Read Tshiluba 1 Bamakabe 5 Bible Online

1 Bamakabe 5 - Tshiluba bible

1 Bamakabe 5

¹Bena matunga avita ku mutumba wa bena Izrayele, bumvue ne: bena Yuda mbasulule tshilambuilu, kabidi mbalongolole muaba wa tshijila, bu muvuabi kale kufikabu munda bikole.

²Kushindikabu mua kubutula bena Izrayele bavua basomba munkatshi muabu. Kutuadijabu kushipa, kubutula kabidi bana betu.

³Yudase kuluisha bena mu Idumeya mu Akrabatene,[67] bavua babanyungulula. Kubakengeshaye bikole, kubipata, kupawula bintu biabu.

⁴Pashishe Yudase kuela meji a kunyoka bena Baya[68] bua ngenzelu yabu mibi: bavua bajikila bena Izrayele njila; bateka mitshi bua kubakuata mu buteyi.

⁵Yudase kusemeja bena Baya bua bapingane ku nzubu yabu mikolesha. Kubanyungululaye ne mvita. Kushindikaye bua kubabutula bonsu. Kuoshaye nzubu ne bonsu bavuamu.

⁶Pashishe kuyaye kudi bena tshisamba tshia Amone, bavua ne tshiluilu tshikole kabidi ne bantu musumba munene uvuabu balombola kudi Timote.[69]

⁷Kubelaye mvita mikole. Kubashipaye, kubatshimuna bonsu.

⁸Kukuataye tshimenga tshia Yazere[70] ne misoku yatshi. Pashishe kupinganaye mu Yudeya.

⁹Meku a bena Ngilaade kudisangisha bua kuluisha ne kujimija bena Izrayele bavua base mu buloba buabu. Ke bena Izrayele kuya kusokoma mu nzubu mikolesha mu Datema.[71]

¹⁰Bena Izrayele kutumina Yudase ne bana babu mukanda, bamba ne: — Bantu benyi batudi nabu mutumba, mbadisangishe bua kutujimija pa buloba.

¹¹Badi badilongolola bua kutujimija ne tshiluilu tshiabu pa muaba utudi basokome. Timote ke udi ulombola tshiluilu tshiabu.

¹²Bantu bavule ba munkatshi muetu mbafue. Ufike kunu utusungidile.

¹³Betu bonsu ba mu ditunga dia Tobiya[72] mbashipa. Bakaji babu mbaye nabu mu bupika, ne bana kabidi. Bintu biabu mbinyenga. Bantu balume batua ku tshinunu mbajimine diba adi.

¹⁴Patshi wabu babala mikanda ayi, bakuabu bantu kufika ne mikenji amu ya momumue, batumina ku Ngalileya, bilamba bipanda, bu badi mu madilu,

¹⁵bamba ne: “Bena Ptolemayise, bena Tire ne bena Sidone mbadisange ne benyi[73] bonsu badi mu Ngalileya bua kutubutula.”

¹⁶Yudase ne bana babu bumvue nanku, kubikilabu tshisangilu tshinene bua kukeba tshidibu mua kuenza bua kusungidila bana babu badi mu njiwu ya mvita.

¹⁷Yudase kuambila muanabu Simeyone ne: — Sungula balume badi bamanye mvita, uye kusungidila bana betu bena Yuda badi mu Ngalileya. Meme ne Yonatane wetu, netuye mu bena Ngilaade.

¹⁸Kushiyaye Yozefe muana wa Zekarya kabidi ne Azariya bua kulombola bantu mu Yudeya. Bamue bena tshiluilu bavua bashale kabidi.

¹⁹Yudase kubafundila tshia kuenza ne: “Lamayi bantu, kadi kanutuadiji mvita ne benyi too ne ku diba diapingana.”

²⁰Kupeshabu Simeyone bena mvita binunu bisatu bua kuya mu Ngalileya, ne binunu muanda mukulu kudi Yudase bua kuya mu bena Ngilaade.

²¹Simeyone ufika mu Ngalileya, kuluisha benyi kubatshimuna, kunyemabu.

²²Kubalondakajaye too ne ku tshiibi tshia tshimenga tshia Ptolemayise. Benyi kufua batua ku binunu bisatu. Ke kupawulaye bia lufu biabu.

²³Kuangataye bena Yuda ba mu Ngalileya ne ba mu Arbata,[74] kupinganaye nabu mu Yudeya ne disanka, pamue ne bakaji, bana ne bintu biabu bionsu.

²⁴Eku Yudase Makabe ne muanabu Yonatane kusabukabu musulu wa Yardene, kuenda matuku asatu mu tshipela.

