Read Tshiluba 2 Bamakabe 3 Bible Online

2 Bamakabe 3 - Tshiluba bible

2 Bamakabe 3

¹Tshikondu tshia Onyase,[32] mutuangaji munene, mu Yerushalayime, tshimenga tshia tshijila, bantu bavua basombe mu bupole, balama meyi a Mvidi Mukulu. Bualu Onyase uvua munemeki wa Mvidi Mukulu, mubenga bubi.

²Bakalenga mene bavua banemeka muaba wa tshijila, kabidi bafila milambu mipite buimpe.

³Ke muvua Seleyukuse, mukalenga wa Aziya[33] ufila biende biuma bua kufuta milambu ivuabu balambula.

⁴Kadi bavua bateka mutuangaji mukuabu dina diende, Shimeyone, wa mu tshisumbu tshia Bilga,[34] mfumu wa balombodi ba midimu ya nzubu wa Mvidi Mukulu. Yeye ewu uvua mupangakane ne mutuangaji munene Onyase, pa bualu bua dikenketa dia tshisalu tshia mu tshimenga.

⁵Kadi mutuaye kayi mua kumyuangana ne mutuangaji Onyase, kuyaye kudi Apolonyuse, muana wa Traseyase. Tshikondu atshi uvua mulombodi wa Siriya[35] ne wa Fenisiya.

⁶Kumulondelaye mutua biuma bitule mu tshibutshilu tshia nzubu wa Mvidi Mukulu, kabayi nansha mua kutabala. Kadi bine bionsu abi kabitua amu bua milambu to. Mbimpe kubinyenga kubipesha mukalenga.

⁷Patua Apolonyuse muye kudi mukalenga kumulondela bualu bua mpetu, uvua mumuambile bua bungi bua mpetu itua Shimeyone mumumanyishe. Nanku mukalenga kutuma Eliyodore, mulombodi wa kumpala wa mu bukalenga buende, bua kuya mu Yerushalayime, kumuangatshila mpetu ayi.

⁸Diakamue Eliyodore kuya bu muntu udi uya kukenketa buloba bua Siriya ne Fenisiya, kadi pabi bikale bua kuenza tshitata mfumu mumutumine.

⁹Eliyodore ufika mu Yerushalayime, kumuakidilabu bimpe kudi mutuangaji munene ne kudi bena mu tshimenga. Kubajikuilaye kendela kende ne tshidiye mumvue bua mpetu ya mu nzubu wa Mvidi Mukulu. Kubakonkaye ne: bualu butotabu batulondela mbua bushuwa anyi?

¹⁰Mutuangaji munene kumuleja ne: bidi mukuetu Shimeyone muambe mbia dishima. Kumvuijaye mutata mpetu ivuabu balame mikale ya bakaji bakamba ne bana ba nshiya.

¹¹Tshitupa tshia lupetu tshivua tshia Irkane, muana wa Tobiyase, muntu wa lumu. Nenku tshivua Shimeyone, muntu mubi awu muambe mbualu bua dishima. Kabidi muvua amu kilo binunu dikumi ne tshimue ya nkanu mitoke ya mushinga mukole ne kilo binunu bitanu ne nkama itanu ya mpawungi.[36]

¹²Mutuangaji kumvuija kabidi ne: kamuena mushindu wa kuanyisha bua muntu kampanda angate biuma bidi bantu bateka mu muaba wa tshijila, bualu bavua bamanye ne: muaba wa nzubu wa Mvidi Mukulu mmuaba udi bintu kabiyi mua kunyanguka, mmuaba udi kabidi ne lumu pa buloba bujima.

¹³Kadi Eliyodore uvua amu musue kuangata mpetu yonsu bua ishale mu dina dia mukalenga, bu muvua meyi a mukalenga mamufundila.

¹⁴Dituku dia kuenza mulubu wa mpetu dikumbana, kubuelaye mu nzubu wa Mvidi Mukulu. Bena tshimenga bonsu bavua buwule ne kanyinganyinga.

¹⁵Ke batuangaji kuvuala bilamba biabu bia tshijila, kudiela mpala panshi kumpala kua tshilambuilu, babila Mvidi Mukulu uvua mufunde meyi a kulama bintu bia bende, bia bonsu bavua babiteka. Bualu Mvidi Mukulu uvua muambe bua kulama bintu biteka.[37]

¹⁶Bonsu bavua batangila mutuangaji munene, bavua bumvua dikenga dinene mu muoyi wabu. Bualu mpala wende uvua muandamuke bibi, uleja dibungama dinene divua mu muoyi wende.

¹⁷Bowa ne luzakalu bivua bikuata mutuangaji bivua bileja patoke bonsu bavua bamumona muvua muoyi wende musunsuke ne dibungama.

¹⁸Bantu kupatuka mu nzubu yabu bafuilakane, bikale mu bisumbu bisumbu, bua kutendelela Mvidi Mukulu pamue, bua nzubu wende kapetshi bundu bunene ebu.

¹⁹Bakaji bavuala bilamba bia madilu, bavua biadi bitupu,[38] mu misesu tente. Bansongakaji batshidi mu nzubu ya baledi babu, bavua banyema, aba batangila ku biibi, bakuabu benda pa bimana, banga binangila ku madidishi a nzubu yabu.

