Read Tshiluba 1 Bamakabe 14 Bible Online

1 Bamakabe 14 - Tshiluba bible

1 Bamakabe 14

¹Mukalenga Demetriyuse II kusangisha tshiluilu tshiende, mu tshidimu tshia 172, bua kuya ku ditunga dia Madayi. Uvua ukeba diambuluisha bua amone mua kuluisha Trifone.[218]

²Arsake[219] mukalenga wa bena Persa ne bena Madayi umvua ne: Demetriyuse mmubuele mu buloba buanyi, kutumaye umue wa ku banene ba tshiluilu tshiende ne bena mvita bua kukuata Demetriyuse ne muoyi.

³Awu kuyaye kuluisha tshiluilu tshia Demetriyuse, kumukuata, kuya nende kua Arsake. Awu kumuela mu lukanu.

⁴Ditunga dia Yudeya kushala talalaa mu tshikondu tshivua Simeyone mudie bukalenga. Simeyone uvua ukeba bua ditunga dilengele. Bantu bende kuanyisha bukalenga buende ne lumu luende matuku onsu avuaye ne muoyi awu.

⁵Lumu luende kuvula pavuaye mukuate tshisabu tshia Yope;[220] munzuluile bena Yuda njila wa kuya ku bidiila bia Ngreke.

⁶Kudiundishaye mikalu ya ditunga diende, kulama ditunga dine bimpe.

⁷Kupingajaye bantu bavule bavua bakuata ku bupika mu ditunga. Kukuataye tshimenga tshia Ngezere, tshia Bete-Sure[221] ne nzubu mukolesha wa Yerushalayime. Kadi kumbushaye mikiya yonsu ivuaku. Muntu nansha umue kavua utua nkanana kumpala kuende.

⁸Bantu kudima ne ditalala. Bia pa madimi kuika, mitshi ya mu mpata kukuama.

⁹Bakulu ba mu ditunga pavuabu basombe mu bialu bavua balonda amu malu a disanka. Bansonga bavua batuala bilamba bia mvita ne disanka.

¹⁰Simeyone utua upa bantu batua mu bimenga bia kudia, kabidi ne bia lufu bua kulama nabi ditunga. Nenku batua batela dina diende too ne ku ndekelu kua buloba.

¹¹Kubuejaye bupole mu ditunga, bena Izrayele kusanka bikole.

¹²Muntu yonsu uvua musombe muinshi mua mitshi yende ya nwinyo ne ya mfiku mu bupole. Muntu nansha umue kavua ubakuatshisha bowa.[222]

¹³Baluishi bonsu kumuka mu Yudeya. Kuipatabu bakalenga ba matunga a bantu benyi.

¹⁴Simeyone uvua wambuluisha bapele bonsu ba mu tshisamba tshiende. Utua ulama meyi a Mvidi Mukulu, wipata bena Yudabonsu batua babenga kuitaba meyi awu.

¹⁵Kutumbishaye nzubu wa Mvidi Mukulu ne lumu lunene, kutekaye mu nzubu amu bintu bitule bia tshijila.

¹⁶Bena Rome ne bena Sparte kumvuabu lumu ne: Yonatane wafu, kumudilabu bikole.

¹⁷Kadi bavua bamanye ne: muanabu Simeyone mutuangaji munene, utua mumupingane pa muaba wende. Uvua mudie kabidi bukalenga mu ditunga dijima dia Yudeya ne mu bimenga biadi.

¹⁸Kumufundilabu miaku pa bitata bia tshiamu tshikunze, idi iyuluija ndondu ne bulunda bivuabu batue ne bana babu: Yudase ne Yonatane.[223]

¹⁹Kubalabu bitata ebi bena Yerushalayime bonsu basangile.

²⁰Telejayi mutua miaku itua bena Sparte bafunde: — Tuetu bamfumu ne bena tshimenga tshia Sparte, tudi tutumina Simeyone, mutuangaji munene, pamue ne bakulu, batuangaji ne bena Yuda bonsu mukanda. Bana betu: Muoyi wenu ewu.

