Read Tshiluba 1 Bamakabe 11 Bible Online

1 Bamakabe 11 - Tshiluba bible

1 Bamakabe 11

¹Mukalenga Ptolemeye mu Ejipitu kusanga tshiluilu tshinene, bena mvita bungi bu lusenga lua ku muelelu wa mayi manene. Uvua ne matu manene a mvita. Uvua ukeba kukuata bukalenga bua Aleksandre ne budimu bua kubusakidila ku buende.

²Kuyaye mu Siriya ne meyi malenga bu muntu udi musue kumvuangana ne bantu. Bantu kumunzuluila biibi bia bimenga biabu, kuya kumuakidila. Bualu ke muvua Aleksandre mubafundile bua bakidile Ptolemeye nanku, bualu uvua muku wende.

³Kadi pavua Ptolemeye upitshila mu tshimenga tshionsu, uvua utekamu bena mvita.

⁴Pakavuaye usemena pabuipi ne Asdode,[167] kumulejabu muaba wa tshijila wa nwidie Dagone uvuabu buoshe. Kumulejabu kabidi muvuabu banyange tshimenga atshi ne misoku ivua pabuipi natshi. Kumonaye miaba yonsu ne bitalu bivua Yonatane muoshe mu mvita, bualu bavua babikunguja muaba uvua mukalenga ne bua kupitshila.

⁵Bantu kuambila mukalenga bionsu bivua Yonatane muenze, amu bua kusonguela Yonatane kudi mukalenga. Kadi mukalenga kushala amu mupuwe.

⁶Yonatane kuya mu Yope[168] bua kupetangana ne Ptolemeye. Kuelanganabu muoyi, kulalabu bonsu mu tshimenga atshi.

⁷Yonatane kushindikija mukalenga too ne ku musulu wa Eletere.[169] Pashishe kupinganaye mu Yerushalayime.

⁸Mukalenga Ptolemeye kushala mukalenga wa bimenga bia ku muelelu wa mayi manene too ne ku Seleyusiye[170] tshimenga tshia ku muelelu wa mayi manene. Kutuadijaye kuelela Aleksandre meji mabi.

⁹Kutumaye bamienampala kudi mukalenga Demetriyuse bua kumuambila ne: — Luakunu, tutue ndondu. Nenkupe muananyi wa bakaji, musela kudi Aleksandre. Neushale mu bukalenga pa muaba wa tatuebe.

¹⁰Ndi ne kanyinganyinga bu mumvua museleshe mulumiana ewu muananyi wa bakaji, bualu ukadi ukeba kunshipa.

¹¹Ptolemeye uvua udiuwula Aleksandre nanku, bualu uvua ukeba kuangata bukalenga buende.

¹²Kunyengaye Aleksandre muanende wa bakaji, kumupa Demetriyuse. Kushipaye diumvuangana ne Aleksandre. Dipangakana diabu kumueneka patoke.

¹³Ptolemeye kubuela mu Antiyokiya, kushala mukalenga wa buloba bujima bua Siriya.[171] Kuambakajaye bifulu bibidi, tshia bukalenga bua bena Ejipitu ne tshia buloba bunene bua Siriya.

¹⁴Matuku awu, mukalenga Aleksandre uvua mu Silisiya, bualu bena ditunga adi bavua bamutombokela.

¹⁵Aleksandre umvua bionsu bivua Ptolemeye muenze, kumulongoluelaye mvita. Kadi Ptolemeye kuya kumuakidila ne mvita, kumutshimunaye, bualu uvua ne tshiluilu tshikole.

¹⁶Ke Aleksandre kunyemena mu Arabiya bua kusokomenamu, diba adi mukalenga Ptolemeye kuleja bukole buende.

¹⁷Kadi Zabdyele, muena Arabe, kukosa Aleksandre mutu, kuutumina Ptolemeye.

¹⁸Kupita amu matuku abidi nenku, ke mukalenga Ptolemeye kufua pende. Bena ditunga kushipa bena mvita bende bonsu bavua mu bimenga bikolesha.