²⁵Kusambakenabu ne bena Nabate.[75] Aba kubakidila bilenga, babalondela bionsu bivua bienzekela bana babu ba bena Izrayele mu Ngilaade. Kubambilabu ne:

²⁶bavule ba munkatshi muabu bavua babakuata, babalama mu tshimenga tshia Bosora, tshia Alema, tshia Kasfo, tshia Makede ne tshia Karnayime,[76] bimenga bivuabu bakolesha ne bimana.

²⁷Mudi bavuabu binjidila mu bimenga bikuabu bia bena Ngilaade. Baluishi babu bavua bashindika mua kubabunda maloba mu miaba eyi, kubakuata ne kubutula mu dituku dimue bonsu badibu basanganamu.

²⁸Diakamue Yudase ne tshiluilu tshiende kuangatabu njila wa Bosora, bakosolola tshipela. Kukuataye tshimenga, kushipa balume bonsu, kupawula bintu bionsu, kuosha tshimenga.

²⁹Kubangululaye luendu butuku. Kuendabu too ne ku tshimenga tshia Datema[77] tshia bena Yuda, tshidi tshikolesha ne bimana.

³⁰Diba dipatuka, Yudase ne bavuaye nabu kumona musumba wa bena tshiluilu muvule, bimanyika bibandilu, basemeja matempu a mvita bua kukuata tshimenga,[78] babanga mvita.

³¹Yudase umona ne mvita ikadi mituadija, umvua kabidi bela bibingu mu tshimenga, bela mpungi ne mikunda ibanda mu diulu,

³²kuambilaye bena tshiluilu tshiende ne: “Tuluangane lelu bua kupandisha bana betu bena Izrayele.”

³³Uvua utungunuja tshiluilu tshiende. Kutshikosololaye mu bitupa bisatu. Kulondabu bena mvita ba baluishi mu nyima bua kubaluisha. Kuelabu mpungi, kuelabu mbila, babila Mvidi Mukulu.

³⁴Bena tshiluilu tshia Timote[79] bamone ne: ntshiluilu tshia Makabe, ke kudituabu lubilu, kunyema. Ke tshiluilu tshia Yudase kubatshimuna. Dituku adi bantu kufua batua ku binunu muanda mukulu.

³⁵Pashishe Yudase kuluisha tshimenga tshia Alema,[80] kutshikuata, kushipa balume bonsu, kupawula bintu bionsu, kuosha tshimenga.

³⁶Kumukaye bua kuya kukuata tshimenga tshia Kasfo, tshia Makede ne tshia Bosora, kabidi ne bimenga bikuabu bia bena Ngilaade.

³⁷Malu aa mamane kuenzeka, ke Timote kushisha kusangisha banga bena tshiluilu, kuasa mitanda mitangilangane ne tshimenga tshia Rafone, dia muamua dia musulu.[81]

³⁸Yudase kutuma bantu bua kujadika mudi mu mitanda ya baluishi. Ke kumutuadilabu bualu ne: “Matunga onsu adi matunyungulula mmadisange, mmenze tshiluilu tshinene tshikole, batshilombola kudi Timote.

³⁹Mbangate bena Arabe bua kukumbaja tshisumbu tshiabu. Mbase mitanda luseke lukuabu lua musulu, mbadilongolole bua kukubunda, kuluangana nebe.”

⁴⁰Diakamue Yudase kuya bua kusangila nabu ne tshiluilu tshiende, usemena ku musulu. Timote kuambila baludiki ba tshiluilu ne: — Neatupite dikanda bu yeye mudianze kusabuka musulu kumpala kuetu. Nenku katuakutua nkanana to.

⁴¹Kadi pikalaye ne bowa, wanji kutula luseke lukuabu lua musulu, tuetu netusabuke. Nanku netumutshimune.

⁴²Kadi Yudase ufika amu ku muelelu wa musulu, kutekaye bamue balombodi ku muelelu wa musulu awu, ubelela mukenji ne: — Muntu nansha umue kena mua kuimana to. Bonsu baye ku mvita.

⁴³Kusabukaye musulu kumpala, tshiluilu tshionsu tshimulonda munyima. Kutshimunaye baluishi bende. Bobu kuimansha bia lulu biabu, kunyemabu ku nzubu wa tshijila wamu Karnayime.[82]

⁴⁴Bantu ba Yudase kukuata bangabanga tshimenga, kuosha nzubu wa tshijila ne bonsu bavuamu, kutonkola kabidi Karnayime. Biangatshile ku tshikondu atshi kakuvua mushindu wa kukandamana kumpala kua Yudase to.

