Read Tshiluba 2 Bamakabe 2 Bible Online

2 Bamakabe 2 - Tshiluba bible

2 Bamakabe 2

¹“Tudi tabala mu mikanda ya kale ne:[14] Muambi Yirmeya uvua mutumine batuabu baye nabu ku lukanu diyi bua bateke muaba mujalame kapia ka ku tshilambuilu, bu mutu tua banulondele kulu eku.

²Tudi bamanye kabidi mutuaye mubapeshe mukanda wa mikenji ya Mvidi Mukulu, kabidi ne muvuaye mubabele bua kabapu mikenji ya Maweja-Nangila muoyi, kabasesuki ne meji abu pa kumona mu matunga a bende mpingu ivuabu balengeje ne mpawungi nansha ne tshiamu tshitoke tshia mushinga mukole.

³Uvua ubabela kabidi mua kulamabu diyi dia Mvidi Mukulu kashidi.

⁴“Mu mukanda mukuabu wa ku mikanda eyi, badi balonda kabidi muvua muambi Yirmeya mudimuja kudi Mvidi Mukulu, muangate ntenta wa kusambakena ne mushete wa ndondu mu nzubu wa Mvidi Mukulu, ubanda nabi pa mukuna uvua Moshe mubande bua kumonaye ditunga dijima ditua Mvidi Mukulu mulaye bantu bende.[15]

⁵Amu ufika pine apu, Yirmeya kusangana lubuebue. Kubuejaye momu ntenta, mushete wa ndondu ne tshilambuilu tshia manananshi. Pashishe kujibikilaye tshibuelelu.

⁶Balunda bende bakuabu batua bajinga kuyilaku bua kuenza bimanyinu ku njila. Kadi kabena bamona lubuebue to.

⁷Yirmeya umvua nanku, kubatandisha wamba ne: ‘Muaba ewu neushale musokome too ne pikala Mvidi Mukulu musangishe tshisamba tshiende, kabidi mutshileje luse luende.

⁸Diba adi, Maweja-Nangila nealeje binta ebi. Kabidi nealeje lumu luende mu dituba amu bu mutuaye udileja tshikondu tshia Moshe, nansha diba ditua Shelomu utendelela Mvidi Mukulu bua muaba wa tshijila ushale mujidila ne lumu lunene.[16]’

⁹“Badi balonda kabidi mutua Shelomu munta wa meji, ulambula milambu bua kujidila nayi nzubu wa Mvidi Mukulu,[17] kabidi bua kuanyisha nayi Mvidi Mukulu pa dijika dia muaba wa tshijila.

¹⁰Muvua Moshe utendelela, ke muvua Shelomu utendelela, kapia katuluka mulu, kuosha milambu yonsu.[18]

¹¹Moshe uvua wamba ne: ‘Kapia kadi kuosha mulambu, bualu bantu kabena badia tshitupa tshiabu tshia mulambu.[19]’

¹²Shelomu uvua muenze tshibilu atshi matuku muanda mukulu mudibu benza imue misangu.[20]

¹³“Malu a mushindu umue aa adi mafunda mu mikanda ayi ne mu Mikanda ya Nehemiya. Badi balonda kabidi muvua Nehemiya mutuadije tshilaminu tshia mikanda. Kusangishaye mikanda ya pa malu a bakalenga ne a bambi, ya Davide ne ivua bakalenga batume bua milambu.[21]

¹⁴Ke muvua Yudase pende musangishe mikanda yonsu ivuabu batangalaje bua mvita ivuabu batuele.[22] Mpindiewu mikanda eyi idi mu bianza bietu.

¹⁵Panuikala basue kupeta imue ya kudiyi, tutuminayi bantu bua banutuadileyi.