²¹Mienampala yenu inuvua batutumina kunu, mmituambile muvuabu banutumbishe, banunemeke. Tudi basanke bua luendu luabu alu.

²²Tuafundi bionsu bidibu bakula mu mikanda ya ditunga ne: Numenyuse, muana wa Antiyokuse, kabidi ne Antipatere, muana wa Yasone,[224] mienampala ya bena Yuda ivua mifike kunu bua kuenzulula netu ndondu ne bulunda.

²³Bualu ebu bavua busankisha bena tshimenga tshietu. Batua bakidila ne musangelu mienampala ayi, bateka mukanda wa malu avuabu bamba mu tshilaminu tshia mikanda ya ditunga, bua bena Sparte bashale ne tshitulukilu. Batua batumine kabidi Simeyone, mutuangaji munene mukanda mutentulula miaku ya mukanda awu.

²⁴Pashishe,[225] ke Simeyone kutuma Numenyuse ku Rome ne ngabu munene wa mpawungi wa mushinga wa kilo 500 ya tshiamu tshitoke tshia mushinga mukole, bua kushindika ndondu yabu ne bena Rome.

²⁵Bena Yuda bumvua lumu lua malu onsu awu, kuambilanganabu ne: — Mutudi mua kuela Simeyone ne bana bende tuasakidila mbishi?

²⁶Bualu yeye ne bana babu, kabidi ne diku dia tatuende dijima, mbadileje bilobu bia mvita. Kuipataye baluishi ba bena Izrayele, kubatshimuna. Tshisamba tshietu kupeta budikadidi. Kufundabu miaku pa bitata bia tshiamu tshikunze, kubilamika ku makunji manene avua pa mukuna wa Siyone.

²⁷Monayi muvua miaku ya mu mukanda yamba: — Mu dituku dia dikumi ne muanda mukulu dia ngondu wa Elule, wa tshidimu tshia 172, mu tshidimu tshisatu tshia bulombodi bua Simeyone, mutuangaji munene,[226]

²⁸batuangaji, bena tshimenga, bamfumu ne bakulu ba mu ditunga bavua basangile pamue mu tshipangu. Bavua bajadika bidi bilonda ebi:

²⁹Munkatshi mua nwita mivule ivua mikuate ditunga, Simeyone, muana wa Matatiyase, wa ku ndelanganyi ya Yoyaribe[227] ne bana babu, bavua badifila mu njiwu, baluisha bena lukuna ba ditunga diabu. Bavua basue kusungidila nzubu wetu wa Mvidi Mukulu ne mikenji yetu. Ke padi kabidi ditunga dietu ne lumu lunene.

³⁰Yonatane kusangisha tshisamba tshietu mu bobumue. Kupetaye muanzu wa mutuangaji munene bangabanga ne lufu luende.

³¹Baluishi ba bena Yuda kujinga mua kubuela mu ditunga dietu bua kudinyanga, kunyanga kabidi ne nzubu wa Mvidi Mukulu.

³²Ke Simeyone kuangata bumfumu, kubaluisha bua kusungidila ditunga diabu. Wakatula tshitupa tshinene tshia bintu biende. Kupaye bena mvita ba ditunga bia lufu ne difutu bua benzele ditunga diabu mudimu.

³³Kukoleshaye bimana bia bimenga bia Yudeya ne, ku mikalu ya ditunga, Bete-Sure,[228] tshimenga tshivua baluishi balamina bia mvita. Kutekayemu tshisumbu tshia bena mvita ba bena Yuda.

³⁴Kukoleshaye tshimenga tshia Yope tshivua ku muelelu wa mayi manene, kabidi tshimenga tshia Ngezere tshivua pamue ne Asdode[229] muaba uvua baluishi basomba bangabanga. Simeyone kuteka momu bena Yuda, kuteka kabidi mu bimenga bionsu bibidi bintu bivua bantu bakengela.

