Read Tshiluba 2 Bamakabe 15 Bible Online

2 Bamakabe 15 - Tshiluba bible

2 Bamakabe 15

¹Nikanore umvua ne Yudase ne bena diende badi mu tshitupa tshia buloba bua Samariya, kushindikaye bua kuya kubaluisha, dituku dia Dikisha, bua kabamonyi mua kumuenzela bibi.

²Bena Yuda bavuaye mubueje mu tshiluilu tshiende ku bukole, kumuambila ne: — Kuena mua kubashipa mushindu mubi wa tshikisu ewu to. Kadi tumbisha dituku didi Mvidi Mukulu munemeke, divuaye muenze dia tshijila. Umanye ne: Mvidi Mukulu udi umona bionsu.

³Kadi mushipianganyi mubi ewu,[169] kubakonka ne: — Mulu mudi mfumu udi muele diyi dia kuenza tshibilu tshia dituku dia Dikisha anyi?

⁴Bobu kumumvuija ne: — Eyowa, Mfumu wa muoyi, Yeye ke mfumu wa mulu, udi mutume diyi bua tulame dituku dia muanda mutekete.

⁵Ke Nikanore kubandamuna ne: — Kadi meme panyi, mfumu wa pa buloba, ndi ntuma diyi bua miangate bia lufu bua nuenze mudimu udi mukalenga wenu ulomba. Apu kavua ne bukole bua kukumbaja bualu buende bubi ebu to.

⁶Nikanore kuditambisha bikole, kushindika mua kuibaka tshibumba tshia mudiye mutshimune ne bintu bivuaye mua kupawula bia Yudase ne bia bena diende.

⁷Kadi, Yudase Makabe pende uvua mutekemene bikole kudi Maweja-Nangila ne: neangambuluishe.

⁸Kukoleshaye bavua nende ku muoyi, bua kabatshinyi mvita ya benyi, kadi bavuluke muvuabu bapete diambuluisha dia Muena kulu ku kale. Uvua ubabela kabidi bua batekemene se: nansha mpindiewu, muena bukole buonsu neatshimune baluishi babu.

⁹Kubakoleshaye kabidi ku muoyi pa kubabadisha malu a mu diyi dia Moshe ne a mu mikanda ya bambi, kabidi pa kubavuluija mvita ikadibu batshimune.

¹⁰Mumane kubavuluija nanku, udi ujikija mibelu yende pa kubaleja mudi benyi kabayi ne diyi dia bulelela, kabidi ne mudibu bashipa ndondu yabu.[170]

¹¹Kupaye yonsu wa kudibu bia lufu mu bianza, ki nngamu ngabu ne mafuma, kadi nangananga miaku milenga idiye ubambila. Kabidi kusankabu bikole bua pavuaye mubumvuije bivuaye mumone mu ndota,[171] bidi mua kubalengelela.

¹²Bivua Yudase mumone mbiebi: Uvua mumone Onyase, uvua mutuangaji munene ku kale, muntu muimpe, munangi wa bantu. Uvua muntu mupole malu mumanye mua kulongesha bantu, mumane kusadila Mvidi Mukulu biangatshile ku buana buende. Kumumonaye utendelela, bianza biolola kulu,[172] bua bena Yuda bonsu.

¹³Pashishe, Yudase kumona mushindu wa momumue: Muntu muikale ne nsuki mitoke, wa kunemeka, uvuabu bangata ne mushinga.

¹⁴Onyase kuamba ne: “Muntu ewu udi utunanga tuetu bana babu, utendelela bikole bua tshisamba ne bua tshimenga tshijidila tshia Yerushalayime tshijima, ke Yirmeya,[173] Muambi wa Mvidi Mukulu.”

¹⁵Yirmeya kuolola tshianza tshia balume ne muele wa mpawungi kudi Yudase, umupawu ne miaku ya ne:

¹⁶“Angata muele wa tshijila ewu, ndipa dia kudi Mvidi Mukulu. Paudi nawu neubutule baluishi.”

¹⁷Miaku ya Yudase kukolesha bena mvita ku muoyi, kubambika dikanda. Bansongalume kupeta muoyi wa bukitu. Bena Yuda kushindika bua kupatuka mu mitanda, kuya ku mvita, kuela mualu, kubanga mvita, muntu ne muntu batangilangana. Bavua ne bowa bua njiwu idi nukuata tshimenga, dilongesha dia malu a Mvidi Mukulu ne nzubu wa Mvidi Mukulu.

¹⁸Kabavua batangila nangananga bualu bua bakaji, bua bana, bua bana babu ne bua baledi babu. Kadi tshiwa tshipite kubabungamija tshiwa amu bua nzubu wa tshijila wa Mvidi Mukulu.

¹⁹Bavua bashala mu Yerushalayime bavua pabu ne dipampakana bualu kabavua bamanye ne mvita eyi mu mpata neipite bishi.

