Read Tshiluba 2 Bamakabe 5 Bible Online

2 Bamakabe 5 - Tshiluba bible

2 Bamakabe 5

¹Matuku awu, Antiyokuse kutuadija kulongolola mvita bua kuya kuluisha bena Ejipitu[59] tshiakabidi.

²Diba adi, munkatshi mua matuku makumi anayi majima, mu tshimenga tshijima tshia Yerushalayime bantu kumona kulu mu diulu, babandi ba pa nyama ya tubalu, bawala binkutu bioya ne buanda bua mpawungi, kabidi ne bena mvita bikale difuma mu tshianza, muele mu tshikuabu!

³Babandi bavua bela mualu, batangilangana, basemena kumpala, bapingana tshianyima. Bawa banyungisha ngabu yabu, bapatula miele mu bibubu, bela mafuma, basa miketa. Bia mvita biwabu bawala: bilamba bia biamu ne tuzaku tua bilengejilu bia mpawungi bivua bikenka miaba yonsu.

⁴Bena mu tshimenga bavua batendelela bua biwabu bamona, bibaleja ne: nebapete diakalenga.

⁵Kadi lumu lua dishima lua lufu lua Antiyokuse lukawa lumane kutangalaka. Ke Yasone kuangata bantu bu tshinunu. Kuyaye nabu bua kuluisha Yerushalayime. Kuipataye bena mvita bavua pa bimana, kukuataye tshimenga. Menelase kuya kusokoma mu nzubu wa bimana bikolesha pabuipi ne nzubu wa Mvidi Mukulu.

⁶Yasone kushipa bena kuabu kakuyi luse, kayi welaku meji ne: patudi tuluisha kabidi ditshimuna bena tshisamba tshietu, didi dijimija bionsu kashidi. Bavuaye mutshimune, kawa nansha ubatangila bu bana babu to, anu bu baluishi.

⁷Uvua mupete amu bundu bua bungi bua pavuaye ukengesha bana babu. Nanku kupinganaye kabidi kudi bena Amane[60] kayi mudie bumfumu.

⁸Ku ndekelu kua bionsu, kutuilaye mu dikenga. Aretase, mukalenga wa Baarabe uvua mumueleshe mu lukanu. Apu Yasone kupetela mushindu wa kunyema. Bavua bamulondakaja miaba yonsu. Bonsu kumudiwula, bualu uvua ubenga malu a Mvidi Mukulu, upangila ditunga ne bena muabu. Kunyemaye too ne mu Ejipitu.

⁹Kunyemenaye mu ditunga dia bena Ngreke wela meji ne: Bena Sparte nebangakidile bualu mbana babu ne bena Yuda.[61] Nanku muntu awu uvua wipata bantu ba bungi mu ditunga diabu, ufuila bu muenyi mu ditunga dia bende.

¹⁰Yeye uvua mushipashipa bantu, mutekete bitalu biabu panshi kabayi babijika, lelu kakumona yeye wa kumudila nansha wa kumujika mu nkita ya bankambua, nansha wa kumuenzela madilu.[62]

¹¹Mukalenga Antiyokuse umanya bualu buwa buenzeka mu Yerushalayime, kuelaye meji ne: bena Yudeya bonsu badi bantombokela. Kumukaye mu Ejipitu ne lonji munda tente bu nyama wa muitu. Kukuataye tshimenga tshia Yerushalayime lukasa luonsu.

¹²Kutuminaye bena mvita diyi dia kushipa kakuyi luse, bantu bonsu badibu bapeta, kabidi bua bakose mitu ya bonsu basanganabu basokome mu nzubu.

¹³Kubutulabu bansonga, bantu bakole, bakaji ne bana, mishikankunde ne bana ba ku dibela.

¹⁴Munkatshi mua matuku asatu, Yerushalayime kujimija bantu binunu makumi muanda mukulu. Bantu binunu makumi anayi bawabu bashipa, bantu binunu makumi anayi ne pa mutu bawabu basumbishe bu bapika.

