Read Tshiluba 1 Bamakabe 6 Bible Online

1 Bamakabe 6 - Tshiluba bible

1 Bamakabe 6

¹Mukalenga Antiyokuse kupitshila mu Mezopotamiya. Kumvuaye batela lumu lua Elimayise,[92] tshimengatshiamuditunga dia bena Persa. Bavua bamba ne: mu Elimayise mudi bubanji buvule, mudi nkanu mitoke ya mushinga mukole mivule ne mpawungi.

²Kabidi mu nzubu wa nwidie wabu mudi biuma tente, bia lufu bienza ne mpawungi, nkonka ne bia mvita bivuabu bashiye kudi Aleksandre wa Filipe, mukalenga wa bena Masedoniya, uvua mudianze kudia bumfumu mu bena Ngreke.

³Antiyokuse kuya mu tshimenga atshi. Kukebaye mua kutshikuata ne kupawula bintu bia mu tshimenga. Kadi bualu abu kabuvua bukumbane to, bualu bena mu tshimenga bakaya bamanye meji avuaye nawu.

⁴Bavua bamuluisha mvita, bamutshimuna. Ke kumukaye muaba awu ne tshiji tshikole, kupingana mu Babilone.

⁵Mu Persa bavuile kumumanyisha muvua bena Yuda batshimune biluilu bivuaye mubatumine.

⁶Lisiyase uvua muyemu ne bena mvita ba bukole bupite. Kadi bena Yuda kumutshimuna. Nenku bena Yuda bavua ne bukole bua bungi, bualu bavua banyenga bena tshiluilu bavuabu batangalaje, bintu bia lufu, biuma ne bintu bikuabu mu mvita.

⁷Bena Yuda bavua babumbula “tshintu tshibi tshia kabutu,” tshivua Antiyokuse muibake pa tshilambuilu tshia mu Yerushalayime. Kabidi bavua bamane kukolesha muaba wa tshijila ne bimana bile bu muvuabi bangabanga. Bavua bakolesha kabidi tshimenga tshiyuabu banyenga mukalenga tshia Bete-Sure ne bimana.[93]

⁸Mukalenga umvua malu awu, kupetaye bowa ne luzakalu, kuyaye mu bulalu mupungile. Kupetaye disama dimutekesha, bualu tshivuaye mujinge ki ntshikumbane to.

⁹Kushalaye mu bulalu matuku mavule. Malu aa avua mamutekesha mu maboku. Kumanyaye ne: ndi ne bua kufua.

¹⁰Kubikidishaye “balunda ba Mukalenga[94]” bonsu, ubambila ne: — Tshiena ne tulu kuisu nansha tukese, dikenga ndimpite.

¹¹Ke meme kudiambila mundamunda ne: Ndi ndiabakena nenku bua tshinyi? Kadi mvua musankishe bantu, bantu bavua bannanga, diba dintshivua mu bukalenga!

¹²Kadi mpindiewu meme kutuluka mianda mibi imvua muenzele bena Yerushalayime. Mvua muangate bintu bionsu bia mpawungi ne nkanu mitoke ya mushinga mukole bivuamu. Meme kutuma bantu bua kubutula bantu bonsu ba mu tshimenga, kapayi bualu.

¹³Ndi njadika ne: disama dindi nadi edi mbua bualu abu. Mona nkadi mfua muteketangana mu ditunga dia bende.

¹⁴Kubikidishaye Filipe, umue wa ku “balunda ba Mukalenga.” Kumupeshaye bulongolodi bua ditunga dijima.

¹⁵Kumupaye tshifulu tshiende tshia bukalenga, muntumpu ne tshitampi tshiende. Kumupaye ne mudimu wa kukuba muanende Antiyokuse,[95] bua amone mua kuakanyina bukalenga.

¹⁶Mukalenga Antiyokuse kufua mu Persa mu 149.[96]

¹⁷Liziyase umvua ne Antiyokuse wafu, kutekaye muana wa Antiyokuse, uvuaye mukoleshe ne mulongolole biangatshile ku buana buende, mu bukalenga, pa muaba wa tatuende. Kuinyikaye kabidi muana dina dia Epatore.[97]

¹⁸Tshikondu atshi baluishi batshivua mu tshimenga tshia Davide.[98] Kujikilabu bena Izrayele mu nzubu wa Mvidi Mukulu. Kubenzelabu bibi mishindu yonsu, kabidi kukoleshabu benyi mu maboku.

¹⁹Yudase Makabe kushindika mua kubabutula. Kubikidishaye bantu bonsu bua kubela munkatshi ne nwita.

²⁰Kukungilabu, bua kuluisha tshimenga atshi mu tshidimu tshia lukama ne makumi atanu.[99] Kuenzabu bintu bua kukuata nzubu ne kubumbula bimana.

