” bua wikale ku tshietu, ushala mulunda wetu. Mukalenga pamue ne mukanda kumutumina muntumpu mukunze ne tshifulu tshia mpawungi.[152]

²¹Mu ngondu wa muanda mutekete wa tshidimu tshia lukama ne makumi asambombu,[153] mu tshibilu tshia tuzubu tua Bisasa, ke kuvuadikabu Yonatane bilengejilu bia butuangaji. Kusangishaye bena mvita, kutuadija kuenza bia lufu bivule.

²²Demetriyuse umvua nanku, kubungamaye, kuamba ne:

²³“Ntshilema kaayi tshitudi natshi bua padi Aleksandre udianza kumvuangana ne bena Yuda, bobu pabu batua ku tshiende!

²⁴Ndi musue kubafundila panyi, mbambila miaku milenga, mbalaya bua kubapa mianzu ne biuma, bua bamone mua kulamata ku luseke luanyi.”

²⁵Ke kubafundilaye mukanda mushindu ewu: — Bana betu ba bena Yuda, meme mukalenga Demetriyuse, ndi nnuela mioyi!

²⁶Tudi basanke pa kumvua mudi diumvuangana dietu nenu dishale amu pa diodi. Nudi balunda betu. Kanuena baditue kudi baluishi betu to, tudi tusanka bikole.

²⁷Nutungunuke ne ditulamata dienu. Netunufute bua ngenzelu yenu ayi.

²⁸Netukepeshe bitadi bienu. Kabidi netunuenzele bilenga.

²⁹Bituadija ku lelu, nuenu bena Yuda bonsu ndi nnumusha ku difuta bitadi bia tshibidilu, ku bitadi bia pa luepu ne bikuabu bia pa buabi.

³⁰Lukuabu luseke, bituadije ku lelu, ndi ndekela kashidi tshia bisatu tshimue tshia bintu bia mu madimi ne tshia bibidi tshia bimuma bia mitshi binuvua bampe meme. Bintu ebi tshiena mbilomba ne mu Yudeya, nansha mu bitupa bisatu bia buloba bua Samariya bivuabu basakidile[154] ku ditunga dia Yudeya, nansha mu Ngalileya.

³¹Tshimenga tshia Yerushalayime tshidi tshishala tshimenga tshia tshijila. Bantu kabena ne bua kufutamu tshitadi to, nansha mu buloba buatshi buonsu. Nanku mbapete tshia dikumi, nansha bikuabu bitadi bidibu bafuta.[155]

³²Ndi nshiya kabidi nzubu wa bena mvita wa mu Yerushalayime, ashale mu dina dia mutuangaji munene bua atekemu bantu nansha bena mvita badiye musue.

³³Bena Izrayele bonsu badi mu lukanu, nansha bobu bikale mu musoku wabu wa Yuda, nansha baye nabu ku munga muaba mu bukalenga buanyi, nebapete budikadidi kabayi bafuta kantu.

³⁴Bena Yuda bonsu badi basombe mu bukalenga buanyi, kabena ne bua kufuta bitadi nansha mabanza adibu nawu, mu matuku a bibilu binene, a Dikisha, a bibilu bia ngondu mupiamupia, ne a bibilu bikuabu, kabidi ne matuku asatu adi kumpala nansha kunyima kua tshibilu tshinene kampanda.

³⁵Muntu nansha umue kena ne bumfumu bua kubafutshisha tshintu, nansha bua kunyingalala muntu wa bena Yuda.

³⁶“Bena Yuda badi mua kudifundisha mena ku bena nwita ba mu ditunga dianyi, too ne ku binunu makumi asatu. Nebapete difutu dia momumue ne dia muena nwita wa mu bukalenga.

³⁷Bakuabu ne tubateke mu bimenga bikolesha bia mu bukalenga. Netuteke bantu mu mianzu minene ya mu ditunga. Balombodi babu ba nwita ne bamfumu babu nebabasungule amu munkatshi muabu nkayabu. Nebalame anu mikenji yabu, muvua Mukalenga mutume diyi bua bena Yuda.

