Read Tshiluba Matayi 1 Bible Online

Matayi 1 - Tshiluba bible

Matayi 1

¹Mena a bankambua ba Yezu Kristu, muana wa ku ndelanganyi ya Davide ne ya Abrahame, adi nunku:

²Abrahame uvua mulele Izake. Izake kulela Yakobe. Yakobe kulela Yuda ne bana bakuabu ba balume.

³Yuda ne mukajende Tamare kulela Perese ne Zera. Perese kulela Esrome. Esrome kulela Arame.

⁴Arame kulela Aminadabe. Aminadabe kulela Nashone. Nashone kulela Salmone.

⁵Salmone ne mukajende Rakabe kulela Bowaze. Bowaze ne mukajende Rute kulela Obede. Obede kulela Ishayi.

⁶Ishayi kulela mukalenga Davide. Davide ne mukaji wa Uriya kulela Shelomu.

⁷Shelomu kulela Rekabame. Rekabame kulela Abiya. Abiya kulela Asa.

⁸Asa kulela Yoshafate. Yoshafate kulela Yorame. Yorame kulela Uziya.

⁹Uziya kulela Yotame. Yotame kulela Akaze. Akaze kulela Izkiya.

¹⁰Izkiya kulela Menashe. Menashe kulela Amone. Amone kulela Yoshiya.

¹¹Yoshiya kulela Yekoniya ne bana bakuabu ba balume. Tshikondu atshi ke tshiyuabu baya ne bena Izrayele mu bupika ku Babilone.[1]

¹²Bamane kuya ne bena Izrayele mu bupika ku Babilone, Yekoniya kulela Sheyaltiyele. Sheyaltiyele kulela Zerubabele.

¹³Zerubabele kulela Abiyude. Abiyude kulela Eliyakime. Eliyakime kulela Azore.

¹⁴Azote kulela Sadoke. Sadoke kulela Akime. Akime kulela Eliyude.

¹⁵Eliyude kulela Eleyazare. Eleyazare kulela Matane. Matane kulela Yakobe.

¹⁶Yakobe kulela Yozefe, bayende wa Mariya, mamuende wa Yezu, udibu binyika ne: Kristu.

¹⁷Nanku biangatshile ku Abrahame too ne ku Davide kudi ndelanganayi dikumi ne inayi; biangatshile ku Davide too ne ku tshikondu tshiyuabu baye ne bena Izrayele mu bupika ku Babilone kudi ndelanganyi dikumi ne inayi; biangatshile tshikondu atshi too ne ku diledibua dia Kristu kudi kabidi ndelanganyi dikumi ne inayi.

¹⁸Bavua balela Yezu Kristu mushindu ewu. Mamuende Mariya uvua mubangila kudi Yozefe. Kadi kayi muanji kuya kudi bayende, kudimonaye muikale ne difu ku bukole bua Mueyelu wa Tshijila.

¹⁹Yozefe uvua mumubangile, uvua muntu wa nsongu. Kavua musue kumanyisha bantu bualu ebu, bua kafuishi Mariya bundu. Nanku kushindikaye bua kushiyangana nende mu musokoku.

²⁰Kadi patshivuaye wela meji awu, mutumibue wa Maweja-Nangila kumumuenekela mu tshiota, umuambila ne: — Yozefe, muana wa Davide, kutshinyi kuangata mukajebe Mariya, bualu difu didiye nadi ndia ku bukole bua Mueyelu wa Tshijila.

²¹Nealele muana wa balume. Neumuinyike dina ne: Yezu, bualu neasungile bantu bende ku mibi yabu.[2]

²²Bionsu ebi bivua bienzeke bua kukumbaja bivua Maweja-Nangila muambe mukana mua muambi wende ne:

²³“Nsongakaji utshidi kamama neimite difu, nealele muana wa balume. Nebamuinyike dina ne: Emanuwele,[3]” (mmumue ne: “Mvidi Mukulu udi netu.”)

²⁴Yozefe kubika ku tulu. Kukumbajaye bivua mutumibue wa Maweja-Nangila mumuambile: kuangataye mukajende Mariya.

²⁵Kadi kavua mumanyangane nende, too ne muakalela Mariya muanende wa balume. Yozefe kuinyika muana awu dina ne: Yezu.