Read Tshiluba Matayi 10 Bible Online

Matayi 10 - Tshiluba bible

Matayi 10

¹Yezu kubikila bapostolu bende dikumi ne babidi, kubapa bukole bua kuipata mikishi mibi, kabidi bua kujikija masama onsu ne matekete a bantu.

²Mena a bapostolu dikumi ne babidi adi nunku: wa kumpala ke Simone, uvua ne dina dikuabu dia Petro, ne muanabu Andre; Yakobe ne muanabu Yowanane, bonsu babidi bana ba Zebede;

³Filipe ne Bartolmayi; Tomase ne Matayi, mulambuishi wa bitadi; Yakobe muana wa Alfayi, ne Tadeyi;

⁴Simone, uvua mu tshisumbu tshia baluidi ba ditunga, ne Yudase Iskariyote, uvua mupangile Yezu.

⁵Yezu kutuma bapostolu bende dikumi ne babidi aba, ubambila bivuabu ne bua kuenza ne: — Kanuyi mu matunga a bantu badi kabayi bena Yuda, kanubuedi mu bimenga bia bena Samariya.[57]

⁶Nuye nangananga kudi mikoku mijimine ya mu tshisamba tshia bena Izrayele.

⁷Panuaya, nulongeshe bantu, nubambile ne: “Bukalenga bua mu diulu bukadi pabuipi!”

⁸Nujikije masama a babedi, nubishe bafue, numushe nsudi ya badi nayi, nuipate mikishi mibi. Bavua banupa bionsu tshianana, nupangane kabidi tshianana.

⁹Kanuangatshi tshiamu tshia mpawungi, nansha tshiamu tshitoke tshia mushinga mukole, nansha makuta a biamu mu bibombi bienu.

¹⁰Kanuyi ne tshibuta tshia luendu, kanuyi ne mutelu mukuabu, nansha ne bisabata, nansha ne dikombu dia luendu. Bualu muena mudimu udi ne bua kupeta biakudia biende.[58]

¹¹Panuafika mu tshimenga, nansha mu musoku, nukebe muntu wa disanka udi mua kunuakidila bimpe. Nushale kua muntu awu, too ne panudi numuka.

¹²Panuabuela mu nzubu, nuambe ne: “Bupole buikale mu nzubu emu.[59]”

¹³Pikala bena mu nzubu amu banuakidila bimpe, muoyi wenu wa bupole neushale kudibu. Kadi pikalabu babenga kunuakidila, muoyi wenu wa bupole Mupingane kunudi.

¹⁴Mu nzubu yonsu, nansha mu tshimenga, muikalabu babenga kunuakidila, nansha kunuteleja, nupatukemu. Kadi nututule lupuishi lua ku makasa enu.[60]

¹⁵Ndi nnuambila bulelela ne: dituku dia tshilumbuluilu, Mvidi Mukulu neanyoke bena tshimenga etshi bipite dinyoka dia bena Sodome ne bena Ngomore.[61]

¹⁶— Telejayi! Ndi nnutuma bu mikoku munkatshi mua nkashama. Nanku nuikale ne budimu bu bua nyoka, kabidi ne muoyi mulenga bu wa nyunyu wa nkudimba.

¹⁷Nudimuke, bualu bantu nebanufile ku bilumbuluilu binene, kabidi nebanukumishe mikaba mu nzubu yabu ya kutendelela.

¹⁸Nebaye nenu kudi balombodi ne bakalenga ba matunga bualu buanyi, bua nuenu kujadika bulelela buanyi kumpala kuabu, ne kumpala kua bantu badi kabayi bena Yuda.

¹⁹Pikalabu baye nenu kumpala kua balumbuluishi, kanupampakanyi bua tshinudi ne bua kuamba, ne bua mushindu unudi ne bua kuakula. Nenupete tshia kuamba anu diba adi.

²⁰Nanku nuenu, kanuakuamba bualu, kadi Mueyelu wa Tatuenu newakuile munda muenu.

