Read Tshiluba 2 Bamakabe 1 Bible Online

2 Bamakabe 1 - Tshiluba bible

2 Bamakabe 1

¹“Bena Yuda badi mu Yerushalayime ne badi mu ditunga dia Yudeya, badi batumina bana babu badi mu Ejipitu[1] mukanda, babajingila bupole ne diakalenga.

²“Mvidi Mukulu anuenzele bimpe! Avuluke ndondu uvuaye mutue ne bena mudimu bende, bavua bamulamate: Abrahame, Izake ne Yakobe.

³Anuambike bonsu muoyi wa kumukukuila, kabidi ne wa kuenza mudiye musue ne muenu muonsu.

⁴Anumanyishe diyi diende ne mikenji yende. Abueje bupole kunudi!

⁵Ateleje malomba enu, anulekele mibi yenu. Kanulekedi diba dia dikenga to!

⁶Ke tshitudi tulomba bualu buenu muaba ewu ne mpindiewu.

⁷“Mu tshidimu tshia 169, pa bukalenga bua Demetriyuse, tuetu bena Yuda tuvua banufundile ne: Bidimu ebi, dikenga ne lutatu bivua bibuele munkatshi muetu bua Yasone ne badi batua ku tshiende, bavua banyange Buloba bua Tshijila, ne bua Mukalenga[2] Mvidi Mukulu wetu.

⁸Kuoshabu tshiibi tshinene tshia nzubu wa Mvidi Mukulu. Kabidi kushipabu bantu bavua kabayi kalu. Ke patuvua batendelele Maweja-Nangila. Kutumvuaye. Tuetu kulambula milambu ya diosha ne ya ntete ya bukula. Tuetu kutemesha miendu ya mu nzubu wa Mvidi Mukulu, kuteka mampa a tshijila.”

⁹“Kadi mpindiewu, tudi Umulomba bua nuikale nuenza tshibilu tshia tuzubu tua Bisasa mu ngondu wa Kislewu[3] matuku malondangana muanda mutekete.

¹⁰“Mu tshidimu tshia 188.[4]” “Bena Yuda badi mu Yerushalayime ne badi mu Yudeya, Tshipangu tshia bakulu ne Yudase, badi batumina Aristobule wa mu tshisamba tshia batuangaji ba Maweja-Nangila, mufidi wa ngenyi wa mukalenga Ptolemeye, ne bena Yuda badi mu Ejipitu mukanda, babajingila diakalenga ne bukole bua mubidi.[5]

¹¹“Mvidi Mukulu mmumpandishe ku njiwu minene. Tudi tumuanyisha bikole, bualu waluishi mukalenga bualu buetu.[6]

¹²Maweja-Nangila wipatshi bonsu bavua mu tshimenga tshia tshijila, bafika ne bia lufu bua kuluisha benamu.

¹³Mukalenga Antiyokuse uvua muye mu Persa ne tshiluilu tshiende tshivua tshimueneka katshiyi mua kukimina. Batuangaji ba nwidie mukaji, Naneya kushipabu ne budimu mukalenga ne tshiluilu tshiende.[7]

¹⁴Bualu Antiyokuse mushindikija kudi balunda bende, kubuelabu mu nzubu wa nwidie awu bua kumusela. Pine apu uvua ne dijinga dia kuangata mpetu mipite bungi ivua mu nzubu wanwidie awu.

¹⁵Batuangajibamu nzubu wa Naneya kuleja mpetu yonsu patoke. Mukalenga Antiyokuse ne balunda bende bakuabu kubuela munda mua nzubu wa nwidie. Kadi batuangaji kuinjila muaba wabu wa tshijila pabuedi Antiyokuse.

¹⁶Kunzululabu tshiibi tshia mu tshisasa tshia nzubu, kuasabu mukalenga ne bantu bende mabue. Kubakosabu bidimba ne mutu, kuelelabu bavua pambelu mitu yakakosabu ayi.

¹⁷Mvidi Mukulu atumbe kashidi, bualu yeye ngudi mushipeshe badi bamutombokela! Atumbe tshiendelele!

¹⁸“Tudi tuenza tshibilu tshia dijidila dia nzubu wa Mvidi Mukulu ne tshia tuzubu tua Bisasa mu matuku makumi abidi ne atanu a ngondu wa Kislewu. Tudi tunumanyisha bua nuenze penu tshibilu etshi. Ke munudi mua kuvuluka kapia kavua kamueneka diba divua Nehemiya, mumane kuasulula nzubu wa Mvidi Mukulu ne tshilambuilu,[8] mulambule milambu.

