Read Tshiluba Matayi 2 Bible Online

Matayi 2 - Tshiluba bible

Matayi 2

¹Kulelabu Yezu mu musoku wa Betleyeme,[4] mu ditunga dia Yudeya. Tshikondu atshi Erode ke uvua mukalenga wa ditunga. Bamane kulela Yezu, bena meji, bavua balonge malu a mitotu bikole, kufikabu mu tshimenga tshia Yerushalayime, batumine luseke ludi diba dipatukila.

²Kukonkabu ne: — Muana udibu balele bua kuikalaye mukalenga wa bena Yuda udi penyi? Tudi bamone mutotu wende luseke ludi diba dipatukila. Ke patudi bafike bua kumukukuila.

³Mukalenga Erode ne bena Yerushalayime bonsu bumvue nanku, kupampakanabu bikole.

⁴Mukalenga Erode kubikidisha bamfumu bonsu ba batuangaji, ne balongeshi ba mikenji ba bena Izrayele. Kubakonkaye muaba uvuabu ne bua kulela Kristu.

⁵Kumuandamunabu ne: — Mu musoku wa Betleyeme mu ditunga dia Yudeya. Bualu muambi uvua mufunde ne:

⁶“Wewe, Betleyeme, musoku wa mu ditunga dia Yudeya, kuena mushadile ku misoku yonsu ya mu ditunga dia Yudeya. Bualu kuudi wewe nkuafumina mfumu, mulombodi wa bantu banyi, bena Izrayele.[5]”

⁷Ke Erode kubikidisha bena meji abu mu musokoku. Kubakonkaye diba menemene divua mutotu mumueneke.

⁸Pashishe kubatumaye ku musoku wa Betleyeme, ubambila ne: — Nuye, nukebe muana bimpe. Panuikala bamusangane, nummanyishe. Nanku meme kabidi nenye kumukukuila.

⁹Bena meji bamane kumvua meyi a kudi mukalenga Erode, kutungunukabu ne luendu. Diba adi mutotu, uvuabu bamane kumona luseke ludi diba dipatukila, kubamuenekela kabidi. Uvua wenda kumpala kuabu. Mutotu ufika muaba uvua muana, kuimanawu mulu.

¹⁰Bena meji bamone mutotu wenza nanku, kusankabu bikole bipite.

¹¹Kubuelabu mu nzubu, kumonabu muana ne mamuende Mariya. Kutuabu binu panshi bua kukukuila muana. Pashishe kusululabu mabuki abu, kupeshabu muana bintu bivuabu bamutuadile: tshiamu tshia mpawungi, musenga wa kamonya, ne manananshi.

¹²Kadi Mvidi Mukulu kubadimuja mu tshilota bua kabapinganyi kudi Erode kabidi to. Nanku kupinganabu kuabu mu njila mukuabu.

¹³Bena meji bamane kumuka, ke mutumibue wa Maweja-Nangila kumuenekela Yozefe mu tshilota, umuambila ne: — Juka, angata muana ne mamuende, uye kusokomena nabu mu Ejipitu. Ushalemu too ne pangakuambila bua wewe kupingana. Bualu Erode neakebe muana bua kumushipa.

¹⁴Nanku Yozefe kujuka, kuangata muana ne mamuende, kuya nabu butuku mu Ejipitu.

¹⁵Yozefe kushala mu Ejipitu too ne pakafua Erode. Bionsu ebi bivua bienzeka bua kukumbaja bivua Maweja-Nangila muakule mukana mua muambi ne: “Mvua mubikile muananyi wa balume bua kumukaye mu Ejipitu.[6]”

¹⁶Erode kujingulula ne: bena meji mbanshime, kufikaye munda bikole. Kutumaye diyi bua bashipe bana ba balume bonsu ba mu Betleyeme, ne ba mu misoku ivua pabuipi. Bana aba bavua ne bidimu bibidi anyi bishadile, bilondeshile tshikondu tshivua bena meji bamujadikile bua dimueneka dia mutotu.

¹⁷Nanku meyi avua muambi Yirmeya muakule kukumbanawu. Uvua muambe ne:

¹⁸“Bantu kumvua mbila mikole, miyenga ne miadi, ku Rama. Rakele ke udi udila bana bende, kena musue bua bamusambe, bualu bana bende kabatshienaku.[7]”

¹⁹Erode mumane kufua, mutumibue wa Maweja-Nangila kumuenekela Yozefe mu tshilota mu Ejipitu,

²⁰umuambila ne: — Juka, angata muana ne mamuende, upingane nabu mu ditunga dia bena Izrayele. Bualu bantu bavua bakeba kushipa muana mbamane kufua.

²¹Nanku Yozefe kujuka, kuangata muana ne mamuende, kupingana nabu mu ditunga dia bena Izrayele.

²²Kadi Yozefe kumvua lumu ne: Arkelawuse[8] mmushale mukalenga wa ditunga dia Yudeya, mupingane tatuende Erode. Nanku Yozefe kumvua bowa bua kuya kusomba mu Yudeya. Mumane kumvua mu tshilota tshivuaye ne bua kuenza, kuyaye mu buloba bua Ngalileya.

²³Kusombaye mu tshimenga tshiyuabu binyika ne: Nazarete. Bionsu ebi bivua bienzeka bua kukumbaja diyi divua bambi bamba ne: “Nebamuinyike ne: mmuena Nazarete.[9]”