Read Tshiluba 1 Bamakabe 4 Bible Online

1 Bamakabe 4 - Tshiluba bible

1 Bamakabe 4

¹Ngorjiyase[50] kuangata bena tshiluilu binunu bitanu; kabidi ne babandi ba pa nyama ya tubalu, bamanyi bapiluke tshinunu, kuyabu mu butuku,

²bua kutulukila bena Yuda mu mitanda mu tshintuluntulu bua kubaluisha. Pine apu, bantu ba mu tshimenga tshia Yerushalayime, ba mu nzubu ya bimana bikolesha, bavua baye nabu bua kubaleja njila.

³Yudase umvua bualu, kuyaye kudibu ne bantu bende ba bukitu bua kuluisha bena bukalenga bavua mu Emawuse,[51]

⁴diba adi bena tshiluilu ba ngoyiyase batshivua batangalaka dia muamua dia mitanda.

⁵Ngorjiyase kufika butuku mu mitanda ya Yudase, kumusangana mutupu, kudituaye ku dikeba bena Yuda mu mikuna, bualu uvua wamba ne: “Bena Yuda mbatunyeme.” Kutuadijabu kubakeba mu mikuna.

⁶Mu dinda dionsu, tshiluilu tshia Yudase kumueneka mu mpata. Bavua bantu binunu bisatu, kabayi ne ngabu nansha miele bungi bikumbane.

⁷Kumonabu tshiluilu tshikole tshia benyi, tshivuala ngabu, tshijika kudi bena tubalu, bonsu amu bapiluke mu malu a mvita, baluanganyi ba dilambu.

⁸Yudase kuambila bena diende ne: — Kanutshinyi bua bungi buabu nansha bua mushindu udibu batubunda.

⁹Vulukayi muvua bankambua betu bapande ku Mayi manene makunze, pavua mukalenga wa bena Ejipitu ubalondakaja ne tshiluilu tshiende![52]

¹⁰Kadi mpindiewu, tusengelelayi Mvidi Mukulu. Padiye mutusue, neavuluke ndondu ivuaye mutue ne bankambua betu. Nenku lelu neaboze tshiluilu etshi patuatshiluisha.

¹¹Matunga onsu a benyi neamanye ne: kudi kampanda udi upikula ne usungidila bena Izrayele.

¹²Diakanue baluishi kumona tshiluilu tshia bena Yuda tshivua kudibu.

¹³Kupatukabu mu mitanda bua kubaluisha. Bantu ba Yudase kuela mpungi,

¹⁴ke kutuadijabu mvita. Kushipabu bantu ba matunga makuabu, aba kunyema mu mpata.

¹⁵Kadi bena Izrayele kushipa bonsu bavua bashale luanyima. Bena Yuda kulondabu bantu too ne mu tshimenga tshia Ngezere ne mu mpata ya Idumeya, ya Asdode ne ya Yamniya.[53] Kushipabu bantu benyi batua ku binunu bisatu.

¹⁶Yudase upingana ne bena mvita ku dilondakaja baluishi,

¹⁷kuambilaye bantu ne: — Kanutambi kupukila ku bintu bia dipawula. Nuamanya ne: mikuabu mvita mmituindile.

¹⁸Ngorjiyase ne tshiluilu tshiende kabena kule to, badi mu mikuna emu. Mpindiewu, tuanji kulamakaja baluishi, tubaluishe. Pashishe nenuangule bintu bionsu bia mvita talalaa.

¹⁹Yudase utula meyi, kumonabu baluishi babu ku lusongu lua mukuna benda batentekela.

²⁰Baluishi kumonabu ne: babu bena tshiluilu bavua banyema bonsu, kaba-tshivuapu, kabidi mitanda yabu ivua mitue kapia, bualu minshi ivua ibaleja muvuabi.