⁴⁵Ke Yudase kusangisha bena Izrayele bonsu ba mu Ngilaade, bakulumpe ne bakaji babu, bana ne bintu. Bavua tshisumbu tshinene. Kuyabu batangila ku ditunga dia bena Yuda.

⁴⁶Kufikabu mu tshimenga tshinene kabidi tshikolesha tshia Efrone,[83] tshivua mu njila uvuabu bayila. Kabavua mua kupita tshimenga etshi ku dia balume nansha ku dia bakaji to. Bua kupitabu, anu bobu batshikosolola munkatshi.

⁴⁷Bantu ba mu tshimenga kubenga mua kubapitshisha. Ke kudinjidilabu biibi ne mabue manene.

⁴⁸Ke Yudase kubalayaye ne miaku ya bupole ne: “Tudi tukosolola ditunga dienu bua kupingana kuetu. Muntu kakunuenzela bualu to. Nedipite buludi ne njila.” Bena ditunga kubenga bua kubunzuluila biibi.

⁴⁹Yudase kutuma diyi bua bantu bonsu bimane muaba udibu.

⁵⁰Bena mvita kudilongolola ku mvita. Yudase kubunda bena tshimenga munya ne butuku bujima. Ke kukuataye tshimenga.

⁵¹Kushipaye balume bonsu, kubutula tshimenga, kushidisha, kupawula bintu. Pashishe kukosololabu tshimenga benda badiata bitalu.

⁵²Kusabukabu musulu wa Yardene batangila mu Mpata munene udi mutangilangane ne tshimenga tshia Bete-Sheyane.[84]

⁵³Yudase uvua utua upingana, ukunguja bena mvita bavua bashadile panyima bapungile, ukolesha bantu ku muoyi too ne muafikibu mu ditunga dia bena Yuda.

⁵⁴Kubandabu pa mukuna wa Siyone buwule ne disanka, kulambulabu Mvidi Mukulu mulambu wa kuosha, bualu bapinganyi amu bimpe kabayi bajimine kudi muntu nansha umue wa kudibu.

⁵⁵Mu matuku avua Yudase ne Yonatane bikale mu Ngilaade, muanabu Simeyone pende mu Ngalileya ku Ptolemayise,[85]

⁵⁶ke Yozefe muana wa Zekarya, ne Azariya, bamfumu wa tshiluilu, kumvua malu a dikema ne nwita ivua bana babu benza.

⁵⁷Kuambilanganabu ne: “Tukebayi petu lumu, tuluishayi matunga adi matunyungulukila.”

⁵⁸Kutuminabu bena nwita babu diyi bua baye kuluisha Yamniya.[86]

⁵⁹Ngorjiyase[87] kupatuka mu tshimenga ne bena diende bua kuya kubanga nwita.

⁶⁰Kutshimunabu Yozefe ne Azariya, kubalondakaja too ne ku mikalu ya ditunga adi. Bena Izrayele bu binunu bibidi kufua dituku adi.

⁶¹Bantu kubatshimuna, bualu Yozefe ne Azariya kabavua bateleja diyi dia Yudase ne dia bana babu.[88] Bavua bela meji a kutshimuna bu bakuabu.

⁶²Kadi bobu ki mbantu bavua Mvidi Mukulu mupeshe mudimu wa kusungidila bena Izrayele nansha.

⁶³Yudase tshilobu tshia mvita ne bana babu kupeta lumu lunene kudi bena Izrayele ne kudi matunga onsu. Bavua amu babatela.

⁶⁴Bantu bavua babayila bua kubela ka lumbandi.

⁶⁵Yudase ne bana babu kuya kuluisha bena Edome, mu buloba bua kuinshi kua ditunga. Kukuatabu Ebrone[89] ne misoku ya pabuipi. Kubumbulabu bimana, kuosha ne tuleya tua mu tshimenga.

⁶⁶Pashishe kuyabu mu ditunga dia bena Peleshete, bakosolola tshimenga tshia Mareka.[90]

⁶⁷Dituku adi, bavua bashipa batuangaji, bavua bakeba kuya mu mvita, bakeba lumu ne butumbi, kadi kabayi ne budimu.

⁶⁸Yudase kuya ku Asdode,[91] mu buloba bua bena Peleshete. Kutonkolaye bilambuilu biabu, kuoshisha mpingu ya nwidie yabu. Kupawulaye bintu bia mu tshimenga, kupingana nabi ku ditunga dia bena Yuda.