²¹Kadi bamue baluishi ba ku bavua munda mua nzubu kupatukamu, kubuelakana pamue ne bena Yuda bapange ditaba.

²²Kuyabu kua mukalenga Antiyokuse Epatore, bamuamba ne: — Udi muindile too ne ku diba kaayi bua kunyoka bena lukuna betu, ne bua kusombuela balunda betu?

²³Tuetu tudi badisuike bua kuenzela tatuebe mudimu, bua kulonda meyi ende ne kuenza tshidiye musue.

²⁴Pa kumona nanku, bana betu menemene bakadi bashala baluishi betu.[100] Mbashipe too ne bamue ba kutudi bavuabu bapete, biba kabidi bintu bietu.

²⁵Ki mbatubunde amu tuetu kayetu to, mbabunde kabidi matunga atudi nawu mutumba.

²⁶Lelu bakadi baluisha ne muaba mukolesha wa mu Yerushalayime bua bashalemu bamfumu. Mbakoleshe nzubu wa Mvidi Mukulu, kabidi ne tshimenga tshia Bete-Sure[101] ne bimana bile.

²⁷Wewe kuyi mukebe mua kukosolola malu aa lukasa, nebenze makuabu mapite audi kuyi mua kukandika.

²⁸Mukalenga Antiyokuse mumane kumvua bionsu abi, kufikaye munda, kusangishaye “balunda ba Mukalenga” bonsu, balombodi ba mvita ba tshiluilu tshia ku makasa ne ba tshia babandi ba pa tubalu.

²⁹Uvua mufute kabidi bena mvita ba mu matunga a benyi, kabidi ne ba mu bidila bia bena Ngreke, bua kumuambuluisha.

³⁰Bena nwita bavua benda ku makasa bavua binunu lukama, babandi ba pa tubalu binunu makumi abidi, ne nyama ya tupumbu makumi asatu ne ibidi, ivuabu bibidije bua mvita.

³¹Antiyokuse ne bena mvita bende, bavua bapitshila ku Idumeya, bajinga tshimenga tshia Bete-Sure. Kusanganabu matuku mavule. Kuenzabu matempu a mvita.[102] Kadi bantu abu kupatukabu, kuluangana ne bukitu, kutua bintu bia mvita kapia.

³²Ke Yudase kumuka ku tshimenga tshia Yerushalayime, kuasa mitanda yende mu tshimenga tshia Bete-Zekarya,[103] bitangilangane ne mitanda ya mukalenga.

³³Mukalenga ujuka dinda dionsu, kutuma tshiluilu tshiende tshijima ku njila wa ku Bete-Zekarya. Bena nwita bende kudilongolola ku nwita, kuelabu mpungi.

³⁴Kuangatabu mayi a tumuma tua nwinyo ne makuabu bu a tumuma tua mbelebela, kumusha nyama ya tupumbu bua kuyijula lonji lua nwita.

³⁵Kuabanyabu nyama munkatshi mua bisumbu bia bena nwita.[104] Pabuipi ne nyama yonsu bavua bateka bantu tshinunu bavuala kazaku ka tshiamu, kabidi basa tshifulu tshia tshiamu tshikunze, batekamu kabidi babandi ba pa tubalu bapiluke nkama itanu.

³⁶Babandi abu bavua bamanye muonsu muvua nyama, baya nende kabidi miaba yonsu ivuaye ne bua kuya.

³⁷Pa nyama yonsu, mbenzelepu kaleya kakole ka mabaya kasuika ne mikaba. Kaleya aka kavua kajika bena mvita kudi baluishi. Mu kaleya kuonsu muvua baluanganyi ba pa nyama ya nzevu basatu ne muludiki umue.

³⁸Mukalenga uvua muteke babandi ba pa nyama ya tubalu bavua bashala ku dia balume ne ku dia bakaji kua milongu ya baluanganyi ba ku makasa, bua kubambuluisha ne bua kuluisha Yudase.

³⁹Pavua nkenke ya diba itua mu ngabu ya mpawungi ne ya tshiamu tshikunze, bukenke buvua bavua ku mikuna, ngabu itema bu tshimunyi tshia kapia.

⁴⁰Tshiluilu tshia mukalenga kuya tshitupa kulu kua mukuna, tshinga kuinshi. Bavua benda mu milongu, kabayi batshina.

⁴¹Bonsu bavua ne dipampakana pa kumvua mikuma ya bia mvita bivua bipitakana, ne mikuma ya bantu pa kuenda. Bushuwa tshiluilu etshi tshivua tshinene ne tshikole kabidi.

⁴²Yudase ne tshiende tshiluilu kuya bua kubanga mvita. Ke kushipabu bena mvita ba mukalenga diakamue nkama isambombu.

⁴³Elazare, muinyika Awarane,[105] kumona umue wa ku nyama mibuikila tshilamba tshia tshiamu, tshileja lumu lua mukalenga, mupite mikuabu yonsu ku bule. Kuelaye meji ne mukalenga mmubandepu.

