Read Tshiluba 2 Bamakabe 9 Bible Online

2 Bamakabe 9 - Tshiluba bible

2 Bamakabe 9

¹Amu mu tshikondu atshi, Antiyokuse kumuka mu ditunga dia bena Persa kayi mupete lumu nansha lukese.

²Bualu mu Persa amu, uvua mubuele mu tshimenga tshia Persepolise.[98] Kupangaye kupawula bintu bia mu nzubu wa nwidie wabu, ukengesha ne bena mu tshimenga. Bantu kutomboka, kuangata bia lufu bua kuluisha Antiyokuse. Awu kunyema, kusemena tshianyima ne tshiluilu; mmufue bundu.

³Yeye mumane kufika ku Ekbatane,[99] kumvuaye lumu lua malu avua menzekela Nikanore, Timote ne bantu bavuabu nabu.

⁴Kupetaye tshiji tshikole, kuelaye meji a kunyoka bena Yuda bua bundu buvuabu bamufuisha kudi bena Persa bavua bamuipata. Pa bualu ebu, kutuminaye mumuendeshidi wa ditempu diyi dia kutungunuka ne luendu kayi wimana too ne muafikaye kuvuaye uya. Kadi tshikavua tshimuenzeja atshi tshivua tshilumbu tshivuaye natshi ne Muena kulu. Kuakulaye miaku ya diditambisha ne: “Nengenze Yerushalayime bu tshiina tshiuwule ne bitalu bia bena Yuda tente.” Uvua upua muoyi ne Mvidi Mukulu kena umulondesha.

⁵Kadi Maweja-Nangila mumonyi wa bionsu, Mvidi Mukulu wa bena Izrayele, kumutumina disama dikole kadiyi kuondapa, kabidi kadiyi dimueneka kudi bantu. Antiyokuse utula amu miaku, munda kumusama bikole, disama dia tshinyengu kumukuata.

⁶Ke dinyoka divuabu bamupingajila bu nuwuaye musamishe bantu bakuabu munda ne makenga a bungi atudi katuyi banji kumona.[100]

⁷Kadi nanshaye kulekela buakulavi buende. Ne ditambisha dia bungi uvua utandisha bena Yuda. Ke kutumaye diyi bua bakoleshe luendu. Kadi bua bubi bua lubilu kukulukaye kupona panshi, kutshibukaye bidimba bionsu.

⁸Kadi muntu ewu uvua ne ditambisha kadiyi dia bantu. Uvua wela meji ne: ndi mua kutumina mavuala a mayi diyi, ndi mua kupima mikuna mitumbuke pa tshipimu.[101] Lelu ukadi mulale panshi. Badi ne bua kumuambula mu bulalu. Ke muvua bantu bonsu bajadika bukole bua Mvidi Mukulu.

⁹Mukalenga wa tshikisu uvua amu ne muoyi, ne misanda kuisu, usama bikole. Mubidi wende udi utukakana yeye mutshikale ne muoyi. Dikenga diende divua dinene. Mubidi wende uvua upatuka mupuya mubi uvua ulukisha bena mvita bende bonsu.

¹⁰Yeye uvua wela meji a kulenga mabulunga a kulu,[102] lelu wapangi ne udi mua kumuambula, bua bubi bua mupuya udiye ununka.

¹¹Nenku, bu nuwuaye mumvue makenga a bungi, mutekete mu maboku bua dinyoka divua Mvidi Mukulu mumunyoke nadi, ke kushishaye kupeta meji makane, kulekela lutambishi luende.

¹²Bu muvuaye yeye nkayende kayi mua kumvua kabidi mupuya mubi wa pambidi pende, kutondaye ne: “Bidi bimpe bua bantu bu mundi emu, batumbishe Mvidi Mukulu, kabayi bela meji ne tudi mulongu umue ne Mvidi Mukulu to.”

¹³Kadi ditendelela dia muntu ewu mubi divua difika ne kudi Maweja-Nangila uvua kayi mua kumufuila kabidi luse, nansha Antiyokuse mulaye ne:

¹⁴“Mvua musue kuya lukasa mu Yerushalayime, tshimenga tshia tshijila, bua kutshibutula ne kutshiandamuna tshishale tshiina tshiwule ne bitalu. Kadi mpindiewu ndi muanyishe bua tshimenga etshi tshidienzele malu.

