Read Tshiluba 2 Bamakabe 14 Bible Online

2 Bamakabe 14 - Tshiluba bible

2 Bamakabe 14

¹Bidimu bisatu bipite, Yudase ne bena diende kumvuabu bamba ne: Demetriyuse, muana wa Seleyukuse, mmubuele ne tshibilu tshinene ne buatu mu tshisabu tshia Tripoli.[156]

²Mmukuate ditunga, kabidi mmushipeshe Antiyokuse ne tatuende mukuabu Lisiyase.

³Pine apu kuvua muntu diende dina Alkime, uvua mutuangaji munene kale. Kadi uvua mudinyange ne mikiya pa kubuelaye mu bibidilu bia bena Ngreke mu tshikondu tshiwa bena Yuda batomboke. Uvua mumanye ne bena Yuda kabena mua kumulekela uya ku tshilambuilu, nansha upeta tshiakabidi muanzu wa mutuangaji munene.

⁴Nanku mu tshidimu tshia 151,[157] kuyaye kudi mukalenga Demetriyuse, mumutuadile tshifulu tshia mpawungi, dilala dia dibue ne tutamba tua mutshi wa olive, biwabu ne bua kufila bilondeshile bibidilu bia muaba wa tshijila. Kadi dituku adi, kawa mumuleje meji avuaye nawu.

⁵Kadi kupetaye mushindu wa kumvuija mukalenga meji ende mabi awu. Mukalenga uwa mumubikidishe bua abuele mu Tshipangu tshia bakulu, abumvuije meji avua bena Yuda bela ne malu avuabu bapangadika. Alkime kuandamuna ne:

⁶Munkatshi mua bena Yuda, mudi bantu badibu babikila ne: mbena Aside,[158] badibu balombola kudi Yudase Makabe, badi badilongolola amu ku mvita ne ku buntomboji. Badi bapangisha badi mu bukalenga mua kusomba talalaa.

⁷Meme bawa bannyenga muanzu wa mutuangaji munene umvua mupete kudi bankambua. Nanku ke pandi muvue munu.

⁸Bangabanga, ndi nkeba diakalenga diebe wewe mukalenga. Ndi nkeba kabidi bidi bilengelela bena kuetu. Bualu dibula meji dia bandi ntela aba, ndibueja tshisamba tshietu tshijima mu makenga.

⁹Mukalenga wetu, ebeja bakuambile ku kalu ku kalu mudi bionsu abi. Pashishe, keba mua kusungidila ditunga dietu ne tshisamba tshietu tshidibu babueja mu njiwu etshi, bilondeshile muudi wenzela bantu bonsu!

¹⁰Bualu patshidi Yudase ne muoyi, ditunga kadiena mua kupeta bupole nansha bukese to.

¹¹Alkime ujikija diakula, “balunda ba Mukalenga,[159]” bavua babenga malu a Yudase kulundula tshiji tshia Demetriyuse.

¹²Kusungulaye Nikanore,[160] uvua mulombodi munene wa tshiluilu tshia ne nyama ya nzevu, kumuteka bua ikale mulombodi wa tshitupa tshia buloba bua Yudeya. Kumutumaye kuine aku,

¹³ne bukenji bua kushipa Yudase, kutangalaja bonsu bavua nende, kabidi ne bua kubanjija Alkime mu muanzu wa mutuangaji munene mu nzubu wa Mvidi Mukulu, uvua munene ku yonsu.

¹⁴Benyi bavua mu Yudeya bavua banyema kumpala kua Yudase, bakabuela bisumbu ne bisumbu mu tshibilu tshia Nikanore. Bavua bela meji ne: netusanke bualu bena Yuda nebabuele mu njiwu, nebapete makenga a bungi.