³⁸“Kadi bua bitupa bisatu bia buloba bua Samariya,[156] bivuabu basakidile ku buloba bua Yudeya, nebishale mu buloba bua Yudeya, bikale amu ku bumfumu bua mutuangaji munene.

³⁹Ndi mfila tshimenga tshia Ptolemayise[157] ne bitupa bidi pabuipi natshi bishale ku bumfumu bua muaba wa tshijila, bua mpetu idi ifumaku bayitule amu bua midimu ya nzubu wa Mvidi Mukulu.

⁴⁰Kadi meme nengikale mfila nkanu mitoke ya mushinga mukole binunu dikumi ne bitanu ya mu mushete wa bukalenga buanyi ku tshidimu ku tshidimu.

⁴¹Ku kale, bena mudimu ba mu bukalenga ba matunga adi ne biuma, kabavua bafile kantu[158] kudi muntu nansha umue ku makuta avua apita pa mutu. Biangatshile lelu, makuta awu nebaalame bua midimu ya nzubu wa Mvidi Mukulu.

⁴²Kabidi, nkanu mitoke ya mushinga mukole binunu bitanu ivuabu bangate ku bintu bivua biela mu muaba wa tshijila ku tshidimu tshionsu, nebabiabanyine batuangaji badi bakuata mudimu muaba wa tshijila.

⁴³“Muntu yonsu waya kusokoma mu nzubu wa Mvidi Mukulu wa mu Yerushalayime ne miaba ya pabuipi nende, bua padiye kayi mulambule tshitadi tshia mukalenga, nansha bua mabanza kabena bamukuata to. Kabakumunyenga bintu bidiye nabi mu bukalenga buanyi.

⁴⁴Bidibu batula bua dibaka ne dilengeja dia muaba wa tshijila, badi babifuta amu kudi mukalenga.

⁴⁵Bionsu bidibu bakengela bua dibakulula dia bimana ne dikolesha dia Yerushalayime, nansha dibakulula dia bimana bia bimenga bikuabu bia Yudeya, nebabifute amu kudi mukalenga.”

⁴⁶Yonatane ne bantu kubenga kuitaba bivua Demetriyuse muambe. Nansha kubiangatabu ne mushinga, bualu bavua bavuluka muvua Demetriyuse mubakengeshe bikole, mubenzele bibi bitambe.

⁴⁷Kujadikabu mua kulamata amu Aleksandre, bualu uvua wa kumpala uvua ukeba kutua nabu ndondu. Ke bobu kumvuangana nende matuku onsu avuaye ne muoyi.

⁴⁸Ke mukalenga Aleksandre kusangisha tshiluilu tshiende, kuya bua kuluisha Demetriyuse.

⁴⁹Bakalenga babidi aba bamane kubanga mvita, ke tshiluilu tshia Aleksandre kunyema mvita. Mukalenga Demetriyuse kubalondakaja, kubatshimuna.

⁵⁰Kuluanganaye mvita mikole too ne ku dilolu. Kadi kushipabu Demetriyuse dituku adi.

⁵¹Mukalenga Aleksandre kutumina Ptolemeye VI, mukalenga wa bena Ejipitu, mukenji kudi bamienampala, wamba ne:

⁵²— Mbapinganyi mu bukalenga, mbasombi mu nkuasa wa bankambua banyi. Ndi mudiangatshile bumfumu ku bukole; ndi mutshimune Demetriyuse. Meme kupeta ditunga dietu tshiakabidi.

⁵³Tuvua baluishe Demetriyuse mvita mikole, tuetu kumutshimuna ne bena mvita betu. Ke tuetu kusomba mu nkuasa wende wa bukalenga.

⁵⁴Kadi bua mpindiewu, shala mulunda wanyi. Bituadije ku lelu, tutue nebe ndondu bua nsele muanebe wa bakaji. Nengikale muku webe, nenku nenkupeshe bintu bidi bikukumbanyina bia buku, ne yeye pende nemmupe bidi bimukumbanyina.

