Read Tshiluba Matayi 21 Bible Online

Matayi 21 - Tshiluba bible

Matayi 21

¹Yezu ne balongi bende basemena mu Yerushalayime, kufikabu pabuipi ne musoku wa Betfaje, ku mukuna wa Olive.[137] Yezu kutuma balongi bende babidi,

²kubambila ne: — Nuye mu musoku ewu udi kumpala kuenu. Nenusanganemu diakamue mpunde mukaji musuika pamue ne muanende. Nuyisulule, nuvue nayi kundi.

³Pikalabu bamba bualu, nuandamune ne: “Mfumu[138] udi nayi dijinga.” Nebanyishe musangu umue bua nuenu kuya nayi.

⁴Ebi bivua bienzeka bua kukumbaja miaku ya muambi ya ne:

⁵“Ambilayi bena mu Siyone ne: Ke mukalenga wenu awu udi ufika kunudi. Udi mudipuekeshe bikole, mubande pa nyama wa mpunde mukaji, ne pa muana wa nyama wa mpunde.[139]”

⁶Nanku balongi kuya. Kuenzabu bivua Yezu mubambile.

⁷Kufikabu ne nyama wa mpunde mukaji ne muanende. Kutekabu bilamba biabu pa nyama ayi. Yezu kubandapu.

⁸Bantu bavule kuadija bilamba biabu panshi mu njila. Bakuabu bavua bakosa mabeji a mitshi, baela mu njila.[140]

⁹Bavua benda kumpala kua Yezu, ne bavua bamulonda mu nyima, bonsu kuela mbila ne: “Lumu tuikale kudi Muana wa Davide! Udi uvua mu dina dia Maweja-Nangila, Mvidi Mukulu amuele lupemba! Lumu bikale kudi Mvidi Mukulu mu diulu![141]

¹⁰Pavua Yezu mubuele mu Yerushalayime, bantu bonsu bavua bapampakana, bakonkangana ne: — Ewu nnganyi?

¹¹Bantu bakuabu bavua bandamuna ne: — Yezu, muambi, muena Nazarete wa mu Ngalileya.

¹²Yezu kubuela mu nzubu wa Mvidi Mukulu. Kuipataye mu nzubu amu bantu bonsu bavua basumbisha bintu, ne bavua babisumba. Kutonkolaye mesa a bashintudi ba makuta, ne nkuasa ya basumbishi ba nyunyi ya nkudimba.

¹³Pashishe kubambilaye ne: — Mikanda ya tshijila idi yamba ne: “Nebi-nyike nzubu wanyi ne: ngwa ditendelela.” Kadi nuenu nukadi bamuandamune muaba wa buivi![142]

¹⁴Bampofu ne batebuki kusemena kuvua Yezu mu nzubu wa Mvidi Mukulu. Kujikijaye masama abu.

¹⁵Bamfumu ba batuangaji, ne balongeshi ba mikenji, kufika munda pa kumona malu a dikema avua Yezu wenza, ne bana bavua bela mbila mu nzubu wa Mvidi Mukulu ne: “Lumu tuikale kudi Muana wa Davide!”

¹⁶Kukonkabu Yezu ne: — Udi mumvue mudibu bamba anyi? Yezu kubandamuna ne: — Eyowa. Kadi kanuena babale Mukanda wa tshijila anyi? Badi bafundamu ne: “Uvua muenze bua bana batekete mene, nansha batshidi bamua mabele, bakutumbishe.[143]”

¹⁷Pashishe kubashiyaye, kupatuka mu tshimenga, kuya mu Betanya. Kulalaye muaba awu.

¹⁸Butshia dinda, pavua Yezu upingana mu tshimenga, kumvuaye nzala.

¹⁹Kumonaye mutshi wa mfiku ku muelelu wa njila. Kuyaye pabuipi nawu, kusangana anu mabeji. Ke kutshipaye mutshi awu ne: — Wewe kuakukuama kabidi bimuma kashidi! Diakamue mutshi kuumawu.

²⁰Balongi bamona nanku, kukemabu. Kuebejabu Yezu ne: — Mutshi wa mfiku ewu mmuume anu lukasa nanku bua tshinyi?

²¹Yezu kubandamuna ne: — Ndi nnujadikila bulelela ne: nuenu bikale ne ditaba, kanuyi nuela mpata, kanuakuenza anu tshindi muenzele mutshi wa mfiku ewu nansha. Kadi diba adi nenuambile mukuna ewu ne: “Umuke paudi apu, uye kudiela mu mayi manene,” mukuna neuye.

²²Bu nuenu nuitaba, nenupete bionsu binudi nulomba mu ditendelela.

²³Yezu kubuela mu nzubu wa Mvidi Mukulu. Pavuaye mutuadije kulongesha, bamfumu ba batuangaji, ne bakulu ba bena Yuda, kusemena kudiye, bamukonka ne: — Malu audi wenza aa, udi muenze ne bumfumu kaayi? Udi mukupeshe bumfumu ebu nnganyi?

²⁴Yezu kubandamuna ne: — Meme kabidi ndi musue kunuela lukonku amu lumue. Nuenu bangandamune, nanku nennuambile bumfumu bundi ngenza nabu bionsu ebi.