¹⁵Bena Yuda bavua bumvua muvua Nikanore musue kubabisha, kabidi muvua benyi badisangisha nende. Kudielabu buloba mu mitu, kusengelelabu Mvidi Mukulu uvua musungule tshisamba tshiende bua kashidi, uvua wambuluisha amu kuambuluisha bena bumpianyi buende ne malu a dikema a bungi.[161]

¹⁶Ke mufumuabu Yudase kutumina bantu diyi bua kumuka muaba uvuabu. Kubangabu mvita ne baluishi babu mu tshimenga tshia Adasa.[162]

¹⁷Shimeyone, muanabu ne Yudase, uvua mubange mvita ne bantu ba Nikanore. Kadi bu muvua baluishi babatulukila mu tshimpitshimpi, ke kuanjiye kutshimuka ne bende bena mvita.[163]

¹⁸Pavua Nikanore umona bukitu bua Yudase ne basalayi bende, ne muoyi mukole wa kukula ditunga diabu uvuabu nawu, uvua wela meji ne: katuena mua kubatshimuna ne mvita to.

¹⁹Ke kutumaye Posidonyuse, Teyodote ne Matatiyase bua baye kumvuangana ne Yudase.

²⁰Mumane kukenketa majinga avuaye mupete, Yudase kumanyishaye basalayi muvuabu bakeba kumvuangana. Bonsu kuanyisha diumvuangana adi.

²¹Kusungulabu dituku dia kutuilanganabu kudi bamfumu pa nkayabu. Ku nseke yonsu ibidi bavua bapatula ditempu. Kutekamu nkuasa ya bumfumu.

²²Yudase uvua muteke bena mvita miaba miakane, balongame mua kuluangana, pikalabu bamone mudi baluishi babu bandamuna muoyi wabu, babanga mvita. Kadi bamfumu babidi bavua bapetangana amu bimpe ku meyi.[164]

²³Nikanore kuya mu Yerushalayime kayi wenzela bena Yuda bualu bubi nansha bumue. Kupingajaye bena mvita benyi bavua babuela mu tshiluilu tshiende kuabu.

²⁴Yudase uvua ku luseke luende, bavua benda pamue diba dionsu, banangangana bikole.

²⁵Nikanore kubela Yudase bua asele, alelangane. Yudase kusela, kushalaye ne bupole, musombe amu bimpe.

²⁶Kadi Alkime kumona muvua diumvuangana dikale amu dimpe pankatshi pa Nikanore ne Yudase, kudipetelaye mukanda mutentulula wa ndondu ivua Nikanore ne Yudase batue. Kuyaye kudi Demetriyuse, kuambila mukalenga ne: Nikanore udi wenza malu adi anyanga ditunga. Bualu mmulaye Yudase, muntu udi utombokela bukalenga, bua amupingane mu bumfumu.

²⁷Luntuta lua muntu ewu kujula mukalenga tshiji tshikole, kufikilaye Yudase munda. Ke mukalenga kufundilaye Nikanore mukanda ne tshiji umujikuila mudiye kayi wanyisha nansha kakese diumvuangana ne bena Yuda adi. Uvua utuma Mikanore diyi bua bakuate Yudase Makabe, bamutume lukasa mu Antiyokiya.

²⁸Nikanore umona mukanda ewu, kunyingalalaye bikole. Kavua mumvue tshivuaye ne bua kuenza. Uvua utshina mua kushipa bulunda ne muntu udi kayi muenze kalu kabi nansha kamue.

²⁹Kadi bu nuwuaye kayi mua kubenga diyi dia mukalenga, Nikanore utuadijile kukeba mua kukumbaja diyi dia mfumuende mu budimu.

³⁰Ke Makabe kujandula mukavua Nikanore umulengulula kayi nende kabidi ne muoyi muimpe wende wa matuku onsu. Kujadikaye ne: ebi bionsu nebitukebele bilumbu. Nanku kusangishaye bantu bende ba bungi. Kumukaye kudi Nikanore, kuya kumusokoma.