¹⁶“Tudi tunufundila mukanda ewu bu mutukadi pa kuenza tshibilu tshia diumusha mikiya mu nzubu wa Mvidi Mukulu. Mbimpe bua nuenze penu tshibilu atshi nanku.[23]

¹⁷Mvidi Mukulu wakapandisha bantu bende bonsu, kabidi wakatupingajila buloba buetu, bukalenga bua mfumu, midimu ya batuangaji ne ya bonsu badi bakuata mudimu mu nzubu wa Mvidi Mukulu,[24]

¹⁸bu muvuaye mudianze kulaya mu mukanda wa diyi. Tudi tutekemena kudiye bua atufuile luse mpindiewu, kabidi neatusangishe tuetu badi batangalake mu matunga onsu a pa buloba[25] mu muaba wa tshijila. Bualu ukadi mutumbushe ku makenga manene, kabidi ukadi mumane kumusha mikiya idi mu nzubu wa Mvidi Mukulu.”

¹⁹Malu manene avua menzeka mu tshikondu tshia Yudase Makabe ne bana babu.[26] Bavua bumushe mikiya mu nzubu munene wa Mvidi Mukulu, bajidila tshiakabidi tshilambuilu.

²⁰Bavua baluishangana ne Antiyokuse Epifane ne muanende wa balume Epatore.[27]

²¹Muvua makole a kulu avua amueneka,[28] ambuluisha bilobu bivua biluila muabi muonsu malu a Mvidi Mukulu wa bena Yuda. Nanku nansha muvuabu bungi bukese, bana betu bakakuata tshiakabidi ditunga dijima, bipatamu musumba wa bena tshiluilu tshia ku ba bende.

²²Bana betu kunyenga baluishi nzubu wa Mvidi Mukulu udibu bamanye lumu luende pa buloba bujima. Kusungidilabu Yerushalayime, kuelulula mikenji ikavua isua kunyanguka.[29] Bavua bakumbaja bionsu ebi bualu Mvidi Mukulu uvua mubanange.

²³Malu onsu aa avua Yasone wa mu Sirene[30] mufunde mu mikanda itanu, meme nengidikije mua kuakepesha mu mukanda umue.

²⁴Bungi bua malu adibu bafunda kudi Yasone, ne dibadika dia bintu ne bantu bidi mu mikanda yende, bidi mua kutonda muntu udi musue amu kumanya mu tshikosu malu avua menzeka.

²⁵Ndi ngidikija mua kutekesha dibala bua bonsu badi basue amu kubala, badi basue kuvuluka bidi bienzeka, kabasanganyi bualu bukole mu mukanda wanyi to.

²⁶“Kukepesha malu aa, ki mmudimu mutekete to. Mvua mukuate mudimu ne bisululu bivule ne bitabela kabidi.

²⁷Mbifuanangane ne mudimu mukole wa muntu udi ulongolola didia dinene, didi ne bua kusankisha bantu bashilangane badiye mubikile. Ndi mudikebele panyi mu mudimu ewu mukole bua kusankisha bantu badi ne majinga mashilangane.

²⁸Nenku mudimu wa kutulondela bionsu ku kalu ku kalu, ndi ngushila mufundi wa malu a kale. Meme ndi mudikoleshe bua kunulondela tshikepeshilu[31] tshia malu.

²⁹Padibu base nzubu, muashi wa nzubu ke udi ne bua kutangila nzubu ku kalu ku kalu. Kadi udi ulengeja nzubu ne wela mukubu, udi ukeba bidiye mua kuenza nabi mudimu. Ke mundi ngenza mudimu wanyi nanku.

³⁰Muntu yonsu udi ufunda bualu bua kale udi ne bua kukenketa bualu buende, kukebulula ku kalu ku kalu ne mankenda onsu.

³¹Kadi muntu udi ufunda tshikepeshilu udi ne bua kufunda tshikosu, kayi ukeba mua kuleja ku kalu ku kalu to.

³²Nenku nentuadije bualu buetu tshiyi nsakidila ku bindi mumane kuamba. Bualu amu muntu mupale ke udi musue kuvudija malu mu mbangilu wa mukanda wende, mufuane mua kupanga ne muaba wa kufunda bualu buine.