Read Tshiluba 2 Bamakabe 12 Bible Online

2 Bamakabe 12 - Tshiluba bible

2 Bamakabe 12

¹Bena Yuda ne Lisiyase bamane kutua ndondu, Lisiyase kupingana kudi mukalenga. Bena Yuda pabu kutungunuka ne didima madimi abu.

²Kadi munkatshi mua banene balombodi ba tshitupa tshia buloba atshi, muvua Timote ne Apolonyuse, muana wa Ngeneyuse, Iyeronime ne Demofone,[128] pamue ne Nikanore, mfumu wa bena mvita benyi ba mu Shipre. Bonsu aba kabavua banyisha bua bena Yuda bapete dikisha, basomba mu bupole.

³Bantu ba mu Yope[129] kuenzabu bualu bupite bubi bua lukinu. Bavua balomba bena Yuda bavua base muabu bua kubuelabu nabu pamue ne bakaji babu ne bana, mu matu avuabu balongolola. Bavua babashima bamba ne: munkatshi muetu kamuena kalu.

⁴Kadi bu muvua bena mu tshimenga bonsu basuika diyi, ke bena Yuda bu muvuabu kabayi bamanye bualu, kuanyisha bualu abu, bua kuleja bena mu tshimenga muvuabu bajinga bupole. Kadi bafika munkatshi mua mayi, bena Yope kuela bena Yuda bonsu bavua mu buatu mu mayi — bantu bavua batua ku nkama ibidi.

⁵Yudase umvua bualu bubi buvuabu benzela bena Yuda nende, kumanyishaye bena mvita bende malu a kuenzabu.

⁶Bamane kusengelela Mvidi Mukulu mukoshi wa nsambu pa yoyi, kuyabu batangila kudi bavua bashipa bana babu. Kuoshabu bintu bionsu bivua muaba awu butuku, kuosha matu, kushipa ne bantu bavua baye kusokoma momu.

⁷Kadi bu muvuabu bakanga biibi bia tshimenga, Yudase kumuka muikale ne meji a kupingana dituku dikuabu bua kunyanga tshimenga tshia bena Yope tshijima.

⁸Kumanyishabu kabidi Yudase muvua bena Yamniya[130] bajinga mua kuenzela bena Yuda bavua basomba munkatshi muabu bia momumue ne muvua bena Yope benza.

⁹Yudase kubunda bena Yamniya pabu butuku, kuosha bintu bivua muaba uvua tshisabu ne matu onsu. Bena Yerushalayime bakamona kapia aku kuabu, mutantshi bu wa kilometre 45.

¹⁰Pashishe, Yudase ne tshiluilu tshiende bavua bashiya tshimenga tshia Yamniya, baya kubunda Timote. Bakavua mutantshi wa kilometre ibidi ne tshimenga, bua kuya kulondakaja Timote, ke kubabundabu kudi bena mvita ba bena Arabe[131] bu binunu bitanu, ne babandi ba pa tubalu nkama itanu.

¹¹Kusanganabu mvita mikole. Kadi ku diambuluisha dia Mvidi Mukulu, bena mvita ba Yudase kutshimuna ba bena Arabe, bendakanyi ba mu tshipela abu. Kulombabu Yudase bua bumvuangane nabu. Bavua balaya Yudase bua kumupa bimuna ne kumukuatshila midimu mikuabu.

¹²Yudase umvua ne badi mua kumukuathila midimu ya bungi, kumyuangana nabu. Pashishe kushiyanganabu, bena Arabe kupingana ku ntenta yabu.

¹³Yudase kubunda kabidi tshimenga tshia Kaspine tshiyuabu bakolesha ne bimana. Bavua basombamu kudi bantu ba mu matunga mashilangane.[132]

¹⁴Bena mu tshimenga bavua badiamba bua bukole bua bimana bia tshimenga tshiabu, ne bua bungi bua bintu bia didia bivuabu nabi, munda mua tshimenga. Ke kusekabu bena mvita ba Yudase, babapenda kabidi bipendu bibi, basendeka ne Mvidi Mukulu mene.

