Read Tshiluba 2 Bamakabe 4 Bible Online

2 Bamakabe 4 - Tshiluba bible

2 Bamakabe 4

¹Shimeyone utudi tutela ewu uvua muambile Apolonyuse tshilumbu tshia mpetu ya ku nzubu wa Mvidi Mukulu,[42] ukebela ditunga diabu tshimvundu. Nanku Shimeyone awu kutungunuka ne dinyanga lumu lua Onyase. Utua wambila bantu ne: “Onyase ke uvua muluishishe Eliyodore, mumukebele kabidi ne makenga!”

²Utua ufunda Onyase ne udi utombokela bumfumu bua ditunga. — Kadi pine apu Onyase uvua wenzela tshimenga bimpe, uvua wenzela bana babu bimpe, kabidi uvua ubela bantu bua kulama diyi!

³Lukinu lua Shimeyone elu lutua luenda ludiunda. Umue wa ku bantu batua batua ku tshiende, batua babanga kushipa bantu.

⁴Kadi Onyase uvua mumone mutua malu aa mua kuba-kebela njiwu. Utua mumone kabidi mutua Apolonyuse, muana wa Menesteye mulombodi wa buloba bua Siriya[43] ne bua Fenisiya mukoleshe Shimeyone ku muoyi.

⁵Nenku Onyase kuya kua mukalenga, kasua musue kufunda bana babu. Uvua ukeba amu diakalenga dia muntu yonsu ne dia ditunga diabu dijima.

⁶Uvua mumone ne: padi mukalenga kayi muele diyi dia bumfumu, kakuena mushindu wa kupingaja bupole mu ditunga. Bualu Shimeyone kavua mua kulekela muoyi mubi utuaye nawu to.

⁷Matuku mamane kupita, Seleyukuse kufua. Kumupinganabu mu nkuasa kudi Antiyokuse muidika dina dia Epifane. Nanku Yasone muanabu ne Onyase,[44] kudiangatshila mudimu wa mutuangaji munene mu buivi.

⁸Uvua muye kumonangana ne mukalenga, mumulaye kilo 10.000 ya nkanu mitoke ya mushinga mukole ya bitadi, ne kilo 2.200, mipeta muaba mukuabu.

⁹Utata mumulaye kabidi bua kufuta kilo 4.000, pikala mukalenga muanyishe bua kumupa dianyisha dia kuasa tshipalu tshia manaya ne nzubu wa kulongeshila bansongalume. Kumulayaye kabidi bua kufila mena a bantu ba mu tshimenga tshia Yerushalayime bua kushalabu bena Antiyokiya.[45]

¹⁰Mukalenga kuitaba bionsu abi. Yasone amu wangata bumfumu, ke kukudimunaye bibidilu bia bankambua bua kubueja mu ditunga bibidilu bia bena Ngreke.

¹¹Kubengaye bulombodi buvua bakalenga bape bena Yuda kale bua kubafuila luse ku mudimu wa Yowanane, tatuende wa Epoleme. (Yeye ewu ke wavuabu kutuma ku ba bende bu muenampala bua kutua ndondu ne bena Rome.[46]) Yasone uvua munyange bibidilu bia bankambua, mupatule bidi bibengangana ne diyi dia Mvidi Mukulu.

¹²Uvua musanke bua kuasa tshipalu tshia manaya amu kuinshi kua mukuna uvua ne nzubu wa Mvidi Mukulu. Kufilaye bansongalume bavua batalamuke bua benze manaya, bikale banaya bu bena Ngreke.[47]

¹³Ke muvua bibidilu bia bena Ngreke bibuela mu ditunga. Bantu bavua balonde amu kulonda bibidilu bia bantu benyi, bua bubi bua Yasone, uvua muntu uvua kayi unemeka Mvidi Mukulu, mudiangatshile butuangaji bunene mu buivi.

¹⁴Batuangaji mene kabatshivua basumpakana bua mudimu wabu wa mulambu. Kadi bakavua bapepeja midimu yabu ya mu nzubu wa Mvidi Mukulu, balengulula milambu. Diba dionsu divua ngonga udila, bavua bafuilakana bua kuya mu manaya avua diyi dia Mvidi Mukulu dibenga.[48]

¹⁵Kabavua bangata kabidi bibidilu bia ditunga diabu ne mushinga to, bakavua batumbisha amu bia bena Ngreke.

¹⁶Ke pavuabu babuela mu dikenga dinene kunyima kua matuku nanku. Bualu bantu bavuabu bidikija mua kubafuana, mua kulonda mu dikasa, ke bavuile baluishi babu ne babakengeshi kabidi.