³⁵Bantu kumona muvua Simeyone ne muoyi umue, ujinga kupetesha ditunga lumu, kumutekabu mfumu ne mutuangaji munene. Bavua benza nanku bua bilenga bionsu bivuaye wenzela ditunga, bua buakane buende, kabidi bualu uvua uditatshisha ku dituku ku dituku amu bua ditunga diende diye kumpala. Simeyone uvua ukeba mishindu yonsu bua bantu bende bapete lumu.

³⁶Patshivuaye ne muoyi, kuipatabu benyi bonsu bavua basomba mu Yudeya, ne bonsu bavua basomba mu Yerushalayime, mu tshimenga tshia Davide. Bantu aba bavua bibaka nzubu wa bimana bikolesha; bavua bapatukamu bua kunyanga ku mpenga kua nzubu wa Mvidi Mukulu ne kupetesha muaba wa tshijila mikiya.

³⁷Simeyone kuteka bena mvita ba bena Yuda mu nzubu mukolesha, bua balame nzubu awu, bua ditunga ne bena mu Yerushalayime bikale ne bupole. Kutumbulaye kabidi bimana bia mu tshimenga mulu.

³⁸Pa kumona bionsu abi, ke mukalenga Demetriyuse II, kushindika Simeyone mu muanzu wa mutuangaji munene.

³⁹Kumutekaye mulongu wa “mulunda wa Mukalenga,” kumupa lumu.

⁴⁰Bualu uvua mumane kumvua ne: bena Rome badi bumvuangana ne bena Yuda, babatangila bu balunda babu, batua nabu ndondo babanemeka bu bana babu, bakidila mienampala ya Simeyone ne disanka.

⁴¹Bavua bambilakabidi Demetriyuse ne: bena Yuda ne batuangaji babu[230] mbateke Simeyone mfumu kabidi mutuangaji munene, banyishe nanku kabidi bua ndelanganyi yende too ne ku diba diafika muambi mulelela.

⁴²Bavua bateka Simeyone mfumu munene wa bena mvita, mutangidi wa nzubu wa Mvidi Mukulu, muikale ne mudimu wa kusungula bamfumu ba midimu, bantu bavua ne bua kulongolola malu a ditunga, kabidi ne batangidi ba tshiluilu ne balami ba nzubu ya bena mvita.

⁴³Simeyone uvua mulombodi wa mianda ya mu nzubu wa Mvidi Mukulu, bantu bonsu bavua ne bua kumuitaba. Mikanda yonsu ya malu a mu ditunga bavua ne bua kuyifunda mu dina diende. Uvua ne bukenji bua kuvuala bilamba bikunze bia tshibilu, kabidi ne bimanyinu bia tshiamu tshia mpawungi.

⁴⁴Muntu wa mu ditunga nansha mutuangaji, kena mua kudiwula tshidi Simeyone mulongolole, nansha kuamba bishilangane ne tshidi meyi ende amba, nansha kuenza tshisangilu mu ditunga kayi ne dianyisha diende, nansha kuvuala bilamba bia bumfumu, nansha kudiasa bimanyinu bia mpawungi.[231]

⁴⁵Muntu yonsu udi ubenga meyi aa nansha wakupula, nebamulumbuluishe.

⁴⁶Bantu kuitaba diyi bua Simeyone enze bilondeshile meyi onsu aa.

⁴⁷Simeyone kuanyisha bua kushala mutuangaji munene, muludiki wa tshiluilu, kabidi mfumu wa ditunga dia bena Yuda ne wa batuangaji. Ke muvuaye mushale ku mutu kua bonsu nanku.

⁴⁸Bena Yuda kujadika bua miaku eyi bayifunde pa bitata bia tshiamu tshikunze, babiteka patoke mu lubanza lua nzubu wa Mvidi Mukulu.

⁴⁹Batua batentule mukanda ewu, bateka mikanda mitentula mu tshilaminu tshia biuma, mu nzubu wa Mvidi Mukulu, bua Simeyone ne bana bende ba balume bamone mua kuyibala.