Read Tshiluba 1 Bamakabe 8 Bible Online

1 Bamakabe 8 - Tshiluba bible

1 Bamakabe 8

¹Yudase kupeta lumu lua ne: bena Rome mbantu ba bukitu bua mvita, badi bakidila bonsu badi bakeba mua kumyuangana nabu. Bonsu badi babavuila, badi badia nabu bulunda.

²Kulondelabu Yudase muvua bena Rome bamanye mua kuluangana, bamuambila malu onsu avuabu benzele tshisamba tshia bena Gaule.[121] Bena Rome kubatshimuna, kubatekesha, bashala babalambula milambu.

³Mu buloba bua Espanye, bavua bakuate miaba ivua bantu bumbula mpawungi ne biamu bitoke bia mushinga mukole.

⁴Bavua bakuate ditunga dijima adi, nansha diodi dikale mutantshi mule ne diabu, ku ditalama ne ku disuminyina diabu. Bena Rome bavua batshimuna kabidi ne bamfumu bavua bafume kule bua kubaluisha. Bena Rome bavua babatekesha bikole. Bavua bashala ne muoyi bavua babalambula milambu ku tshidimu ku tshidimu.

⁵Bavua batshimuna bakalenga ba bena Masedoniya, Filipe ne Perseyuse,[122] kabidi ne bonsu bavua babatombokela. Bobu kubatekesha menemene.

⁶Antiyokuse Munene, mukalenga wa bena Aziya[123] uvua musemene kudibu bua kubaluisha ne nyama ya tupumbu lukama ne makumi abidi, ne babandi ba pa tubalu tua mvita ne bena matempu, kabidi ne tshiluilu tshinene. Kadi bena Rome kubatshimuna.

⁷Kukuatabu mukalenga ne muoyi. Kumufundilabu yeye ne bakuabu bavua bamupingana mu nkuasa wa bukalenga mulambu mupite bunene. Bavua ne bua kufila kabidi bantu ku lukola.

⁸Bavua banyenga Antiyokuse matunga a Inde, a Madayi, a Lidiya ne bimue bitupa bilenga bia buloba buende, bua kubipa mukalenga Emene.[124]

⁹Bena Ngreke bavua bajadika bua kubutula bena Rome.

¹⁰Kadi pakumvua bena Rome bualu abu, kutumabu mulombodi wa tshiluilu anu umue bua kubaluisha. Bena Ngreke kufua bavule. Bena Rome kukuata bakaji ne bana kuya nabu ku bupika. Kupawulabu bintu biabu, kutekesha matunga, kubumbula miaba mikolesha ne bimana, kuandamuna bena Ngreke bapika babu too ne ku lelu.[125]

¹¹Bavua babueja kabidi mu bupika bantu ba matunga makuabu ne ba mu bidila bavua bakandamana kudibu, babutula matunga abu.

¹²Kadi bavua bashala balunda ba bushuwa, ba bantu bavua basue kudia nabu malunda. Bavua batekesha bakalenga ba matunga avua nabu mutumba, ne ba matunga a kule. Bonsu bavua bumvua lumu luabu, bavua babatshina.

¹³Bena Rome bavua bateka mu bumfumu amu bantu bavuabu basue, bavua babambuluisha kabidi. Kadi bakuabu, bavua babumusha mu bumfumu. Bena Rome kupeta dikanda divule dipite.

¹⁴Nansha muvuabi nanku, nansha umue wa kudibu kavua muase tshifulu tshia bukalenga nansha tshilamba tshia bukalenga bua ikale uditemba.

¹⁵Bavua base nzubu wa tshimamuende wa bukalenga. Ke muaba uvua bantu nkama isatu ne makumi abidi basangila ku dituku dionsu, batangila malu a bantu, bakeba mua kulongolola malu a mu ditunga bimpe.

¹⁶Ku tshidimu tshionsu bavua basungula muntu umue wa kudibu[126] uvua ne bua kuludika bena Rome, kudia bumfumu miaba yonsu. Bena mu bukalenga buende buonsu bavua bamuitaba amu yeye kabayi bamubaba, nansha bamujana.

¹⁷Yudase kusungula Epoleme, muana wa Yowanane, muikulu wa Akose, ne Yasone, muana wa Elazare, kubatuma mu Rome bua kudia nabu bulunda, kutua kabidi nabu ndondu.

¹⁸Yudase uvua wela meji mua kumusha bena Yuda ku bupika bua bena Siriya, bualu bena Siriya bavua babueja bena Izrayele mu bupika.

¹⁹Epoleme ne Yasone kuyabu ku Rome. Njila uvua mule. Bavua babuela mu tshimamuende wa bukalenga, kuambilabu bena Rome ne:

²⁰— Yudase Makabe, bana babu ne bena Yuda, mbatutume kunudi bua kutua nenu ndondu bua ku mesu a bantu bonsu tuikale balunda benu bavua badia nenu tshioyu.

²¹Bualu kulengelela bena mu tshimamuende wa bukalenga tshia bena Rome.

²²Telejayi muvua mukanda uvuabu bafunda pa tshitata tshikunze, batuma mu Yerushalayime bua ushale tshivulukilu tshia diumvuangana adi.

²³— Bena Rome ne bena Yuda, nansha bobu benda pa mayi manene, nansha bobu basombe pa buloba, basangana kashidi ku mundundu kukuata anyie! Mvita kayibuedi mu matunga abu! Baluishi kabafiki muabu!

²⁴Kadi pikala mvita midianjila kukuata Rome, nansha bena diende mu buloba budi bena Rome batangile,

²⁵ditunga dia bena Yuda nediluangane pamue ne bena Rome muadi muonsu bua kusungidila bena dietu, mushindu wikale bualu bumueneka.

²⁶Bu mutudi bashindika mu Rome ne: nansha ntete ya bukula, nansha bia lufu, nansha nkanu mitoke ya mushinga mukole, nansha majuwa, bena Yuda kabena bapa nansha basombesha baluishi ba bena Rome. Bena Yuda badi ne bua kulama meyi ne mikandu bia ndondu eyi katuyi tubafuta.

²⁷Mbia momumue padi mvita midianjile kukuata bena Yuda, bena Rome nebayiluangane pabu ne muoyi mujima, mushindu udi bualu bumueneka.

²⁸Bena Rome kabena mua kupa baluishi nansha ntete ya kuenza bukula, nansha bia lufu, nansha nkanu mitoke ya mushinga mukole, nansha majuwa, bu mutudi bashindike mu Rome. Kadi bena Rome badi ne bua kulama meyi ne mikandu bia ndondu eyi kabayi bakeba difutu kudi bena Yuda to.

²⁹Ke mushindu udi bena Rome batua ndondu ne bena Yuda nanku.

³⁰Pikala aba nansha baba, mu matuku avuavua, basue kusakidila, nansha basue kumusha bualu ku aa, nebenze ne dianyisha dietu bonsu. Diba adi disakidila nansha diumusha adi nedikuate bonsu.

³¹Bua makenga avuabu nawu, mapeta kudi mukalenga Demetriyuse, tudi bafundila mukalenga mukanda ne miaku eyi: “Udi ukengesha bena Yuda balunda betu, kabidi bena dietu, bua tshinyi?

³²Bobu bakusonguela kabidi kutudi, tudi tuma ku tshiabu, netukuluishe miaba yonsu, mu mayi nansha ku mukuna.”