¹⁷Bidi bualu bukole bua kulengulula mikenji ya Mvidi Mukulu. Ke bualu budi bitudi tulonda ebi bileja patoke.

¹⁸Mu Tire, bavua banaya manaya ku bidimu binayi binayi. Mukalenga uvua uya kumona.

¹⁹Ke Yasone, muntu mubi kutumaye mienampala ya bena Yerushalayime, bikale ne muanzu wa bena Antiyokiya.[49] Bavua ne nkanu nkama isatu ya tshiamu tshitoke tshia mushinga mukole bua kulambula mulambu wa nwidie Eraklese. Kadi bavua bambula nkanu abu, kubenga bua kuyifila ku mulambu, basua bua ishale ku makuabu malu.

²⁰Nenku lupetu luvuabu batume bua mulambu wa nwidie Eraklese, bavua baluangata bua kuibaka nalu matu a mvita.

²¹Antiyokuse awu uvua mutume Apolonyuse, muana wa Menesteye mu Ejipitu bua kuya mu tshibilu tshia dibanjija dia mukalenga Filometore.[50] Nanku Antiyokuse uvua mumvue ne: Filometore kena muanyishe bulongolodi buende bua malu a ditunga. Nanku Antiyokuse kukeba mua kulama ditunga diende bimpe. Ke kuyaye mu Yope, kufika ne mu Yerushalayime.

²²Kumuakidilabu ne musangelu kudi Yasone ne kudi bantu bonsu ba mu tshimenga. Bantu kubuelelabu nende mu tshimenga ne bimunyi bia kapia mu bianza, bafuta bikashi, bela ne bibingu. Pashishe Antiyokuse kumuka ne tshiluilu tshiende, kuya natshi mu ditunga dia bena Fenisiya.

²³Pajikila bidimu bisatu, Yasone kutuma Menelase muanabu ne Shimeyone, utudi batela kulu eku,[51] bua kutuadila Antiyokuse mpetu, kabidi bua kuyukidilangana nende pa amue malu a kulongolola lukasa.

²⁴Nanku pavua Menelase mufike, kudilejaye kudi mukalenga bu muntu munene. Kukuataye mudimu bua bamupeshe yeye muanzu wa mutuangaji munene. Kuambilaye mukalenga kilo 8.000 bia nkanu mitoke ya mushinga mukole, mipite pa ya Yasone.[52]

²⁵Ke kupinganaye mu Yerushalayime ne mikanda ya kudi mukalenga, ya dimubanjija mu muanzu wa mutuangaji munene.[53] Kadi kavua muakanyine butuangaji nansha kakese. Uvua amu muntu wa tshikisu muikale ne lonji bu lua nyama wa difu.

²⁶Nenku Yasone uvua muenze budimu mushipe muanabu, badi bamunyenga pende muanzu mu budimu kudi munga muntu. Ke Yasone kunyema kuya kusokoma mu buloba bua bena Amane.[54]

²⁷Kadi Menelase nansha yeye mupete muanzu awu nanku, kena mufute mukalenga nkanu iwaye mumulaye to.

²⁸Pine apu, Sostrate mulombodi munene wa bena mvita ba mu tshimenga tshikolesha tshia Yerushalayime kuya kunana dibanza adi. Bualu yeye ke uvuabu bateka ku mudimu, bua kuangata lupetu lua bitadi. Pashishe mukalenga kubikidisha bonsu bubidi buabu Sostrate ne Menelase.

²⁹Menelase kushiya muanabu Lisimake, bua anji kumupingana mu mudimu wa mutuangaji munene. Sostrate pende kushiya Kratese, mfumu wa basalayi ba mu bena Shipre bua anji kushala ku bumfumu pa muaba wende.

³⁰Tshikondu atshi, bena Tarse ne bena Malose[55] kutomboka. Bualu mukalenga uvua mupeshe Antiyokise, mukajende uvuaye mubanjije, bimenga biabu, bu bintu bia disanka.

³¹Nanku mukalenga kuya lukasa bua kulongolola bualu abu. Kushiyaye Andronike, umue wa ku balombodi ba mu bukalenga, bua anji kushala mu bumfumu mu Antiyokiya.

³²Menelase umona nanku, kuelaye meji ne: tshikondu etshi ntshimpe bua meme kulambula Andronike bintu bia mpawungi biba mu nzubu wa Mvidi Mukulu. Kupanaye kabidi bikuabu bia nenku kudi bena Tire ne kudi bena bimenga bitata pabuipi nabu.

