Read Tshiluba 1 Bamakabe 13 Bible Online

1 Bamakabe 13 - Tshiluba bible

1 Bamakabe 13

¹Simeyone kupeta lumu muvua Trifone musangishe bena mvita bavule bua kuya kunyangakaja ditunga dia bena Yuda.

²Uvua mumone kabidi muvua bantu ne bowa, bazakala bua mvita. Ke kuyaye mu Yerushalayime bua kusangisha bantu.

³Kuambilaye bantu, ubashindikila ne: — Nuenu bonsu nudi bamanye bituvua bakumbaje bana betu ne meme muine, ne bonsu bena diku dianyi, bualu bua diyi dia mikenji yetu ne bua nzubu wa Mvidi Mukulu. Nudi bamanye mvita ituvua basangane ne makenga atuvua bapete.

⁴Bana betu bonsu mbafuile tshisamba tshietu tshia bena Izrayele. Meme ndi mushale amu nkayanyi.

⁵Meme tshiena ngela meji bua kudipandisha mu tshikondu etshi tshia dikenga. Bualu tshiena mupite bana betu bonsu abu ku bulenga to.

⁶Kadi meme nendumbuluile ditunga dietu, nzubu wetu wa Mvidi Mukulu, bakaji benu ne bana benu. Bualu bu mudibu ne lukinu, bantu ba bisamba bikuabu mbumvuangane bua kutubutula.

⁷Simeyone wamba amu miaku ayi, bonso kukola muoyi.

⁸Pashishe bena Yuda kumuandamuna bela mbila ne: — Amu wewe ke mulombodi wetu mpindiewu pa mutu pa bana benu aba Yudase ne Yonatane.

⁹Lombola mvita. Tuetu netuenze muonsu muwatuambila.

¹⁰Ke Simeyone kusangisha bena mvita bonsu. Kuluijakajaye bua kuibaka bimana bia tshimenga tshia Yerushalayime kumana. Kukoleshaye tshimenga nseke yonsu.

¹¹Kutumaye Yonatane muana wa Absalome mu Yope[203] pamue ne musumba munene wa bena mvita. Yonatane ufika, kuipata bena tshi menga, kuasamu.

¹²Trifone uvua mumbuke mu tshimenga tshia Ptolemayise,[204] ne bena mvita basule bua kubuela mu ditunga dia Yudeya. Pine apu uvua ne Yonatane muanabu ne Simeyone, uvuaye mukuate mu mvita.

¹³Simeyone kuvuaye kuasa yende mitanda mu Adida[205] ku mpenga kua mpata.

¹⁴Trifene umvua ne: Simeyone wapinganyi muanabu Yonatane mu bumfumu, kabidi ne udi udilongolola mua kuluangana mvita, ke kutuminaye Simeyone bantu ne mukenji, wamba ne:

¹⁵— Midimu ivua muanenu Yonatane ukuata, uvua ne bua kufuta mukalenga, kadi kavua mufute to. Ke patudi bamukuate mu lukanu.

¹⁶Nenku, tumaku nkanu mitoke ya mushinga mukole ya kilo 2.700 ne bana bende ba balume babidi bu tshieya. Bualu tudi tutshina bua patuikala bamupatula mu lukanu kavu kutomboka. Kadi Patuamona bana, nenku netumupatule mu lukanu.

¹⁷Simeyone uvua mumanye ne: miaku ayi nya dishima. Kadi kutumaye amu bantu bua bangate nkanu ne bana, utshina bua kupangakana ne bena Yuda.

¹⁸Bavua mua kuamba ne: “Yonatane wafu amu bualu Simeyone, kena mutumine Trifene bana ne nkanu mitoke ya mushinga mukole.”

¹⁹Ke kutumaye bana ne nkanu mitoke ya mushinga mukole kilo 2.700. Kadi Trifene uvua ushima, kena mupatule Yonatane mu lukanu to.

²⁰Nanku Trifene kubanga luendu bua kukuata ditunga ne kudinyanga. Kubendaye njila wa ku Adora,[206] yeye ne bena mvita bende. Kadi Simeyone ne tshiluilu tshiende tshivua amu tshimulondakaja, tshimutatshisha bikole.

²¹Pine apu, bantu bavua balame nzubu mukolesha mu tshimenga tshia Yerushalayime, kutumina Trifene mukenji, bamubikila lukasa bua ayile ku tshipela bua kupetangana nabu, kabidi abatumine bia kudia.

²²Trifene uvua ulongolola tshiluilu tshijima tshia babandi ba pa tubalu bua kuya ku luendu alu. Kadi butuku abu, mvula mukole wa neje kuloka, kumupangisha mua kuyaye ku luendu alu. Nanku kuyilaye njila wa ditunga dia Ngilaade.[207]

²³Ufika pepi ne Baskama,[208] kushipaye Yonatane. Kumujikaye muine amu.

²⁴Pashishe Trifene kupingana mu ditunga diabu.

²⁵Simeyone kutuma bantu bua bangate tshitalu tshia Yonatane. Kutshijikaye mu Modine,[209] tshimenga tshia bankambua bende.

²⁶Bena Izrayele bonsu kudila Yonatane, kuenza madilu matuku mavule.

²⁷Simeyone kuibakisha bibumba pa lukita lua tatuende ne pa ya bana babu, bua bantu bikale bayimuena kule. Kumpala nansha kunyima kuvua kulamika mabue mafinunuke.

²⁸Kuimanyikaye bibumba muanda mutekete mu mulongu, bua tatuende, mamuende, ne bua bana babu ba balume banayi.