²⁰Bonsu bakavua bindila diba didi mvita mua kutuadija. Diba adi baluishi bakavua bamane kuela mualu pa miaba mimpe, babandi ba pa tubalu benda ku nseke mu milongu ibidi, nyama ya nzevu ivua muaba muimpe.

²¹Nenku Yudase Makabe umona bisumbu bia bena mvita bia mishindu mishilangane, ne nyama ileja luonji luayi, kuelaye bianza kulu ubila Maweja-Nangila, muenji wa bishima. Bualu uvua mumanye ne: ditshimuna kadiena difuma ku bia lufu, kadi kudi Mvidi Mukulu udi udipa muntu udi mudiakanyine.

²²Mu dibila diende uvua wamba ne: “Eyi! Mukalenga wanyi, mu tshikondu tshia Izkiya mukalenga wa Yudeya, uwa mutume mutumibue webe, kubundaye bantu binunu lukama ne makumi muanda mukulu ne bitanu ba tshiluilu tshia Senakeribe.[174]

²³Tumaku mpindiewu, Maweja-Nangila wa mulu, mutumibue muakane kumpala kuetu, bua kubakuatshisha buowa ne luzakalu.

²⁴Leja bukole buebe, shipa bonsu badi bawa kukupepeja, kuluisha tshisamba tshiebe tshijidila!” Ditendelela dia Yudase kujika ne miaku ayi.

²⁵Ke bena nwita ba Nikanore benda baya kumpala ne mpungi ne misambu ya nwita.

²⁶Bena nwita ba Yudase bavua babange mvita, benda basengelela Mvidi Mukulu.

²⁷Bavua baluangana ne mubidi, eku batendelela Mvidi Mukulu mu muoyi wabu. Kushipabu bantu bu binunu makumi asatu ne bitanu, basanka bikole pamue bualu Mvidi Mukulu uvua mubaleje bukole buende.

²⁸Mvita ijika, bobu kumona tshitalu tshia Nikanore panshi, muvuale bia mvita bionsu. Ke bobu kutangalaka ne disanka,

²⁹bela bibingu ne bikashi, batumbisha Maweja-Nangila mu muakulu wa bankambua babu.[175]

³⁰Yudase uvua wa kumpala ku didifila ne mubidi ne muoyi bua bana babu. Uvua munange bana babu muende muonsu, biangatshile ku bunsonga. Kutumaye diyi bua bakose mutu wa Nikanore, kabidi ne diboku diende dia balume bua baye nabi mu Yerushalayime.

³¹Uvua udiyila yeye mene mu Yerushalayime, kubikidishaye bantu bonsu mu nzubu wa Mvidi Mukulu, kutekaye batuangaji kumpala kua tshilambuilu, kutumaye bantu bua babikile bantu bavua mu nzubu wa bena mvita.

³²Kubalejaye mutu wa Nikanore, muntu mubi awu ne tshianza tshiende[176] tshivuaye mutangije ne kapeja ku nzubu wa Mvidi Mukulu, muena bukole buonsu.

³³Pashishe kuambaye bua bakose ludimi lua Nikanore, mubengi wa Mvidi Mukulu awu, balukosolole tutupa tutupa, batuelele nyunyi. Kutumaye diyi bua balembeleje diboku dia Nikanore bitangilangane ne nzubu wa Mvidi Mukulu bua kuleja bantu tshipeta tshia bupale buende.

³⁴Bonsu bavua muaba awu, kutangilabu mulu, bela mbila banyisha Maweja-Nangila wa lumu ne: “Tumbishayi Maweja-Nangila udi mulame muaba wende wa tshijila, kabayi baunyanga.”

³⁵Yudase kulamika mutu wa Nikanore ku nzubu wa bimana bikolesha, bua kuleja bantu bonsu patoke ne: Maweja-Nangila ke udi utuambuluisha.

³⁶Kuelabu mukenji uvuabu banyisha kudi bonsu ne: dituku edi ndia kuvuluka kashidi. Benze tshibilu ku tshidimu, dituku dia dikumi ne disatu dia ngondu wa dikumi ne muibidi, udibu binyika mu tshiena Arame ne: Adare, dia muladilu wa dituku didibu binyika ne: ndia Mordekayi.[177]

³⁷Ke mushindu wakapita malu a Nikanore nanku. Tshimenga kushala mu bianza bia bena Yuda, bituadija ku tshikondu atshi. Nanku meme panyi mbalekedi apa.

³⁸Pikala bindi mufunde ebi, bisankisha, ke tshimvua mujinge. Kadi pikalabi bibi, kabiyi bisankisha bantu, ke muanyi mumvua mua kuenza.

³⁹Bualu bidi bibi pa kunua nwinyo nkayende nansha mayi nkayawu. Kadi nwinyo musangisha ne mayi udi tshiakunua tshilenga tshidi tshipetesha dikanda. Mbia momumue, malu mafunda bimpe adi alengelela mubadi wa mukanda. Mbashikididi apa.