¹⁵Nanku Yudase ne bena mvita bende, kuelabu mbila kudi Maweja-Nangila munene wa buloba, wakabuela Yeriko mu tshikondu tshia Yoshuwa, kayi ne bintu bia kubumbula nabi biibi,[133] nansha mashinyi a mvita. Ke Yudase ne bena diende kubandabu pa bimana bia tshimenga ne tshiji tshikole.

¹⁶Ne diambuluisha dia Mvidi Mukulu, kukuatabu tshimenga. Kushipabu bantu bapite bungi. Dijiba dia mayi divua muaba awu, dikale ne buondoke bua metre nkama isatu makumi muanda mutekete, divua dimueneka diuwule tente ne mashi avua mapuekelamu.

¹⁷Yudase ne bena mvita bende bamane kumuka mutantshi bu wa kilometre lukama ne makumi anayi ne tshimenga tshia Kaspine, kufikabu mu Karakse, muaba uwa bena Yuda bawabu babikila ne: bena ditunga dia Tobiye.[134]

¹⁸Kabavua basangana Timote to, bualu ukavua mumane kumuka muaba awu kayi muenza bualu. Uvua mushiye muaba umue, tshisumbu tshia bena mvita.

¹⁹Kadi Dositeye ne Sosipatere, balombodi banene ba tshiluilu tshia Makabe, kuyamu, kubutula bantu bonsu bawa Timote mushiye mu nzubu wa bena mvita, bawa bapite pa binunu dikumi.

²⁰Kuvua Yudase eku, kukosololaye bena mvita bende mu bisumbu. Kutekaye bantu ku mutu kuabi, kuasa dilondakaja Timote. Kadi Timote uwa ne bantu binunu lukama ne makumi abidi bia bena ku makasa ne binunu bibidi ne nkama itanu bia babandi ba pa tubalu.

²¹Timote umanya bualu bua difika dia Yudase, kutumaye bakaji ne bana ne bintu biabu mu Karnayime. Musoku awu uwa muaba mukole, uvuabu kabayi mua kukuata lukasa. Njila ya kuyamu ivua mibulakane,[135] bantu kabayi mua kupitshilamu bimpe to.

²²Ke tshisumbu tshia bena mvita tshia Yudase tshia kumpala kumueneka.[136] Bena mvita ba Timote kukuatshika bowa. Mvidi Mukulu mukua lumona, kubamuenekela, kubueja buowa mu mitshima yabu. Kunyemabu ku nseke yonsu, aba baya eku, aba baya kuaka. Kutapanganabu bobu nkayabu. Miela yabu kubatua kabidi.

²³Yudase kubalondakaja muende muonsu, kubashipa ku muele, bantu bu binunu makumi asatu.

²⁴Bena mvita ba Dositeye ne ba Sosipatere kukuatabu Timote. Kubalombaye bua bamulekele aye. Uwa wamba ne: tuakuatshi bana benu ba bungi, nuenu bangenzela bibi, nenku nebabashipe pabu.

²⁵Yeye mumane kubalaya mua kulekela bana babu amu bimpe, bobu kumulekela bua kupandisha bana babu abu.

²⁶Pashishe, Yudase kuya mu Karnayime, muaba udi nwidie mukaji Atargatise,[137] kushipeshamu bantu balume binunu makumi abidi ne bitanu.

²⁷Yudase mumane kutshimuna baluishi, kuyaye ne tshiluilu tshiende bua kuluisha tshimenga tshia Efrone, tshivuabu basombe kudi bantu ba misoku misanga.[138] Bansongalume ba dikanda kuelabu mualu kumpala kua bimana bia tshimenga, kuluanganabu ne disuminyina. Mu Efrone amu, bavua balama bintu bivule: mashinyi a kuluangana nawu ne bintu bia kuela baluishi.

²⁸Kadi bena Yuda bamane kutendelela Maweja-Nangila, udi ntangalaja baluishi nduu, kukuatabu tshimenga. Kushipabu bantu bu binunu makumi abidi ne bitanu bavua munda mua tshimenga.

²⁹Bumuka amu, kuyabu kuluisha Shitopolise,[139] tshimenga tshivua mutantshi bu wa kilometre lukama ne makumi abidi ne tshimenga tshia Yerushalayime.

³⁰Bena Yuda bavua basomba mu tshimenga, bavua bamanyisha Yudase malu mimpe avua bena Skitopolise babenzela, ne muvuabu babakidila bimpe diba divuabu mu dikenga.

