Read Tshiluba 1 Bamakabe 2 Bible Online

1 Bamakabe 2 - Tshiluba bible

1 Bamakabe 2

¹Mu mine matuku awu, muvua muntu diende Matatiyase, muana wa Yowanane, muikulu wa Simeyone. Matatiyase uvua mutuangaji wa ku ndelanganyi ya Yoyaribe. Kumukaye mu Yerushalayime bua kuya kusomba mu tshimenga tshia Modine.[11]

²Uvua ne bana balume batanu: Yowanane muinyika Ngadi,

³Simeyone, muinyika Tasi,

⁴Yudase, muinyika Makabe.[12]

⁵Elazare muinyika Awarane ne Yonatane muinyika Afuse.

⁶Matatiyase mumone malu mabi avuabu benza muditunga dia Yuda ne mu Yerushalayime,

⁷kuambaye ne: — Ndikasa dianyi dia kabi! Bua pandi mulele bua mmone mudibu babutula tshisamba tshianyi, banyanga kabidi tshimenga tshia tshijila, nshale musombe amu nanku patupu bu ndi tshiyi ne bualu, mmone tshimenga tshikuata kudi baluishi, Nzubu wa Mvidi Mukulu mu bianza bia benyi?

⁸Nzubu awu mmushala bu muntu kayi lumu.

⁹Bintu bidi bileja lumu luende mbaye nabi, bu bintu bipawule mu mvita.[13] Bana betu batekete mbashipela mu misesu, bansongalume mbabutula ku muele wa mvita.

¹⁰Bantu ba mu bisamba bikuabu, kukuatabu tshimenga, kupawula bintu,

¹¹banyenga bilengejilu biatshi bionsu. Tshivua tshimenga tshia tshidienzela malu, mpindiewu tshiashadi tshia bapika.

¹²Bulenga bua muaba wetu wa tshijila buvua butusankisha, mpindiewu muaba awu ukadi tshipela. Bantu ba bisamba bikuabu badi baunyanga.

¹³Tshindi nshadila ne muoyi kabidi ntshinyi?

¹⁴Matatiyase ne bana bende kupanda bilamba biabu, kuvuala mikusu, kuenza madilu manene.

¹⁵Balombodi ba bena mvita ba mukalenga Antiyokuse bafika, kufundila bantu bua kulekelabu mikenji ya Moshe. Kuyabu mu tshimenga tshia Modine, bambila bantu bua balambule milambu ya benyi.

¹⁶Bena Izrayele basule kuyabu kubakidila, kadi Matatiyase ne bana bende kubengabu, kudisangisha pa nkayabu.

¹⁷Bantu bavua mukalenga mutume kuambila Matatiyase ne: — Wewe udi mfumu mumanyike, munene mu tshimenga emu mujima. Badi bakumvua kudi bana bebe ba balume ne kudi bana benu.

¹⁸Tungunuka wakumpala bua kukumbaja diyi dia mukalenga, bu muvuabu benza kudi bena bisamba bionsu, kudi bantu ba mu Yudeya ne kudi bonsu bavua bashale mu Yerushalayime. Wewe ne bana bebe nenushale “balunda ba Mukalenga.[14]” Mukalenga neanupe bintu bia ka lumbandi: ke nkanu mitoke ya mushinga mukole, mpawungi ne binga bintu bivule.

¹⁹Matatiyase kuandamuna diyi dikole, wamba ne: — Nansha bantu ba bisamba bikuabu, bavua basombe mu bukalenga, bateleja mukalenga, bitaba ku meyi ende, muntu yonsu ulekela ntendelelu wa bankambua bende, ulonda meyi a mukalenga,

²⁰kadi meme, bana banyi ne bana betu, tudi tulonda amu ndondu uvua Mvidi Mukulu mutue ne batatuetu.

²¹Mvidi Mukulu atuambuluishe bua tumone mua kulama Meyi ne mikenji kashidi.

²²Katuena mua kuteleja diyi dia mukalenga bua kusesuka mu ntendelelu wetu awu to.

²³Matatiyase ujikija diakula, ke umue wa ku bena Yuda, kusemena ne milambu, bonsu batangila, bua kulambula pa tshilambuilu tshia Modine bu muvua diyi dia mukalenga.

