Read Tshiluba 1 Bamakabe 7 Bible Online

1 Bamakabe 7 - Tshiluba bible

1 Bamakabe 7

¹Demetriyuse, muana wa Seleyukuse, kunyemena ku Rome mu tshidimu tshia 151. Kuyaye ne bantu bakese mutangile ku tshimenga kampanda tshia ku muelelu wa mayi manene.[108] Kushalaye mukalenga mu tshimenga atshi.

²Ubuela amu mu nzubu wa bukalenga bua tatuende nanku, ke bena mvita bende kukuata Antiyokuse V ne Lisiyase, bakeba mua kufika nabu kudiye.

³Kadi bobu bamane kumanyisha Demetriyuse bualu ebu, yeye kubambila ne: tshiena musue kubamona to.

⁴Ke bena mvita kushipa Antiyokuse ne Lisiyase. Nanku Demetriyuse kusomba ne dikisha mu nkuasa wende.

⁵Ke kufikabu kudiye kudi bena Izrayele bonsu bavua kabayi ne ditaba, kabayi kabidi banemeka mikenji. Nenku muntu wa kudibu uvua ujinga mua kuikala mutuangaji munene[109] kubafila. Diende dina Alkime.

⁶Bafika, kusonguelabu bena Yuda bakuabu kudi mukalenga, bamba ne: — Yudase ne bana babu mbabutule balunda bebe, mbatutangalaje. Katutshiena mu ditunga dietu.

⁷Tumaku muntu wa ku diebe bua kumona bualu ebu, mudi Yudase munyange buloba buetu ne bua mukalenga. Nenku umuambile anyoke Yudase ne bonsu badi bamuambuluisha.

⁸Mukalenga Demetriyuse kusungula umue wa ku “balunda ba Mukalenga” diende Bakidese, uvua ne muanzu wa mulunda wa mukalenga, muikale ulombola kabidi buloba bunene bua Siriya.[110] Yeye ke uvua muntu munene mu bukalenga, uvua ulamata kabidi mukalenga.

⁹Kumutumaye ne muntu uvua ubenga mianda ya Mvidi Mukulu diende divua Alkime. Mukalenga kupa Alkime mudimu wa mutuangaji munene, umufundila kabidi bua kusombuela bena Izrayele.

¹⁰Kuyabu ne tshiluilu tshiende, kufika mu bena Yuda. Kutuminabu Yudase ne bana babu mikenji ya dishima bu bantu badi bakeba bupole.

¹¹Bena Yuda kubenga mikenji ayi, bualu bavua babamona ne tshiluilu tshinene.

¹²Kadi tshisumbu tshia bamue balongeshi ba diyi dia Maweja-Nangila kudisanga ne Bakidese ne Alkime bua kukeba mushindu wa kujikija bualu abu.

¹³Bena Izrayele bavua bakeba mua kuikala ne bupole abu ke bena Aside.[111]

¹⁴Bavua bambilangana ne: Alkime udi mulue ne tshiluilu, mmutuangaji wa mu diku dia Arone. Nanku kakutuenzela bibi to.

¹⁵Ke Alkime kubashindikila ne mutshipu, wamba ne: — Katuakunuenzela kalu nansha kamue. Nansha balunda benu bine, katuena nabu kalu.

¹⁶Kumuitababu. Kadi kukuatshishaye bantu makumi asambombu munkathi muabu. Kubashipeshaye bonsu mu dituku dimue bu mudi Mukanda wa tshijila wamba[112] ne:

¹⁷“Bavua bapumuna mashi a bena mudimu bebe, batangalaja bitalu biabu miaba yonsu ya pepi ne Yerushalayime, kakuena udi mua kubajika.”

¹⁸Ke bowa ne luzakalu kukuata tshisamba tshijima, kuambabu ne: “Bantu aba mbena dishima, bapanga buakane, bualu kabena banemeka mutshipu ne ndondu bivuabu benze bobu mene.”

¹⁹Bakidese kushiya Yerushalayime, kuya kuasa mitanda yende mu tshimenga tshia Bete-Zayite.[113] Kutumaye bantu bua kukuata bantu bavule bavua bitaba, batua ku tshiende, ne bakuabu ba mu tshisamba ba patupu. Kubashipaye, kubelesha mu tshiina tshinene.

²⁰Kupaye Alkime bumfumu bua tshitupa tshia buloba atshi. Kumupaye kabidi ne tshiluilu bua kumuambuluishatshi. Pashishe Bakidese kupingana kudi mukalenga.

²¹Alkime pende kuenza muende muonsu bua bamuanyishe bu mutuangaji munene.

²²Bonsu bavua bakengesha bantu, kudisanga nende. Ke muakapetabu mushindu wa kutangila ditunga dijima dia Yudeya ne kutatshishabu bena Izrayele bikole.

²³Yudase kumona ne malu mabi avuabu babenzela kudi Alkime ne balunda bende, avua mapite bubi ne ku malu avua bena matunga a benyi babenzele.

²⁴Nanku Yudase kuendakana mu tshitupa tshijima tshia buloba bua bena Yuda. Kusombuelaye bantu bonsu bavua babenga malu a ditaba diabu, kubapangishaye mua kuendakana mu ditunga.