¹⁹Ke Demetriyuse kudia bukalenga mu tshidimu tshia 167.[172]

²⁰Matuku awu, Yonatane kusangisha bantu bavua mu Yudeya bua kuluisha bavua mu nzubu wa bimana bikolesha mu Yerushalayime. Ke kuenzaye matempu a mvita[173] mavule bua kuluisha tshimenga.

²¹Bena Yuda bavua babenga diyi, bakina tshisamba tshiabu, kuya kumanyisha Demetriyuse muvua Yonatane ukeba kukuata nzubu wa bimana bikolesha.

²²Demetriyuse umvua nanku, kufikaye munda bikole. Kuelaye meji bua kuya mu tshimenga tshia Ptolemayise.[174] Kufundilaye Yonatane mukanda, umulomba bua alekele kukuata nzubu mukolesha, afike lukasa ku tshimenga tshia Ptolemayise, bua baye kuyukila nende.

²³Pumvuila Yonatane, kutuminaye bena mvita diyi bua baluishe amu kuluisha nzubu mukolesha awu. Kadi kusungulaye bamue bamfumu ba bena Izrayele ne bamue batuangaji, bua baye nende, bua kudifilaye mene mu njiwu.

²⁴Kuambulaye nkanu mitoke ya mushinga mukole ne mpawungi ne bilamba bia bungi ne malambi, kuyaye nabi kudi mukalenga mu Ptolemayise. Demetriyuse kumuanyisha.

²⁵Bena Yuda bavua kabayi bitaba Mvidi Mukulu bavua basonguela Yonatane.

²⁶Kadi mukalenga kumuenzela bu muvuabu bamuenzela kudi bavua badianjila mu bukalenga. Kumubandishaye mianzu kumpala kua “balunda ba Mukalenga” bonsu.[175]

²⁷Kumushindikaye bu mutuangaji munene, kabidi mu minga mianzu ivuaye nayi bangabanga.[176] Kumutekaye kabidi mu mulongu wa kumpala wa “balunda ba Mukalenga.”

²⁸Yonatane kulomba mukalenga bua Yudeya, ne bitupa bisatu bia buloba bua Samariya[177] kabafutshi tshitadi. Kumulayaye bua kumupa kilo binunu muanda mukulu ne lukama bia biamu bitoke bia mushinga mukole.

²⁹Mukalenga kuanyisha dilomba edi. Bua kuleja muvuaye muitabe, kufundilaye Yonatane mukanda ne:

³⁰— Meme mukalenga Demetriyuse, ndi mfundila muanetu[178] Yonatane ne tshisamba tshia bena Yuda mukanda. Muoyi wenu.

³¹Tudi bakutumine kabidi mukanda utudi batumina bualu buenu Lastene umue wa “Bana babu ba Mukalenga,” bua mimanye penu.

³²“Meme mukalenga Demetriyuse, ndi ntumina tatu Lastene mukanda, mmuela muoyi bu mudiye tatuetu.

³³Ndi nshindika bua kuenzela tshisamba tshia bena Yuda bilenga, bualu badi netu bimpe. Badi batuenzela malu onsu amu ne muoyi mulenga.

³⁴Tudi tujadika bua bangate buloba bua Yudeya ne bitupa bisatu bia Aferema, Lida ne Ramatayime.[179] Bitupa ebi, tudi tubiumusha ku ditunga dia Samariya bua bishale bia Yudeya, ne bionsu bidi ku bumfumu buabi. Bishale mu dina dia badi baya kulambula milambu mu Yerushalayime. Bituadije ku lelu, bitadi bivua mukalenga wangata ku tshidimu ku tshidimu bia bintu bia pa madimi ne bia bimuma, nebikale bia nzubu wa Mvidi Mukulu.

³⁵Bua bitadi bia pa tshia dikumi tshitutshidi tupeta kabidi, ne bua bitadi bishilangane bu bia pa luepu, tudi tulekela bionsu bungi buabi.

³⁶Bualu ebu butudi bashindika kabuena buandamuka too ne kashidi.”

³⁷Keba mua kutentula malu onsu adi mu mukanda ewu, kabidi wambike Yonatane mukanda bua auteke patoke ku mukuna, muaba udi nzubu wa tshijila, bua bantu bonsu baumone, baubale.

