Read Tshiluba 2 Bamakabe 10 Bible Online

2 Bamakabe 10 - Tshiluba bible

2 Bamakabe 10

¹Maweja-Nangila uvua uludika Yudase Makabe ne bavuaye nabu bua kunyengabu tshiakabidi nzubu wa Mvidi Mukulu ne tshimenga tshionsu tshia Yerushalayime.

²Kubumbulabu tshilambuilu tshia nwidie, tshiwa tshibaka pa muaba wa tshisalu kudi benyi, ne kabidi miaba yabu mikuabu ya bitendeledi ivuabu base.

³Bobu bamane kujidila nzubu wa Mvidi Mukulu, kuasabu tshilambuilu tshipiatshipia. Kututakajabu mabue a kapia.[106] Kupetabu kapia ka ku tuntolentole tua mabue awu, kulambula naku mulambu, bualu kabatshiwa balambula kabidi milambu mvula ibidi mijima. Kuoshabu musenga wa kamonya, kutemesha miendu, kuteka mampa a tshijila pa mesa.

⁴Bamane kuenza bionsu ebi, kutendelelabu Maweja-Nangila, batua biadi panshi, bua kabakengeshi kabidi mu makenga a mushindu ewu to. Pikalabu mua kumuenzela bibi, abanyoke ne muoyi wa luse. Kabafidi mu bianza bia matunga adi apenda Mvidi Mukulu, kabidi anyanga bantu bende bibi.

⁵Dituku diakajidilabu nzubu ndiodi dine divuabu banyanga nzubu ne mikiya ya benyi. Ke dia matuku makumi abidi ne atanu a ngondu wa Kislewu.[107]

⁶Kuenzabu tshibilu matuku muanda mukulu, bu mutubu benza tshibilu tshia tuzubu tua Bisasa.[108] Yudase ne bavuaye nabu bavua bavuluke muvuabu bapitshisha kumpala kua matuku amu makese tshibilu tshia tuzubu tua Bisasa, bendakana pa mikuna, balala mu mbuebue amu bu nyama ya difu.

⁷Ke pavuabu bambula mitshi milengeja ne mionji ya nwinyo, malala ne tutamba tua mitshi mu bianza. Bavua bimbila Mvidi Mukulu uvua mubambuluishe bua bamone mua kujidila nzubu wende.

⁸Kuelabu mukenji uvuabu banyisha kudi bantu bonsu ne: “Ku tshidimu ku tshidimu, bena Yuda bonsu nebenze tshibilu etshi.”

⁹Ke muvua malu a Antiyokuse Epifane nanku.

¹⁰Tudi tuleja mpindiewu malu adi atangila Antiyokuse Epatore, muana wa muntu mubi awu, uvua kayi witaba Mvidi Mukulu. Tudi Umulondela mu tshikosu makenga avua mvita eyi Kutukebela.

¹¹Mukalenga Epatore mumane kuangata bukalenga bua tatuende, kutekaye Lisiyase, mu muanzu wa bulongolodi bua ditunga, muikale kabidi mulombodi wa buloba bua Siriya ne Fenisiya,[109]

¹²pa muaba wa Ptolemeye Makrone.[110] Uvua wa kumpala uvua ulombola bena Yuda, mu buakane ne mu bupole, umvua luse bua makenga mapite avua bena Yuda bamane kumvua.

¹³“Balunda ba Mukalenga[111]” kumufunda kudi Epatore. Kumvuaye bakadi bamubikila ne: mmuntu mubi, mupangidi wa bantu. Bavua bamuasa tshilumbu bualu uvua mumuke mu Shipre muvuabu bamuteka kudi Filometore mukalenga wa Ejipitu, kuya kulamata mukalenga Antiyokuse Epifane. Kavua kabidi ne mushindu wa kukumbaja midimu ya muanzu uvuaye nawu bimpe. Ke kudilungaye, kufua.

¹⁴Ngorjiyase ushala mulombodi wa ditunga dia Idumeya,[112] kusangishaye tshiluilu tshia benyi, bua kuluisha bena Yuda diba dionsu.

¹⁵Diba adi, bena Edome bine, bamfumu ba nzubu ya bena mvita, bavua baluisha amu kuluisha bena Yuda. Bavua bakidila bantu bavuabu bipata mu Yerushalayime. Bavua basonsola amu bantu ku mvita.

¹⁶Kadi Yudase ne bena mvita bende, bamane kutendelela Mvidi Mukulu, bamulomba bua atue ku tshiabu, kuyabu mpindiewu bua kuluisha nzubu ya bena mvita ba bena Edome.

¹⁷Bavua baluangana bikole, kuipatabu bonsu bavua baluila pa bimana, babuela mu nzubu ya bena mvita. Bonsu bavuabu bakuata, bavua babakosa mitu. Bashipele bantu bapita pa binunu makumi abidi.

