Read Tshiluba 2 Bamakabe 6 Bible Online

2 Bamakabe 6 - Tshiluba bible

2 Bamakabe 6

¹Matuku apita makese, mukalenga kutuma Ngeronte, muena Atene mu Yerushalayime,[70] bua enzeje bena Yuda malu ku bukole, bua balekele kulonda bibidilu bia bankambua babu, kabidi ne mikenji ya Mvidi Mukulu.

²Utata ne bua kunyanga kabidi nzubu wa Mvidi Mukulu mu Yerushalayime, kumuenza nzubu wa nwidie Zeyuse wa pa mukuna wa Olimpe. Nzubu wa Mvidi Mukulu wa pa mukuna wa Ngarizime, ku dilomba dia bena muabu[71] uvua ne bua kushala wa nwidie Zeyuse, tshiala benyi.

³Bavua bakengesha nanku bena ditunga bikole bipite.

⁴Bena matunga a bende bavua babuela mu nzubu wa Mvidi Mukulu, bakuatshikilamu maluvu, benzamu malu mabi onsu: bendelamu ne bundumba, babuejamu bintu bidibu kabayi mua kubuela nabi mu nzubu wa Mvidi Mukulu.

⁵Bavua bateka milambu mibi idi ne mikiya pa tshilambuilu.

⁶Bavua bakandika bantu bua kunemeka dituku dia Dikisha, nansha bua kulama matuku a bibilu bia bankambua, nansha bua kuditela ne tudi bena Yuda.

⁷Bavua bafundila bantu bua kuenza tshibilu ku ngondu ku ngondu dia mufikilu wa diledibua dia mukalenga, babenzeja amu ku bukole. Pavua bibilu bia Diyonisose, nwidie[72] wa mionji ya nwinyo bikumbane, bavua babenzeja ku bukole bua bende luendu lua mazengu ne tshikata tshia mionji ya ntentemu ku mitu yabu.

⁸Bena tshimenga tshia Ptolemayise bavua balomba bua[73] belele bantu ba bimenga bia bena Ngreke bivua mutumba ne Yudeya diyi bua benzeje pabu bena Yuda ba muabu malu ku bukole, bua badie pabu bintu bia mu milambu yabu mibi.

⁹Bawa ne bua kushipa muena Yuda yonsu wabenga mua kulama bibidilu bia bena Ngreke. Bonsu bavua amu mua kumona ne: makenga neatukuate.

¹⁰Bawa bafila bakaji babidi ku tshilumbuluilu bua pavuabu batekesha bana babu panshi. Bakabendesha tshimenga tshijima, bana balembeleja ku mabele. Pashishe bakabimansha kuinshi kua bimana bia tshimenga.

¹¹Bakuabu bena Yuda bavua baya mu mbuebue ya pabuipi nabu bua kutendelela mu musokoku, dituku dia Dikisha. Filipe umanya bualu, kubuosha bonsu pamue, bualu kabawa basue kuluangana mvita, basue amu kunemeka dituku dia tshijila adi.[74]

¹²Nanku ndi ngambila bonsu badi babala mukanda ewu, bua kabatekeshi mu maboku bua bungi bua makenga aa to. Kadi bamanye se: makenga aa adiku ki mbua kubutula tshisamba[75] tshietu to, kadi mbua kutshilengeja.

¹³Padi bantu kabayi bashala mutantshi mule mu bubi buabu, kadi bapeta dinyoka lukasa, bidi bidileja mudi Mvidi Mukulu ubananga.

¹⁴Bua kunyoka bikuabu bisamba, Maweja-Nangila wa bukole buonsu udi windila too ne pakumbajabu buenzayi buabu buonsu. Kadi buetu tuetu kena wenza netu nanku to.

¹⁵Udi utunyoka katuyi banji kuenza bibi bipite bua kadifiki ku ndekelu.[76]

¹⁶Ke padiye utufuila tuetu bantu bende luse. Nansha yeye mutunyoke udi musue kutulongesha, kadi kena ulekela bantu bende to.