³⁸Mukalenga Demetriyuse umona muvuaye ulombola ditunga mu bupole, kakutshiyi muntu udi utua nkanana bua bumfumu buende, kumbushaye bantu bonsu bavua mu tshiluilu. Kutumaye muntu kuabu muntu kuabu, pa kumusha amu bisumbu bia bena mvita benyi, bavua mukalenga muangate mu bidila bia bena Ngreke. Ke muvua bena mvita bonsu ba bisumbu bivuaye mupiane kudi batatuende bamulekela lukinu.

³⁹Nanku, Trifene uvua uditua kumpala ku tshia Aleksandre, umona muvua bena mvita bonsu banyingalala bua diyi dia mukalenga, kuyaye mua Yamlikose, muena Arabe,[180] uvua mukoleshe Antiyokuse, muana wa Aleksandre.

⁴⁰Kumuenzejaye ku bukole bua amupe muana bua apingane tatuende mu bukalenga. Trifene kumumanyisha kabidi muvua Demetriyuse mutume diyi, kabidi muvua bisumbu bionsu bia bena mvita bimubenga. Kushalaye momu matuku mavule.

⁴¹Kadi Yonatane kulomba mukalenga Demetriyuse bua apatule bena mvita bende bavua basomba mu nzubu wa bena mvita mu Yerushalayime, ne mu minga nzubu ya bena mvita ya mu Yudeya. Bualu bonsu bavua baluisha amu bena Izrayele.

⁴²Ke Demetriyuse kuandamuna Yonatane ne: — Nengenze bionsu biudi ulomba kundi, kadi pikalaku mushindu, nenkutumbishe, nentumbishe kabidi ditunga dienu.

⁴³Kadi bua mpindiewu, anji kuntumina bantu badi mua kuluangana pamue nanyi, bualu bena mvita banyi mbantombokele.

⁴⁴Yonatane kumutumina diakamue bantu, baluanganyi ba bukitu binunu bisatu mu Antiyokiya. Demetriyuse ubamona, kusanka bikole.

⁴⁵Bena mu tshimenga kudisanga munda mua tshimenga, batua ku binunu lukama ne makumi abidi, ne lungenyi lua kujimija mukalenga.

⁴⁶Demetriyuse kusokoma mu nzubu wa bukalenga. Pine apu, bantu ba mu tshimenga kuwula misesu tente, kutuadija mvita.

⁴⁷Mukalenga kubikila bena Yuda bua bamuambuluishe. Bobu kudisanga kudiye. Pashishe kutangalakabu mu tshimenga. Dituku adi kushipabu bantu batua ku binunu lukama, nansha pa mutu.

⁴⁸Dituku adi kabidi kuoshabu tshimenga, kusangishabu bia mu mvita bivule. Ke mushindu wakapanda mukalenga nanku.

⁴⁹Bantu bamona ne: bena Yuda bashadi bamfumu ba tshimenga, kushikilabu. Ke kuasabu dilomba kudi mukalenga, bela mbila mikole, bamba ne:

⁵⁰— Tumvuangane nebe, ambila bena Yuda balekele kunduisha, balekele kabidi kuluisha tshimenga.

⁵¹Bena ditunga kulekela bia lufu panshi, kumyuangana ne mukalenga. Bena Yuda pabu kupeta lumu kumpala kua mukalenga ne kua bonsu ba mu bukalenga buende. Ke bena Yuda kupingana mu Yerushalayime ne lumu lunene, kabidi ne bintu bivuabu bapawule bivule.

⁵²Pine apu, mukalenga Demetriyuse kushindama mu bukalenga. Ditunga kupeta bupole mu bukalenga buende.

⁵³Kadi Demetriyuse kupanga mua kulama malaya avuaye mulaye Yonatane, katshiyi mua kuvuluka bilenga bivua Yonatane mumuenzele. Kumukengeshaye bikole.

⁵⁴Matuku makese apita, ke Trifene kushisha kufika ne Antiyokuse.[181] Nansha mutshivuaye muana mutekete, Antiyokuse upetele bukalenga, kuasa tshifulu tshia bukalenga.

⁵⁵Bisumbu bionsu bia bena mvita bivua bipata kudi Demetriyuse, kudisanga kudi Antiyokuse. Kuluishabu Demetriyuse, kumutshimuna, kumuipata.