⁵⁵Mukalenga Ptolemeye kuandamuna pende ne: — Dituku diwapinganyi mu ditunga dia bankambua bebe, kupingana ne mu nkuasa wa bukalenga, ndituku dia disanka.

⁵⁶Kadi mpindiewu nengenze bionsu biudi mufunde mu mukanda. Kadi anji kulua tupetelangane mu tshimenga tshia Ptolemayise bua tuanji kuyukila. Meme nenkupeshe muananyi wa bakaji, umusele bu muudi mundombe.

⁵⁷Mu tshidimu tshia 162,[159] ke mukalenga Ptolemeye kumuka ku Ejipitu pamue ne muanende wa bakaji Kleyopatre, batangile ku tshimenga tshia Ptolemayise.

⁵⁸Mukalenga Aleksandre kuvua kusangila ne Ptolemeye. Ewu pende kumupa muanende wa bakaji. Kuenzabu tshibilu tshia dibaka mu tshimenga tshia Ptolemayise ne musangelu munene mukumbanyine bakalenga.

⁵⁹Mukalenga Aleksandre kufundila Yonatane mukanda umubikila bua baye kusambakena.

⁶⁰Ke Yonatane kuyaye mu Ptolemayise, muvuale biende bia bukalenga. Kusanganaye bakalenga aba babidi. Kubapaye, bobu ne “balunda ba Mukalenga,” nkanu mitoke ya mushinga mukole ne mpawungi kabidi ne bintu bivule bia masanka. Bobu kumuanyisha bikole.

⁶¹Pinapu, bantu bavua kabayi balama meyi a Mvidi Mukulu, bakinyi ba bena Izrayele, kudisanga bua kuluisha Yonatane, bamusonguela kudi mukalenga Aleksandre. Kadi mukalenga pende nansha kubateleja to.

⁶²Kadi kutumaye diyi bua basule Yonatane bilamba bivuaye muvuale, bamuvuadike tshilamba tshikunze tshia bukalenga. Kuenzabu nanku.

⁶³Mukalenga kumusombesha ku luseke luende, wambila balombodi bende ba bena mvita ne: — Ndayi nende mu tshimenga. Ambilayi bantu bua kabamufundi bua tshilumbu nansha tshimue. Kabidi kabena mua kumubungamija bua bualu nansha bua mushindu kayi.

⁶⁴Bena lunsonga kumona lumu luwabu bapesha Yonatane, bilondeshile muvua diyi dia mukalenga, bamumona kabidi ne tshilamba tshikunze pa makaya ende, kunyemabu lubilu.

⁶⁵Mukalenga kumupa lumu pa kumufunda mu mulongu wa “balunda ba Mukalenga.” Kumutekaye mulombodi wa tshiluilu ne muludiki wa tshitupa tshia buloba.

⁶⁶Yonatane kualukila mu Yerushalayime ne bupole ne disanka.

⁶⁷Mu tshidimu tshia 165, Demetriyuse, muana wa mukalenge Demetriyuse I,[160] ufuma ku Krete, kufikaye mu ditunga dia bankambua bende.

⁶⁸Kadi mukalenga Aleksandre mumvue nanku, kupampakanaye, kupingana ku Antiyokiya.

⁶⁹Demetriyuse pende uvua muteke Apolonyuse mu nkuasa wa bulombodi bua Siriya mujima. Ke Apolonyuse kusangisha bena mvita bavule, kuvua kuasa mitanda pepi ne Yamniya.[161] Kutumaye bantu bua bambile Yonatane mutuangaji munene ne:

⁷⁰— Wewe nkayebe ke udi utukeba matandu. Udi mungandamune tshintu tshia kapeja ne bundu bunene. Bidi bikuambuluisha bua wikale mukalenga mu mikuna bua kutukengesha bua tshinyi?

