Read Tshiluba 1 Bamakabe 9 Bible Online

1 Bamakabe 9 - Tshiluba bible

1 Bamakabe 9

¹Pumvuila Demetriyuse muvuabu bashipa Nikanore, batshimuna ne tshiluilu tshiende, kutumaye tshiakabidi Bakidese ne Alkime[127] mu ditunga dia bena Yuda mu tshikondu atshi bua kuludika tshiluilu tshiende.

²Bena tshiluilu kuyilabu njila wa ku Ngalileya, kunyungulula musoku wa Mesalote pa buipi ne tshimenga tshia Arbele.[128] Kukuatabu musoku ewu, kushipa musumba wa bantu.

³Mu ngondu wa kumpala wa tshidimu tshia 152,[129] kuasabu mitanda yabu mitangilangane ne Yerushalayime.

⁴Pashishe kuyabu ne basalayi bavua benda ku makasa binunu makumi abidi, ne ba pa tubalu binunu bibidi, batangile ku Bereta.[130]

⁵Kadi Yudase pende uvua ne bena mvita bapiluke binunu bisatu, bavua base mitanda mu Elasa.[131]

⁶Pamuenabu bunene bua tshiluilu tshia baluishi, ke bena mvita ba bena Yuda kupetabu bowa. Bavule kunyema, kushalaku amu bantu nkama muanda mukulu.

⁷Yudase umona muvua bena tshiluilu tshiende bongoloka baya, nwita payi mimufinakaje, muoyi kumusunsuka munda. Bualu kavua ne diba dia kusangisha bena diende kabidi to.

⁸Yudase mutekesha mu maboku, kadi uvua amu wambila bavua bashala ne: — Jukayi, tuyayi kudi baluishi betu, ne tudi mua kubatshimuna.

⁹Bena mvita bende kabavua banyishe, kumuambilabu ne: — Katuena ne tshitudi mua kuenza mpindiewu to. Kadi tukebe amu bua tuikale ne muoyi. Pangapingana ne bana betu ne tushishe kubangulula mvita. Bualu tudi bungi bukese.

¹⁰Yudase kuandamuna ne: — Kanuambi nanku to, tshiena musue bua bantu bambe ne: mmunyeme! Tshikondu tshietu tshia lufu tshiakumbanyi, tufuayi ne muoyi mukole bua bana betu. Katuena mua kunyanga lumu luetu to.

¹¹Baluishi kupatuka mu mitanda, kuela mualu wa mvita kumpala kua bena Yuda. Babandi babu ba pa tubalu tua mvita bavua batapulula mu bisumbu bibidi. Beedi ba mabue ne ba miketa bavua benda kumpala kua tshiluilu, kadi baluanganyi bapiluke bavua mu milongu ya kumpala ya tshiluilu.

¹²Bakidese kulombola luseke lua ku dia balume dia tshiluilu. Bena mafuma, miele ne ngabu, ba ku makasa, bavua basesa ku nseke yonsu ibidi, balonda mudi mpungi idila. Bena mvita ba Yudase kuela pabu mpungi.

¹³Buloba kuzakala ne mutoyi mukole wa biluilu bibidi ebi. Myita kutuadija ku dinda too ne ku dilolu.

¹⁴Yudase kumona muvua Bakidese ne tshitupa tshinene tshia tshiluilu tshiende benda ku dia balume. Uvua munyungulukila kudi bantu ba bukitu.

¹⁵Kutankulabu baluishi ba bena Siriya bavua benda ku dia balume dia tshiluilu, kubalondakaja too ne ku mikuna ya Azara.[132]

¹⁶Kadi bena ku dia bakaji bamona bena ku dia balume benda basemena panyima, kupindulukabu panyima pa Yudase ne bena diende, benda babaluisha mvita.

¹⁷Mvita kukola, bantu bavule ba nseke yonsu ibidi kufua.

¹⁸Yudase kufua pende muine mu mvita ayi. Diba adi bantu bende bavua bashale kuditua lubilu.

¹⁹Yonatane ne Simeyone kuangata tshitalu tshia Yudase, kutshijika mu Modine[133] mu nkita ya diku diabu.

²⁰Bena Izrayele kudila Yuda bikole. Kuenzabu madilu ende matuku mavule, bamba ne:

²¹Tshilobu tshia bena Izrayele tshiajiminyi bishi?

²²Mikuabu mianda ya Yudase, bu mudi mvita yende, malu a bulobu buende, kabidi ne bionsu bidi bileja malu a lumu luende, kabiena bifunda bionsu to, bualu mbipite bungi.

²³Yudase mumane kufua, bantu bavua kabayi banemeka meyi a Moshe, ne bonsu bavua ne buenzayi mu Izrayele, kupetabu dikamakama.

²⁴Kadi bu muvua tshiyole tshinene mu ditunga, bena Izrayele kumyuangana ne bantu babi abu.