²¹Bamone nanku, baluishi kukuatshika bowa bunene. Bamone kabidi tshiluilu tshia Yudase tshindila mvita,

²²bobu kunyema bonsu batangile ku matunga a bena Peleshete.[54]

²³Yudase kupingana mu mitanda ya baluishi bua kupawula bintu. Bena Yuda kuangata mpawungi mivule ne nkanu muengulula mitoke ya mushinga mukole, bilamba bikunzubile ne bia mubidi mukunze kunzuu, kabidi ne biuma bikuabu bia bungi.

²⁴Mu dipingana, kutumbishabu Mvidi Mukulu, kumusamuna, bimba ne: “Mvidi Mukulu udi mulenga, dinanga diende ndia kashidi.”

²⁵Dituku adi kusungidilabu bena Izrayele.

²⁶Bena Ngorjiyase bavua bapanduke mu mvita kuyabu kuambila Lisiyase[55] bualu buvua buenzeke.

²⁷Malu aa kumutonda bikole, kutekeshaye mu maboku. Uvua munyingalale bualu uvua ne dijinga dia kutshimuna bena Izrayele. Kadi ki mbienzeke nanku to. Kabidi uvua ne dijinga dia kukumbaja bionsu bivua mukalenga mumutumine diyi. Bionsu abi wabipangidi.

²⁸Tshidimu tshivua tshilonda,[56] mfumu Lisiyase kusangisha bena mvita bapiluke binunu makumi asambombu, ne bena mvita ya ne tubalu binunu bitanu bua kuluisha bena Yuda.

²⁹Kufikabu mu Idumeya, kuasabu mitanda mu Bete-Sure.[57] Yudase kuya bua kusangila nabu ne bena mvita binunu dikumi.

³⁰Pamonyiye bukole bua tshiluilu atshi, ke kutendelelaye wamba ne: — Utumbe wewe Mupandishi wa bena Izrayele, wewe ngudi mutshibule bukole bua muluanganyi munene Ngoliyate ku tshianza tshia muena mudimu webe Davide, wewe kufila mitanda ya bena Peleshete kudi Yonatane, muana wa Shawule, ne kudi muambadi wa bia lufu biende.[58]

³¹Bena Izrayele mushindu umue bakuate tshiluilu etshi. Bena mvita ya panshi ne ya tubalu ba baluishi betu bafue bundu.

³²Mvidi Mukulu, ubakuatshishe bowa, tekesha bukole buabu, mbatshimune pamue nebe, batekeshe mu maboku.

³³Bantu badi bakunanga bashipe baluishi babu. Badi bakumanya basamune dina diebe ne misambu.

³⁴Myita kubanga ya bisumbu bibidi. Bena tshiluilu tshia Lisiyase kufua batue ku binunu bitanu.

³⁵Lisiyase umona muatangalaki tshiluilu tshiende, utangila kabidi dikima dia bena mvita ba Yudase, ne muvuabu bashindika mua kufua nansha kushala ne muoyi mu mvita ayi, ke kuyaye mu Antiyokiya[59] bua kuangata benyi badi mua kukolesha tshiluilu papinganaye mu Yudeya.

³⁶Yudase ne bana babu kuambabu ne: — Tuashipi baluishi betu bonsu, tuyayi bua kumusha mikiya ku nzubu wa Mvidi Mukulu ne kumujidila tshiakabidi.

³⁷Tshiluilu tshijima kudisanga, kuya ku mukuna wa Siyone.

³⁸Kumonabu nzubu wa Mvidi Mukulu mushale mutupu, tshilambuilu tshinyanga, biibi biosha, mu lubanza mumena bisosa bu mu tshisuku nansha mu mikuna, kabidi bibambalu bionsu binyanga.

³⁹Kupandabu bilamba biabu, kudilabu bikole, kudiela butu mu mutu.

⁴⁰Kulalabu batue biadi panshi. Pakelabu mpungi, ke kuelabu mbila mikole kudi Mvidi Mukulu.

⁴¹Yudase kutuma diyi bua bantu bende baluishe bantu bavua basombe mu tshimenga tshia Davide too ne ku tshikondu tshivuaye ujikija mudimu wa kulengeja nzubu wa Mvidi Mukulu.