²⁴Matatiyase umona abi, tshiji tshiende kulunduka, bia munda kumunyunga: tshiji tshia pa bualu kumujuka munda muende. Kudielaye kuvua muntu awu, kumukosela muminu pa tshilambuilu.

²⁵Muntu uvua mukalenga mutume bua kufikisha diyi dia kulambula awu, Matatiyase kumushipelamu pende amu pine apu, kutonkola ne tshilambuilu tshiabu.

²⁶Matatiyase kuleja muvuaye munange mikenji ya Moshe bikole, amu bu muvua Pinase muenze ne Zimri, muana wa Salu.[15]

²⁷Pashishe Matatiyase kuenda wela mbila mikole mu misesu ya mu tshimenga, wamba ne: — Bonsu badi bananga mikenji ya Moshe, kabidi balama ndondu wa Mvidi Mukulu bandonde.

²⁸Kushiyabu bintu bionsu mu tshimenga, yeye ne bana bende, kunyemenabu mu mikuna.

²⁹Diba adi bantu bavule bavua bakeba kulonda diyi ne njila wa buakane, bu umvua Moshe muambe, kuyabu mu tshipela bua kusomba.[16]

³⁰Bavua baye ne bana babu ba balume, bakaji babu ne bimuna biabu, bualu bakavua babakengesha bikole.

³¹Kumanyishabu bantu ba mukalenga ne bena tshiluilu bavua basombe mu Yerushalayime, tshimenga tshia Davide, ne: “Bantu bavua babenga diyi dia mukalenga abu mbaye kusokoma mu mbuebue ya mu tshipela.”

³²Tshiluilu tshinene kubalondakaja, babapeta. Ke kuasabu mitanda mitangilangane ne yabu. Bavua badilongolola bua kubabunda dituku dia Dikisha.

³³Kubambilabu ne: — Patukayi mu mitanda. Bua nuenu kushala ne muoyi, amu nuenu bitabe diyi dia mukalenga.

³⁴Ke bena Yuda kuandamuna ne: — Katuena tupatuka to. Katuena tuenza tshidi mukalenga muambe bua kushipa mukenji wa dituku dia Dikisha to.[17]

³⁵Baluishi kutshinta bena Yuda ne mvita.

³⁶Bena Yuda kabavua bakandamana, kabavua babela nansha dibue, kabavua nansha binjila ku mishiku ya mbuebue bua muntu kabuedi to.

³⁷Bavua bamba amu ne: “Tufue mu buakane, diulu ne buloba mbijadike bu munudi nutushipa kapayi bualu.”

³⁸Kubelabu mvita mikole mu dituku dia Dikisha. Bena Yuda kubutuka bavule, ne bakaji ne bana, kabidi ne bimuna biabu. Bavua batue ku tshinunu.

³⁹Matatiyase bumvua bualu abu yeye ne bana bende, kudilabu bana babu bikole.

⁴⁰Kuandamunabu ne: “Bu tuetu bonsu tuenza muenji bana betu emu, katuyi tuluisha bisamba bia benyi, bua tuetu kushala ne muoyi kabidi ne bua kulama Meyi etu, bantu aba nebatubutule diakamue pa buloba.”

⁴¹Dituku adi kuangatabu dipangadika dia ne: “Muntu walua kutubunda dia Dikisha, tudi tumuluisha, nanku katuakufua bonsu bu mufuile bana betu mu mbuebue yabu to.”

⁴²Ke musumba wa bantu, bena mu Aside,[18] kulua kudisangisha nabu. Bavua bantu ba bukitu ba mu bena Izrayele balami ba mikenji.

⁴³Bantu bakuabu bavua banyema bavua babakengesha kuvua kuvudija tshisumbu tshiabu. Bungi bua bena tshiluilu kuvula.

⁴⁴Kusangishabu bena tshiluilu, kushipabu bantu bavua babenga mua kulama mikenji, kumana tshiji ne bonsu bavua babenga Mvidi Mukulu. Bantu bavuabu kabayi mua kushipa, kunyemenabu mu bisamba bia benyi.

⁴⁵Matatiyase ne balunda bende kuendakanabu mu ditunga, benda batonkola bilambuilu bia nwidie ya benyi.