²⁵Alkime mumane kumona ne: Yudase ne bena diende mbakole bapite, tshiena ne bukole bua kubapita, ke kuyaye kudi mukalenga, ubasonguela ne malu a tshianana mapite bungi.

²⁶Ke mukalenga kutuma Nikanore[114] umue wa ku banene ba tshiluilu tshiende, uvua mukine bena Izrayele bikole, bua abutule tshisamba etshi kashidi.

²⁷Nikanore kufika mu Yerushalayime ne musumba munene wa bena mvita. Kuambilaye Yudase ne bana babu malu a dishima, bu udi ukeba diumvuangana nabu.

²⁸Kubambilaye ne: “Munkatshi muetu nebe kamuikadi mvita to. Ndi mfika ne bena mvita bakese bua bamfile, bua tumvuangane nenu mu bupole.”

²⁹Kufikaye kudi Yudase. Kuelanganabu muoyi bu mudi balunda benza! Kadi bena tshiluilu ba Nikanore bavua badilongolola bua kubakula Yudase, kuya nende.

³⁰Kadi Yudase umona ne Nikanore uvua ne lungenyi lua kumuenzela bibi, kumvuaye bowa pa kumumona. Kubengaye bua kuyukila nende.

³¹Nikanore umona ne Yudase mmutandule budimu buende, kuyaye bua kumuluisha pepi ne tshimenga tshia Kafarsalama.[115]

³²Bantu nkama itanu ba Nikanore kufua mu mvita ayi. Bashadile kunyema batangile mu tshimenga tshia Davide.

³³Nikanore kushisha kuya mu mukuna wa Siyone. Ke batuangaji ne bakulu kupatuka mu nzubu wa Mvidi Mukulu bua kumusekelela, bamuleja ne milambu ya kuosha ivuabu balambula bua mukalenga wabu.

³⁴Kadi Nikanore kuseka batuangaji ne bakulu, kubela ne mate, kubapisha mikiya, kabidi ubadiombola ne miaku ya didisua.

³⁵Kuditshipaye ne tshiji wamba ne: — Panuikala babenga mua kumpa Yudase ne tshiluilu tshiende lelu, kadi pambikala meme muine mumane kuditshimuina Yudase, nempingane bua kuosha nzubu wa Mvidi Mukulu ewu. Pashishe kupatukaye ne tshiji tshikole.

³⁶Batuangaji kubuela kabidi mu lupangu lua muaba wa tshijila. Kuimanabu kumpala kua tshilambuilu bamba badila ne:

³⁷— Eyi Mvidi Mukulu, wewe ngusunguile nzubu ewu bua ikale nzubu wa kutendelela, kabidi muaba utudi tukusengelela.

³⁸Muntu ewu Nikanore ne tshiluilu tshiende ubasombuele. Bafue bonsu ku muele wa mvita. Vuluka nsenda yabu. Kabashadi kabidi ne muoyi to.

³⁹Nikanore mupatuke mu Yerushalayime kuasaye mitanda mu Betorone.[116] Ke muvuile tshiluilu tshia bena Siriya kudisanga kudiye.

⁴⁰Yudase pende kuasa yende mitanda mu Adasha[117] ne bantu binunu bisatu. Yudase kutendelela wamba ne:

⁴¹“Pavua bantu bavua mukalenga kampanda mutume basendeka Mvidi Mukulu, mutumibue webe kuvua kubashipa binunu lukama ne makumi muanda mukulu ne bitanu.

⁴²Mushindu awu ke uudi mua kubutula tshiluilu etshi, tuetu batangile, bu muuvua muenze bakuabu abu, bua bantu ba muoyi bamanye ne udi unyoka bantu badi basendeka muaba webe wa tshijila. Unyoke Nikanore bilondeshile tshikisu tshiende.”

⁴³Bena nwita kubanga nwita mu matuku dikumi ne asatu a ngondu wa Adare.[118] Tshiluilu tshia Nikanore kubutuka. Yeye muine ke wakadianjilabu kushipa mu mvita amu.

⁴⁴Bena mvita bamona ne: Nikanore wafu, kuimanshabu bia lufu, kunyema lubilu.

⁴⁵Bena Yuda kubalondakaja mu dituku dijima, kutuadija ku Adasha too ne ku Ngezere.[119] Pavuabu babalondakaja apu, bavua bela mpungi bua bena Yuda nabu balue kubambuluisha mu mvita.

⁴⁶Mu misoku ya bena Yuda ya pabuipi, bantu kupatuka, kujinga baluishi, kubapingaja tshianyima. Bonsu kufua ku muele, nansha muntu umue kavua munyeme to.

⁴⁷Kupawulabu bintu bivua nabi bena mvita ne bia lufu biabu. Kukosabu mutu ne tshianza tshia balume tshia Nikanore, tshianza tshia bukole tshivuaye muele mulu diba divuaye muakule ne ditambisha. Kuyabu nabi bua kubileja bantu mu Yerushalayime.

⁴⁸Bantu bonsu kusanka, kutangilabu dituku adi bu dituku dia disanka dinene.

⁴⁹Kuelabu diyi bua dituku dia 13 dia Adare[120] dishale tshibilu ku tshidimu ku tshidimu.

⁵⁰Bena Yuda kushala mu bupole matuku mulongu.