⁴²Pashishe kusungulaye batuangaji bavua kabayi ne buenzayi, bavua balama meyi ne mikandu ne disuminyina.

⁴³Kumushabu mikiya ku nzubu wa Mvidi Mukulu, kutekabu mabue avua ne mikiya muaba musunguluke.[60]

⁴⁴Bavua badiebeja tshivuabu ne bua kuenza ne tshilambuilu tshia milambu ya kuosha tshikavua tshiuwule ne mikiya.

⁴⁵Ke kupetabu lungenyi lulenga lua kutshibumbula, bua katshishadi tshibafuisha bundu, bualu benyi bakavua batshishile mikiya. Kutshibumbulabu.

⁴⁶Kadi kutekabu mabue atshi pa mukuna wa nzubu wa Mvidi Mukulu, pa muaba muakumbanyine, bindile muambi bua avue kuamba tshia kuenza nawu.[61]

⁴⁷Kuangatabu mabue kaayi masonga, bu muvua meyi mambe,[62] kuibakabu tshinga tshilambuilu tshifuanangane ne tshia kale.

⁴⁸Kuakajilulabu muaba wa tshijila ne munda mua nzubu wa Mvidi Mukulu. Kujidilabu kabidi ne mbanza.

⁴⁹Bamane kuenza ngesu mipiamipia[63] mijidile, kutekabu mu nzubu wa Mvidi Mukulu tshitekelu tshia miendu, tshilambuilu tshia manananshi ne mesa a mampa malambula.

⁵⁰Kuoshabu musenga wa kamonya pa tshilambuilu, kutemeshabu miendu mu nzubu wa Mvidi Mukulu.

⁵¹Kutekabu mampa pa mesa, kukudikabu tshilamba, kujikijabu midimu yonsu.

⁵²Mu dituku dia makumi abidi ne ditanu dia ngondu wa tshitema[64] udi dina ne: Kislewu, mu tshidimu tshia lukama ne makumi anayi ne muanda mukulu, kujukabu dinda dionsu.

⁵³Kulambulabu mulambu pa tshilambuilu tshivuabu base bu muvua Meyi a Moshe mambe.

⁵⁴Kubanjijabu tshilambuilu ne misambu, ne lunzenze ne nshiba ne mpungi anu dituku dia mufikilu divuabu batshinyanga kudi benyi atshi.

⁵⁵Bantu bonsu kudiela panshi bua kukukuila Mvidi Mukulu, pashishe kuimbabu misambu ne musangelu.

⁵⁶Kuenzabu tshibilu tshia dijidila tshilambuilu matuku muanda mukulu. Ke kulambulabu milambu ya kuosha ne disanka dinene, kabidi ne milambu ya ditua ndondu ne ya diela tuasakidila.

⁵⁷Kulengejabu tshimana tshia kumpala kua nzubu wa Mvidi Mukulu, ne bikata bia mpawungi ne ngabu milengeja bimpe,[65] kulongololabu ne bibuelelu ne bibambalu, kupingaja biibi.

⁵⁸Bantu kupeta disanka divule. Bundu buvuabu bapeta kudi benyi kujika.

⁵⁹Yudase ne bana babu ne bena Izrayele bonsu kujadika bua kuenzenza tshibilu tshia dijidila nzubu wa Mvidi Mukulu, matuku muanda mukulu, ku tshidimu ku tshidimu, bituadije ku matuku dikumi ne atanu a ngondu wa Kislewu, bua basanke, batshionkomoka.

⁶⁰Matuku awu ke ashilebu tshimana tshile tshinyungulule mukuna wa Siyone, ne tuleya tukole, bualu bavua batshina ne benyi kabavu kunyanga miaba ayi bu bangabanga.

⁶¹Yudase kuteka tshisumbu tshia bena tshiluilu bua kulama nzubu wa Mvidi Mukulu bimpe. Kukoleshaye Bete-Sure, bua bantu bende bikale ne muaba mukole mutangilangane ne ditunga dia Idumeya.[66]