⁴⁴Ke kudielaye bua kupandisha tshisamba tshiabu, ne bua kupeta dina dia kadiyi dijimine.

⁴⁵Ne dikima dionsu, kudituaye munkatshi mua bena tshiluilu mutangila kudi nyama. Elazare kushipa ku dia balume, kushipa ku dia bakaji. Baluishi bamone nanku, kuanji kumushila muaba ku nseke yende.

⁴⁶Kudituaye muinshi mua tshiadi tshia nyama, kumututa bikole, kumushipa. Nyama kudiupuila panshi pambidi pa Elazare, kumushipa pende.

⁴⁷Bena Yuda bamone muvua tshiluilu tshia mukalenga tshiluangana ne bukole buonsu, kutangalakanganabu.

⁴⁸Tshiluilu tshia mfumu kuya mu Yerushalayime bua kuluangana mvita ne bena Yuda. Mfumu uvua uluisha ditunga dia Yudeya, kabidi ne mukuna wa Siyone.

⁴⁹Kumvuanganabu ne bena Yuda ba mu tshimenga tshia Bete-Sure. Bobu kumuka mu tshimenga, bualu kabatshivua nansha ne kantu ka kudia. Tshidimu atshi tshivua tshia Dikisha,[106] bantu kabayi badima.

⁵⁰Mukalenga kukuata tshimenga tshia Bete-Sure, kutekamu tshisumbu tshia bena mvita bua kutshilama.

⁵¹Mukalenga kunyungulukila ne mvita matuku mulongu mukuna uvua ne nzubu wa Mvidi Mukulu. Kuasaye bintu bishilangane bia kuluangana nabi: matempu avua alama bena ndudi, bintu bia kushimbula nabi bimana, bia kuosha nabi nzubu, bia kuela nabi mabue, bia kuela nabi miketa ne bia kuela nabi nsoka.

⁵²Bena Yuda kuenza pabu binga bia lufu bua bamone mua kubundangana ne tshiluilu tshia mukalenga. Kuluanganabu mutantshi mule.

⁵³Kadi biakudia kujika mu mayeba a ku nzubu wa Mvidi Mukulu. Kushalamu mutupu. Bualu bivua tshidimu tshia muanda mutekete tshia Dikisha, kabidi bena Izrayele bavua kua bende, bapingana mu Yudeya, bakavua bajikija biakudia bivua bishale.

⁵⁴Kushiyabu amu bantu bakese mu muaba wa tshijila. Bualu bua tshiyole, bakuabu kutangalaka muntu kuabu muntu kuabu.

⁵⁵Diba adi, Lisiyase kupeta lumu ne: Filipe udi utumina ku Persa ne ku Madayi pamue ne bena mvita bavua ne mukalenga. Kupetaye kabidi lumu ne: Filipe udi ukeba mua kulombola malu onsu a mu bukalenga. Antiyokuse IV kayi muanji kufua, uvua muteke Filipe bua kukolesha Antiyokuse muana[107] ne kumulongesha malu a bukalenga.

⁵⁶

⁵⁷Pumvua Lisiyase bualu abu, kudilongolola lukasa bua kumuka. Kuambilaye mukalenga ne bamfumu ba tshiluilu ne bena tshiluilu bonsu ne: — Tudi tuteketa ku dituku ku dituku. Biakudia bitudi nabi bidi bikepa ku kakese ku kakese. Muaba utudi banyungulukila udi muaba mukole. Kabidi kudi malu adi atangila bukalenga atudi ne bua kuakaja.

⁵⁸Tukebayi diumvuangana ne bena Yuda, tukebayi nabu bupole, kabidi ne ditunga diabu dijima.

⁵⁹Tubanyishayi bua balonde bikadilu biabu bitudi babenge. Bavua batomboke, bajule tshimvundu, bualu tuetu tuvua bakandike bibidilu biabu.

⁶⁰Mukalenga ne banene bende kuanyisha dilomba adi. Lisiyase kutumina bena Yuda mukanda, ubamanyisha mmuabu bela meji amu. Bena Yuda kuanyisha pabu.

⁶¹Mukalenga ne banene bende bamane kujadika diakula diabu ne mutshipu, ke bena Yuda kushisha kupatuka mu muaba mukolesha wa bena mvita.

⁶²Kadi mukalenga kubanda pa mukuna wa Siyone, umona muvuabu bakolesha muaba wa tshijila awu. Kupulaye mutshipu wende, kutumaye diyi bua banyangakaje bimana.

⁶³Pashishe kuyaye ne lubilu luonsu, kupinganaye mu Antiyokiya, muvuaye musangane Filipe mumane kukuata tshimenga. Kumubundaye, kumunyenga tshimenga ku bukole.