³³Pakambilabu Onyase bualu, wakaya kusokoma mu nzubu wa Mvidi Mukulu mu Dafne, pabuipi ne Antiyokiya.[56] Pakafikaye mu muaba awu wa tshinyemenu, Onyase kufundila Menelase bua kumuleja dipanga diende patoke.

³⁴Diba adi Menelase kuya ne Andronike ku luseke, kumusuminyina, umusuya bua ashipe Onyase. Nenku Andronike kuya kudi Onyase, kumushima ne miaku ya bulunda, umulaya ne: tshiakukuenzela bibi to. Nansha bu mutata Onyase ne dipampakana, kayi muitabe miaku eyi menemene, utata amu mupatuke muaba wa tshinyemenu uvuaye musokome. Ke Andronike kumushipa diakamue, kakuyi tshilumbu nansha tshikese.

³⁵Bua bualu bubi ebu, bantu bonsu, bena Yuda ne bantu ba matunga makuabu kubungama, banyingalala.

³⁶Diba adi, mukalenga upingana, utumina ku Silisiya, bena Yuda ba mu tshimenga tshia Antiyokiya ne bena Ngreke batata banyingalala pabu bua lufu lubi lua Onyase. Kuyabu kudi mfumu bua kumuambila bualu ebu.

³⁷Antiyokuse kupeta dibungama divule. Muoyi kumunyingalala munda, kudilaye bua pavuaye uvuluka meji ne lutulu bia mufue awu.

³⁸Kupetaye tshiji tshikole, kuambaye bua bavule Andronike muntumpu mukunze wa bumfumu, bapande bilamba biende bikuabu, bamushiya tshianana. Bantu bonsu kuendesha Andronike mu tshimenga, kumufila too ne ku muaba uvuaye mushipele Onyase. Kushipabu mushipianganyi pa muaba awu. Ke Maweja-Nangila utata munyoke Andronike ne dinyoka dimuakananyina.

³⁹Tshikondu atshi, Lisimake uvua muibe bintu bivule bia mu nzubu wa Mvidi Mukulu wa mu Yerushalayime ne diambuluisha dia muanabu Menelase. Bintu bia mpawungi kutangalaka. Ke bantu kumvua bualu, kudiungija bua kuluisha Lisimake.

⁴⁰Bu mutata musumba wa bantu mujukila kulu, muwule ne tshiji, Lisimake kusangisha bena nwita binunu bisatu bua kubaluisha. Mfumu wa bena mvita uvua dina ne Oranose, muntu mukole, muikale kabidi mupange malu.

⁴¹Bantu batata mu lubanza lua nzubu wa Mvidi Mukulu bajadika ne: Lisimake udi mubabunde, bamue kuangata mabue, banga ne mitshi, badipu kuboya butu bua milambu buvua muaba awu, bela mu bantu abu bua kubatangalaja.

⁴²Kutapabu ba bungi mputa, banga kufua muaba awu. Kuipatabu bashadi. Kushipabu Lisimake, muivi wa bintu bia tshijila, pabuipi ne nzubu wa kutekela bintu udi ku nzubu wa Mvidi Mukulu.

⁴³Bantu kufunda Menelase ku tshilumbu bua malu onsu awu.

⁴⁴Diba diafiki mukalenga mu Tire, bantu basatu kufika kudiye, batuma kudi Tshipangu tshia bakulu tshia mu Yerushalayime bua kufunda Menelase.

⁴⁵Menelase umona ne: mbapidi, kulaya Ptolemeye, muana wa Dorimene[57] lupetu lua bungi bua amone mua kumuakuila kudi mukalenga, anubingishe.

⁴⁶Ptolemeye kupatuka ne mukalenga mu nzubu bua mukalenga apete kapepe. Muine amu kumuandamunaye muoyi.

⁴⁷Nenku muntu ewu, Menelase uvua muenze malu aa, mukalenga kumulekela pa bionsu bivuabu bamusonguela. Kadi wakashipesha bantu basatu aba bavua mua kubinga nansha babalumbuluisha kumpala kua bena Skite.[58]

⁴⁸Bantu basatu aba bavua bakuila tshimenga tshia Yerushalayime, bakuila benatshi kabidi, bakuila bintu bia tshijila biba mu nzubu wa Mvidi Mukulu, bakabashipa diakamue nansha bobu kabayi ne bualu.

⁴⁹Bamue bena Tire bavua babungama bua bualu ebu bubi. Bua kuleja muvuabu banemeka bantu basatu aba kubenzelabu madilu manene.

⁵⁰Kadi Menelase kushala mu bumfumu amu bualu bua lukuka luwabu nalu kudi bavua badi mu bumfumu bua ditunga. Kukolelaye mu bubi, kudienzaye muluishi munene wa bana babu.