²⁵Ke Bakidese kusungula munkatshi mua bena Yuda babengi ba diyi dia Mvidi Mukulu bua bamone mua kuludika ditunga.

²⁶Bantu aba kukuatshisha balunda ba Yudase, kubafila kudi Bakidese bua kubanyokaye, kubatshimbakaja.

²⁷Izrayele kubuela mu tshinyangu tshivua katshiyi tshienzeka katshia tshikondu tshia bambi tshiapita.

²⁸Nanku ke balunda bonsu ba Yudase kusangila, kuambilabu Yonatane ne:

²⁹— Katshia Yudase wenu wafua, kakuena muntu udi mua kuluisha baluishi betu bu yeye, kuluisha Bakidese ne bonsu badi bapangila ditunga dietu.

³⁰Tudi tukusungula lelu bua ushale pa muaba wende bu mfumu ne mutuludiki, kabidi bua ulombole tshiluilu tshietu.

³¹Diba adi, ke diapingena Yonatane pa muaba wa muanabu Yudase. Kuitabaye bua kulombola bena Yuda.

³²Bakidese umvua malu awu, kukebaye mua kujimija Yonatane.

³³Yonatane ne Simeyone wabu kumanya bualu. Kabidi ne bonsu bavua ne Yonatane kubumanya pabu. Kusombabu mu tshipela tshia Tekowa. Kuasabu mitanda yabu pabuipi ne mabungu manene a mayi a mu Asfare.[134]

³⁴(Bakidese kumvua bualu abu dituku dia Dikisha, muaba uvuabu. Ke kusabukaye musulu wa Yardene ne tshiluilu tshiende.[135])

³⁵Yonatane kutuma muanabu Yowanane uvua ulombola bena meku a bena nwita bua alombe balunda bende bena Nabate[136] dianyisha dia kuteka mabuki abu mavule mu musoku wabu.

³⁶Kadi bena Jambri ba mu Medeba[137] kubakula Yowanane ne bionsu bivuaye nabi mu njila, kuya nabi.

³⁷Ke Yonatane ne Simeyone wabu kumvua ne bena Jambri badi benza tshibilu tshinene tshia dibaka. Nsongakaji uvua muana wa muntu munene wa bena Kenaane. Bumvua kabidi ne: bantu musumba nebaye kuangata muana mu tshimenga tshikolesha tshia mu Nabata.[138]

³⁸Ke Yonatane ne Simeyone kuvulukabu lufu lua muanabu Yowanane, mushipa kudi bena Jambri. Kuyabu, kusokoma mu lubinga lua mu mikuna.

³⁹Pavuabu basokoma, kumvuabu mutoyi munene, kumonabu mulume uvua mubangilangane, ne balunda bende ne bana babu, benda ne bintu bivule. Bena misambu ne bena ngoma bavua nabu. Bonsu bavua ne bia lufu mu bianza.

⁴⁰Yonatane ne bena Yuda kupatuka, kudiela kuvua baluishi, kubashipa ba bungi. Bashadile ne muoyi kunyemabu batangila ku mikuna. Bena Yuda kuangata bintu bionsu bivua baluishi abu nabi.

⁴¹Nenku “didia dia dibaka kuandamuka madilu. Misambu payi kuandamuka miyenga ya muadi.[139]”

⁴²Yonatane ne Simeyone kusombuelabu lufu lua muanabu. Kupinganabu mu tshisense tshia musulu wa Yardene.

⁴³Bakidese umanya muaba uvuabu, kuluaye dituku dia Dikisha ne tshiluilu tshinene ku muelelu wa Yardene.

⁴⁴Yonatane kuambila bantu bende ne: — Tuyayi! Tuluangane bua kudisungidila. Katshia katuena banji kupeta njiwu bu itudi nayi lelu.

⁴⁵Tudi mpindiewu ne baluishi kumpala kuetu, kunyima kudi musulu wa Yardene, ku nseke kudi tshis nse kabidi ne difu. Katuena ne muaba nansha umue wa kunyemena.

⁴⁶Tutendelelayi Maweja-Nangila bua tupanduke kudi baluishi betu.

⁴⁷Myita kubanga, Yonatane olola diboku ne ntape Bakidese. Kadi Bakidese kuepela, kupingana tshianyima, kuvua bena mvita babu.

⁴⁸Ke Yonatane ne bena diende kudiela mu musulu wa Yardene, kuowela, kusabuka dia muamua. Baluishi babu nansha kusabuka musulu to.

⁴⁹Bantu bavua Bakidese nabu, kufua batua ku tshinunu dituku adi.