¹⁸Baluishi, bu binunu tshitema, kuyabu kusokoma mu tuleya tubidi tuasa bikole. Bavua ne bionsu bisuabu nabi dikenga, bua kuipata baluishi bavua basue kubuela mu tuleya atu.

¹⁹Yudase Makabe kushiya Shimeyone ne Yozefe pamue ne Zakayi ne bena diende, bungi bukumbane mua kuluisha tuleya atu. Makabe muine kuya miaba mikuabu isuabu nende dikenga.

²⁰Kadi bantu bavua nabu Shimeyone, mbena lukuka lua biuma, bakabakosa mishiku kudi bamue bantu basue munda mua tuleya. Bakangata nkanu mitoke ya mushinga mukole binunu makumi muanda mutekete, bua kulekela bamue baluishi, kubanyemesha.

²¹Yudase umanya bualu abu, kusangishaye bamfumu ba bena mvita bende, kulejaye muvua bantu abu basumbishe bana babu pa kunyemesha baluishi badi mua kubenza mvita tshiakabidi.

²²Yudase kushipeshaye bena tshibassu abu. Ke kukuataye tuleya tuonsu tubidi.

²³Makabe usua mupete amu dikasa dimpe mu mvita yende yonsu. Kutshimunaye bantu bapite pa binunu makumi abidi mu nzubu eyi ibidi ya bena mvita.

²⁴Timote uvua bena Yuda batshimuna musangu wa kumpala assu, wakakeba bena mvita benyi musumba munene. Kukungujaye kabidi babandi ba pa tubalu, bafuma ku Aziya.[113] Kubuelaye nabu mu Yudeya bua kukuata ditunga ku mvita.

²⁵Pakawabu basemena pabuipi, ke Yudase Makabe ne bantu bende kutendelela Mvidi Mukulu, kuela buloba mu mitu,[114] kuvuala bilamba bia madilu mu tshimonu.

²⁶Bavua badiela panshi kumpala kua tshilambuilu, balomba Mvidi Mukulu bua abafuile luse, aluishe baluishi babu, bu mudibu bafunda mu mikenji.[115]

²⁷Bapatuka mu ditendelela, kuangatabu bia lufu, kupatukabu mu tshimenga, benda mutantshi mule. Kadi pafikibu pabuipi ne baluishi, kuimanabu.

²⁸Amu panshi pabululuka, kubangabu mvita, kutuilanganabu nseke yonsu ibidi. Bena Yuda bavua batekemena ne tudi ne bukitu buetu, tudi kabidi ne ditekemena dietu kudi Maweja-Nangila. Kadi baluishi babu ku luabu luseke, bavua amu bela meji ku tshiji tshiabu.

²⁹Munkatshi mua mvita ayi, baluishi kumona mu diulu tubalu tutuluka, tuvuala bilamba bia mpawungi. Babandapu kudi bantu batanu balenga tshishiki, bimana kumpala kua bena Yuda bua kubaludika.

³⁰Bavua bela Yudase munkatshi muabu babidi ku luseke babidi ku luseke, bamulama bimpe ne bia mvita biabu bua katapiki. Bavua basa baluishi mikete, babela kabidi ne bintu bivua bitema kapia. Ke baluishi kupanga kua kuya, kubatshiompakajabu, kutangalakabu nduu.

³¹Bawa bashipa basalayi ba ku makasa binunu makumi abidi nkama itanu ne babandi ba pa tubalu nkama isambombu.

³²Timote mene kunyemena mu Ngezere,[116] muaba mukolesha bimpe ne bimana. Kereyase uvua mulombodi wa muaba awu.

³³Kadi Yudase ne bena diende kubaluisha bikole mu matuku anayi majima.

³⁴Ke muvua baluishi bela meji ne: tudi tusomba muaba mukole, batungunuka amu ne disendeka Mvidi Mukulu, kabidi bapenda bena Yuda ne miaku mibi.

³⁵Butshia dituku ditanu, bansongalume makumi abidi, bena mvita ba Yudase, kupetabu tshiji tshikole bua bipendu bia baluishi, kubandabu pa bimana, kudiela ne bukitu muvua baluishi, kushipabu bonsu bavuabu bakuata.

³⁶Bakuabu kubuela momumue, ku luseke lukuabu lua panyima pa tuleya, kuoshabu tuleya, batemesha nkunyi, kuoshabu basendeki ba Mvidi Mukulu abu ne muoyi. Kadi bakuabu, kutshibulabu biibi bia tshimenga, kubuejamu basalayi babu bavua bashala. Nenku ke bobu kukuata tshimenga tshijima lukasa.

³⁷Timote uvua musokome mu tshiina tshia mayi pamue ne muanabu Kereyase ne Apolofane. Babamona kubashipabu bonsu.

³⁸Pakajikijabu mudimu ewu, kuanyishabu Mvidi Mukulu ne misambu, kumutua makumbu bu muvuaye muenzele Izrayele bimpe, mumupeshe dikanda dia kutshimuna.