⁵⁶Trifene kunyenga nyama ya nzevu ya mvita, kukuata Antiyokiya.

⁵⁷Antiyokuse VI muana, kufundila Yonatane mukanda, wamba ne: “Ndi nkujadika mu muanzu wa mutuangaji munene. Ndi nkuteka mfumu wa bitupa binayi[182] bia buloba. Ndi nkupesha muanzu wa ‘mulunda wa Mukalenga.’ ”

⁵⁸Kumutuminaye makopu a mpawungi a kudila ku mesa, ne bionsu bidi bitangila didia nabi. Kumuanyishaye bua anuine mu dikopu dia mpawungi, bua avuale ne tshilamba tshikunze tshia bukalenga ne ndami ya mpawungi[183] miasaku.

⁵⁹Kutekaye Simeyone, muanabu ne Yonatane, bu mulombodi munene wa bena mvita wa buloba biangatshile ku mikuna ya Tire[184] too ne ku mikalu ya Ejipitu.

⁶⁰Yonatane kuya, kutambakana mu buloba bunene bua Siriya mu bimenga bionsu. Bisumbu bionsu bia bena nwita kudisanga nende bua kuluangana pamue nende. Kufikaye mu Askalone.[185] Bantu kumuakidila ne disanka.

⁶¹Umukamu, kuyaye mu Ngaza.[186] Kadi bena ditunga kuinjilabu biibi bia tshimenga. Kuidikijaye mua kukuata tshimenga atshi. Kuoshaye miaba ya pabuipi natshi, kupawula bintu.

⁶²Bantu ba mu Ngaza diba adi kusengelela Yonatane, balomba ditalala, yeye kuanyisha. Kadi kukuataye bana balume ba bamfumu babu lukola, kubatuma mu Yerushalayime. Pashishe kusololaye ditunga too ne ku Damase.

⁶³Yonatane kumvua ne: banene ba tshiluilu tshia Demetriyuse bakadi pepi ne Kadeshe[187] ka mu Ngalileya, ne tshisumbu tshinene tshia bena mvita, bua kumupumbisha mudimu wende.

⁶⁴Kuyaye bua kusambakena nabu. Uvua mushiye muanabu Simeyone mu Yudeya.

⁶⁵Simeyone uvua muele mualu wa mvita kumpala kua Bete-Sure[188] tshimenga tshivuaye mujinga mutshiluisha matuku mavule.

⁶⁶Bena tshimenga kumulomba bua abapeshe ditalala. Simeyone kuitaba. Kadi kubipataye mu tshimenga. Kuangataye miaba yonsu, kutekamu bena mvita.

⁶⁷Kadi Yonatane ne bena tshiluilu bende, kuasabu mitanda pa buipi ne dijiba dia Ngenezarete. Dinda dionsu kufikabu mu mpata wa Asore.[189]

⁶⁸Pine apu, tshiluilu tshia benyi tshivua tshisemena bua kusambakena nabu mu mpata awu. Kadi bakavua bamane kusokoka tshisumbu tshia bena mvita mu mikuna, bua kuluisha Yonatane. Bakuabu bavule bavua baya bua kubanga mvita.

⁶⁹Kadi tshisumbu tshivua tshisokome kumueneka, kuluangana mvita.

⁷⁰Bena mvita bonsu ba Yonatane kunyema. Muntu nansha umue kavua mushale pa kumbusha balombodi ba bena mvita babidi: Matatiyase, muana wa Absalome, ne Yudase, muana wa Kalfi.

⁷¹Nanku Yonatane kupanda bilamba biende, kuela buloba mu mutu, kusengelela Mvidi Mukulu.

⁷²Pashishe kupinganaye bua kubunda baluishi. Kubatshiminaye. Ke bobu kunyema.

⁷³Bena tshiluilu tshiende bakavua banyema Yonatane, bamona muvuaye mutshimune, kupinganabu kabidi kudiye bua kumuambuluisha. Kutuadijabu kulondakaja baluishi too ne ku Kadeshe. Kufikabu ne mu mitanda ya baluishi. Bobu kuasamu.

⁷⁴Dituku adi, musumba mukese wa benyi kufua bu binunu bisatu. Kadi Yonatane kupingana mu Yerushalayime.