Read Tshiluba 1 Bamakabe 12 Bible Online

1 Bamakabe 12 - Tshiluba bible

1 Bamakabe 12

¹Yonatane umona nuwuaye mupete dikasa dimpe mu mvita, kusungulaye bamienampala. Kubatumaye ku bena Rome bua kujadika ne kukolesha diumvuangana dia bulunda buabu ne bena Rome.[190]

²Mikanda ya mushindu umue, kuyituminaye kabidi bena Sparte ne bikuabu bimenga kabidi.

³Bamienampala kuya mu Rome. Bafika, kubabuejabu mu nzubu wa tshimamuende wa bukalenga. Kuambabu miaku eyi: — Yonatane, mutuangaji munene, ne bena Yuda, mbatutume kunudi bua kukolesha bulunda ne diumvuangana nenu, bu muvuabi bangabanga.

⁴Bena tshimamuende wa bukalenga, kubapa mikanda ya kupa bamfumu ba matunga onsu avuabu ne bua kukosolola, bua bamfumu bambuluishe bamienampala, bua bapingane kuabu bimpe.

⁵Telejayi muvua mukanda uvua Yonatane mutumine bena Sparte:

⁶— Meme Yonatane, mutuangaji munene, pamue ne Tshipangu tshia bakulu ba ditunga, batuangaji ne bana betu bakuabu bonsu bena Yuda, tudi tutumina bana[191] betu bena Sparte mukanda ewu. Muoyi wenu bonsu.

⁷Ku kale, mukalenga Areyose, uvua mudie bumfumu munkatshi muenu, uvua mutumine Onyase mutuangaji munene wetu mukanda. Uvua mufunde ne: tudi bana benu. Bua kujadika, tangila miaku ya mukanda utudi tusakidila ku wetu.[192]

⁸Onyase kuakidila ne musangelu muntu uvua mufike ne mukanda. Kubalaye mukanda uvua uleja patoke dijinga dia mfumu dia kumyuangana netu ne kudia netu tshioyu.

⁹Kadi, katuena tukengela kudia tshiovu ne bantu, bualu mikanda ya tshijila itudi nayi idi bukole buetu.

¹⁰Kadi tuvua basue kutuma bantu bua kubanga tshiakabidi diumvuangana ne bulunda buetu nenu. Katuena basue kuikala benyi kunudi. Bualu bidimu bivule biapitshi, katshia nuatutumina bantu,

¹¹tudi amu tunuvuluka mu bibilu ne matuku makuabu, misangu yonsu itudi tulambula milambu, tutendelela. Ke mudi bena muntu ne bua kuenzelangana.

¹²Tudi tusanka bua lumu luenu.

¹³Kadi tuetu, makenga ne mvita biatupitshi. Kabidi bakalenga ba ku mitumba yetu bavua amu batuluisha.

¹⁴Mu mvita eyi katuvua basue kunusuya, nansha bantu bakuabu batudi batua nabu ndondu, nansha balunda betu.

¹⁵Amu Mvidi Mukulu ke uvua mutuambuluishe. Mmutusungidile kudi baluishi betu, bobu kufua bundu.

¹⁶Ke patudi basungule Numenyuse, muana wa Antiyokuse, ne Antipatere, muana wa Yasone, bua tuetu kubatuma kudi bena Rome bua kubangulula bulunda ne diumvuangana dietu dia bangabanga.

¹⁷Tuvua babafundile kabidi bua bafike ne kuenu aku. Banuele muoyi, banupe ne mukanda wetu wa dibangulula dia tshioyu ne dia diumvuangana dietu.

¹⁸Anyishayi bua nutuandamune pa bualu ebu.

¹⁹Ke mukanda uvuabu batumine Onyase ku kale ewu:

²⁰— Meme Oreyose, mukalenga wa bena Sparte, ndi ntumina Onyase, mutuangaji munene, mukanda ewu. Muoyi webe awu.

²¹Tuamonyi mu mukanda wa kale mudi bena Sparte bikale bana babu ne bena Yuda. Bonsu buetu tudi ndelanganyi ya Abrahame.

²²Kadi mpindiewu, bu mutuamanyi nanku, bidi bimpe bua nutufundile, nutumanyishe malu a kuenu aku.

²³Tudi tunumanyisha ne: “Tudi basue bua bimuna bietu, nansha biuma bietu bikale bu bienu. Nanku biuma bienu nebikale bu bietu.” Tudi bafundile mienampala yetu bua banumanyishe meji atudi bele.

²⁴Yonatane kumvua ne: bamfumu banene ba bena mvita ba Demetriyuse mbafike tshiakabidi ne musumba mupite wa kumpala, bua kumuluisha.

²⁵Kumukaye diakamue mu Yerushalayime bua kusangila nabu mu buloba bua Amate.[193] Bualu kavua musue bua bapete mushindu wa kubuela mu ditunga diende to.

²⁶Kutumaye batentekedi mu mitanda yabu. Bapingana kumuambilabu muvua baluishi badilongolole muabu muonsu bua kujula mvita butuku.

²⁷Dilolu, Yonatane kuambila bena mvita bende bua batabale, bikale ne bia lufu mu bianza, bindila mvita. Kutekaye kabidi bena mvita nseke yonsu bua kulama ne kutentekela mitanda.