²¹Bantu nebafile bana babu bua kubashipabu. Baledi nebenze bia momumue ne bana babu balela. Bana pabu nebatombokele baledi babu; nebabashipeshe.

²²Bantu bonsu nebanukine, bualu nudi nungitabe Kadi wananukila ne ku ndekelu, nebamusungidile.

²³Panukengeshabu mu tshimenga kampande, nuye kusokomena mu tshikuabu. Ndi nnujadikila bulelela ne: Muana wa muntu neafike, kanuyi banji kujikija mudimu wenu mu bimenga bionsu bia bena Izrayele.

²⁴Mulongi kena mua kupita mulongeshi wende. Muena mudimu kena mua kupita mfumuende.

²⁵Mbimpe mulongi ikale bu mulongeshi wende, muena mudimu bu mfumuende. Pikalabu binyika mfumu wa diku ne: Belzebule[62] nanku bena diku mene nebabinyike mena mapite bubi.

²⁶— Nenku kanutshinyi bantu to. Bualu busokome buonsu nebumanyike. Bualu budi bantu kabayi bamanye, nebabumanye.

²⁷Bualu bundi nnuambila mu midima, nubuambe patoke; bunudi numvua bamba mu musokoku, nubuambe, bantu bonsu bumvue.

²⁸Nenku kanutshinyi bantu badi bashipa mubidi, kadi kabayi mua kushipa muoyi. Nutshine nangananga Mvidi Mukulu, udi mua kujimija[63] diakamue mubidi ne muoyi mu kandondu.

²⁹Nyunyi ya mishamisha ibidi, kabena bayisumbisha ku dikuta dimue anyi? Kadi nansha umue wa kudiyi kena mua kupona panshi, Tatuenu Mvidi Mukulu kayi mumanye.

³⁰Kadi nuenu mimanye ne: nansha nsuki yenu idi mibadika yonsu.

³¹Nanku kanutshinyi to. Nudi bapite nyunyi ya mishamisha mivule mushinga!

³²— Muntu yonsu udi wamba kumpala kua bantu ne: ndi wa Kristu, meme kabidi nemmuambe ne: ngwanyi, kumpala kua Tatuanyi udi mu diulu.

³³Kadi muntu yonsu udi unwila[64] kumpala kua bantu, meme kabidi nemmuvile kumpala kua Tatuanyi udi mu diulu.

³⁴— Kanuedi meji ne: ndi mufike bua kubueja bupole pa buloba. Tshiena mufike bua kubueja bupole, kadi anu myita.

³⁵Ndi muvue kusongakaja nsongalume ne tatuende, nsongakaji ne mamuende, mukaji wa muana ne mamuenende.

³⁶Baluishi ba muntu nebikale anu bena diku diabu.[65]

³⁷— Muntu udi unanga tatuende nansha mamuende bipite mudiye munnange meme, kena mungakanyine to. Muntu udi unanga muanende wa balume nansha wa bakaji bipite mudiye munnange meme, kena mungakanyine meme to.

³⁸Muntu udi kayi wambula mutshi wende mutshiamakane, kayi undonda, kena mungakanyine meme to.

³⁹Muntu udi musue kudilamina muoyi wende, neaujimije. Kadi udi ujimija muoyi wende bualu buanyi, neaupete.

⁴⁰— Muntu udi unuakidila, udi ungakidila meme. Udi ungakidila, udi wakidila ewu udi muntume.

⁴¹Muntu udi wakidila muambi wa Mvidi Mukulu, bua padiye muambi, neapete difutu didibu bapesha muambi. Muntu udi wakidila muntu wa Mvidi Mukulu, bua padiye muntu wa Mvidi Mukulu, neapete difutu didibu bapesha muntu wa Mvidi Mukulu.

⁴²Ndi nnujadikila bulelela ne: muntu udi upa umue wa ku bakese banyi aba nansha dikopu dia mayi matalale, bua padiye mulongi wanyi, kakubula difutu diende to.