³¹Ke Yudase ne bavuaye nabu kuela bena Skitopolise tuasakidila, kubakolesha ku muoyi bua bashale amu bumvuangana ne bena Yuda matuku adi kumpala. Yudase ne bena diende kufikabu mu Yerushalayime bualu matuku a tshibilu tshia Dinowa akavua pabuipi.

³²Tshibilu tshia Dinowa tshimana kupita, Yudase ne tshiluilu tshiende kuluisha Ngorjiyase, mulombodi wa buloba bua bena Edome.[140]

³³Ngorjiyase kuya bua kubaluisha ne bena mvita ba ku makasa binunu bisatu ne babandi ba pa tubalu nkama inayi.

³⁴Kuluanganabu mvita ayi. Bena Yuda bakafua ba bungi.

³⁵Muntu mukuabu diende Dositeye uvua muena mvita wa mukitshi, mubandi wa pa nyama wa kabalu, wa mu tshisumbu tshia bena mvita ba mu ditunga dia Bakenore. Kukuataye Ngorjiyase, muntu mubi ewu mu bilamba, kumupulumuna ne lungenyi lua kumukuata ne muoyi. Kadi muena mvita kampanda wa bena Trase,[141] kudielaye kudi Dositeye, kumukosa diboku. Nanku Ngorjiyase kunyema kuya ku luseke lua Mareka.

³⁶Kadi bu muvua bena nwita ba Azarya bamane kuluangana mukungulu mule, kupungilabu bikole. Yudase kusengelela Maweja-Nangila bua ikale ku tshiabu, alombole mvita yabu.

³⁷Yudase wakela lubila lua nwita mu muakulu wa batatuende,[142] wimba ne musambu, ubanga mvita. Ke bantu ba Ngorjiyase kunyema nduu.

³⁸Bamane kuluangana, Yudase mumane kusangisha tshiluilu tshiende, kutshifilaye mu tshimenga tshia Adulame. Bafikilemu mu dituku dia muladilu wa dituku dia Dikisha. Nanku kudilongololabu bu muvua tshibidilu tshiabu.[143] Pashishe, kuenzabu tshibilu tshia dituku dia Dikisha pa muaba awu.

³⁹Dituku divua dilonda dia Dikisha, Yudase ne bena mvita bende, kabawa mua kuindila bua kusangisha bitalu bia bafue babu bashipe mu mvita. Kuyabu kubijika mu nkita ya bankambua babu.

⁴⁰Kadi kusanganabu mu bilamba bia yonsu uvua mufue, mpingu ya nwidie ya mu Yamniya[144] ivua mikenji ya Mvidi Mukulu mikandike bena Yuda bua kabangatshi. Bonsu kujadika kafuila ka basalayi abu.

⁴¹Ke bonsu kutumbisha Maweja-Nangila, mukoshi wa nsambu pa yoyi, udi usokolola bidi bisokome.

⁴²Kutendelelabu, balomba bua Mvidi Mukulu abalekele tshilema atshi. Kadi tshilobu tshiabu, Yudase kubela bena mvita bua badilame ku bubi buonsu, bualu nkayabu bavua badimuenena tshiwa tshienzekela bawa benza bibi.

⁴³Kusangishaye lupetu ku muntu ku muntu, lua nkanu mitoke ya mushinga mukole bu binunu bibidi. Kulutumaye mu Yerushalayime bua kulambulabu mulambu wa pa mibi ya bafue. Bavua benza bualu buimpe bua kutumbisha, baleja ne: bavua bitaba dibiika dia bafue.

⁴⁴Bulelela, bu yeye kayi muitabe ne: bena mvita bafue aba nebabiike, kusankidila bua bafue kuvua mua kuikala bualu bua patupu, bua dibula dia lungenyi.

⁴⁵Kadi Yudase uwa muitabe, mujadike ne: Mvidi Mukulu neasankishe bamulamatshi bende. Ke meji mimpe, makanyine muntu wa Mvidi Mukulu avuaye nawu. Ke pawaye wenzeja mulambu ewu mu dina dia bafue, bua babalekele bibawu biabu. Mibi yabu ijimine.