Read Tshiluba Matayi 14 Bible Online

Matayi 14 - Tshiluba bible

Matayi 14

¹Tshikondu atshi, Erode, mulombodi wa buloba bua Ngalileya, uvua mumvue bantu bayukila bua Yezu.

²Kuambilaye bantu bende ne: — Muntu awu ke Yowanane-Batiste: udi mubike ku bafue! Ke padiye mua kuenza bishima.

³Bualu Erode ke utua mutume diyi kale, bua bakuate Yowanane, bamusuike mionji, bamuele mu nzubu wa lukanu. Uvua muenze nanku anu bualu bua Erodiyade, mukaji wa Filipe wabu.[96]

⁴Bualu Yowanane uvua mubele Erode ne: — Kuena mua kuangata Erodiyade bu mukajebe nansha![97]

⁵Erode uvua musue kushipesha Yowanane. Kadi uvua utshina bena Yuda, bualu bena Yuda bonsu batua banemeka Yowanane bu muambi wa Mvidi Mukulu.

⁶Kadi dituku dia mufikilu wa diledibua dia Erode, muana wa bakaji wa Erodiyade uvua uja maja, bantu bonsu batua Erode mubikile batangile. Nsongakaji awu uvua mupite kusankisha Erode.

⁷Ke Erode kuditshipa bua kupesha nsongakaji awu tshionsu tshialombaye.

⁸Mamuende wa muana kumupa meji. Ke muana kuambila Erode ne: — Umpeshe mutu wa Yowanane-Batiste mu dilonga amu mpindiewu!

⁹Mukalenga Erode kubungama bikole. Kadi bumuvuaye muditshipe, bantu bavuaye mubikile bumvue, kutumaye diyi, bua bapeshe nsongakaji mutu wa Yowanane.

¹⁰Kutumaye muntu mu nzubu wa lukanu, bua akosemu mutu wa Yowanane-Batiste.

¹¹Kuambulabu mutu mu dilonga, kuutuadilabu nsongakaji. Yeye pende kuufila kudi mamuende.

¹²Balongi ba Yowanane kufika, kuangata tshitalu tshiende, kutshijika. Pashishe kuyabu kumanyisha Yezu malu onsu avua menzeke.

¹³Pavua Yezu mumvue bualu ebu, kumukaye kaba aka mu buatu. Kuyaye kupengama pa nkayende. Kadi bantu bavule kumanya ne: Yezu mmumuke. Nanku kumukabu mu bimenga, bayila ku muelelu wa mayi, benda balonda Yezu.

¹⁴Yezu upatuka mu buatu, kumonaye bantu ba bungi. Luse kumukuatalu. Kutuadijaye kujikija masama abu.

¹⁵Dilolu balongi kuya kuambila Yezu ne: — Bukadi buila. Muaba ewu nku mpenga. Tangalaja bantu. Baye kusumba biakudia mu misoku.

¹⁶Yezu kubandamuna ne: — Kabena mua kutangalaka to. Nuenu mene bapeshayi biakudia!

¹⁷Balongi kumuambila ne: — Kadi muaba ewu, tudi amu ne mampa atanu, ne minyinyi ibidi ya mu mayi.

¹⁸Yezu kubambila ne: — Bintuadilayi apa.

¹⁹Pashishe kutumaye diyi, bua bantu basombe panshi mu bisosa. Ke kuangataye mampa atanu, ne minyinyi ibidi ya mu mayi. Kutangilaye mulu, wela Mvidi Mukulu tuasakidila. Kukosaye mampa, kuapeshaye balongi, bua baabanyine bantu.

²⁰Muntu yonsu uvua mudie muukute. Balongi kukunguja bisunsukile bivua bishale, bibondu dikumi ne bibidi[98] tente.

²¹Bavua badia bavua bantu bu binunu bitanu, katuyi tubala bakaji ne bana.

²²Diakamue Yezu kuambila balongi, bua babande mu buatu, bamudianjidile dishiya dia dijiba. Bualu utshivua ulayangana ne bantu.

²³Yezu mumane kulayangana nabu, kubandaye nkayende pa mukuna bua kutendelela. Butuku, kushalaye muaba awu nkayende.

²⁴Buatu bukavua bushilangane ne muelelu wa mayi mutantshi. Mavuala avua abutankula, bualu lupepele luvua lubuluisha.

²⁵Patshiatshia, Yezu kuya kudi balongi bende, wenda pa mayi.

²⁶Balongi bamumona wenda pa mayi, kutshinabu bikole, bela mbila ya bowa ne: — Mukishi!

²⁷Diakamue Yezu kubambila ne: — Kanutshinyi. Meme! Koleshayi muoyi!

²⁸Nanku Petro kulomba Yezu ne: — Mfumu, ne ngwewe, utume diyi, mvua kuudi, ngenda pa mayi.

²⁹Yezu kumubikila ne: — Vuakunu! Petro kupatuka mu buatu, wenda pa mayi, mutangile kudi Yezu.

³⁰Kadi utangila lupepele, kumvuaye bowa, kutuadijaye kudiina mu mayi. Ke kuelaye diyi ne: — Mfumu, unsungidile!

³¹Diakamue Yezu kolola tshianza, kumukuata, wamba ne: — Akia! Ditaba diebe ndikese be! Udi upampakana bua tshinyi?

³²Bonsu babidi kubuela mu buatu. Lupepele kutuya.

³³Nanku balongi bavua mu buatu kutuila Yezu binu panshi, bamba ne: — Udi Muana wa Mvidi Mukulu bulelela!

³⁴Kusabukabu dijiba, kufikabu mu buloba bua Ngenesarete.[99]

³⁵Bena muaba awu kumanya ne: Yezu. Nanku kumanyishabu mu buloba bujima abu ne: wafiki! Ke bantu kufika ne babeedi bonsu kudiye.

³⁶Bavua bamusengelela bua bantu bamulenge nansha ku luzemba lua tshinkutu tshiende. Bonsu bavua balulenga, bavua bumvua bimpe.