⁵⁰Bakidese kupingana mu Yerushalayime. Kuibakaye bimenga bikolesha ne bimana, biibi ne bikuvu, mu ditunga dia Yudeya, mu Yeriko, mu Emawuse, mu Betorone, mu Betele, mu Timna, mu Faratone ne mu Tefone.[140]

⁵¹Pashishe kutekaye tshisumbu tshia bena mvita mu tshimenga tshionsu bua kusuya bena Izrayele.

⁵²Kukoleshaye tshimenga tshia Bete-Sure, tshia Ngezere[141] kabidi ne bimana bia Yerushalayime. Kutekayemu bisumbu bena mvita ne mayeba a biakudia.

⁵³Kukuataye bana ba bamfumu ba matunga lukola, kubalamina mu nzubu wa lukanu wa bimana bikolesha.

⁵⁴Mu tshidimu tshia 153, mu ngondu muibidi, Alkime kutuma diyi bua babumbule tshimana tshia munda mua lupangu lua nzubu wa Mvidi Mukulu. Ke muvuaye musue kunyanga mudimu muenzeja kudi bambi.[142] Kutuadijabu kubibumbula.

⁵⁵Kadi Alkime kupeta disama, midimu kuanji kuimana. Katshivua ne bukole, kayi mua kunyungisha mubidi, katshiyi mua kuakula nansha kuamba kalu ka dilayangana ne bena diku diende.

⁵⁶Alkime kufua mu tshikondu atshi, mukenga bikole ne disama.

⁵⁷Bakidese umvua muvua Alkime mumane kufua, kupinganaye kuvua mukalenga Demetriyuse. Ke bena Yuda kuanji kushala mu ditalala bidimu bibidi.

⁵⁸Nanku bena Yuda bonsu bavua babenga diyi dia Mvidi Mukulu, kusangilabu, kuambilanganabu ne: “Yonatane ne bena diende bashadi mu bupole, kabayi badimuke bua kutshina mvita. Nanku tupingajayi Bakidese mpindiewu, abakuate bonsu butuku bumue.”

⁵⁹Kuyabu kumyuangana nende.

⁶⁰Bakidese kubanga luendu ne tshisumbu tshinene tshia bena mvita. Kufundilaye bena Yuda bavua batue ku tshiende mukanda mu musokoku, ubalomba bua kukuatabu Yonatane ne bena diende. Kadi Yonatane kujandula meji avuaye muele awu. Bualu nansha kukumbana.

⁶¹Kadi Yonatane ne bena diende kukuatabu bantu bavua bakeba mbipishilu, batue ku makumi atanu, kubashipa.

⁶²Pashishe Yonatane, Simeyone ne bena diabu bonsu kuya mu tshipela, mu tshimenga tshia Bete-Basi.[143] Kuasululabu nzuba ya muaba awu ivua minyanguke, kukolesha ne bimana.

⁶³Bakidese umvua nanku, kusangishaye tshiluilu tshiende tshijima, kubikilaye kabidi bena diende bavua mu ditunga dia Yudeya.

⁶⁴Kuvuaye kuela mualu wa mvita mu mpala mua Bete-Basi, kubundaye bavua muaba awu matuku mulongu ne matempu a mvita.[144]

⁶⁵Nenku Yonatane kushiya Simeyone wabu mu tshimenga. Yeye ne tshiluilu tshikese, kupatukabu mu tshimenga bua kuendakana mu ditunga.

⁶⁶Kutshimunaye Odomera ne bana babu, kabidi ne bana ba Fasirone,[145] mu mitanda yabu. Yeye mumane kubatshimuna kudisangishabu ne Yonatane, bua kuluisha Bakidese pamue nende.

⁶⁷Simeyone ne bantu bende kupatuka ku Bete-Basi kuosha matempu a mvita.

⁶⁸Kuluishabu Bakidese, kumutshimuna. Ke diba divuaye mutekeshe mu maboku pavuaye kayi mukumbaje meji ende avuaye muelele bena m vita.

⁶⁹Bakidese kupeta tshiji tshikole bua bantu babi bavua bamufikishe mu ditunga emu, kubashipa bavule. Kushindikaye bua kupingana kuende.

⁷⁰Kadi pumvuila Yonatane bualu ebu, kumutuminaye bantu bua batue ndondu, kabidi bapingajilangane bena lukanu.

⁷¹Bakidese kuanyisha dilomba dia Yonatane. Kukumbajaye tshivuaye ulomba bua kabenzedianganyi bibi kashidi.

⁷²Kumupingajilaye bena Yuda bonsu bavuaye muele mu lukanu. Pashishe kupinganaye kuende. Kena mufike kabidi mu ditunga dia Yuda to.

⁷³Bena Izrayele kushala mu dikisha. Yonatane kuya kuasa mu Mikmase.[146] Ufika muamua, kutuadijaye mudimu wa kulumbuluisha bena Izrayele. Ke kushalaye mfumu wa bantu bende, kumushaye bonsu bavua babenga Mvidi Mukulu kabayi bamutumikila.