Read Tshiluba 2 Bamakabe 13 Bible Online

2 Bamakabe 13 - Tshiluba bible

2 Bamakabe 13

¹Mu tshidimu tshia 149,[145] Yudase ne bena nwita bende kumvua ne: Antiyokuse Epatore udi uya ne bena nwita ba bungi, bua kuluisha ditunga dia Yudeya.

²Antiyokuse uvua ne Lisiyase, mulombodi wa mu bukalenga wa kumpala, uvua mumukoleshe bimpe. Bonsu bavua balombodi[146] ba tshiluilu tshia bena Ngreke tshia bena nwita ba ku makasa binunu lukama ne dikumi, babandi ba pa tubalu binunu bitanu nkama isatu, nyama ya nzevu makumi abidi ne ibidi ne matempu a nwita nkama isatu. Matempu awu avua ne miele ku nkata yawu.

³Menelase kuya kudisanga nabu. Uvua usaka ne budimu buvule mukalenga Antiyokuse bua akoleshe nwita, bualu kavua musue diakalenga dia ditunga to. Uvua amu ukeba bua bamupingaje mu muanzu wa mutuangaji munene.[147]

⁴Kadi Maweja-Nangila, Mfumu wa bamfumu, kutabuluja Antiyokuse bua afikile Menelase awu munda. Lisiyase kujadikila Antiyokuse ne: Menelase ke udi nkukebela makenga onsu audi nawu. Ke mukalenga kutuma diyi bua kuya ne Menelase ku tshimenga tshia Bereya,[148] bamushipeleku mushindu udibu ne tshibidilu tshia kuenza koku aku.

⁵Mu tshimenga etshi, muvua kaleya bule bua metre makumi abidi ne itanu, kuwula ne butu tente. Bavua benza kaleya aka ne mashinyi anyunguluka bu bukelu kulu kuaku. Nanku pavuabu belamu bantu bavua bakubikila amu mu butu abu.

⁶Momu amu ke muvuabu babueja bavua biba bintu bia mu nzubu ya nwidie, ne benji ba malu mabi makuabu. Bavua babasakila bua bafue mu butu amu.

⁷Ke lufu luakafua Menelase, muntu kayi ditaba. Nanku kabavua bajika muntu awu to.[149]

⁸Lufu luende ludi bimukumbanyine. Bualu yeye uvua muenze malu mabi a bungi, bualu uvua unyanga tshilambuilu tshia Maweja-Nangila ne butu ne bintu biatshi bia tshijila. Nenku mu butu ke muakafuilaye pende.[150]

⁹Mukalenga Antiyokuse kubuela mu ditunga ne lungenyi lubi, bua kukengesha bena Yuda bipite muvua tatuende mubakengeshe.

¹⁰Yudase umvua bualu, kufundilaye bantu bonsu bua basengelele Maweja-Nangila butuku ne munya, avue kubambuluisha, nanganangampindiewu.

¹¹Bavua basue kubanyenga meyi ne mikenji, ditunga ne nzubu wabu wa Mvidi Mukulu. Nanku bantu bamane kutuadija kupeta dikisha kakese, Mvidi Mukulu kavua mua kubalekela mu bianza bia benyi to.

¹²Bonsu kuenza nanku. Kusengelelabu Maweja-Nangila muena luse, ne binsonji ku mesu. Bavua bajila, badiela panshi matuku asatu malondangana. Pashishe, Yudase kubakolesha ku muoyi, kubatumina diyi bua badilongolole ku mvita.

¹³Yudase mumane kuyukila ne bakulu ba ditunga pa nkayabu, kushindikaye mua kuya mu mvita, bangabanga ne tshiluilu tshia mukalenga katshiyi tshianji kubuela mu Yudeya, nansha kukuata Yerushalayime. Kushindikabu bua kuenza bionsu ne diambuluisha dia Mvidi Mukulu.

¹⁴Bobu bamane kuteka Mufuki wa bionsu bu Musungi wa matandu pankatshi pabu, Yudase kukolesha bena Yuda ku muoyi, bua baluangane ne bukitu. Nansha bua lufu, bafue, bua kusungidila mikenji ya Mvidi Mukulu, nzubu wa Mvidi Mukulu, tshimenga tshia Yerushalayime, ditunga diabu ne bibidilu biabu. Yudase kuasa mitanda ya bena mvita pabuipi ne Modine.[151]

¹⁵Kuambilaye bena mvita bende mudibu mua kudimanyisha diba dia mvita ne: “Mvidi Mukulu ke udi utshimuna.[152]” Pashishe kubangaye mvita butuku ne bansongalume ba bukitu, bapiluke mu diluangana. Bavua baluangana nangananga muaba uvua ntenta wa mukalenga. Bantu bakafua mu mvita ayi, batua ku binunu bibidi. Bantu ba Yudase kushipa nyama wa nzevu munene wa ku yonsu, kushipa ne muntu uvua umuludika.

¹⁶Pashishe bavua mu mitanda kukuatshika buowa ne luzakalu. Ke Yudase ne bena diende kushisha kuya muabu, bamane kujikija bimpe mudimu uvuabu bavuile.

¹⁷Bavua mua kukumbaja bionsu bimpe amu bualu bua Maweja-Nangila uvua ubalama, ubambuluisha kabidi. Ke diba padi kumueneka.

¹⁸Mukalenga mumane kujingulula bukitu bua bena Yuda, kujingaye mua kubatekesha ne budimu bua bungi.

¹⁹Kusemenaye mu Bete-Sure,[153] bualu momu ke muvua muaba uvua bena Yuda bakoleshe bimpe. Kadi bena Yuda kutshimuna mukalenga misangu ne misangu.

²⁰Yudase kutumina bana babu bawa mu tshimenga bionsu bivuabu nabi dikenga.

²¹Kadi Rodokuse, muena mu tshibilu tshia bena Yuda, kuya kuambila baluishi malu onsu aa. Ke kumukebabu, kumukuata, kumushipabu.

²²Mukalenga kukeba mua kumvuangana musangu muibidi ne bena mu Bete-Sure. Bobu bamane kupunga diyi dimue, mukalenga kumuka ne tshikulu tshiende.

²³Mpindiewu kuyaye kuluisha Yudase ne basalayi bende. Kadi kumutshimunabu. Mukalenga uwa mushiye Filipe mu Antiyokiya bua kulongolola malu a mu bukalenga. Umvua ne: Filipe mmutomboke, kupampakanaye bikole. Kubikidishaye bena Yuda bua kumyuangana nabu. Kusuikaye nabu diyi, uditshipa bua kukumbaja malaya onsu a ndondu wabu. Mukalenga kulambula mulambu, bua kuleja muvuaye musue kunemeka nzubu wa Mvidi Mukulu. Kufilaye bintu bia bungi bua muaba wa tshijila.

²⁴Pashishe mukalenga kuakidila Yudase Makabe bimpe. Ke kushilaye Ejemonide bua ikale mulombodi munene wa tshitupa tshia buloba, biangatshile ku tshimenga tshia Ptolemayise too ne ku Ngera.[154]

²⁵Pashishe, Antiyokuse kuya mu Ptolemayise. Kadi bena tshimenga etshi, kabavua basue diumvuangana diabu edi to. Kufikabu munda, bakeba mua kubenga diumvuangana adi.[155]

²⁶Kadi Lisiyase kuyukila ne bantu, kubumvuija buimpe bua diumvuangana. Nanku, ke bantu kushisha kuitaba, kutuya, kupeta muoyi muimpe. Lisiyase kupingana mu Antiyokiya. Ke muvua mvita ya mukalenga ne dipingana diende kuende nanku.