¹⁵Mvua muele meji a kuelela nyama ya difu ne nyunyi bitalu bia bena Yuda ne bana babu, bualu mvua muele meji ne kabena mua kubijika to. Kadi mpindiewu ndi musue ne bikale anu mushindu umue ne bena Atene.

¹⁶Ndi ndaya bua kufila milambu milenga bua nzubu wa Mvidi Mukulu umvua mupawule bintu kale. Ndi ndaya kabidi bua kupingaja ngesu yonsu ya tshijila ivua mipawula mu nzubu wa Mvidi Mukulu, kusakidila mikuabu pa mutu mivule. Ndi musue kabidi kufila lupetu luanyi meme bua bamone mua kualambula bu milambu.[103]

¹⁷Ndi ndaya kabidi bua kudienza muena Yuda, bua kuenda kutangalaja lumu lua bukole bua Mvidi Mukulu mu matunga onsu.”

¹⁸Kadi makenga a Antiyokuse avua amu atungunuka. Bualu Mvidi Mukulu uka-vua mumane kumufundila tshibawu tshimuakanyine. Bu muvuaye kayi kabidi utekemena lupandu, ke mukalenga kufundila bena Yuda mukanda wa dibasengelela, wamba ne:

¹⁹“Bakunemeka bitambe, bena Yuda, ne betu basuibue, meme Antiyokuse, mukalenga ne mulombodi wa kumpala wa bena mvita, ndi nnujingila disanka, bukole bua mubidi ne diakalenga diwle.

²⁰“Ndi ntekemena se: nudi amu bimpe ne bana benu, kabidi malu enu onsu adi amu aya bimpe kumpala. Ke pandi nganyisha Mvidi Mukulu undi mutekemene.

²¹Meme ndi amu mutekesha kudi disama mu bulalu. Ndi nnuwluka ne disanka. “Pampingena ku ditunga dia Persa, meme kupeta disama didi dingenza buowa. Ke mundi nkeba mushindu unudi mua kusomba talalaa.

²²Ndi amu mutekemene ne disama dianyi nedijike, butekete ebu nebushiye kaba.

²³Kadi ndi muvuluke ne tatuanyi uvua udianza kusungula muntu uvua mua kumupingana musangu uvuaye uya mu mvita mu matunga adi ku luseke ludi diba dibandila[104] lua musulu wa Perate.

²⁴Uvua wenza ne meji a ne: bu bualu bua tshimpitshimpi mua kumvuila nansha bantu bapeta lumu lubi lua lulu, kabavu kulubakana, bualu bakadi badianza kumanya mupinganyi wende.

²⁵Ndi mumanye kabidi mudi bamfumu ba matunga adi netu mutumba, batutentekela, bindila tshikondu tshiakane tshia kunduisha. Nanku mbasungudi muananyi Antiyokuse bua kumpingana. Nkawa mumuteke mu bianza bienu misangu imvua mbanda ku luseke lua bitupa bia buloba bidi ku mutu wa ditunga. Nenku nkadi mumufundile mukanda udi ulonda kuinshi eku.

²⁶“Ndi nnusengelela, nnulomba bua nuvuluke bilenga bionsu bimvua munuenzele patoke bonsu pamue nansha muntu yonsu nkayende. Nulame muoyi mulenga unudi nawu bualu buanyi ne bua muananyi wa balume kabidi.

²⁷Ndi mumanye se: bu mudiye muntu udi munange muntu nende, nealonde majinga anyi onsu, kabidi neumwangane nenu bonsu.”

²⁸Nenku mushipianganyi, kabidi mupendi wa Mvidi Mukulu ewu, mmufue mu makenga mapite amu bu muvuaye mukengeshe bakuabu. Wapetshi tshibawu tshipite bikuabu, bualu wafuidi mu ditunga dia bende pa mikuna.

²⁹Mulunda wende Filipe kuvua kuangata tshitalu tshiende, kuya natshi mu Antiyokiya. Kadi bu nuwuaye mutshine muana wa Antiyokuse, kuyaye ku Ejipitu kudi mukalenga Ptolemeye Filometore.[105]