²⁵Yowanane, udi mumutume bua kutua bantu mu mayi, Mvidi Mukulu anyi mbantu?[144] Kadi kuelanganabu meji munkatshi muabu nkayabu ne: — Tuetu bandamune ne: “mMvidi Mukulu nguvua mumutume,” neatuebeje ne: “Kadi kanuena bitabe Yowanane bua tshinyi?”

²⁶Tuetu bambe ne: “Bantu ke bavua bantumine,” tudi ne bua kutshina bantu. Bitalu bonsu badi anu bitabe ne: Yowanane mmuambi!

²⁷Ke kuandamunabu Yezu ne: — Katuena bamanye to. Nanku Yezu kubandamuna kabidi ne: — Meme panyi tshiena nnuambila bumfumu bundi ngenza nabu bionsu ebi.

²⁸Yezu kubakonka kabidi ne: — Bua lusumuinu elu, nudi nuamba penu bishi? Muntu uvua ne bana ba balume babidi. Kuambilaye wa kumpala ne: “Muananyi, lelu uye kuenza mudimu mu budimi buanyi bua nwinyo.”

²⁹Muana kubenga ne: “Tshiena musue to.” Kadi pashishe kunyingalalaye bua miaku yende ayi, kuyaye mu budimi.

³⁰Ke tatu awu kulomba kabidi muana muibidi, bua aye ku budimi. Muana kuitaba lukasa ne: “Eyowa, mfumu.” Kadi nanshaye kuya to.

³¹Ku bana babidi aba, udi muenze tshivua tatuende musue nnganyi? Kumuandamunabu ne: — Anu muana wa kumpala. Nanku Yezu kubambila ne: — Ndi nnujadikila bulelela ne: balambuishi ba bitadi, ne bakaji bena buendenda, nebanudianjidile mu Bukalenga bua Mvidi Mukulu.

³²Bualu Yowanane-Batiste mmufike kunudi, bua kunuleja njila mululame. Kadi kanuena bamuitabe to. Balambuishi ba bitadi, ne bakaji bena buendenda, bakamuitaba. Kadi nansha nuenu bamone bobu benza nanku, kanuena banyingalala nansha kakese, bua numone mua kumuitaba.

³³— Telejayi lusumuinu lukuabu. Kuvua muntu ne budimi buende. mMukunemu mionji ya nwinyo. Kunyungululaye budimi abu ne lupangu. Kumbulaye kabidi tshiina bua kuasamu tshikaminu tshia maluvu. Kuasaye kazubu katumbuke ka batentekedi.[145] Pashishe kushilaye bena mudimu budimi buende bua nwinyo ebu. Kuyaye ku luendu.

³⁴Tshikondu tshia kupola tumuma tshikumbana, kutumaye bena mudimu bende kudi bavuaye mushile budimu abu, bua kupeta tuende tumuma.

³⁵Kadi bantu abu kukuata bena mudimu bende abu, kukuma umue, kushipa mukuabu, muisatu kumuasabu mabue.

³⁶Ke muena budimi kutuma tshiakabidi bena mudimu bakuabu ba bungi bapite ba kumpala. Kadi bavua ne budimi, kubenzela anu mushindu umue.

³⁷Ku ndekelu kubatuminaye muanende, wela meji ne: “Nebanemeke muananyi.”

³⁸Kadi bavua ne budimi bamona muana, kuambilanganabu ne: “Ke washala muena budimi wawa. Tuyayi, mmushipe! Nanku netushale ne budimi buende kashidi!”

³⁹Kumukuatabu, kuyabu kumushipela ku mpenga kua budimi.

⁴⁰Yezu kubakonka ne: — Pafika muena budimi, neenze tshinyi ne bavuaye mushile budimi aba?

⁴¹Kumuandamunabu ne: — Kakumvuila bantu babi aba luse to. Neabashipe bonsu. Neashile bantu bakuabu budimi buende, bua bamupeshe pa diba tshiende tshitupa tshia bimuma bidibu banowa.

⁴²Ke Yezu kubambila ne: — Kanuena banji kubala mukanda wa Mvidi Mukulu anyi? Mbafundemu ne: “Dibue divua bibaki bimansha, ndishale dibue didi dishindika nzubu. Ke mudi Maweja-Nangila muenze nanku. Bualu bua dikema butuvua bamone![146]

⁴³— Ke Yezu kuamba kabidi ne: ke pandi nnujadikila ne: nebanunyenge Bukalenga bua Mvidi Mukulu, bua kubupesha tshisamba tshidi mua kukuama bimuma bilenga. [

⁴⁴Muntu wadishinda pa dibue edi, neatshibukilepu. Kadi pikala dibue diponena muntu, nedimuvingutule.[147]]

⁴⁵Bamfumu ba batuangaji ne Baparushe kumvua nsumuinu ya Yezu. Kujingululabu ne: udi utuamba tuetu.

⁴⁶Nenku kukebabu muvuabu mua kumukuata. Kadi bavua batshina bantu, bualu bantu bavua bitabe ne: Yezu mmuambi.