Read Tshiluba 2 Bamakabe 11 Bible Online

2 Bamakabe 11 - Tshiluba bible

2 Bamakabe 11

¹Matuku makese apita, Lisiyase, mulombodi wa kumpala mu bukalenga, “tatuende mukuabu wa Mukalenga,[117]” uvua mutangidi wa malu onsu a mu bukalenga, kubungamaye bikole bua malu onsu avua menzeka.

²Kusangishaye bena mvita ba ku makasa bu binunu makumi muanda mukulu, ne ba babandi ba pa tubalu bonsu. Kuyabu bua kuluisha bena Yuda. Uvua ujinga mua kuandamuna tshimenga tshia bena Yuda, tshishala tshimenga tshikale ne bibidilu bia bena Ngreke.

³Uvua ujinga bua bafute tshitadi tshia muaba wa tshijila amu mudibu bafuta bua nzubu mikuabu ya mvidie ya matunga a bende. Uvua ujinga kabidi bua bapane muanzu wa mutuangaji munene ku tshidimu ku tshidimu.

⁴Lisiyase kawa uvuluka bukole bua Mvidi Mukulu to. Uvua amu usanka pa kumona bungi bua bena mvita bende ba ku makasa, bavua binunu ne binunu, ne bungi bua babandi ba pa tubalu, bavua tshinunu, ne bungi bua nyama yende ya nzevu, ivua makumi muanda mukulu.

⁵Pakafikaye mu Yudeya, kusemenaye pabuipi ne nzubu wa bena mvita wa mu tshimenga tshia Bete-Sure,[118] tshiwa mutantshi bu wa kilometre 28 luseke lua kuinshi lua Yerushalayime. Kuluishaye bena mvita abu bikole.

⁶Kadi Yudase Makabe ne bena diende bumvue ne: Lisiyase mmuluishe nzubu yabu ya bena mvita, kusengelelabu Maweja-Nangila ne muadi ne binsonji ku mesu. Pamue ne bantu bonsu, bavua balomba Maweja-Nangila bua atume mutumibue[119] wende, asungidile bena Izrayele.

⁷Makabe kudianza kuambula bia lufu yeye muine. Kukoleshaye bakuabu ku muoyi bua badifile mu njiwu bua kupandisha bana babu. Bonsu ne muoyi umue, kuyabu kuvua baluishi.

⁸Kadi patshivuabu pabuipi ne tshimenga tshia Yerushalayime, ke muena nwita mubandi wa pa tubalu muvuale bilamba bitoke kumuenekaye kumpala kua bena Yuda bua kubaludika. Usua ne bia lufu bia mpawungi mu bianza.

⁹Diakamue, kuanyishabu pamue Mvidi Mukulu muena luse. Kudiumvuabu ne dikanda, ki ngamu bua kushipa bantu, kadi kabidi bua kushipa nyama ya lonji, ne dia kupanda bimana bia tshiamu.

¹⁰Nanku kuyabu kumpala bela mualu wa mvita. Mutumibue wa mu diulu kuendaye nabu, kubalombola bualu Maweja-Nangila uvua mumane kubafuila luse.

¹¹Kudielabu munkatshi mua baluishi bu mudi nyama ya ntambue. Bena mvita ba ku makasa kufua binunu dikumi ne tshimue, babandi ba pa tubalu tshinunu ne nkama isambombu. Ke baluishi bakuabu bonsu kunyema.

¹²Ba bungi kunyema batapika, bamane kuimansha bia lufu bisuabu nabi ku bianza. Lisiyase pende kunyema, kulejaye bukata buende patoke.

¹³Kadi Lisiyase kavua muntu mupote nansha. Kuelaye meji pa mushindu uvuabu bamutshimuna. Kumanyaye ne: bena Yuda badi bamutshimuna bualu badi babambuluisha kudi Mvidi Mukulu wa bukole. Ke kutumaye bantu

¹⁴bua badie tshibalu, bumvuangana bimpe. Uvua ubalaya kabidi mua kuenza muende muonsu bua mukalenga ashale mulunda wa bena Yuda.

¹⁵Yudase kuanyisha bionsu bivua Lisiyase mumuambile, bualu uvua ukeba amu diakalenga dia bantu. Kabidi bionsu bisua Makabe mufundile Lisiyase mumulombe bua bena Yuda kupeta dikisha, mukalenga usua mubianyishe pende.

