Read Tshiluba 2 Bamakabe 7 Bible Online

2 Bamakabe 7 - Tshiluba bible

2 Bamakabe 7

¹Dituku dikuabu kukuatabu bana muanda mutekete pamue ne mamuabu. Kubafundilabu mfimbu ne mikaba, kubakengeshabu bikole bua badie munyinyi wa ngulube mukandika kudi Mvidi Mukulu.[78]

²Umue wa kudibu kuebejaye mukalenga mu dina dia bonsu ne: — Tshiudi musue kukonka ne kumanya kutudi ntshinyi? Umanye ne: tukadi pa kufua pa mutu pa kubenga meyi a bankambua betu.

³Mukalenga kumvua tshiji tshikole. Kutumaye diyi bua bateke nkanu ne ngesu pa kapia kanene.

⁴Bionsu bipie bikunze, kutumaye diyi bua bakose ludimi lua uvua wakula mu dina diabu awu, bamuvule ne dikoba dia ku mutu, bamukose bianza ne makasa, bana babu ne mamuende kabidi batangila.

⁵Bamukosa bionsu bajikija, mukalenga kutuma kabidi diyi bua bamusemeje pabuipi ne kapia, yeye mutshikale ne muoyi, bamuteke pa nkanu. Muinshi kumuangalaka ku nkanu. Diba adi bakuabu ne mamuabu kukoleshangana ku muoyi pamue, mua kufua ne bukitu, bambilangana ne:

⁶— Maweja-Nangila Mvidi Mukulu wetu udi umona makenga etu. Bulelela neatufuile luse, bu muvua Moshe muambe kale bua kudiwula badi basue kuvila Mvidi Mukulu ne: “Neafuile badi bamukuatshila mudimu luse.[79]”

⁷Muana wa kumpala ufua mushindu awu, kufikabu ne muibidi pa muaba wa tshishipelu awu. Bamane kuvula dikoba dia mutu ne nsuki, ke kumukonkabu ne: — Udi udia munyinyi wa ngulube anyi, peshi udi musue bua bakukose bidimba biebe bionsu ku tshimue ku tshimue?

⁸Kadi kuandamunaye mu ngakuilu[80] wabu ne: — Katshia tshiena mudie bintu abi to. Ke kumukengeshabu muvuabu bakengesha wa kumpala amu.

⁹Pa kukula muoyi kuambaye mukalenga ne: — Mushipianganyi wee! Udi utumbusha mu muoyi wa ku bantu eku, kadi Mukalenga wa bionsu, muena meyi atudi tufuila neatubishe bua tupete muoyi wa kashidi.[81]

¹⁰Kubangabu kukengesha muisatu. Kutumabu diyi bua apatule ludimi. Yeye kulupatula lukasa. Kuololaye bianza kayi utshina lufu.

¹¹Ke kuambaye ne bukitu ne: — Mvidi Mukulu wa mu diulu mmumpe bidimba ebi. Ndi ngitaba bua kubilambula bua meyi ende. Ndi ntekemena se: yeye neabimpingajile!

¹²Mukalenga ne bonsu bavuaye nabu bavua amu bakema bua muoyi mukole wa nsongalume, uvua umvua bisama kabiyi bimuenzela kalu nansha kamue.

¹³Yeye mumane kufua, ke kutuadijabu kukengesha muana muinayi amu ne tshikisu tshia mushindu wa mumue awu.

¹⁴Pa kukula muoyi, kuambaye mukalenga ne: — Ndi ne disanka bua padi bantu banshipa, bualu tudi bashindike se: Mvidi Mukulu neatubishe ku bafue bu nuwuaye mulaye. Kadi wewe Antiyokuse kuakubika ku bafue bua kupeta muoyi to.

¹⁵Kufikabu ne muitanu.

¹⁶Awu mutangila mukalenga talalaa, kumuamba ne: — Udi amu ne bumfumu bua kuenzela bantu biudi musue, kadi neufue pebe bu bobu. Kuedi meji ne: Mvidi Mukulu mmulekela tshisamba tshietu to.

¹⁷Wewe anji kuindila, neumone bukole buende. Neakukengeshe ne ndelanganyi yebe.[82]

¹⁸Kufikabu ne muisambombu, pakavuaye pa kufua, kuambaye mukalenga ne: — Kuena mua kudidinga patupu to! Tudi bapete makenga bualu bena tshisamba tshietu bavua benzela Mvidi Mukulu bibi. Ke padi bipupu bibi ebi bitukuata.[83]

¹⁹Kadi umanye wewe pebe nebakunyoke, bualu wabangi kuluisha Mvidi Mukulu nkayende!

²⁰Munkatshi muabu utuvua mua kutamba kukema malu ende, kabidi kulama tshifukilu tshiende ke mamuabu. Nansha yeye mumone bana bende muanda mutekete bafile mu dituku dimue, uvua mumvue bionsu ne bukitu, bualu uvua utekemena kudi Maweja-Nangila.