¹⁵Kadi Antiyokuse kavua muanji kusanka to. Kukiminaye mua kubuela mu muaba wa tshijila, mupite mikuabu yonsu ya pa buloba bujima. Bavua bamubuejamu kudi Menelase muluishi wa mikenji ya tshijila ne wa ditunga dietu.

¹⁶Antiyokuse ne bianza biuwule ne mikiya udi ulenga ngesu ya tshijila, wangata ne milambu ivua bakalenga bakuabu bafila bua kunemeka muaba wa tshijila, kuupetesha lumu.

¹⁷Antiyokuse kudiela mulu, kayi mumanye ne: Maweja-Nangila mmufike munda amu bua tshitupa tshikese, amu bua bualu bua mibi ya bantu ba mu tshimenga. Ke mutua Mvidi Mukulu udileja bu mubenga mua kushala mu nzubu wende.

¹⁸Bu bena Yerushalayime kabayi benza mibi mipite bungi, Antiyokuse pende bavua ne bua kumunyoka diakamue amu utshifikilaku, bu muvuabu benzela Eliyodore uvua Seleyukuse mutume bua kukenketa bintu bia mu kashete ka mu nzubu wa Mvidi Mukulu.[63] Diba adi kavua mua kukumbaja mudimu wende mubi to.

¹⁹Nanku Maweja-Nangila kena musungule bantu bende bua nzubu wa Mvidi Mukulu to, kadi mmunange nzubu wende bua bantu bende.[64]

²⁰Ke pavua nzubu wa Mvidi Mukulu mudisange ku makenga a bantu, bua avue kudisanga ku musangelu wabu. Diba divua bantu benza bibi, Mvidi Mukulu muena bukole buonsu uvua mulekele nzubu wende bua tshiji. Kadi diba didibu badilengeja ne mfumu, muaba wa tshijila kupetulula tshiakabidi lumu luawu.

²¹Nenku Antiyokuse mumane kuangata kilo binunu makumi anayi ne muanda mukulu bia nkanu mitoke ya mushinga mukole mu nzubu wa Mvidi Mukulu, kuluijakananganaye mua kuya mu Antiyokiya. Ne diditambisha ne didiamba mu muoyi, uvua wela meji ne ndi mua kuenza bionsu bindi musue nansha mene kuendesha mazuwa a mayi pa buloba buume nansha bena mvita pa mutu pa mayi manene.

²²Kushiyaye balombodi banene bua kunyanga bena Yuda. Mu Yerushalayime kushiyaye Filipe, muena mu Frijiya,[65] muntu mubi mupite ne Antiyokuse mene ku tshikisu ne ku bubi.

²³Pa mukuna wa Ngarizime,[66] kutekaye Andronike. Pa mutu pabu bonsu katupu muoyi Menelase uvua ukengesha bana babu, mupite bakuabu babidi abu ku bubi. Antiyokuse uvua mukine bena Yuda kashidi.

²⁴Kutumaye Apolonyuse, mulombodi wa tshiluilu tshia Misiya[67] ne bantu binunu makumi abidi ne bibidi. Uvua mubelele diyi bua kushipa bantu bonsu badi mu tshimenga kabidi ne bua kupana bakaji ne bana bu bapika.

²⁵Ufika mu Yerushalayime nenku, Apolonyuse kudileja bu muntu udi ukeba bupole. Kuindilaye amu dituku dia tshijila, dia Dikisha dia bena Yuda. Utua muindile bua banji kujikija mudimu onsu, bua alongolole ngendu ya mazengu ne bena mvita kumpala kua bimana bia tshimenga.

²⁶Diakamue kutumaye diyi bua bashipe bonsu batua bafike bua kumona bitua bienzeka. Pashishe kubuelaye lukasa ne bena mvita mu tshimenga. Kushipeshaye bantu musumba munene.[68]

²⁷Kadi Yudase Makabe, kuangata bantu bakuabu tshitema, kuya nabu mu tshipela tshia pa mikuna. Kuaka yeye ne batua bamufila, batua basomba amu bu nyama, badia bisosa,[69] batshina mikiya.