⁴⁶Kabidi bavua bateka nsongalume panshi ku bukole. Ke bonsu ba mu tshitupa tshia buloba bua bena Izrayele, bavuabu kabayi banji kuteka panshi.

⁴⁷Kuipatabu bamfumu bonsu ba bisamba bikuabu bavua baditambisha.

⁴⁸Kukandikabu benyi ne bamfumu babu bua kabanyangi mikenji ya Moshe. Mukalenga Antiyokuse kupanga mua kutombokela Mvidi Mukulu.

⁴⁹Matatiyase kudiumvua ukadi pa kufua. Ke kuambilaye bana bende ba balume ne: — Monayi tshikondu tshidi bantu baditambisha, tshikondu kabidi tshidi Mvidi Mukulu ne bua kuleja tshiji, tshiji tshikole tshia kunyoka buenzayi.

⁵⁰Kadi nuenu, bana banyi, suminyinayi mu dilama dia Meyi ne mikandu bia Moshe. Nuluile ndondu ivua Mvidi Mukulu mutue ne bankambua benu.

⁵¹Vulukayi malu avua bankambua betu benza tshikondu tshiabu. Nulonde tshilejilu tshiabu, nanku nenupete lumu lunene ne butumbi bua kashidi.

⁵²Abrahame[19] uvua mulamate Mvidi Mukulu mu dikenga ke pavua Mvidi Mukulu mumutangile bu muakane.

⁵³Yozefe[20] uvua mulame Meyi a Mvidi Mukulu mu dikenga, ke kushalaye mukalenga wa bena Ejipitu.

⁵⁴Nkambua wetu Pinase[21] uvua uleja disuminyina diende dilelela, ke pavua Mvidi Mukulu mulame ndelanganyi yende yonsu bua ikale batuangaji kashidi.

⁵⁵Yoshuwa[22] ukumbajile mudimu mumufundila; kushalaye mulombodi mu Izrayele.

⁵⁶Kalebe[23] bua pajadikilaye bulelela, bena Izrayele basangila, wakapeta buloba bua bumpianyi.

⁵⁷Davide,[24] bu muvuaye mulamatshi wa Mvidi Mukulu, wakapeta nkuasa wa bumfumu buende ne bua ndelanganyi yende kashidi.

⁵⁸Eliya[25] pavuaye mupite kusuminyina mu dilama dia Meyi ne mikandu, bakamuambula mu diulu.

⁵⁹Pavua Ananiya, Azariya ne Mikayele[26] batekemena kudi Mvidi Mukulu, bakapanduka ku ndimi ya kapia.

⁶⁰Danyele[27] pavuaye muntu muakane, ntambue kayakamuenzela bualu.

⁶¹Numanye ne: mu ndelanganyi yonsu badi batekemena kudi Maweja-Nangila, kabakupanga diambuluisha kashidi.

⁶²Kanutshinyi mikanu ya mukalenga ewu, muluishi wa Mvidi Mukulu, neafue, misanda idie mubidi wende, lumu luende nelunyanguke.

⁶³Lelu udi uditambisha, uditemba, kadi maloba kenaku, bualu neandamuke lupuishi, kabidi bidiye mupangadike mbinyanguke.

⁶⁴Nuenu bana banyi, ikalayi bantu ba muoyi mukole, luilayi meyi a Mvidi Mukulu, bualu wowu nganupa lumu luvule.

⁶⁵Monayi Simeyone wenu, mmuntu wa meji, numuteleje, neashale bu tatuenu.

⁶⁶Monayi Yudase Makabe, mmuntu wa mpolondu bituadije ku buana buende, yeye neashale uludika tshiluilu tshienu, nealudike nwita padi baluishi benu banubunda.

⁶⁷Buenu nuenu, kungijayi bonsu badi balama mikenji, nushindike mua kudisombuela kudi bukua bisamba.

⁶⁸Enzelayi benyi bibi bu muvuabu banuenzela. Nulame bionsu bidi mikenji mmufundile.

⁶⁹Pashishe Matatiyase kubajingila diakalenga, kufuaye.

⁷⁰Ufuile mu tshidimu tshia lukama ne makumi anayi ne isambombu.[28] Bana bende kumujika mu nkita ya mu diku diabu mu tshimenga tshia Modine. Bena Izrayele bonsu kuenza madilu ende.