⁷¹Paudi utekemena kudi bena mvita bebe ne badi mua kuenza bualu, upueke mu mpata emu, tupimangane. Bualu bukole bua bena mvita ba mu bimenga, ndi nabu.

⁷²Bakuambule mundi. Umanye kabidi bukole budi nabu bonsu badi bangambuluisha mu mvita. Nebakuambile ne: kuena mua kuluangana netu mvita, bualu tukadi batshimune bankambua bebe misangu milondangane ibidi mu ditunga diabu menemene.[162]

⁷³Kuena mua kukandamana kumpala kua babandi ba pa tubalu, nansha kabidi kua tshiluilu tshianyi bunene nenku, mu mpata mudi kamuyi muaba wa kusokoma, kamuyi lubuebue nansha mabue.

⁷⁴Yonatane umvua miaku ya Apolonyuse, kubindulukaye bikole, kusungula bantu binunu dikumi. Kumukaye nabu mu Yerushalayime. Muanabu Simeyone kumulonda ne bantu bua kumuambuluisha.

⁷⁵Kuasabu mitanda kumpala kua tshimenga tshia Yope. Bena tshimenga kuinjila biibi, bualu muabu muvua tshisumbu tshia bena mvita ba Apolonyuse. Bena Izrayele kuluisha bena Yope.[163]

⁷⁶Bena tshimenga kukuatshika bowa, kunzulula biibi. Yonatane kukuata tshimenga, kushala mfumu watshi.

⁷⁷Apolonyuse umvua nanku, kuangataye babandi ba pa tubalu binunu bisatu, kabidi ne tshiluilu tshinene, benda batangila ku Asdode[164] bu badi basue kukosolola ditunga. Pine apu, kudituaye mu mpata, mutekemene kudi musumba wa babandi ba pa nyama ya tubalu.

⁷⁸Yonatane kumulondesha ku luseke lua Asdode. Ke bena mvita ba bisumbu bibidi kuluangana.

⁷⁹Kadi Apolonyuse uvua mushiye babandi ba pa tubalu tshinunu basokome munyima mua bena Izrayele.

⁸⁰Kadi diba didi Yonatane umanya bua disokoma dia bena nwita, bamuluisha munyima mua tshiluilu tshiende, tshiluilu tshiende kupeta njiwu minene. Babandi ba pa tubalu kuela bena Izrayele munkatshi, kubasa mikete, bituadije ku dinda too ne ku dilolu.

⁸¹Kadi bena mvita ba Yonatane kuluangana bikole muvuabu babafundile kudi Yonatane. Ke tubalu tua baluishi kupungila.

⁸²Nenku diba divua babandi ba pa tubalu bamane kupungila, ke Simeyone kubunda bena mvita ba ku makasa, kutshimuna baluishi. Kunyemabu lubilu.

⁸³Babandi ba pa tubalu kutangalaka mu mpata. Bavua banyema, kufikabu mu Asdode. Kubuelabu mu nzubu wabu wa nwidie wabu Dagone.

⁸⁴Yonatane kuosha Asdode ne bimenga bivua ku mutumba. Kupawulaye bintu, kuosha muaba wa tshijila wa Dagone ne bonsu bavuamu.

⁸⁵Bantu binunu muanda mukulu kufua ku muele ne ku kapia.

⁸⁶Yonatane kumuka kuya kuasa mitanda mu Askalone.[165] Bena tshimenga kuya kumuakidila buwule ne disanka.

⁸⁷Ke Yonatane kupingana ne bena diende mu Yerushalayime ne bintu bivule bivuabu bapawule mu mvita.

⁸⁸Mukalenga Aleksandre umvua bualu, kupa Yonatane lumu tshiakabidi.

⁸⁹Ke kutuminaye Yonatane ndami ya bilamba ya mpawungi, mutubu bapa “bana babu ba Mukalenga”. Kumupaye tshimenga tshia Ekrone[166] ne tshitupa tshionsu tshia buloba tshia pabuipi natshi, kushalabi biende kashidi.