³¹Kadi diakamanya Nikanore ne: Yudase mmumusokome mu budimu, kubuelaye mu nzubu wa Mvidi Mukulu mupite bunene ne wa tshijila menemene, pa diba divua batuangaji balambula milambu bu pa tshibidilu. Kubelaye diyi bua bamupe Yudase.

³²Batuangaji kuditshipa, bamujadikila muvuabu kabayi bamanya muaba uvua muntu uvuaye ukeba.

³³Nikanore kuolola tshianza tshia balume mutume ku nzubu wa Mvidi Mukulu, uditshipa ne: — Nuenu kanuyi bavua kumpesha Yudase muanya mionji, nengupule nzubu wa Mvidi Mukulu ewu, pashala amu buloba. Nembumbule tshilambuilu, muaba ewu nengashile nwidie Diyonisose[165] nzubu muimpe.

³⁴Ujikija diakula, kuyaye. Kadi batuangaji kuela bianza kulu, basengelela Mvidi Mukulu, usombela uluila tshisamba tshietu matuku onsu, bamba ne:

³⁵“Maweja-Nangila, wewe kuena dikenga ne tshintu. Kadi uvua muanyishe bua kusomba munkatshi muetu mu nzubu webe wa tshijila ewu.

³⁶Mpindiewu, Maweja-Nangila, wewe nkayebe udi wa tshijila. Lama nzubu ewu, utuvua bajidile amu mpindiewu.[166] Ukandike bibi bionsu kashidi bua nzubu ewu kanyanguki kabidi.”

³⁷Ku bakulu ba mu Yerushalayime, kuvua muntu dina diende Razise. Kumusonguelabu kudi Nikanore. Muntu ewu uvua wambuluisha bana babu misangu ne misangu. Bena Yuda bavua bamunemeka bikole, bantu bawa bamubikila ne: “tatu wa bena Yuda”.

³⁸Mu matuku a kumpala a mvita, bavua bamusonguela bua dilama diende dia malu a buena Yuda.[167] Nenku diba adi bavua bamukengesha, bavua bafuana kumushipa bualu uvua ulama bibidilu bia bankambua bende.

³⁹Nikanore pende uvua musue kuleja patoke muvuaye mutekele bena Yuda lukinu. Kutumaye bena mvita bapite pa nkama itanu bua kumukuata.

⁴⁰Bualu uvua wela meji ne: bu meme mushipe muntu ewu ndi ngenza bualu bunene munkatshi mua bena Yuda.

⁴¹Kadi bua bena mvita bamone mua kukuata kaleya muaba uvua Razise, kusakilabu tshiibi tshia lupangu. Bavua babela diyi dia kutemesha kapia, kuosha bibi bia kaleya. Ke Razise udimona mujingila nseke yonsu, kudituaye muele.[168]

⁴²Uvua musue bua kufua lufu luimpe, lumuakanyine pa mutu pa kumukuatabu, kumulambula ne bundu kudi bena tshikisu.

⁴³Kadi bu muyilaye mu njiwu, kavua muditue muele bimpe to. Nanku kushalaye ne muoyi. Ke bena mvita kubuela mu nzubu. Yeye kunyema bikole, kubanda pa tshimana, kudiela panshi munkatshi mua musumba, kayi bowa.

⁴⁴Baluishi kupingana tshianyima lubilu, kutangalaka. Ke Razise kuvua kupona panshi muaba uvua mutupu.

⁴⁵Utshivua upuyakana, kujukaye ne muoyi mukole. Mashi apueka amu kupueka. Uvua ne mputa ya bungi, ukenga bikole. Kupitaye munkatshi mua musumba wa baluishi. Kubandaye ku lubuebue lua kapulumuku.

⁴⁶Nansha yeye mujimije mashi a bungi, kuditulaye bia munda kubikuata manza abidi, kubimansha mu bantu. Kusengelelaye Maweja-Nangila, Mfumu wa muoyi ne mueyelu bua amupingajilebio dituku dia dibiika. Ke muakakula Razise muoyi nanku.