¹⁷Meme mumane kunuvuluija malu aa, nenku mpindiewu tupinganayi ku bualu buetu.

¹⁸Ku balongeshi banene ba diyi dia Mvidi Mukulu, kuwa muntu dina diende Eleyazare, muntu mukulumpe kabidi muneme menemene. Bawa bamuenzeja ku bukole, bamuela munyinyi wa ngulube[77] mukana.

¹⁹Uvua ujinga kufua ne lumu pa mutu pa kuenda ne bundu. Ke pawaye udiyila mutangila ku tshishipelu ne muoyi mukole, ubenga munyinyi.

²⁰Kutuilaye munyinyi uvuaye nawu mukana panshi. Uvua uleja bantu mudibu ne bua kubenga kudia bintu bidi ne mikiya, nansha baluishi basue kubashipa.

²¹Bavua balongolola didia dia bintu bia nwidie, bivua bikandika kudi diyi dia Mvidi Mukulu. Bakuabu balunda ba kale ba Eleyazare kuyabu nende ku luseke. Kumulombabu bua bamutuadile minyinyi idibu banyisha kudi diyi dia Mvidi Mukulu, bua yeye adipikule nkayende. Kadi enze amu bu udi udia minyinyi ya ngulube ivua mukalenga mufunda bua kudia.

²²Bua pikalaye muenze nanku, balunda bende ba kale bamone mua kumupandisha ku njiwu ya lufu ayi.

²³Kadi Eleyazare kuangata dipangadika dinene, divua dikumbanyina bukole buende, bu muvuaye muikale kabidi ne nsuki mitokela mu mudimu. Katshia bamutela uvua amu ulonda meyi ne mikandu bia tshijila, bienza kudi Mvidi Mukulu muine. Nenku wakamba patoke ne: nuntume ku lufu lukasa.

²⁴Kusakidilaye kabidi miaku wamba ne: — Mu tshikondu tshinkadi, tshiena mua kudinga bantu. Bualu bansonga ba bungi badi mua kuitaba ne Eleyazare, muntu ne mvula makumi tshitema, uvua amu muangate ngikadilu ya benyi.

²⁵Pandi tshiyi ndeja ditaba dianyi patoke, ndi mua kupambula bantu bavule. Mbundu kaayi kabidi mbipendu kaayi bikalabu nabi bualu buanyi, mukulumpe ushima bua kushala ne muoyi kabidi matuku makese!

²⁶Kadi nansha meme mupanduka lelu ku dinyoka dia bantu edi, nansha meme mushala ne muoyi nansha meme mufue, tshiena mua kupanduka ku dinyoka dia Mvidi Mukulu, muena bukole buonsu.

²⁷Nanku ndi mudilongolole mua kufua mu bukitu bu mukulumpe wa bushuwa.

²⁸Neushile bansongalume tshilejilu tshia lufu luimpe, ludibu ne bua kufua ne disanka bua tumone mua kunemeka meyi ne mikandu bietu bia tshijila. Utula meyi awu, kuyaye buludi ku tshishipelu.

²⁹Kadi bantu bavua nende, kuandamunabu ngenzelu yabu. Ke bakavua nende ne muoyi mubi, bualu bakavua bumvua diyuki diende bu dia muntu mupale.

³⁰Kadi pakavuaye pa kukula muoyi bua bukole bua mituutu, kuambaye witshija mioyi ne: — Maweja-Nangila udi mumanye bionsu ne dimanya diende dijima. Udi mumanye mumvua mua kupanduka ku lufu. Kadi udi mumanye kabidi mundi ngumvua bisama bikole bia mituutu mu mubidi wanyi. Kadi mu muoyi wanyi, ndi ngumvua ne disanka bualu ndi mudifile kudi Mvidi Mukulu.

³¹Ke mudi Eleyazare mufue nanku. Lufu luende ndushile bansonga ne bantu ba bungi ba mu ditunga tshilejilu tshia muntu wa muoyi mukole ne tshia muenji wa malu mimpe.