²¹Mamu uvua ubela muana yonsu mu ngakuilu wabu. Uvua unanga bana bende ne muoyi wa bu mamu, kadi ubaleja kabidi ne bukitu bu bua muntu mulume, ubambila ne:

²²— Tshiena mumanye munudi bavue kungikila. Ki mmeme udi munupe mueyelu nansha muoyi to. Kabidi ki mmeme udi mukuatakaje bitupa bia mubidi wenu to.

²³Nenku, Mufuki wa bintu bionsu, ke udi muenze muntu. Bionsu bidi mu bianza biende. Kadi bu mudiye ne luse, neanupingajile mueyelu ne muoyi, bualu nudi nubilambula mpindiewu bua numone mua kulama mikenji yende.

²⁴Antiyokuse kuela meji ne: mamu awu udi umpepeja, umpenda. Nanku bu muvua muana mukala mutshikale ne muoyi, mukalenga kuenza muonsu bua muana anyishe bua kulekela kulonda bibidilu bia bankambua babu. Uvua mumulaye, muditshipe bua kumupa biuma ne muanzu, kumuteka mu mulongu wa “balunda ba Mukalenga,[84]” kumupa ne mudimu munene, pikalaye mubenge bionsu abi.

²⁵Nsongalume kavua muteleje bivua mukalenga wamba abi to. Ke mukalenga kubikidisha mamuende, bua kubelaye nsongalume bua apande.

²⁶Bakabela mamu mutantshi mule, mamu kuitaba pende bua kuyukila ne muanende.

²⁷Mamu kubenga bionsu bivua mukalenga wa tshikisu muambe abi, kuinama kudi muanende, kuambila muana mu ngakuilu wabu ne: — Muananyi, mfuilaku luse. Meme mvua nebe ngondu tshitema, meme kukuamusha bidimu bisatu, kukudisha ne kukukolesha too ne ku mpindiewu.

²⁸Ndi nkusengelela muananyi: Tangila mulu ne panshi, mona bionsu bidipu, umanye se: Mvidi Mukulu mmubifuke amu patupu. Nansha bantu uvua mubafuke amu mushindu awu.

²⁹Kutshinyi mushipianganyi awu to. Kadi udileje pebe mupuangane bu bana benu. Anyisha bua kufua, bua nakusangane nabu dituku didi Mvidi Mukulu ne bua kutufuila luse.

³⁰Mamu utula amu meyi, nsongalume kuamba ne: — Nudi bindile tshinyi? Tshiena ngitaba meyi a mukalenga to. Ndi ngitaba amu diyi dia Mvidi Mukulu divua Moshe mupeshe batatuetu.

³¹Kadi wewe mukebi wa tshipupu tshidi tshishipa bena Ebrewu, tshianza tshia Mvidi Mukulu netshikutape!

³²Bualu, tudi tukenga amu bua buenzayi buetu tuetu nkayetu.[85]

³³Pikala Maweja-Nangila udi ne muoyi, mutufikile munda, mutunyoke bua kutulengeja, neadie tshiakabidi tshibalu ne tuetu bena mudimu bende.

³⁴Kadi wewe, muena tshikisu, kabidi mupite bonsu ku lonji, kudiedi mulu patupu, kuditambishi bua bena mudimu ba Mvidi Mukulu baudi ushipa nansha!

³⁵Bualu kuena mua kunyema dinyoka didi Mvidi Mukulu, muena bukole buonsu, udi umona bionsu, mua kukupa to.

³⁶Bualu bana betu mbafue bua ndondu yetu ne Mvidi Mukulu. Bobu bamane kumvua makenga a tshitupa tshikese, bakadi bamane kufika ku muoyi udi kauyi ujika.[86] Kadi buebe wewe, Mvidi Mukulu neakulumbuluishe, akunyoke bua ditambisha diebe.

³⁷Buanyi meme bu bana betu ndi ndifila ne mubidi ne muoyi bua kunemeka meyi a bankambua. Ndi ndomba Mvidi Mukulu bua afuile tshisamba tshietu luse. Akutumine makenga bua ujadike, umanye wewe nkayebe patoke mudiye Mvidi Mukulu nkayende.

³⁸Bana betu ne meme tuikale ba ndekelu ku bena tshisamba tshietu badi Mvidi Mukulu unyoka amu kunyoka pa kanyokela.

³⁹Mukalenga mubinduluke bua miaku ivuabu bamuamba abi, kunyokaye muana wa ndekelu bipite bia bakuabu.

⁴⁰Nsongalume kufua kayi uvila ditaba diende nansha kakese, mutekemene amu kudi Maweja-Nangila.

⁴¹Ke mamu kushisha kufua bamane kushipa bana bende.

⁴²Tudi tushikidila apa ne dinulondela mutotabu bakengesha bena tshisamba tshietu bikole, basue kubadisha ku bukole bintu bia mikiya bidi mikenji yetu mibenga.