²⁸Baluishi bumvua muvua Yonatane mubindile bua mvita, buowa kubakuata ne luzakalu, kutemeshabu kapia mu mitanda, kunyemabu.[194]

²⁹Yonatane ne bena diende mbalue kumanya diumbuka dia baluishi mu mitanda amu dinda, bualu bavua bamona kapia kashale katema mu mitanda.

³⁰Ke Yonatane kubalondakaja. Kadi kena mubapete, bualu bakavua bamane kusabuka musulu wa Eletere.[195]

³¹Yonatane kukudimukila bena Arabe bavuabu babikila ne: bena Zabade.[196] Kubatshimunaye, kupawula ne bintu biabu.

³²Pashishe, kutulabu mitanda. Kuendakananganabu tshitupa tshia buloba atshi tshijima. Kufikabu ne ku Damase.

³³Simeyone pende uvua ukosolola ditunga too ne ku Askalone ne ku bimenga bikolesha bia pabuipi. Kufikaye kabidi mu Yope,[197] kuasaye momu.

³⁴Bualu uvua mumvue ne bena ditunga badi basue kupa Demetriyuse tshimenga. Ke yeye kuteka mu Yope tshisumbu tshia bena mvita bua kutshilama.

³⁵Yonatane upingana mu Yerushalayime, kusangishaye bakulu ba ditunga, kushindika nabu bua kukolesha bimana bidi mu Yudeya,

³⁶bua kubandisha bimana bia Yerushalayime, kabidi ne bua kuasa tshimana tshile tshidi tshikosolola tshimenga ne nzubu wa bena mvita, bua bena mvita ba Demetriyuse bashale amu mu nzubu, kabamonyi mua kupana nansha kusumba bintu biabu.

³⁷Bantu kusangila bua kuasulula tshimenga, bualu luseke ludi diba dipatukila lua tshimenga, tshitupa tshia tshimana tshivua tshiupuke. Kulongololabu kabidi bilenga tshitupa tshia tshimenga tshivuabu babikila ne: Kafenata.[198]

³⁸Simeyone kuasulula kabidi tshimenga tshia Adida[199] mu mpata. Kutshikoleshaye, kuelaku biibi ne mabaya.

³⁹Trifone uvua ukeba kudia bumfumu mu buloba bunene bua Siriya, ukeba bua kuikala mukalenga pa mutu pa mukalenga Antiyokuse VI.[200]

⁴⁰Kadi uvua utshina ne: Yonatane udi mua kumujikila njila, kabidi kumuluisha. Nenku kukebaye mua kukuata Yonatane bua kumushipa. Kuyaye mu Bete-Sheyane.[201]

⁴¹Yonatane kuangata bena mvita binunu makumi anayi, bavua bamanye mvita bapiluke bua kuya kumuluisha. Kufikabu mu Bete-Sheyane.

⁴²Trifone umona ne: Yonatane udi ne bena mvita bavule, kupangilaye mua kumuluisha.

⁴³Trifone kuakidila Yonatane ne musangelu, kumuleja balunda bende, kumupa malambi. Kutuminaye balunda bende ne tshiluilu tshiende diyi dia kutumikila Yonatane, amu bu mudibu bamutumikila yeye muine.

⁴⁴Kuambilaye Yonatane ne: — Udi upungijija bantu bebe bonsu aba, patudi katuyi ne mvita bua tshinyi?

⁴⁵Tuma bena mvita kuabu, angata amu badi ne bua kukulama. Tuetu tuye nebe mu Ptolemayise. Ndi nkupa tshimenga atshi ne nzubu ya bena mvita idi mu bimenga bikuabu, ne bisumbu bia bena mvita ne banene ba mu bukalenga. Pashishe nempingane kuanyi. Ke bualu bundi muvuile abu.

⁴⁶Yonatane kuanyisha. Kuenzaye mumuambidi Trifone amu. Kutangalajaye tshiluilu. Kutshipingajaye ku bena Yuda.

⁴⁷Kulamaye bantu binunu amu bisatu. Kutekaye binunu bibidi mu Ngalileya. Kushala ne tshinunu bua kumulamatshi.

⁴⁸Kadi Yonatane ubuela amu mu tshimenga tshia Ptolemayise, bantu ba mu tshimenga kuinjila biibi. Kumukuatabu, kushipa bonsu bavua babuela nende.

⁴⁹Trifone kutuma bisumbu bia bena mvita ne bia babandi ba pa tubalu mu Ngalileya ne mu Mpata munene[202] bua kushipamu bena mvita bakuabu ba Yonatane.

⁵⁰Bavua mu Ngalileya kujadika ne mbakuate mutuangaji munene, kabidi mbashipe ne bonsu bavuaye nabu. Kukoleshanganabu ku muoyi. Kuyabu mu mvita basuikakanangana, badilongolola ku mvita.

⁵¹Baluishi babu bavua babalondakaja, bamona ne: bena mvita badi bakeba kuluangana mvita muabu muonsu, kupinganabu.

⁵²Ke bena mvita ba bena Yuda kupingana bonsu bilenga mu Yudeya. Kudiabu Yonatane ne bavuaye nabu. Kudiumvuabu ne bowa bunene. Bena Izrayele bonsu bavua mu madilu manene.

⁵³Diba adi bena mutumba babu bonsu bena bisamba bikuabu bavua bakeba mua kubabutula. Bavua bamba ne: “Tubaluishayi mpindiewu, netubabutule pa buloba. Kabatshiena nansha ne mfumu, nansha ne udi mua kubambuluisha kabidi to. Nanku muntu kakubavuluka kabidi panu to.”