²⁰Bantu bonsu bavua bela bianza biabu kulu,[39] balomba Mvidi Mukulu bua abambuluishe.

²¹Bivua bienza bia luse pa kumona bantu badiela panshi, basopakanangana, batendelela, kabidi umvua mutuangaji munene ukengakana ne kanyinganyinga.

²²Pine apu bonsu bavua basengelela Maweja-Nangila, muena bukole buonsu, bua alame bintu bivua bantu bateke mu nzubu wa Mvidi Mukulu ne ditekemena diabu dijima.

²³Kadi Eliyodore pende uvua wenza tshiyuabu bamutume bua kuenza.

²⁴Eliyodore ne bena diende bakavua bamane kufika pabuipi ne muaba udibu bateka biuma bia mu nzubu wa Mvidi Mukulu. Ke Mfumu wa nwidie yonsu ne makole a kulu[40] onsu kumueneka ne lumu lupite, kupangisha bonsu bavua bafika muaba awu bukole ne dikanda dia kuenza kalu.

²⁵Kumonabu muntu mukuata buowa, mubanda pa kabalu, kavuadika bilamba bimpe. Kabalu kavua kadiela ne lukasa lupite kudi Eliyodore, kumutua bikonu bia mpala. Muntu uvua mubanda pa kabalu uvua umueneka bu muvuala bia mvita bia mpawungi.

²⁶Dine diba adi, bansongalume babidi, bikale ne bukole bupite, balenga menemene, bavuala bilamba bimpe, kumuenekabu kudi Eliyodore. Bavua bimana ewu ku dia balume, mukuabu ku dia bakaji, bamutuuta kakuyi luse, bamukuma bikole bipite.

²⁷Eliyodore kupona panshi diakamue, kufua tshipuka.[41] Kumuambulabu bua kumuteka mu nkuasa.

²⁸Nanku muntu awu uvua mubuele mu nzubu wa mpetu ne musumba wa bantu, kabidi ne bena mvita bende, mpindiewu bakadi bamuambula, kayi mua kudienzela bualu nansha bumue. Nanku bantu bonsu bavua batonda patoke bumfumu bua Mvidi Mukulu.

²⁹Eliyodore ukavua udijinga panshi diyi kadiyi diumvuika, kayi mua kutekemena mua kunyema ku bianza bia Mvidi Mukulu.

³⁰Kadi bantu bavua mu tshimenga bavua basamuna Maweja-Nangila, bualu uvua ulama lumu lua muaba wende wa tshijila. Nzubu wende uvua mukuatshishe bowa ne tshimvundu kudi bantu amu mutantshi awu, ukadi muwule ne disanka ne musangelu, bualu Maweja-Nangila muena bukole buonsu wadileji patoke.

³¹Balunda bakuabu ba Eliyodore kuyabu lukasa kudi Onyase, mutuangaji munene, bamulomba bua atendelele Muena Kulu bua apingajile Eliyodore muoyi, bualu ukavua pa kukula muoyi.

³²Mutuangaji munene uvua utshina bua mukalenga kavu kuamba ne: bena Yuda mbenzele muntu wanyi bibi. Ke pavua Onyase ulambula Mvidi Mukulu mulambu bua apingajile Eliyidore muoyi.

³³Patshivua mutuangaji munene ulambula mulambu wa dimulombela luse kudi Mvidi Mukulu, bansongalume abu kumuenekela Eliyodore tshiakabidi. Bavua bavuale bilamba bimpe, bimana pabuipi nende, bamuamba ne: — Elaku Onyase mutuangaji munene tuasakidila mutule, bualu Maweja-Nangila mmukupeshe muoyi bualu buende.

³⁴Kadi buebe wewe utuluke mudi Mvidi Mukulu mukunyoke, nanku ndaku kumanyisha bantu bonsu bukole bua Mvidi Mukulu. Bamba amu nanku, kujiminabu.

³⁵Nanku Eliyodore kulambula Maweja-Nangila mulambu, kumulayaye bintu bitule bualu uvua mumulame ne muoyi. Pashishe kushiyanganabu bimpe ne Onyase, kupinganaye ne tshiluilu tshiende kudi mukalenga.

³⁶Kulondelaye bantu bonsu malu onsu atua Mvidi Mukulu mupite bunene mumuenzele kabidi mumuleje bua abimone ne mesu ende.

³⁷Ke mukalenga kumukonka dina dia muntu utuaye mua kutuma tshiakabidi mu Yerushalayime. Eliyodore kuandamuna ne:

³⁸— Mukalenga, pawikala nansha ne muluishi nansha muntu udi welela bukalenga buebe tshitungu, wamutuma mu Yerushalayime! Nansha yeye mua kupingana, neapingane, kadi bamane kumukengesha bikole bipite! Bualu bukole bua Mvidi Mukulu budi pa muaba awu.

³⁹Bualu Mvidi Mukulu udi usomba mu diulu, udi ulama nzubu ewu, umukuba. Nanku badi bafika pa muaba awu ne meji mabi, Mvidi Mukulu udi ubashipa, ubabutula.

⁴⁰Ke mupitshile malu a Eliyodore, uvua musue kuangata mpetu ya mu nzubu wa Mvidi Mukulu nanku.