¹⁹Bualu, diba divuabu baye ne batatuetu ku Persa,[9] bamue batuangaji balamatshi ba Mvidi Mukulu kuangatabu kapia ka tshilambuilu, kukateka mu musokoku mu lubuebue luvua bu tshiina katshiyi ne mayi. Bavua basokoke kapia bikole mushindu uvua muntu nansha umue kayi mua kukamona.

²⁰Bidimu bivule bimane kupita, ku bulongolodi bua Mvidi Mukulu, mukalenga wa bena Persa kutumaye Nehemiya mu Yerushalayime. Awu kulomba kudi bena diku dia batuangaji bavua basokoke kapia bua baye kukakeba.

²¹Kadi bu muvuabu batumvuija ne: kakuena kapia to, anu bintu bia muendundu bikuatakana bu mafuta, Nehemiya kutuma diyi bua bamutuadile tshitupa tshia bintu abi. Diba dituabu balongolole bintu bia kulambula, Nehemiya kutumina batuangaji diyi bua bamiamine bintu abi pa nkunyi ne pa milambu ivua mitekapu.

²²Benza nanku, dibungi ditangalaka, munya utema, kapia kanene kutema, bantu bonsu kukema.

²³Diba divua kapia aku kuosha milambu, batuangaji bavua batendelela pamue ne bantu bakuabu bonsu. Yonatane uvua wakula, pashishe bonsu bavua bapunguluja pamue ne Nehemiya.[10]

²⁴Ditendelela adi divua nenku: “Maweja-Nangila, Maweja-Nangila Mvidi Mukulu wetu, Mufuki wa binta bionsu, wa kutshina, wewe udi mukole, muakane, muena luse. Wewe nkayebe udi mukalenga, wewe udi muimpe.

²⁵Wewe nkayebe udi ne luse, kabidi udi ne muoyi muakane, udi muena bukole bonsu ne wa kashidi, ukeba amu bua kupandisha bena Izrayele ku bubi buonsu. Wewe ke uvua musungule bankambua betu bua bikale bantu bebe, mubateke pa nkayabu bua bakuenzele mudimu.

²⁶Anyisha mulambu ewu utudi tulambula bua bantu bebe bena Izrayele bonsu. Ubalame bualu mbantu bebe, ubambuluishe bua bakuenzele mudimu.

²⁷Pingaja munkatshi muetu bonsu bavua batangalaja.[11] Patula mu bupika badi kua bende. Fuila bantu bebe badibu bapepeja, bakengesha luse, bua bukua matunga bukumanye muudi Mvidi Mukulu wetu.

²⁸Nyoka bonsu badi batukengesha, batufuisha bundu padibu baditambisha.

²⁹Teka tshisamba tshiebe mu ditunga diebe dia tshijila bu mutua Moshe muambe ne: Newenze.[12]”

³⁰“Pashishe batuangaji kuimba misambu.

³¹Milambu mimane kupia yonsu mijike, Nehemiya kutuma diyi bua bitshikijile binta bia muendundu bitua bishale pa mabue manene.

³²Bitshikija amu nanku, kapia kujikuka, kadi dinkenke diaku divua dishadile ku dia kapia kavua katema ku tshilambuilu.

³³“Bualu butua buenzeka kutangalaka mu buloba bujima. Mukalenga wa bena Persa kumvuaye muvuabu basangane binta bia muendundu muaba uvua batuangaji batuabu baye nabu ku bupika basokoke kapia. Kumvuaye kabidi mutua Nehemiya ne balunda bende bangate binta bia muendundu bua kuosha nabi mulambu pa tshilambuilu.

³⁴Nanku, mukalenga mumane kukenketa bualu abu, mmujadike, kueleshaye lupangu muaba awu, bua bautangile bu muaba wa tshijila.

³⁵Muaba awu uvuile muaba wa tshimuenenu tshia binta bitule bia mukalenga. Utua usankisha nabi bantu batua pa diende.

³⁶“Nehemiya ne bantu bende batua babikila binta abi ne: Neffare, mmumue ne: ‘Diumusha mikiya,’ kadi bantu ba patupu badi babikila ne: ‘Nafte.[13]’ ”