¹⁶Ke mukanda usua Lisiyase mufundile bena Yuda essu: “Nuenu bena Yuda bonsu, muoyi wenu!

¹⁷“Bantu banutua bantumina, Yowanane ne Absalome, mbantuadile mukanda udi ulonda ewu,[120] bandomba bua nshindike bidi bifundamu.

¹⁸Nanku meme kuanyisha bimvua ne bukenji bua kuanyisha. Ke meme kuleja mukalenga bisua bimutangila yeye.[121]

¹⁹Kadi bu nuenu bashale balamate ku bumfumu bua ditunga, nengenze muonsu mundi mua kuenza bua nupete diakalenga.

²⁰Kadi mvua mulombe bantu banutua bantumine ne bantu banyi bua babuele nenu mu tshipangu, bumvuangane nenu mushindu unudi mua kukumbaja bionsu ebi.

²¹“Nuashala bimpe! Ndi mfunda mukanda ewu mu tshidimu tshia 148, matuku 24 a ngondu wa Zeyuse-Korente.[122]”

²²Ke mukanda usua mukalenga mufundile Lisiyase ewu: “Meme mukalenga Antiyokuse, ndi mfundila muanetu[123] Lisiyase mukanda. Kolaku!

²³“Tatu wanyi mmumane kufua. Ndi njinga bua bena ditunga dietu bonso basombe talalaa, bakuata mudimu mudibu basue.

²⁴Tumvu kabidi mudi bena Yuda kabayi basue kulonda bibidilu bia bena Ngreke, bu muvua tatu wanyi mujinge. Badi basue kusomba mudibu basue. Ke padibu balomba bua bamone mua kulama mikenji yabu.

²⁵Nanku, tudi tujinga bua bantu aba kabidi basombe talalaa. Tuajadiki bua babapingajile nzubu wabu wa Mvidi Mukulu. Basombe bu bena matunga makuabu bonsu, balame bibidilu bia bankambua babu.

²⁶Ubatumine muntu udi mua kubumvuija bionsu ebi, bamanye mundi nabu ne muoyi muimpe wa kudia nabu bulunda. Nanku balongolole mianda yabu bu mudibu basue kabayi bapampakana.”

²⁷Mukalenga usua mutumine bena Yuda pabu mukanda ne: “Meme mukalenga Antiyokuse, ndi mfundila Tshipangu tshia bakulu ba bena Yuda, ne bena Yuda bakuabu bonsu, mukanda, mioyi yenu ayi!

²⁸“Ndi njinga bua nuikale bimpe. Tuetu mene tudi petu bimpe.

²⁹Menelase[124] utuambidile dijinga dienu dia kupingana kuenu, bua kutungunuka ne midimu yenu.

³⁰Nanku bonsu badi bapingana kuabu bangabanga ne matuku makumi asatu a ngondu wa Ksantike[125] bamanye ne: kabakubatatshisha to.

³¹Nudi mua kulama mikenji yenu ya pa buayi idi itangila biakudia ne meyi enu makuabu onsu, bu munuvua nuenza kumpala. Kabena mua kukengesha muntu wa kunudi bua tshilema tshivuaye muenze kale kayi mumanye.

³²Ndi munutumine kabidi Menelase bua kunujadikila bulelela.

³³“Nuashala bimpe! “Ndi mfunda mukanda ewu mu tshidimu tshia 148,[126] matuku 15 a ngondu wa Ksantike.”

³⁴Bena Rome ku luabu luseke, kutuminabu bena Yuda mukanda ne: “Tuetu Kintuse Memiyuse ne Tituse Maniyuse, mienampala ya bena Rome, tudi tutumina bena Yuda mukanda ewu: Mioyi yenu ayi!

³⁵“Malu onsu adibu banuambila kudi Lisiyase ‘muanabu ne Mukalenga,[127]’ ne tuetu petu tudi tuanyisha bua ikale nanku.

³⁶Kadi bua bionsu bidiye mushindike bua kuteka mu bianza bia mukalenga, panuamona kubijoja, nututumine muntu lukasa bua tumone mua kubifila kudi mukalenga, tumusake bua abianyishe munudi basue. Bualu tudi tuya ku Antiyokiya.

³⁷Tutuminayi bantu lukasa bua tumanye petu mudi dijinga dienu.

³⁸“Nuashala bimpe! “Tudi tufunda mukanda ewu mu tshidimu tshia 148, mu matuku 15 a ngondu wa Ksantike.”