²⁹Uvua mubielele lupangu bua makunji manene. Ku makunji eku uvua muzoleku bia lufu bia bena mvita, bua bikale batuluka matuku onsu Bamakabe. Ku luseke lua bia lufu, uvua muzoleku majuwa a miongumiongu, bua bonsu bavua bayile mu mayi manene[210] babimone.

³⁰Ke mudi nkita ivua Simeyone muibakishe mu Modine nanku. Itshidiku too ne ku lelu.

³¹Tshikondu atshi, Trifene ne budimu bupite, kushipesha ne Antiyokuse mukalenga mutshikale muana.[211]

³²Kudiaye bukalenga buende bua mu buloba bunene bua Siriya, [212] kuasa tshifulu tshia bukalenga. Ditunga kupeta makenga mavule bualu bua mukalenga awu.

³³Simeyone kuasulula nzubu ya bimana bikolesha ya mu Yudeya, kuyinyungulula ne tuleya tule, ne bimana bikole, bikale ne biibi bipayika mabaya. Ke kutekeshaye ne bia kudia mu nzubu amu.

³⁴Pashishe Simeyone, kutumina mukalenga Demetriyuse II ba mienampala, umulomba bua bena Yuda kabalambudi bitadi mu ditunga, bualu Trifone uvua munyangakaje bintu bia ditunga diabu.

³⁵Ke mukalenga Demetriyuse kuanyisha, kuandamuna miaku eyi mu mukanda udi ulonda ewu:

³⁶— Meme mukalenga Demetriyuse, ndi ntumina Simeyone, mutuangaji munene, kabidi mulunda wa bakalenga, pamue ne bena Yuda ne bakulu ba ditunga muoyi.

³⁷Tuapetshi nkata wa mpawungi ne dilala dia butumbi binudi batutumina bu tshintu tshia disanka. Tudi basue bua tutue ndondu bua bupole buikale munkatshi muetu. Netufundile bena mudimu ba mu bukalenga bua kabanulambuishi bitadi.

³⁸Bionsu bitudi bamane kuamba bualu buenu, tudi tubishindika.[213] Kabidi nzubu ya bimana bikole inudi base idi ishala yenu.

³⁹Tudi Umufuila luse bua tulema ne ntupakanyi yenu binudi benze too ne mpindiewu. Katuena tulomba kabidi tshitadi tshimvua ne bua kufuta, nansha bitadi bikuabu bivuabu balomba ne ku lelu mu Yerushalayime.

⁴⁰Pikala ba kunudi bakanyine kudifundisha mu bena mvita ba mukalenga, bidi amu bimpe bua tuetu nenu tuikale ne bupole!

⁴¹Mu tshidimu tshia 170,[214] bena Izrayele bavua bapatuka mu bupika bua matunga a bende.

⁴²Bavua batuadija kufunda mu mikanda ne: “Mu tshidimu tshia kumpala tshia Simeyone, mutuangaji munene, mulombodi wa bena mvita, mfumu wa bena Yuda.”

⁴³Mu matuku awu, Simeyone kunyungulukila Ngezere[215] ne tshiluilu tshiende, kuibaka kaleya kadibu mua kuendesha, bua kuya naku kumpala mu mvita, kukasemeja pepi ne tshimenga. Kuluishaye kamue kaleya ka mu tshimenga. Kukakuataye.

⁴⁴Bantu bavua mu kaleya ka kuendesha kudiela panshi mu tshimenga. Bowa bunene kukuata bantu bonsu.

⁴⁵Bena mu tshimenga, pamue ne bakaji ne bana, kubanda pa tshimana. Kupandabu bilamba biabu, bela mbila mikole, balomba Simeyone bua abafuile luse.

⁴⁶Bavua bamba ne: — Kusombodi bua bubi butuvua benze, kadi utufuile luse!

⁴⁷Simeyone kuitaba, kulekeshaye mvita. Kadi kubipataye mu tshimenga. Kumushaye mikiya ivua ku nzubu ivuabu batendelala nwidie. Pashishe kubuelaye ne bena mvita bende mu Ngezere bimba misambu, batumbisha Mvidi Mukulu.

⁴⁸Kumushaye bubi buonsu mu tshimenga. Kutekayemu bantu bavua balamate Mvidi Mukulu. Kukoleshaye bimana bia tshimenga, kuasamu nzubu wende.

⁴⁹Kadi bonsu bavua mu nzubu wa bimana bikolesha mu Yerushalayime, bavua bapanga mua kupatuka bua kuya kusakula mu ditunga,[216] nansha kupingana mu nzubu. Nanku nzala kubasuma bikole kushipa bantu bavule.

⁵⁰Kulombabu Simeyone bua abapeshe ditalala. Yeye kuanyisha. Kubipataye mu nzubu wa bimana bikolesha. Kumushaye mikiya ivuamu.

⁵¹Bena Yuda kubuelabu mu nzubu wa bimana bikolesha awu mu matuku makumi abidi ne asatu a ngondu muibidi wa tshidimu tshia 171.[217] Bavua babuelamu bela tunkunduluila bambula malala ne lunkombe, lumembu ne lunzenze bienda bidila, misambu ikungula, bualu Izrayele wabutulu muluishi wende munene wamuipatshi.

⁵²Simeyone kutuma diyi bua tshidimu tshionsu, padi dituku adi dikumbana, benza tshibilu ne disanka. Kukoleshaye mukuna wa tshijila uvua mutangilangane ne nzubu wa bimana bikolesha. Kusombaye popu ne bena mvita bende.

⁵³Simeyone umona ne muanende Yowanane wakolu, kuelaye meji mua kumuteka mfumu wa tshiluilu. Yowanane uvua muye kusombela mu Ngezere.